ဒဳပေဝ်ယေန် – ဨဗြဴ(၄)
ရးဒေသသေတ်ဂါၚ်၊ ပွိုၚ်ဍုၚ်ဒဳပေဝ်ယေန် သ္ကုတ်ပလိုတ်ဂှ် ဟိုတ်နူဒပ်ကံၚ်ဇြဳပၞာန် ဗတိုက်ဒၟံၚ်ကဵုက္ၜၚ်ကျာ ပွိုၚ်(၃)တ္ၚဲအဆက်ဆက်ဂှ်ရ ညးဍုၚ်ကွာန် နူကွာန်စှ်ကွာန်တအ် ဒးဂြိပ်ဒဴဒၟံၚ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
နူဂိတုမာတ်ချ် စၟတ်တ္ၚဲ (၃၁) တုဲကၠုၚ်တေံဂှ် က္ၜၚ်ကျာသၞေၚ်ဝဲ Mi-35 တိုန်ကၠုၚ် နူဌာန်ဂအုပ်ရးပၞာန်ဗာယပ်မွဲဖ္ဍိုက် ပန်ပှော်ဒၟံၚ်တုဲ ညးဒေသ နူကွာန်မပ္တံကဵု ကွာန်တဝ်ကျောၚ်၊ မှာန်တာဂျဳ၊ အေန်တာန်၊ ဝဘာ၊ ဖုယျာထွတ်၊ ယေန်ဒေ၊ ကျဳ ကေုာံကွာန်လာပ်တဳ ဂၠိုၚ်ကဵုလ္ၚီု ဒးဂြိပ်ဒဴဒၟံၚ်ရ။
မ္ၚးနူဂှ်ပၠန် ဂိတုမာတ်ချ် စၟတ်တ္ၚဲ (၂၇)ဂှ်လေဝ် မွဲဒမြိပ်ဂၠံၚ် သာၚ်ပျေန်-ဒဳပေတ်ယျေန်ဂှ် ဟိုတ်နူထ္ပက်လုပ်ကၠုၚ်ကရောၚ်ပၞာန် ဇြဟတ်(၁၀၀)တၠပြၚ်ဂှ်ရ ဒှ်လဝ်ပေါဲဗတိုက်ကဵု ဒပ်စဵုဒၞာဒေသတအ်တုဲဂှ် ကၠုၚ်ပန်ပှ်ောဒၟံၚ် ကဵုက္ၜၚ်ကျာရဂှ် ဂွံတီကေတ်ရ။
ဂိတုဨဗြဴ စၟတ်တ္ၚဲ(၂) အခိၚ်နူဂယးဂှ် ဒှ်လဝ်ပေါဲဗတိုက်ဆေၚ်မုက်တုဲ ဒၟာနူကံၚ်ဇြဳပၞာန် ဂြာတ်ထောံဖျေံလဝ်ဗုမ်ဂှ်ရ ပရေၚ်ဇီုကပိုက်လီုလာ် ၜိုန်ရနွံကီုလေဝ် ဒှ်ဒၟံၚ်အကာဲအရာ ဂွံညာတ်ကေတ် နူဌာန်ဇမ္ၚောဲရဂှ် ညးဒေသမွဲတၠ ဟီုသ္ဂးလဝ်ရ။
အတိုၚ်ဌာနဝန်ဇၞော်အခေါၚ်အရာမၞိဟ် အလဵုအသဳပရေၚ်ညဳသၟဟ်ကောန်ဂကူ (NUG) ဟီုသ္ဂးလဝ်မ္ဂး ပ္ဍဲကၟိန်ဍုၚ်ဗၟာ ကြဴနူဒပ်ပၞာန်သီအဝဵုတုဲ ဂဗုတ်ပြိုက်ဂစိုတ်လဝ်ဗွဝ်ဗွဝ် မၞိဟ်လတူနူ (၅)တၠဂှ် (၆၀)ဂဗုတ်ပြၚ်နွံဒၟံၚ်တုဲ ဟိုတ်နူပရေၚ်ပရောတအ်ဂှ် ကောန်အရာပ်(၇၀၀)တၠပြၚ် ဒးအိုတ်လဝ်လမျီုရဂှ် ဂွံတီကေတ်ရ။
Data For Myanmar မဒှ်ဂကောံသုတေသနမွဲဂကောံဂှ်လေဝ် ပ္ဍဲမွဲဒပ်ပၞာန်သီအဝဵု ပွိုၚ် (၂) သၞာံဏံ သ္ၚိဒၟံၚ် ကေုာံစမြိုၚ် အပံၚ်လၟိဟ် (၆၀,၀၀၀) ပြၚ် ဒးဒုၚ်စံၚ်ပလီုလဝ်ရဂှ် လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-ပရေၚ်ထံက်ပၚ်-ညးပါဲပၞာန်-ပွိုၚ်ဍုၚ်ဒဳပေဝ်ယေန်