ရေဝ်၊ ဨဗြဴ(၂)
တွဵုရးဍုၚ်မန်၊ ပွိုၚ်ဍုၚ်ရေဝ် အကြာကွာန်ဗေလၟိုၚ်(ဘေးလမိုင်း)ကဵု ကွာန်အေကမ္ဘာ ပ္ဍဲဂၠံၚ်ဇၞော်ရေဝ်-မတ်မလီုဂှ် ဂိတုဨဗြဴ စၟတ်တ္ၚဲ (၁) အခိၚ်နူဂယး ကွဳစက်သ္ၚိမွဲဖ္ဍိုက် ဒးဒုၚ်ပန်လဝ်တုဲ ညးဒေသ(၂)တၠ ဒးလဝ်ဝပ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တ္ၚဲဏအ် အခိၚ်နူဂယးၜိုတ် (၆)နာဍဳကဝက်ဂှ် ကွဳစက်သ္ၚိမွဲဖ္ဍိုက် တိတ်ကၠုက်နူလ္ပာ်လၟိုၚ် တိုန်ကၠုၚ်လ္ပာ်မတ်မလီုဂှ် ဒးဒုၚ်ပန်လဝ်ကဵုလွဟ်သေနာတ် အကြာကွာန်ဗေလၟိုၚ်ကဵု ကွာန်အေကမ္ဘာရ။
ဒၟာနူဒးဒုၚ်ပန်လဝ်ကဵုလွဟ်သေနာတ်တုဲ ဥူမဝ်ဝ အာယုက် (၄၈)သၞာံ ကေုာံ သမ္ဘာညး ဒဝ်ကောန်ဟလာ အာယုက်(၄၅)သၞာံ ဒၟံၚ်ဍုၚ်လၟိုၚ်တအ် ဒးလဝ်လွဟ်မကမ်တုဲ ဂွံလဝ်ဘဲဝပ်ရ။
သမ္ဘာကဵုတၠသ္ၚိ ဒးလဝ်ဝပ်လွဟ်သေနာတ်(၂)တၠဂှ် ဂကောံရီုဗၚ်ဟံၚ်ပြာ်တအ် နူရုၚ်ဂဥုဲလၟိုၚ် ပလံၚ်ဗစိုပ်ဏာလဝ်ရုၚ်ဂဥုဲညးဍုၚ်ကွာန် ဍုၚ်မတ်မလီုရဂှ် ဂွံတီကေတ်ရ။
အတိုၚ်လဟီုညးဍုၚ်ကွာန်တအ်မ္ဂး ပ္ဍဲဒၞာဲကွဳစက်ဒးဒုၚ်ပန်လဝ်ဂှ် ဒှ်ဒၞာဲဒပ်ကံၚ်ဇြဳပၞာန်မၚ်ဒၟံၚ်ကၚ်တုဲ ပန်နၚ်နူကၚ်တုဲ ဒးလဝ်လွဟ်သေနာတ် ဒှ်မာန်ရဂှ် ဟီုသ္ဂးလဝ်ရ။
ဂိတုမာတ်ချ် စၟတ်တ္ၚဲ (၃၁) အခိၚ်ဇိုၚ်သဝ်တ္ၚဲ တုဲကၠုၚ်တေံလေဝ် ပ္ဍဲဂၠံၚ်ဇၞော်ရေဝ်-မတ်မလီုဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ဒှ်လဝ်ပေါဲဗတိုက်ညးသ္ကအ်တုဲ ပရေၚ်ဒးလဝ်ဘဲဝပ်ဟၟဲရဂှ် ဂွံတီကေတ်ရ။
ပွိုၚ်ဍုၚ်ရေဝ်ဂှ် ကြဴနူလလောၚ်တြးကၠုၚ် ပရေၚ်အုပ်ဓုပ်ပၞာန်တုဲဂှ် ဒပ်ကံၚ်ဇြဳပၞာန်ပတေၚ်ဂြတ်ကၠုၚ်လဝ် ပရေၚ်ဂီုကၠီုကီု ကွဳစက် ကွဳလိုန်ဓာတ် အာကၠုၚ်ဒၟံၚ် အခိၚ်တိတ်ဗ္တံဟွံဂွံတအ်ဂှ်လေဝ် ဟိုတ်နူပန်ပှ်ောဒၟံၚ်ကဵုလွဟ် ဟွံလအ်ဟွံလအ်ဂှ်ရ ပရေၚ်ဇီုကပိုက် ချိုတ်ဂျိုၚ် နွံကၠုၚ်ဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ