နေဗျဳဒဝ်၊ ဨပရဴ (၃)
သ္ကိုပ်ဂကောံပြုပြေၚ်ပၞာန်တၟေၚ်ကံၚ်ဇြဳပၞာန် စၟတ် (၄) မရပ်စပ်ဒၟံၚ် တိဍာ်ဗော်သွးကောန်ဂကူကရေၚ် KNU အဓိကတံဂှ်ကီု သီုကဵုသ္ကိုပ်ရးဌာန်ဂအုပ်ပၞာန်တံဂှ် ကဵုဒေါအ်ဇူလဝ် ကေုာံ ကၠောန်သ္ပဆုဲပြံၚ်လဝ် ပ္ဍဲဇြဟတ်ဒပ်အရန်တံရောၚ်ဂှ် ဂွံတီကေတ် နူကဵုဗွိုၚ်ဒပ်ပၞာန်တံရ။
ဒုသ္ကိုပ်ဗိုလ်ဇၞော် သ္ကိုပ်စကခ စၟတ် (၄) မရပ်စပ်ဒၟံၚ် ဒၞါဲဌာန်ဒေသ တိဍာ် KNU ချဳဒရာၚ် အဓိကဂမၠိုၚ် မပ္တံကဵု တွဵုရးကရေၚ်၊ တွဵုရးဍုၚ်မန် ကေုာံ ရးဒေသဇၞော်တၞၚ်သဳတံဂှ် ကဵုဒေါအ်ဇူလဝ်တုဲ ပ္ဍဲကဵုဒၞါဲညးဂှ် ခါန်ကၞက်လဝ် သ္ကိုပ်ရးဌာန်ဂအုပ်ပၞာန် ရးလ္ဂုၚ် သ္ကိုပ်ဗိုလ်ညောအ်ဝေန်ဇြိုဲရ။
သ္အာၚ်နူဂှ်ပၠန် သ္ကိုပ်ရးဌာန်ဂအုပ်ပၞာန်ရးအဂၞဲ သ္ကိုပ်ဗိုလ်မျာတ်တိတ်ဥူ မကေတ်လဝ်တာလျိုၚ် ကိစ္စမဆေၚ်စပ်ကဵုပရေၚ်ပၞာန် တွဵုရးဍုၚ်မန် ကေုာံ တွဵုရးကရေၚ်တံဂှ်လေဝ် ဆုဲပြံၚ်လဝ် လ္ပာ်ဇြဟတ်အရန် ဒပ်ပၞာန်ဂှ်တုဲ ပ္ဍဲကဵုဒၞါဲညးဂှ် သ္ကိုပ်ဗိုလ်ဇၞော်သဵုမေန် မဒှ်သ္ကိုပ်ၝောံဒပ် ဌာန်ဂအုပ်ၝောံဒပ်တိုက် စၟတ် (၁၁) ဖျေံသ္ဇိုၚ်ရးဒေသဇၞော်လ္ဂုၚ်ဂှ် ဒးဒုၚ်ဆုဲပြံၚ်လဝ်ရ။
ကၠောန်သ္ပဆုဲပြံၚ် သၞာဲဒဴကဆံၚ်သၠုၚ်ၚ် လ္ပာ်ဒပ်ပၞာန်လ္ၚဵုတံဂှ်ဝွံ ဟိုတ်နူကဵုအာတာလျိုၚ် ကုညးမကြမ်ကြထ္ၜး အတိုၚ်ပၟိက်စိုတ်က္ဍိုပ်သ္ကိုပ်ပၞာန်တံဂှ်ရ အပ္ဍဲကာလကၠုၚ်စိုပ်ဏံ ပဋိပက္ခပရေၚ်ပၞာန် သာသ္ကာတ်မြဟ်ကၠုၚ်မာန်ရောၚ်ဂှ် ဥက္ကဌ ကမ္မတဳကောပ်ကာဲ ကေၚ်ကာမိတ်ခရိုၚ်သဓီု ဟီုရ။
အတိုၚ်ဂလာန်ဗွိုၚ်ဒပ်ပၞာန်တံဂှ်မ္ဂး အပြံၚ်အလှာဲ သ္ကိုပ်စကခ ကေုာံ သ္ကိုပ်ရတခ တံဂှ်ဝွံ ဆေၚ်စပ်ဒၟံၚ်ကဵု ပရေၚ်ဌာန်ဂအုပ်ပၞာန်ရးအဂၞဲ ဒးဒုၚ်ဗ္တိုက်ဂှ်ကဵု ဗ္ဒိုပ်ဒပ်ကံၚ်ဇြဳပၞာန် မၞုံအပ္ဍဲတိဍာ် KNU တံ ဒးဒုၚ်သီဂိုၚ်တံ အဓိကရောၚ်ဂှ် ဟီုဂးဒၟံၚ်တံ နွံဒၟံၚ်ရ။
တုဲကၠုၚ် ပ္ဍဲဂိတုမာတ်ချ် (၁၆) တေံ ဒပ်ပံၚ်ကောံ ဂကောံဇြဟတ်ပၠန်ဂတးတံ ကၠုၚ်စိုပ်ဗ္တိုက်လဝ် ဌာန်ဂအုပ်ပၞာန်ရးအဂၞဲ ဖျေံသ္ဇိုၚ်မတ်မလီုတံဂှ်တုဲ စမြိုၚ်လ္ၚဵု ဇီုကပိုက်လီုလာ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−MOI