“မေန်အံၚ်လှာၚ်ဂှ် လ္ပဗက်သ္ပဒၟံၚ်။ ညံၚ်ကဵုဂွံစှ်ေသၞောတ်လေဝ် ဗတိုက်တှ်ေ ဗတိုက်ကဵုချိုတ်ပၠိုတ်။ သ္ၚိဌာန်ညးဍုၚ်ကွာန်ဂှ် လ္ပဗက်စံၚ်ဒၟံၚ် ကောန်ဗြဴညးဍုၚ်ကွာန်တအ်ဂှ် လ္ပဗက်ပလီုဒၟံၚ်။ ကၠောန်သ္ပကၠုၚ်ဗီုဏံတှ်ေ လ္ပာ်ပိုဲ သွက်ဂွံသၠးကဵုအခေါၚ် ဟၟဲပုဟ်။ ဟွံပေၚ်ဒကေဝ်ညံၚ်ညံၚ် ပေၚ်ဒကေဝ်ညံၚ်ၚ် က္ဍဟ်မေက်ဒၟံၚ်မွဲကရေက်တုဲ လ္ပဗက်ကၠောန် လ္ပဗက်သ္ပဒၟံၚ်”

ဒပ် Myingyan Black Tiger မဒှ်ဒပ်ပၠန်ဂတး ဖျေံသ္ဇိုၚ်ရးဒေသမဂွေ၊ ပွိုၚ်ဍုၚ်ယျေသဂျိုဝ်ဂှ် သွက်တၠအဝဵုပၞာန် ဂွံပြဟ်ဒတုံစှ်ေ ဒှ်ဂကောံစဵုဒၞာဒေသ ရပ်လဝ်လွဟ်ၜိုတ်ဒှ်ကဵုဒှ်တုဲ ချဳဒရာၚ်ကၠုၚ်ဒၟံၚ် ပ္ဍဲရးဒေသမဂွေ ကေုာံရးဒေသသေတ်ဂါၚ်ရ။ ဒပ် Myingyan Black Tiger ဂှ် ပ္ဍဲဂိတုမာတ်ချ် စၟတ်တ္ၚဲ (၁၈) တုဲကၠုၚ်တေံဂှ်လေဝ် ဒှ်လဝ်ပေါဲဗတိုက်ကဵု ကရောၚ်ပၞာန်လကိုဟ် ကံၚ်ဇြဳပၞာန် ဂေတ်ဒၟံၚ်ရးတုဲ ကုတ်ဗပိုတ်က္ဍိုပ် ပြိုက်ဂစိုတ်ဒၟံၚ် ကောန်ဒပ်စဵုဒၞာဒေသတအ်ဂှ်ရ။ ဟိုတ်ဂှ်ရ စပ်ကဵုပရေၚ်ချဳဒရာၚ်ဒပ် လၟုဟ်ကီု၊ အကာဲအရာပေါဲဗတိုက်ဆေၚ်မုက် က္တဵုဒှ်လဝ်ကဵု ကရောၚ်ပၞာန်လကိုဟ်ကီု၊ စပ်ကဵုဗျူဟာဗတိုက် ကရောၚ်ပၞာန်လကိုဟ်တအ်ကီုတုဲ ဆက်စၠောံသၟာန်သွဟ်လဝ်ကဵု က္ဍိုပ်သ္ကိုပ် ဒပ် Myingyan Black Tiger ကိုဝ်မိုက်ခေဝ်ရ။

-ကိုပ်ကၠာအိုတ်ဏံ ဆက်မိက်ကဵုပရောဒပ် Myingyan Black Tiger ညိ။ 

ပိုဲဂှ် ဒှ်ဂကောံ Local ရ။ တံဒပ် MOD လေဝ်ဟွံသေၚ်ဏီပုဟ်။ ချဳဒရာၚ်ဒၟံၚ်နဒဒှ် Local ကောန်အညာပေၚ်ၚ်ဂှ်ရ ချဳဒရာၚ်ဒၟံၚ် ပ္ဍဲဒေသအညာရ။ ချဳဒရာၚ်ဒၟံၚ်ကဵုလွဟ်ကၠောန် ၜိုတ်နွံကဵုနွံဂှ်ရ။ ဗတိုက်သရိုဟ်ဒၟံၚ် ကံၚ်ဇြဳပၞာန်ကဵုနဲကဲခိုဟ်အိုတ်ရ။ ပိုဲဂှ် ညးဂွံဒးဟီု မၞိဟ်သ္ပကဵု ညံၚ်ကံၚ်ဇြဳပၞာန် ဂွံဖေက်လကိုတ်အိုတ်ဂှ် ပ္တိတ်ဒၟံၚ်ဇြဟတ်ရ။

– ပ္ဍဲဒေသဒပ် Myingyan Black Tiger ဖျေံသ္ဇိုၚ်တအ်ဂှ် အကာဲအရာပရေၚ်ပၞာန် နွံဗီုပြၚ်လဵုရော။

နကဵုပရေၚ်ပၞာန်တှ်ေ ရးဖျေံသ္ဇိုၚ်ဂှ် ရးအၚ်ဝပါဏောၚ်၊ ရးမဂွေကဵု ရးသေတ်ဂါၚ်ပါဏောၚ်။ လၟုဟ်ပြဟ်ဟ်ဏံတှ်ေ ပ္တဝ်လဝ်ပရေၚ်ပၞာန်ကဵု ဗတိုက်ဒၟံၚ်ဂၠိုၚ်အိုတ်ဂှ် ဒှ်ရးမဂွေရ။ ရးမဂွေဂှ် ဂွံတှ်ေ ဗီုဂွံပ္ဍဲသေတ်ဂါၚ်လေဝ် ချဳဒရာၚ်ဒၟံၚ်ရ။ လၟုဟ်တှ်ေ ချဳဒရာၚ်ဒၟံၚ် ပ္ဍဲရးၜါရးဏံရ။ ရးအၚ်ဝဂှ်တှ်ေ မျေန်ချာန်၊ တောၚ်တာ၊ နွာထိုဝ်ဂျဳ သွက်ဂွံချဳဒရာၚ် ပ္ဍဲဒၞာဲတအ်ဏအ်ဂှ် ဟိုတ်နူအကာဲအရာအခက်ခုဲ မံၚ်ကလေၚ်(မောၚ်ပြန်)ကီု၊ ဟိုတ်နူအကာဲအရာဂၠံၚ်ဍာန်ကီု သွက်ဂွံချဳဒရာၚ်ပၞာန် အခေါၚ်ဟွံခိုဟ်ဏီဂှ်ရ ပိုဲဒးညိၚ်ဒၟံၚ် မွဲအံၚ်ရ။ ဆ္ဂးဂှ် အခေါၚ်ခိုဟ်ကၠုၚ်တှ်ေ ဗီုခိုဟ်ဂှ် ချဳဒရာၚ်လဝ်နွံရ။ ရးသေတ်ဂါၚ်တှ်ေ ချောၚ်ဥူပါဏောၚ်။ မြံၚ်မြကီု ပ္ဍဲကဵုၜါဒၞာဲဏံဂှ် ဖျေံလဝ်သ္ဇိုၚ်တုဲ ကၠောန်ဒၟံၚ် ပရေၚ်ချဳဒရာၚ်ပၞာန် နွံဒၟံၚ်ညိညရ။ အဓိကဂှ်တှ်ေ ပ္ဍဲရးမဂွေဂှ် ဒှ်ကၠောန်လဝ်ဂၠိုၚ်ရ။

-စပ်ကဵုပရေၚ်ဒှ်လဝ်ပေါဲဗတိုက်ကဵု ကရောၚ်ပၞာန်လကိုဟ် ၝောံဒပ် ၉၉ ကံၚ်ဇြဳပၞာန်တုဲ ဟီုထ္ၜးကဵုညိ။

ကဵုကရောၚ်ပၞာန်လကိုဟ် ကံၚ်ဇြဳ ၝောံဒပ် ၉၉ ဂှ် အခိၚ်လဵုဒှ်လဝ်ပေါဲဗတိုက်ဆေၚ်မုက်ရောတှ်ေ စဵုကဵု စၟတ်တ္ၚဲ ၁၆၊ ၁၇၊ ၁၈ ပိုဲဒှ်လဝ် ပေါဲဗတိုက်ရ။ နကဵု Myingyan Black Tiger ပိုဲဂှ် ဗတိုက်လဝ်ပေါဲဗတိုက် တၟာဂလိုၚ်ရ။ ကေၚ်ဗတိုက်လဝ်ရ။ ဗတိုက်လေဝ် ဗတိုက်လဝ်ရ။ ဆ္ဂးဂှ် ကဵုၝောံဒပ် ၉၉ နူကဵုနဲကဲဗျူဟာကံၚ်ဇြဳပၞာန်ဂှ်တှ်ေ ခိုဟ်ကွေံကွေံဏောၚ် ဟီုစမာန်ရ။ မုဒဒှ်ရောတှ်ေ ဗျူဟာၝတအ်ဏံ သုၚ်စောဲဏာဂှ်တှ်ေ ဗျူဟာတြိဂံ ကဵုဗျူဟာဗီုပြၚ်ဝဂှ် ပံၚ်တောဲသုၚ်စောဲကၠုၚ်လဝ် နွံရ။ လကြဴဏံ ဗီုပြၚ်ဝသက်က် သုၚ်စောဲကၠုၚ်လေဝ် နွံရ။

သုၚ်စောဲလဝ် ပရေၚ်ချဳဒရာပၞာန်ဇွိုန်လပှ် ထ္ပက်ဒၟံၚ်ပၞာန် ပ္ဍဲဒေသကောန်ဍုၚ်အရၚ်တအ်ဂှ် ဂၠိုၚ်ရ။ ၝတအ်ဏံထ္ပက်ကၠုၚ်ကဵု ပိဂကူဏံဂှ် အရိုဟ်ဟ်တွဵု ပရေၚ်ချဳဒရာၚ်ပၞာန်ပကတိတှ်ေ အကြာပိနာဍဳ၊ မသုန်နာဍဳ အကြာဏံရ ဒပ်ကံၚ်ဇြဳပၞာန် ထ္ပက်ကၠုၚ်ပၞာန်ဂၠိုၚ်ရ။ ပိုဲဗတိုက်ဒၟံၚ်လေဝ် အခိၚ်တအ်ဏံရ ဗတိုက်စဂၠိုၚ်ရ။ ဆ္ဂးဂှ် ၝတအ်ဏံ မုဒှ်ရောတှ်ေ အခိၚ်ဒေါဝ်တ္ၚဲလေဝ် ထ္ပက်ပၞာန်ဂှ်ရ။ ဟွံထေၚ်တှ်ေ ဗီုဟွံထေၚ်။ အကာဲအရာ ပိုဲဟွံထေၚ်ခယျလဝ်မွဲသာ်ဂှ် ၝတအ်ဏံ ထ္ပက်ကၠုၚ်ပၞာန်ဂှ်ရ ပိုဲဒးဆေၚ်မုက်ဗတိုက်လဝ်ဂှ် ဒှ်ကၠုၚ်ခက်ခုဲညိညရ။ မုဗျူဟာ ဍေံတအ်သုၚ်စောဲဒၟံၚ်ရောဟီုဂှ် ပိုဲတီဒၟံၚ်ရ။ ဗျူဟာဍေံတအ်ဂှ် ဗီုလဵုပ ပိုဲဂွံဗတိုက်ပ္တိတ်ထောံရော။ သုၚ်စောဲဗျူဟာဗီုလဵုတုဲ ပိုဲဂွံဗတိုက်ပ္တိတ်ထောံ ဍေံတအ်မာန်ရောဟီုဂှ် ပိုဲတီဒၟံၚ်ရ။ ဆ္ဂးဂှ် သွာၚ်စပ်ကဵုလွဟ်တှ်ေ စက်ဍောတ်၊ စက်ဇၞော်၊ ပၠံၚ်ဂၠေံ၊ စနူကဵု ၆၀ ကောန်မာန်ဒိုဝ်ဒှ်တမ် အာပဳဂျဳတအ်လေဝ် ၜိုတ် (၁၀)ဒကိုအ် ရုမ်ဒၟံၚ်ရ။ ပ္ဍဲအကာဲအရာဏံ လွဟ်ကၠောန်ကဵုပိုဲဂှ် ဗီုလဵုသ္ပလေဝ် ဒုၚ်ဒဝ်ဟွံမာန်ပုဟ်။ ပ္ဍဲပိုဲအခက်ခုဲ နွံတၟာဂလိုၚ်ရ။ ဆ္ဂးဂှ် ကွာန်ပိုဲဂှ် စံၚ်ထောံဟွံဂွံပုဟ်။ ဍေံတအ်စံၚ်ကွာန်ဟီုဂှ် ၝတအ်ဏံ ပ္ၚုဟ်က္တဵုဒၟံၚ် သတ္တိကောန်အညာတအ်ရဏောၚ် ပိုဲပတှ်ေကေတ်လဝ်ရ။ ၝတအ်ဏံဂှ် ယဝ်ဗတိုက်ကဵုက္ဍဟ်နွံနွံဏောၚ်တှ်ေ ဗတိုက်ဗီုပကတိ။ ရပ်ဂွံ PDF ပိုဲ၊ ရပ်ဂွံအဲဏောၚ်တှ်ေ အာဂစိုတ်ထောံ အဲဒုၚ်တဲမာန်ဒၟံၚ်ရ။ ဆ္ဂးဂှ် ဗီုကဵုပလီုပလာ်ကောန်ဗြဴညးဍုၚ်ကွာန် ဒုဟ်ဒဏ်ဟၟဲ စံၚ်ပလီုသ္ၚိဌာန်ညးဍုၚ်ကွာန်တအ်ဟီုဂှ် နကဵုပိုဲနဲလဵုလေဝ် ဒုၚ်တဲဟွံမာန်လးလးရ။

သွက်ဂွံသၠးကဵုအခေါၚ်မာန် ညိဓဝ်ဟၟဲပုဟ်။ လၟုဟ်စံၚ်တှ်ေ ဗတိုက်ထောံလၟုဟ်ညိ။ အရာဏံ သောၚ်ကၠးဒၟံၚ်ရ ပိုဲတအ်ဂှ်။ သီကေတ်ဗ္ဒပ်ပိုဲမာန်တှ်ေ စံၚ်ထောံ ဒုၚ်ဒၟံၚ်တဲရ။ ဣဏံဂှ် ဗ္ဒပ် PDF၊ ပိုဲလေဝ် အခိၚ်သီဂွံ ဗ္ဒပ်ဍေံတအ်မာန်တှ်ေ စံၚ်ထောံရ။ ပလီုပလာ်ကောန်ဗြဴညးဍုၚ်ကွာန်၊ စံၚ်ပလီုသ္ၚိဌာန်ညးဍုၚ်ကွာန်။ ဗီုဏံဂှ် ပိုဲဒုၚ်တဲဟွံမာန်ပုဟ်။ စဵုကဵု ၁၆၊ ၁၇ ပိုဲဒုၚ်ဒဝ်မာန်လဝ်ရ။ ပ္ဍဲစၟတ်တ္ၚဲ ၁၈ ဂှ်တှ်ေ ဒၟာနူဍေံတအ်စံၚ်ပလီုသ္ၚိဌာန်ညးဍုၚ်ကွာန်တအ်ဂှ်ရ လ္ပာ်ပိုဲ အာဗတိုက်လဝ်ရ။ လ္ပာ်ဍေံတအ် သီုကဵုမၞိဟ်ကဆံၚ်နွံမွဲတၠ ထပှ်တၠ ချိုတ်လဝ်တုဲ ဇွဍေံတအ်ဂှ် ဍေံတအ်က္လေၚ်တိုပ်လဝ်ရ။ ကောန်မာန်ဒိုဝ်လကိုဟ်ဂှ် ဗတိုက်ခိုဟ်ဒၟံၚ်။ ဆ္ဂး တော်လဝ် ကောန်အညာတအ်ယအ်ယအ်သာသာဏောၚ်တှ်ေ ကောန်အညာဂှ် ဂၠဴဟွံသေၚ်ပုဟ် ဂုဏ်နူဒှ်ဒၟံၚ်ကၠဂှ်ရ လ္ပကၠုၚ်တံၚ်မံၚ်ဗ္တညိ ဒှ်အာဗီုပြၚ် ကၠုၚ်စမ်ဝေၚ်ဆီပိုဲရ။

-ကရောၚ်ပၞာန်လကိုဟ်ဂှ် ဇြဟတ်ဒပ် ၜိုတ်ဂလိုၚ်လဵု ပါဒၟံၚ်ရော။

ၜိုတ်ပိုဲဂွံတီလဝ်ဂှ်တှ်ေ ၝတအ်ဏံ စှ်ေကၠုၚ်နူလ္ပာ်အယျာတဝ်ရ။ နူကဵုသေတ်ဂါၚ် စဵုကဵုမဂွေ ဍေံတအ်စိုပ်ကၠုၚ်လဝ်ရ။ ၜိုတ်ချိၚ်ခယျကေတ်ဂွံတှ်ေ ဇြဟတ်ဍေံတအ် ၜါကၠံပြၚ်ဏောၚ်။ မၞိဟ်အာယုက်ဇၞော်ဇၞော်တှ်ေ ပါဒၟံၚ်ၜါပိတၠဏောၚ်။ ဗိုက်လတက်လဝ် ကယျိုၚ်ကောန်အရာပ်။ မၞိဟ်ဗိုက်လ္တက်လဝ်ကယျိုၚ်ပၞာန် ပ္ဍဲဍေံတအ်ဂှ်တှ်ေ နွံညိညဓဝ်ရ။

-ပ္ဍဲပေါဲဗတိုက်ကဵုကရောၚ်ပၞာန်လကိုတ်ဂှ် ပရေၚ်ဆောံလေၚ်ကီု ၜိုတ်ဂလိုၚ်လဵု ဆဵုဂဗလဝ် အခက်ခုဲရော။

ပရေၚ်ဆောံလေၚ်လဝ်ဂှ်တှ်ေ လ္ပာ်ပိုဲ ၜိုတ်လဵုဟွံဂၠိုၚ်ပုဟ်။ နူလ္ပာ်ပိုဲ သ္ဂံၚ်မွဲတၠဂှ်တှ်ေ ဒးလဝ်ဘဲဝပ်ရ။ လ္ပာ်ဍေံတအ်ချိုတ်လဝ် ၇ တၠရ။ ပိုဲဂှ်ဂွံလဝ်ဝပ် ၜါတၠ။ မွဲတၠဂှ်တှ်ေ အကာဲအရာပရေံဒၟံၚ်ကွေံကွေံရ။ လၟုဟ်ဏံ သက်သာကၠုၚ်ယျ။ ကရောၚ်ပၞာန်လကိုဟ် ၝောံဒပ် ၉၉ဂှ် အခိၚ်ပိုဲဒးဗတိုက်လဝ်ဂှ်တှ်ေ ဗ္ဒပ်ပရေၚ်ချဳဒရာၚ်ပၞာန် စၟတ်(၁) ထ္ၜးဒၟံၚ်အစောန် ပရေၚ်ချဳဒရာၚ်ပၞာန် ပါ်စွံလဝ်ဂှ် ဒးဒုၚ်သီဏာလဝ်ရ။ ပကတိတှ်ေ ယဝ်ရထ္ပက်ကၠုၚ်ပၞာန်တှ်ေ နူကဵုဌာန်ဂအုပ်ပၞာန်ပိုဲ နကဵုဇြဟတ်လွဟ်လက်နက် ကပေါတ်ပါ်ခတိုဟ် ဗွဲမဂၠိုၚ် အာဗတိုက်ဒၟံၚ်ရ။ လၟုဟ်ဂှ်တှ်ေ ဗတိုက်ဟွံပုဟ်။ မုဒှ်ရောတှ်ေ မွဲလ္ပာ်ဂှ်လေဝ် ဒးထိၚ်လဝ် ကရောၚ်ပၞာန်လကိုဟ်။ မွဲလ္ပာ်ပၠန်ဂှ်လေဝ် ဒးဒုၚ်ဗတိုက်ဒၟံၚ်ဟီုတှ်ေ ဗ္ဒပ်ပရေၚ်ချဳဒရာပၞာန် စၟတ်(၁) ပိုဲ ကပေါတ်ပါ်ခတိုဟ် ဒးသုၚ်ဒၟံၚ်ဂၠိုၚ်အိုတ် အာဗဳဂျဳကၠောန်ကေတ်ကီု၊ ဗ္ဂၚ်ပၞးကၠောန်ကေတ်ကီု၊ မကမ်တအ်ကီု ဒးဆောံလေၚ်အာလဝ် တၟာဟလိုၚ်ရ။

-ကရောၚ်ပၞာန်လကိုဟ်ဂှ် ထ္ပက်ကၠုၚ်ကရောၚ်ပၞာန် ကဵုဗျူဟာဗီုလဵုရော။ ကဵုကရောၚ်ပၞာန်တၞဟ် မုတၟေၚ်နွံရော။

ဗီုအဲဟီုလဝ် နူကၠာဏံဂှ်ရ ပ္ဍဲကရောၚ်ပၞာန်လကိုဟ်ဂှ် တၚ်ဂွံဇြဟတ် နွံဒၟံၚ်မွဲရ။ ကရောၚ်ပၞာန်တၞဟ်တအ်ဂှ် ယဝ်ရသီကေတ်ဏောၚ်တှ်ေ ပန်လုပ်အာ၊ ကၠာနူဍေံတအ်ဟွံဗတိုက်ဏီ နူကဵုၜိုတ် (၁၀၀)မဳတာဂှ် ပန်လုပ်ကၠုၚ်တုဲ အခိၚ်ဗတိုက်ဂှ် အခိၚ်သွက်ဂွံပလေဝ်ပလေတ် နွံရ။ အခိၚ်ဗတိုက်ဂှ် အခိၚ်ဂွံပလေဝ်ပလေတ် နွံရ။ အခိၚ်ဂွံက္လေၚ်ဆုတ် နွံရ။ ကရောၚ်ပၞာန်လကိုဟ်ဂှ်တှ်ေ ဟွံပန်လုပ်ပုဟ်။ ထ္ၜးလဝ်ဗီုပြၚ်တြိဂံတုဲ တိုန်ကၠုၚ်ရ။ တုဲမှ ပလီုဗီုပြၚ်တြိဂံတုဲ ခၞံလုပ်ကၠုၚ် ဗီုပြၚ်ဝတုဲ ဗိုၚ်ဂေတ်လဝ် ဗ္ဒပ်တုဲ ပန်ဂေတ်ကၠောံရ။ အခိၚ်ဂှ် သွက် PDF ပိုဲ ဂွံရုဲစှ်ဂှ် နွံၜါဂၠံၚ်ဓဝ်ရ။ ပါဲဟွံဂွံရပုဟ်။ ဒးဗတိုက်ပေၚ်ၚ်ဏောၚ်။ ဒးကလေၚ်ဗတိုက်ဍေံတအ်ဏောၚ်။ ကလေၚ်ဗတိုက်ဟာ။ ဗတိုက်ဆုတ်တိတ်ဟာရ။ အခိၚ်ဒးဗတိုက်ဂှ် ကရောၚ်ပၞာန်လကိုဟ်ဂှ်တှ်ေ နကဵုပိုဲ ဒှ်ဒၟံၚ်အကာဲအရာပရေံပရေံရ။

-လၟုဟ်ပြဟ်ဟ်ဏံ စပ်ကဵုအကာဲအရာ ပရေၚ်ပၞာန်ဒေသအညာတုဲ ဟီုထ္ၜးကဵုညိ။

ပရေၚ်တၞဟ်ခြာ ကံၚ်ဇြဳပၞာန်ဒးဗတိုက်ကဵုဒေသအညာဂှ်တှ်ေ တၞဟ်ခြာကွေံကွေံရ။ ပ္ဍဲဒေသအညာဂှ် လွဟ်ဇေတ်တ် အောန်ဒၟံၚ်ရ။ ဂကောံပိုဲလေဝ် ဇြဟတ်မၞိဟ်အောန်လောန်ရ။ လွဟ်လက်နက်ဇေတ်တ် ဟၟဲပုဟ်။ ဍေံတအ်ထေၚ်သောဲကဵု ဒေသအညာရ။ ပ္ဍဲလ္ပာ်ကောန်ဍုၚ်အရၚ် ရပ်လဝ်လွဟ်မံၚ်ကလေၚ်တအ်ဂှ် အခိၚ်ဍေံတအ်ဗတိုက်ဂှ် တၚ်ဍိုန်လျ ပ္ဍဲဍေံတအ်နွံဂၠိုၚ်ဒၟံၚ်ရ။ လ္ပာ်ဍေံတအ် ပရေၚ်ဒးပြဟ်လလုဲ နွံဂၠိုၚ်ဒၟံၚ်ရ။ လ္ပာ် PDF ဂှ်တှ်ေ ဇြဟတ်တဴဒၟံၚ်ရ။

ပ္ဍဲဒေသအညာဂှ်တှ်ေ လွဟ်ဇေတ်တ်ဟၟဲပုဟ်။ လွဟ်ကၠောန် ပိုဲကၠောန်ပ္တိတ်လဝ်ကဵုတဲတအ်ရနွံ။ တအ်ဏံဂှ် ကဵုဍေံတအ်ချိုတ်မာန်ဂှ်ရ။ ကၠာတေံတှ်ေ ပၞော်တအ်၊ ပလၚ်ပၟတ်တအ်လေဝ် ပန်ပှ်ောလဝ်ဏီရ။ လၟုဟ် ပ္ဍဲတဲဇကုလေဝ် လွဟ်ညံၚ်ဍေံၚ်တအ်ဂွံချိုတ် နွံကၠုၚ်ယျ။ သွက်ဂွံဒးသ္ပဂရုကဵုဍေံတအ် ညိဓဝ်ဟၟဲပုဟ်။

ဍေံတအ်ဟီုဒၟံၚ်၊ ၝလဵုဂံၚ်ချိုတ်တှ်ေ တိုန်ကၠုၚ်၊ ပိုဲဂံၚ်ချိုတ်ဂှ်ရ တိတ်ကၠုၚ်ရ။ အခိၚ်လၟုဟ်တှ်ေ ၝဂှ်မုမု အဲဂှ်မုမု အခိၚ်ဒးသၟာန်ရဏောၚ်။ ဍေံတအ်ဂံၚ်ချိုတ်တှ်ေ တိုန်ကၠုၚ်။ ပိုဲမၚ်ဒၟံၚ် ပ္ဍဲအညာဏောၚ်။ ပိုဲစဵုဒၞာ တိဍာ်အညာဏောၚ်။ ကောန်အညာဇေတ်တ် နွံဒၟံၚ်ပ္ဍဲအညာ တၟာဂလိုၚ်ရ။ အညာဂှ်တှ်ေ ဆလအ်လ္ပထေၚ်သောဲထောံညိ။ နကဵုမေန်အံၚ်လှာၚ်ဂှ်တှ်ေ ပေါဲဗတိုက် လအ်ဂွံၜိုတ် ၅ မိနေတ်ညိကီုဂှ် ဍေံတအ်ကော်က္ၜၚ်ကျာယျ။ လ္ၚဵုဂှ်တှ်ေ မကမ်အိုတ်တုဲ PDF ပှ်ောဒၟံၚ်ကဵုပၞောဟ်လေဝ် ဍေံတအ်ကော်က္ၜၚ်ဏောၚ်ဟီုတှ်ေ ဍာ်ဒကေဝ်ဗတိုက်ဍေံတအ် ၜိုတ်ကဆံၚ်လဵုလီုလာ်ဒၟံၚ်ရော ဍာ်ဒကေဝ်ချဳဒရာၚ်ပၞာန်ဍေံတအ် ၜိုတ်ကဆံၚ်ဟုတ်ယုတ်ဒၟံၚ်ရောဂှ် တီဒၟံၚ် သီုညးဖအိုတ်ရ။

-အလန်လကြဴအိုတ်ဏံ မုမိက်ဂွံထပ်ဟီုဗပေၚ် နွံဏီရော။

မေန်အံၚ်လှာၚ်ဂှ် လ္ပဗက်သ္ပဒၟံၚ်။ ညံၚ်ဂွံစှ်ေသၞောတ်လေဝ် ဗတိုက်တှ်ေ ဗတိုက်ကဵုချိုတ်ပၠိုတ်။ သ္ၚိညးဍုၚ်ကွာန်ဂှ် လ္ပဗက်စံၚ်ဒၟံၚ် ကောန်ဗြဴညးဍုၚ်ကွာန်ဂှ် လ္ပဗက်ပလီုဒၟံၚ်။ ကၠောန်သ္ပကၠုၚ်ဗီုဏံတှ်ေ လ္ပာ်ပိုဲ သွက်ဂွံသၠးကဵုအခေါၚ် ဟၟဲပုဟ်။ ဟွံပေၚ်ဒကေဝ်ညံၚ်ညံၚ် ပေၚ်ဒကေဝ်ညံၚ်ၚ် က္ဍဟ်မေက်ဒၟံၚ်မွဲကရေက်တုဲ လ္ပဗက်ကၠောန်သ္ပဒၟံၚ်။ ဗတိုက်ကဵုသၞောတ်နွံနွံလေဝ် ဗတိုက်။ အလဵုလေဝ် ဟွံဂြိပ်ပုဟ်။ ၝတအ် ကၠုၚ်ဏောၚ်တှ်ေ မၞိဟ်ပိုဲဂ္ဇအ်မၚ်ဒၟံၚ်တုဲ ဗတိုက်ဏောၚ်။ ၝတအ်ဟွံကၠုၚ်တှ်ေ ပိုဲကၠုၚ်ဗတိုက်ဏောၚ်။ သွဟ်ဍေံဂှ်သောၚ်ဒၟံၚ်ရ။ ဟွံမာန်ပုဟ်ထေၚ်တှ်ေ ဒုၚ်ကျထောံပရေၚ်ပၠန်ဂတးညိ။ ကျတုဲတှ်ေ လ္ပတ္ၚံက်စၞာဲ လ္ပဓဇန် လ္ပယုတ်မာညိ ပိုဲတအ်ဂှ် မိက်ဂွံဟီုဏာ ဆၜိုတ်ဏံရ။