လဂုၚ် – ဨဗြဴ(၂)
ရးဒေသလဂုၚ်၊ ပ္ဍဲသၞေဟ်ကၚ်စၟဳစၟတ် သၞေဟ်ကွဳစက်အံၚ်မၚ်္ဂလာဓရိပ်တရဴဇမ္ၚောဲ စၟတ်(၂)ဂှ် တ္ၚဲဏံ ဂိတုဨဗြဴ စၟတ်တ္ၚဲ (၁) အခိၚ်နူဂယး ဂဗုတ်ပါ်ခတိုဟ် က္တဵုဒှ်လဝ်တုဲ ဗၠာဲသၟိၚ်(၂)တၠ သီုသ္ဇိုၚ်ဝန်ဍိုပ်ဍဴသာယျာမွဲတၠ ဇီုကပိုက်ဒးလဝ်ဝပ်ရဂှ် ညးစုက်လုက်ကဵု ဗၠာဲသၟိၚ်ရးလဂုၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကောန်ဒပ်ဗၠာဲသၟိၚ် သၟဝ်တဲကံၚ်ဇြဳပၞာန်ကီု သီုကဵုသ္ဇိုၚ်ဝန်ဍိုပ်ဍဴသာယျာတအ် ဃောယာဉ်ကွဳစက်သောၚ်ဒၟံၚ် ဒးဒုၚ်ဗတိုက်လဝ်ရဂှ် ညးဟီုသ္ဂးလဝ်ရ။
ပြဟ်ဟ်လၟုဟ်ဏံ ညးဇီုကပိုက်ဒးလဝ်ဝပ်တအ် ပလံၚ်ဗစိုပ်ဏာလဝ် ပ္ဍဲရုၚ်ဂဥုဲတုဲ သွက်ဂွံဟီုသွဟ်ကဵု အကာဲအရာညးတအ် ကေုာံကဆံၚ်ဌာနန္တရညးတအ်ဂှ် တးပါဲလဝ်ရ။
ပရေၚ်ဖံက်ခတိုဟ်ဏံဂှ် God’s Hand Force(GHF) မဒှ်ဂကောံ ဒပ်ဒမၠုက်ဍုၚ်ဇၞော်လဂုၚ် Yangon UG Association (YUA) ဂှ် ဗတိုက်ဖံက်ခတိုဟ်လဝ် နဒဒှ်ပရေၚ်ချဳဒရာၚ်ပၞာန်ဂတှ်လမျီုရဂှ် လလောၚ်တြးလဝ်ရ။
မ္ၚးနူဂှ်ပၠန် သွက်ညးဍုၚ်ကွာန်တအ် ဂွံပါဲဓလေတ်အာကၠုၚ် အထံက်တိုၚ်ဆေၚ်ဆက်ကဵု ကံၚ်ဇြဳပၞာန်၊ ဌာနကမၠောန်၊ ကၚ်ကံၚ်ဇြဳပၞာန်ဒ္တန်တအ်ဂှ်လေဝ် အာတ်မိက်လဝ် ညးဍုၚ်ကွာန်တအ်ရ။
နကဵုညးဍုၚ်ကွာန်ဂမၠိုၚ် ဟွံပါလုပ် ပ္ဍဲပေါဲအတးသၚ်္ကြာန် ကံၚ်ဇြဳပၞာန်ကၠောန်ဗဒှ်ဂှ်တုဲ သွက်ဂွံထံက်ရံၚ်ကဵု မုက်မတ်ညးဍုၚ်တအ်ဂှ်လေဝ် ဗတိုက်ဖ္အောဝ်လဝ်ရ။
ပရိုၚ်-သြၚ်လောန်တိုၚ်(မ်)
ဗီုရုၚ် – CJ