မဝ်သဂိုဝ်- ဨဗြဴ(၄)
ရုယှာဂှ် ပြံၚ်ပဆုဲဏာ လွဟ်လက်နက်နျူကလဳယျာ စှ်ေကိုန်ဗျူဟာညးတအ် ပ္ဍဲပယျဵုဒၞက် ကၟိန်ဍုၚ်ဘဳလာရုတ်ရောၚ်ဂှ် ကလုတ်တၠမာန်ရုယှာ ဟီုသ္ဂးလဝ် ပ္ဍဲဂိတုဨဗြဴ စၟတ်တ္ၚဲ(၂)ရ။
လွဟ်လက်နက်တအ်ဂှ် ဟိုတ်နူစွံပ္တန်အာ ကၠာဟွံစိုပ်နေတိုဝ် ၜိုတ်မွဲဍဟောဝ်ဂှ်ရ ပရေၚ်ကြံၚ်မ္ၚိုဟ် အကြာန်ကၟိန်ဍုၚ်ရုယှာကဵု ကၟိန်ဍုၚ်ပလိုတ်တအ် သွက်သ္ကာတ်မြဟ် နွံကၠုၚ်မာန်ရ။
နူအခိၚ်လောန်ၜက် လ္တူဍုၚ်ယူကရုၚ်တေံဂှ် တၚ်ထ္ၜးစၟတ်သမ္တီ နျူကလဳယျာရုယှာ ပြာကတ်မွဲဂှ်မ္ဂး ဒဒှ်ရဗ္ဂပ်စုတ်လဝ် လွဟ်လက်နက်နျူကလဳယျာ စှ်ေကိုန်ဗျူဟာ ပ္ဍဲဗဳလာရုတ်ရဂှ် သမ္မတဗလာဒဳမာပူတေန် ဟီုသ္ဂးလဝ် ပ္ဍဲဂိတုမာတ်ချ် စၟတ်တ္ၚဲ(၂၆) တုဲကၠုၚ်ဏံရ။
ကၟိန်ဍုၚ်ဇိုၚ်ဝုတ်ဒိုဟ် ၜါကၟိန်ဍုၚ်တအ်ဂှ် ဒှ်ကၠုၚ်လစှ်ေရုယှာ လုပ်သၞောဝ်မွဲဒကုတ်မွဲဒကဴတုဲဂှ် သွက်ဂွံထပ်ပံၚ်တောဲပၠန် ဟီုဂးသဳကၠဳလဝ် လုကဴသၞာံလအ်လကၠုၚ်တုဲ နူကဵုဍုၚ်ဇၞော်မေန်သ် သွက်ဂွံဗလးဏာ ကောန်ဒပ်ရုယှာ ပ္ဍဲဍုၚ်ယူကရုၚ်ဂှ် ကဵုကၠုၚ်လဝ်အခေါၚ်သုၚ်စောဲ တိဍာ်ဗဳလာရုတ်ဇြဳယာမ်တုဲဂှ် ဒှ်လၟေၚ်ကမၠောန် အသိၚ်သၠုၚ်ဂၠိုၚ်တိုန်ဒၟံၚ် မွဲဂကူရ။
“ပြံၚ်ပဆုဲဏာ ပ္ဍဲပလိုတ်ပယျဵုဒၞက် တွဵုရးကၟိန်ဍုၚ်ပံၚ်ကောံပိုဲတုဲ ပရေၚ်ဂီုကၠီု ဂွံချိုတ်ပၠန်ဂှ် သၠုၚ်ပ္တိုန်အာ အရာဒှ်ကၠုၚ်မာန် သီုဖအိုတ်ဏောၚ်၊ ၜိုန်ရဥရောပကဵု အမေရိက ကညာၚ်ကရေဲဒၟံၚ်ကီုလေဝ် အရာဏံဂှ် ဒးကၠောန်သ္ပ တွဵုရ”ဂှ် ကလုတ်တမာန်ဆေၚ်စပ်ကဵုကၟိန်ဍုၚ်ဗဳလာရုတ် ဗိုဝ်ရေတ် ဟီုသ္ဂးလဝ်ရ။
မ္ၚးနူဂှ်ပၠန် အမာတ်ကလုတ်တမာန်ရုယှာဂှ် ၜိုန်ရဟွံဓမံက်ထ္ၜးလဝ် ပ္ဍဲဒၞာဲလဵုဖျေံစွံအာ လွဟ်လက်နက် ပ္ဍဲဗ္ဒပ်လဵုရောဟီုကီုလေဝ် အတိုၚ်အသံပၟိၚ်ပူတေန် ဂိတုဂျူလာၚ် စၟတ်တ္ၚဲ(၁)ကၠုၚ်စိုပ်ဂတဏံ စွံတ္ၚဲလကြဴအိုတ်တုဲ ညံၚ်ရုၚ်သီဂိုၚ်မွဲရုၚ် ဂွံတုဲဒှ် ဒးရေၚ်တၠုၚ်တုဲ ပြံၚ်ပဆုဲဏာ လ္ပာ်ပလိုတ်ဍုၚ်ဗဳလာရုတ်ရောၚ်ဂှ် သ္ပလဝ်ဒ္တန်ရ။
ပ္ဍဲလ္ပာ်သၟဝ်ကျာ ဍုၚ်ဗဳလာရုတ်ဂှ် ဆက်စပ်ဒၟံၚ်ကဵု ပယျဵုဒၞက်ကၟိန်ဍုၚ်လေတ်ဒူယျေနဳယျာ၊ လေတ်ဗဳယျာတအ်တုဲ ပ္ဍဲလ္ပာ်ပလိုတ်ဂှ် ဆက်စပ်ဒၟံၚ်ကဵု ဍုၚ်ပိုဝ်လာန်တုဲ ကြဴနူရုယှာလောန်ၜက် ဍုၚ်ယူကရုၚ်တုဲဂှ် သ္ကုတ်လစှ်ေလ္ပာ်ဗၟံက် နေတိုဝ်ထပ်ဗပေၚ်လဝ် ကောန်ဒပ် ကေုာံကပေါတ်လွဟ်လက်နက်ပၞာန် ပါလုပ်ဒၟံၚ်သီုဖအိုတ်ရဂှ် ဂွံတီကေတ်ရ။
မဟာမိတ်အမေရိကာန်တအ်ဂှ်မ္ဂး စပ်ကဵုရုယှာ ပလံၚ်ဗစိုပ်ကဵုဗဳလာရုတ်လွဟ်လက်နက်စှ်ေကိုန်ဗျူဟာတအ်မာန်ဂှ်တုဲ ဒှ်ဒၟံၚ်ဓဝိၚ်ရဂှ် ဟီုသ္ဂးလဝ်ကီု သမ္မတဗိုၚ်ဒေန်လေဝ် ဟီုသ္ဂးလဝ် အရာဒးက္တဵဒဒှ်ဓဝိၚ်ရ။
ကၟိန်ဍုၚ်ဗဳလာရုတ်ဂှ် ယဝ်နွံပၟိက်မ္ဂး ကဵုအာအခေါၚ်စွံပ္တန်ကမ်လှောဝ်နျူကလဳယျာပန်တိုက် ပ္ဍဲဍုၚ်ညးတအ်ရောၚ်ဂှ် သမ္မတအလေတ်ဇြေန်ဒါ လူကာယှာန်ကိုဝ် ဟီုသ္ဂးလဝ် ဂိတုဨဗြဴ ပ္ဍဲစၟတ်တ္ၚဲ(၁)ဏံရ။
Ref,CNA