တိုဝ်ကျိုဝ်၊ ဨဗြဴ(၁)
ဝန်ဇၞော်ကာဍုၚ်သ္အာၚ်ဂျပါန်ဝွံ သွက်ဂွံသဳကၠဳ ကိစ္စမထိၚ်ဒဝ်လဝ် ကောန်ကလောန် နူကဵုကမ္ပဏဳဂဥုဲ အေသ်တေဝ်လ်ဠာဂှ်ကီု သီုကဵုပြသၞာဗွဲမဂၠိုၚ်ဂၠေၚ်ဂှ်တုဲ စနူတ္ၚဲသ္ၚိသဝ်ဏံတုဲ အာစိုပ်ဂေတ်ဝေၚ် ဍုၚ်ဗေကျေန် ပွိုၚ် (၂) တ္ၚဲရောၚ်ဂှ် ဟီုရ။
သွက်ပရေၚ်သဳကၠဳ မယျဵုလ္ဂူတပ်တးမွဲ သွက်ဂွံဖန်ဗဒှ် ပရေၚ်ဆက်ဆောံ မၞုံကဵုသဘဴပဠေဝ် မညိၚ်ဝတ်တံဂှ် အပ္ဍဲလၟေၚ်တရဴဍုၚ်ကြုက်ဏံ ဆဵုဂဗအာကဵု ဝန်ဇၞော်ကာဍုၚ်သ္အာၚ်ကြုက်ရောၚ်ဂှ်လေဝ် ဂွံတီကေတ်ရ။
လၟေၚ်တရဴဂေတ်ဝေၚ်ဏံဝွံ ကြဴနူလ္ပာ်ဂျပါန်တံ လလောၚ်တြး ဒဒှ်ရကၟာတ်လဒဵု ဗၞိက်ပလံၚ်ပ္တိတ် (၂၃) ဂကူ သီုကဵုပါလုပ်ကပေါတ်ဓာတ်လလဳကၠောံတံတုဲဂှ် မံက်တိတ်ကၠုၚ်လဝ်ရ။
သ္အာၚ်နူဂှ်ပၠန် ပရေၚ်ဆက်ဆောံဂျပါန် ကုကြုက်ဂှ်ဝွံ နူကဵုပရေၚ်ရပ်ဒက် ကောန်ကလောန်ဍုၚ်ဂျပါန် မကၠောန်ဒၟံၚ်ပ္ဍဲကမ္ပဏဳဂဥုဲ အေသ်တေဝ်လ်ဠာ မသက္ကုဟိုတ်ဂှ်မွဲကဆံၚ် ပရေၚ်ဆက်ဆောံၜါဍုၚ် အောန်စှ်ေကၠုၚ်တံ က္တဵုဒှ်လဝ်ရ။
နကဵုအလဵုအသဳဂျပါန် ဒဒှ်ရအာတ်မိက်လဝ် အလဵုအသဳကြုက် သွက်ဂွံကလေၚ်ဗလးကဵု မၞိဟ်မရပ်လဝ်ဂှ် မဳဒဳယျာဂမၠိုၚ် ထ္မံက်ထ္ၜးလဝ်အိုတ်ရ။
သဳကၠဳအာ ကိစ္စပရူပရာ ထၟာဲဓာတ်နျူကလိယျာ ဖူကူယှဳမာ ဒိုၚ်အဳချဳ ပ္တိတ်ဗလးဍာ်တံ၊ ကိစ္စရပ်ထိၚ်လဝ် ကောန်ဍုၚ်ဂျပါန်တံမာန်ဟာ အခိၚ်မဳဒဳယျာတံသၟာန်ဂှ် ဝန်ဇၞော်ကာဍုၚ်သ္အာၚ်ဂျပါန်ဂှ် “နကဵုပိုယ်တံ အပ္ဍဲလၟေၚ်တရဴ မဂေတ်ဝေၚ်အာ ဍုၚ်ကြုက်ဂှ် သီုကဵုကိစ္စတံဏံကီု ကိစ္စပရူပရာဗွဲမဂၠိုၚ်ဂၠေၚ်ဂှ်လေဝ် သဳကၠဳအာရောၚ်” သာ်ဝွံ ကလေၚ်သှ်ကဵုလဝ်ရ။
လၟေၚ်တရဴသ္ကိုပ်ဝန်ဇၞော်ဂျပါန်လၟုဟ်ဂှ်ဝွံ ဒှ်အဆက်လက္ကရဴ ပေါဲသဳကၠဳအကြာက္ဍိုပ်သ္ကိုပ်ၜါဍုၚ် အပ္ဍဲဂိတုနဝ်ဝေမ်ဗာတေံတုဲဂှ်တုဲ ပရေၚ်ဆဵုဂဗဏံဝွံ အပ္ဍဲပွိုၚ်ပိသၞာံဂှ် ဒှ်အလန်ကိုပ်ကၠာအိုတ်ရ။
ပ္ဍဲကဵုအခိၚ်တေံ သ္ကိုပ်ဝန်ဇၞော်ဂျပါန် ဖူမဳအဵုကဳယှဳဒါဂှ် ဒဒှ်ရဒှ်ဓဝိၚ် ကုပရေၚ်ပၞာန်တရဴဍာ်ကြုက် မသၠုၚ်တိုန်တံဂှ် ဟီုဂးလဝ်တုဲ သွက်ဂွံဆက်စၠောံ အကြာၜါဍုၚ်မာန် သွက်ဂွံဖျေံစၟတ် ဂၠံၚ်တရဴကလုတ်တမာန်ဂှ် တုပ်လဝ်စိုတ်ညးသ္ကအ်ရ။
အလဵုအသဳကြုက်ဂှ် လၟေၚ်တရဴဂေတ်ဝေၚ် ဝန်ဇၞော်ကာဍုၚ်သ္အာၚ်ဂျပါန်ဂှ် ဇၞော်ကဵုပၟိက်ရောၚ်ထေၚ်ကေတ်တုဲ သွက်ပရေၚ်ဆက်ဆောံ မခိုဟ်ဂေါဝ်တံဂှ်လေဝ် ဖဵုနွံတုဲ အကြာၜါဍုၚ် သွက်ဂွံဒှ်ပရေၚ်ဆက်ဆောံ မညိၚ်ဝတ်ဂှ် လစွံစိုတ်တုပ်ညးသ္ကအ်တံ နွံလဝ်ဂှ် ညးမၞုံအခေါၚ်ဟီုဂး ဌာနဝန်ဇၞော်ပရေၚ်ဍုၚ်သ္အာၚ်ကြုက် ဟီုဂးလဝ်ရ။
Ref: Reuters