သဓီု၊ ဨဗြဴ(၄)
ပ္ဍဲတွဵုရးဍုၚ်မန်၊ ပွိုၚ်ဍုၚ်သဓီု၊ ဗ္ဒါဲကွာန်ကမာဇြိုၚ် လ္တူဂၠံၚ်ကွဳစက် လ္ဂုၚ်−မတ်မလီုဂှ် ကြဴနူရေၚ်ကွဳစက်ကံၚ်ဇြဳပၞာန် ဒးဒုၚ်ဗ္တိုက်တုဲ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ် ဥက္ကဌကမ္မတဳကောပ်ကာဲကေၚ်ကာမိတ်ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဨပရဴ (၂) အခိၚ်နူဂယးတေံ နူကဵုဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ ဗ္တိုက်ဗ္တိုဟ်မာၚ် ကုရေၚ်ကွဳစက်ကံၚ်ဇြဳပၞာန် ကွဳစက် (၅) ဖ္ဍိုက်ပါဗက်ကၠုၚ် နူကဵုၜဳကလေၚ် မဒဳလုပ်ကၠုၚ် အပ္ဍဲပွိုၚ်ဍုၚ်သဓီုဂှ်တုဲဂှ် ပေါဲဗ္တိုက်ၜါလ္ပာ် က္တဵုဒှ်လဝ်ရ။
ကြဴနူပေါဲဗ္တိုက်ဂှ်တုဲ အရီုဗၚ်ပၞာန် နူကဵုဒပ်ကံၚ်ဇြဳပၞာန် ဇြဟတ်ဒပ် (၅၀) ပြၚ် စိုပ်ကၠုၚ်တုဲ လုပ်စိုပ်ထ္ပက်ကၠုၚ်ကရောၚ်ပၞာန် ကွာန်ဗ္ဒါဲဗ္ဒါဲ ပ္ဍဲကွာန်ကၟာဇြိုၚ် ပွိုၚ်ဍုၚ်သဓီုဂှ်ရ။
ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ရ ဒဵုကဵုအခိၚ်လၟုဟ် က္တဵုဒှ်လဝ်ပေါဲဗ္တိုက်ဟွံမွဲဏီကီုလေဝ် ယဝ်ရထပ်လုပ်စိုပ်ကၠုၚ်မ္ဂး ပေါဲဗ္တိုက်ၜါလ္ပာ် သာသ္ကာတ်မြဟ်ကၠုၚ်မာန်ရောၚ်ဂှ် ဥက္ကဌ ကမ္မတဳကောပ်ကာဲကေၚ်ကာမိတ်ခရိုၚ်သဓီု KNU သ္ဂးရ။
ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ရ ညးဒေသ နူကဵုကွာန်ကမာဇြိုၚ်၊ ယျေဝေ ကေုာံ ကွာန်ဗ္ဒါဲဗ္ဒါဲလ္ၚဵုတံ ဒစးဒုၚ်ဒးဂြိပ်ဒဴပါဲဒလေတ်ဒၟံၚ်တံ နွံဒၟံၚ်တုဲ ညးဒေသလ္ၚဵုတံဂှ် မၚ်ရံၚ်ဒၟံၚ်အကာဲအရာအိုတ်ရောၚ်ဂှ် ဂွံတီကေတ်ရ။
ပ္ဍဲကဵုပေါဲဗ္တိုက် မက္တဵုဒှ်လဝ် ပ္ဍဲဂိတုဨပရဴ (၂) ဂှ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်ဆဆဵုတုဲ ကောန်အရာပ် (၃) တၠ ဒးမကမ်ကလိဂွံလဝ်ဝပ်ရောၚ်ဂှ် ညးဒေသတံ ဟီုရ။
ပ္ဍဲပွိုၚ်ဍုၚ်သဓီု ဗော်သွးကောန်ဂကူကရေၚ် KNU ဂှ် ကြဴနူက္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် လလောၚ်တြး ကေတ်အာဒုဟ် ကုဂကောံရပ်လွဟ်ကောန်ဍုၚ်အရၚ် မရီုဗၚ်ကဵုဒၟံၚ် NUG, PDF တံရောၚ်တုဲဂှ် ပရေၚ်ပၞာန်ၜါလ္ပာ် သာကြံၚ်မ္ၚိုဟ်ကၠုၚ်တုဲ ပေါဲဗ္တိုက်ဆေၚ်မုက်တံ ဆက်က္တဵုဒှ်ဒၟံၚ်မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)
ဗီုဓာတ်−Salween Press