တိုၚ်ပေ – ဨဗြဴ(၂)
က္ၜၚ်ကျာကြုက်(၁၀)ဖ္ဍိုက် တတ်ကၠောံလုပ်စိုပ်လဝ် ဗွဲပကတိမ္ဂး စေဝ်လ္ဒောဝ်ကလိုက်က္ၜဳထိုၚ်ဝါန် မဒှ်အပိုၚ်ခြာၜါလ္ပာ်ရဂှ် ဌာနဝန်ဇၞော်ပရေၚ်စဵုဒၞာထိုၚ်ဝါန် ဟီုသ္ဂးလဝ်ရ။
ဂိတုဨဗြဴ စၟတ်တ္ၚဲ(၁) အခိၚ်နူဂယး (၆)နာဍဳဂှ် က္ၜၚ်ကျာကြုက်ဒ္စိတ်ဖ္ဍိုက် ကေုာံဒရုမ်မွဲဖ္ဍိုက်ဂှ် တတ်ကၠောံလဝ် ပယျဵုဒၞက်စေဝ်လ္ဒောဝ်ဂှ်တုဲ လုပ်စိုပ်ကၠုၚ်ရဂှ် ဓမံက်ထ္ၜးလဝ် ပ္ဍဲလိက်ဒုၚ်စဳရေၚ် ပရေၚ်ချဳဒရာၚ်ပၞာန် လၟေၚ်တ္ၚဲဂှ်ရ။
အခိၚ်ထိုၚ်ဝါန် မၚ်ရံၚ်ကျောဝ်ဒၟံၚ် သၞောတ်ကမ်လှောဝ်ဂှ်ဟေၚ် သွက်ဂွံကဵုသတိ ကုက္ၜၚ်ကျာကြုက်ဂှ် ဗလးဏာလဝ်က္ၜၚ်ကျာဂမၠိုၚ်တုဲ သွက်ပရေၚ်ပလန်တဲဂှ် ဌာနဝန်ဇၞော် သုၚ်စောဲလဝ်မအရေဝ်သၞောတ်ဗ္ၜတ်တအ်ရဂှ် ဟီုသ္ဂးလဝ်ရ။
အကြာကၟိန်ဍုၚ်တ္ကအ်သၟတ် မဒစဵုဒစးတးပါဲဒၟံၚ်ဂှ် ပ္ဍဲဗ္ဒာဲတ္ကအ်ထိုၚ်ဝါန် ကြုက်အာတ်မိက်လဝ် နဒဒှ်ပယျဵုဒၞက်ညးတအ်ဂှ် ဒပ်ပၞာန်ကျာကြုက် ကၠောန်သ္ပဒၟံၚ်ပရေၚ်ဂၠာဲသၞ အရိုဟ်ဒဒှ်တ္ၚဲရ။
လၟုဟ်ဏံ ယဝ်ရသမ္မတထိုၚ်ဝါန် ဇြာၚ်အေန်ဝါန် ဆဵုဂဗကဵု ဥက္ကဋ္ဌကၠတ်ထဝ်သၟဝ်အမေရိကာန်မ္ဂး ကၠောန်သ္ပအာ ပရေၚ်ပလန်တဲဏောၚ်ဂှ် ကြုက်ဟီုသ္ဂးလဝ်ရ။
ကြဴနူဥက္ကဋ္ဌကၠတ်ထဝ် နာန်ဇြဳပေလိုဝ်ဇြဳ ဂေတ်ကြေဝ်စိုပ်ထိုၚ်ဝါန်တုဲဂှ် ကြုက်ကၠောန်ကၠုၚ်ဒၟံၚ် ပရေၚ်ပ္ကတ်ပ္ကေၚ်ပၞာန် ပ္ဍဲမွဲဒမြိပ်ထိုၚ်ဝါန်ရ။
သၞာဲဒဴကဆံၚ်လတူထိုၚ်ဝါန်မွဲတၠဂှ်မ္ဂး ပ္ဍဲသတ္တာဟဏံ ညံၚ်ကြုက်ဟွံဂွံပ္ကတ်ပ္ကေၚ်ပၞာန် ဇၞော်ကဵုဇြဟတ် ဒှ်ဟွံမာန်ပုဟ်ဂှ် ဟီုသ္ဂးလဝ်ကဵု ဌာန်ပရိုၚ်ရိုက်တာတုဲ ကြုက်ဂှ်မ္ဂး သွက် “ပွမပလန်တဲ ဗွဲမသက္ကုစၚ်ခြၚ်” ဂှ်ကၠောန်သ္ပလဝ် ပရေၚ်ပလေဝ်ပလေတ်သီုဖအိုတ်ရဂှ် ဟီုသ္ဂးလဝ်ရ။
က္ၜၚ်ကျာကြုက်ဒ္စိတ်ဖ္ဍိုက်ဂှ် နကဵုပရေၚ်ဂေတ်ကၚ် သွက်ဂွံဗတိုက် မဒှ်ဒၟံၚ်ဒတုဲ တတ်ကၠောံပယျဵုဒၞက်ဂှ်ရ ဖန်ဗဒှ်ဒၟံၚ် ပရေၚ်ကြံၚ်မ္ၚိုဟ်သ္ကာတ်မြဟ်တုဲ ကၠောန်ဗဒှ်ဒၟံၚ် ညံၚ်ဂွံဇီုကပိုက်ဒး ပရေၚ်ၜိုဟ်လလံ ကေုာံပရေၚ်တန်ကြန်ညိၚ်ဝတ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး ဌာနဝန်ဇၞော်ပရေၚ်စဵုဒၞာရ။
Ref,CAN