တၞၚ်သဳ၊ ဨပရဴ (၃)
ဒဒှ်ရအာစိုပ်ဗ္တိုက်လဝ် ဂကောံဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် ကေုာံ ကုန်ဗျူဟာ ဒပ်ကံၚ်ဇြဳပၞာန် မၞုံကွာန်ဍာ်ဗု၊ ပွိုၚ်ဍုၚ်တၞၚ်သဳ၊ ရးဒေသဇၞော်တၞၚ်သဳ ပ္ဍဲမွဲတ္ၚဲဓဝ်ဂှ် ညးတာလျိုၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်တၞၚ်သဳတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဨပရဴ (၁) ပယျာံနူဂယးဂှ် ဂကောံဒပ်ပံၚ်ကောံ ကေုာံ တမ်ဒပ် KNU (၁၁) တံ အာစိုပ်ဗ္တိုက်လဝ် ကုန်ဗျူဟာ ဒပ်ကံၚ်ဇြဳပၞာန် မၞုံကွာန်ဍာ်ဗု နကဵုလွဟ်ဇၞော်၊ လွဟ်ဍောတ်တံရ။
ဟိုတ်နူပရေၚ်ဗ္တိုက်ဏံတုဲ ပရေၚ်ပန်ပှော် မွဲလ္ပာ်ကုမွဲလ္ပာ် က္တဵုဒှ်လဝ် လလအ်ဗ္ဒါဲ (၃၀) မိနေတ်တုဲ စပ်ကဵုပရေၚ်ချိုတ်ဂျိုၚ် ကောန်ဂကောံဒပ်ကံၚ်ဇြဳပၞာန်တံဂှ်တုဲ ဆက်ဂၠိုက်ဂၠါဲဒၟံၚ်ဖိုဟ်ရောၚ်ဂှ် သ္ဂးရ။
ပ္ဍဲကဵုတ္ၚဲဂှ် အခိၚ်နူဂယး (၉) နာဍဳဂှ်လေဝ် နူကဵုဒပ်ပံၚ်ကောံစဵုဒၞါဒေသတံ ဗ္တိုက်ဗ္တိုဟ်မာၚ် ကုဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် အပ္ဍဲကွာန်တုၚ်ဃောန် ပွိုၚ်ဍုၚ်တၞၚ်သဳဂှ်တုဲ ပေါဲဗ္တိုက်ၜါလ္ပာ် ထပ်က္တဵုဒှ်လဝ်ရ။
အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန် ဟွံအောန်နူကဵု (၅) တၠ ဇီုကပိုက်ချိုတ်မာန်တုဲ လ္ပာ်ဂကောံဒပ်စဵုဒၞါညးဍုၚ်ကွာန်တံဂှ် ဇီုကပိုက်ဒး ဟွံမွဲမွဲသာ် ဆုတ်ကလေၚ်မာန်လဝ်ရောၚ်ဂှ် ဟီုရ။
ပပ္တံနူဂိတုမာတ်ချ် သတ္တာဟလက္ကရဴအိုတ် တုဲကၠုၚ်ဏံဂှ်တုဲ ဒပ်ကံၚ်ဇြဳပၞာန် ဟိုတ်နူထ္ပက်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်တၞၚ်သဳ နကဵုဇြဟတ်ဒပ်လၟိဟ်ဗွဲမဂၠိုၚ်ဂၠေၚ်ဂှ်ရ အရိုဟ်ဒဒှ်တ္ၚဲ ပေါဲဗ္တိုက်ဆေၚ်မုက်တံ ဆက်က္တဵုဒှ်ဒၟံၚ်ရ။
ဟိုတ်နူပေါဲဗ္တိုက်ၜါလ္ပာ်ဏံတုဲ ညးဍုၚ်ကွာန်ဒေသ (၁၀၀၀) ပြၚ် နူကဵုကွာန်တုၚ်ဃောန်၊ ကွာန်(ချောၚ်းနှစ်ပေါက်) တံကီု သီုကဵုကွာန်ဗ္ဒါဲဗ္ဒါဲတံဂှ်ဝွံ ဒးဂြိပ်ဒဴပါဲဒလေတ်လဝ် ဒၞါဲဗၠးဘဲတံရောၚ်ဂှ် ဂွံတီကေတ် နူကဵုညးဒေသတံရ။
ပရိုၚ်−သြၚ်လောန်တိုၚ်(မ်)
ဗီုဓာတ်−ဗီုတြေံ