ဗြဝတဳ၊ ဨဗြဴ(၄)
ကောန်ကမၠောန်ဆုဲပြံၚ်ဍုၚ်ဗၟာ မကၠုၚ်စိုပ်ကၠောန်ဒၟံၚ်ကမၠောန် ပ္ဍဲဍုၚ်သေံ နကဵုလိက်ကသုက်တုပ်စိုတ်ၜါဍုၚ် MOU ဗ္ဒါဲ (၁၅၀၀) ဝွံ အပ္ဍဲအကြာတ္ၚဲတံဏံ ဒးဒုၚ်ပ္တိတ်နူကမၠောန်တံ က္တဵုဒှ်ဆက်ဒၟံၚ်ရောၚ်ဂှ် ညးမရီုဗၚ်ရေၚ်တၠုၚ်ပရေၚ်သၟာကမၠောန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲအကြာတ္ၚဲတံဏံ တၠကမၠောန်ဍုၚ်သေံတံ ပ္တိတ်ထောံကမၠောန် ကုကောန်ဍုၚ်ဗၟာ ဗ္ဒါဲ (၁၅၀၀) မကၠုၚ်စိုပ်ကၠောန်ဒၟံၚ်ကမၠောန် ပ္ဍဲရုၚ်ကမၠောန်ၜါ မၞုံပ္ဍဲခရိုၚ်သမွတ်သာဃန် တိဍာ်မဟာၛာဲ ကေုာံ ပ္ဍဲခရိုၚ်နဃန်ပထောန် ပ္ဍဲတိဍာ် (အုန်းနွဲ့အုန်းယိုင်) နကဵုလိက်ကသုက်တုပ်စိုတ် သၞောတ် MOU တံဂှ်ရ။
သၟာကမၠောန်ဍုၚ်ဗမာ MOU မဒးဒုၚ်ပ္တိတ်လဝ်ကမၠောန်တံ သွက်သ္ဂောံဂွံ ၚုဟ်လေဲ မထေက်တန်တံဂှ်ကဵု သွက်သ္ဂောံကလေၚ်ဂွံ ကမၠောန်ကၟိတ်တၟိတံဂှ် ဘိုၚ်ရေၚ်တၠုၚ်ပသောၚ်ကဵုဒၟံၚ်တုဲ နကဵုသၟာကမၠောန် မဒးဒုၚ်ပ္တိတ်ကမၠောန်တံ ယဝ်ရဟွံကလေၚ်ဂွံ ကမၠောန်မ္ဂး ဒးဆေၚ်ဒၟံၚ်မုက် ကုအကာဲအရာ ဒးဒုၚ်ပလံၚ်ဖျဴဌာန်ဒၟံၚ်တံရောၚ်ဂှ် ညးမရေၚ်တၠုၚ်ဒၟံၚ် ပရေၚ်သၟာကမၠောန် ကိုဝ်ယျေဝ်မေန် ဟီုရ။
“သွက်ဂွံဂွံ ၚုဟ်ဒးဂိ မထေက်တန်တံဂှ်ကီု သွက်ညးတံ သ္ဂောံဂွံကမၠောန်ကၟိတ်တၟိ ဗွဲမပြဟ်ဂှ် မွဲကရောံကဵု LPN FOUNDATION ဂှ် ပိုယ်တံ ပံၚ်တောဲကဵု MHAC တုဲ ကၠောန်ဒၟံၚ်ရ။ မွဲမွဲတ္ၚဲ ပါ်ကဵုက္ဍိုပ်ညး က္ဍိုပ်ညးတုဲ တ္ၚဲမွဲဂှ်တှ်ေ အခိၚ်ပိုယ်တံ သောၚ်ကလးထောံ မၞိဟ်ၜိုတ် (၂၀၀) တၠဂှ် မၞိဟ်ဗ္ဒါဲ (၁၀၀) ဂှ် အကာဲအရာ သ္ဂောံကလေၚ်ဂွံကမၠောန်ကၟိတ်ဂှ်နွံ။ သွက်ညးတံ သ္ဂောံဂွံကမၠောန်ဂှ် လ္ပာ်ဒးဆက်ပ္ညဳကဵု အေဂျေန်ဇြဳတံ နွံဒၟံၚ်ဏောၚ်။ မိက်ဂွံသ္ဂးဂှ်တှ်ေ သၟာကမၠောန် MOU တံ ပ္ဍဲအကြာတ္ၚဲတံဏံ ဒးဒုၚ်ပ္တိတ်နူကမၠောန် ၜိုတ် (၁၅၀၀) နကဵုဂအုံဗွဝ်ရ။ သၟာကမၠောန်တံဏံ ဗွဲမဂၠိုၚ်ဂှ် ဒှ်သၟာကမၠောန် လိၚ်မံၚ်ကေတ်ဗ္ဒမ် မ္ၚးမ္ၚးတေံဏောၚ်။ ပရေၚ်စသုၚ်မံၚ်စံၚ်ဂှ်တှ်ေ ပြဟ်ဟ်ဏံ ပြေပြံၚ်ဒၟံၚ်ဏီဏောၚ်။ လက္ကရဴမ္ဂး ၚုဟ်ဗ္ဒမ်၊ ၚုဟ်ပၟတ်၊ ၚုဟ်ဍာ်ဍေံတံ ပြသၞာနွံကၠုၚ်မာန်ဏောၚ်။ ယဝ်ရဟွံဂွံကမၠောန်ဗွဲမပြဟ်ပုဟ်ဟီုမ္ဂး ဍေံတံ ဒှ်အာဒဒိုက်မာန်ဒၟံၚ်ဏောၚ်။ အကာဲအရာဒးဒုၚ်ပလံၚ်ဖျဴ ဌာန်ဒၟံၚ်တံ နွံဏောၚ်။ အေ ဂှ်တှ်ေ သွက်ဂွံကေလၚ်ဂွံကမၠောန်တၟိဂှ် ဒှ်မဂၞန်မွဲရ” သာ်ဝွံ ကိုဝ်ယျေဝ်မေန် ဟီုရ။
သၟာကမၠောန် MOU ဍုၚ်ဗၟာတံ ဒးဒုၚ်ပ္တိတ်နူကမၠောန်ဂှ်ဝွံ ဒှ်တာလျိုၚ် အေဂျေန်ဇြဳဍုၚ်ဗၟာ မပလံၚ်ဗစိုပ်ဒၟံၚ် သၟာကမၠောန်တံ နကဵုသၞောတ် MOU တံဂှ်တုဲ သွက်ပြဝ သၟာကမၠောန်တံ ဒးဒုၚ်ပ္တိတ်နူကမၠောန်ဂှ် နကဵုအေဂျေန်ဇြဳဍုၚ်ဗၟာ ဒးကေတ်တာလျိုၚ်ရောၚ်ဂှ် ကိုဝ်ယျေဝ်မေန် သ္ဂးရ။
သွက်ကိစ္စ သၟာကမၠောန်ဍုၚ်ဗၟာ မဒးဒုၚ်ပ္တိတ်နူကမၠောန်တံ ကလေၚ်သ္ဂောံဂွံကမၠောန်တၟိတံကဵု ၚုဟ်ဒးဂိတံဂှ် ဂကောံကိုဝ်ယျေဝ်မေန် MHAC ၊ ဌာန်ရိုဟ်ကၞက်သ္ဇိုၚ် LPN ၊ ဥူဝေလေန်မိုၚ် နူကဵုဌာနဝန်ဇၞော်သၟာကမၠောန် NUG တံ ကေုာံ ညးတာလျိုၚ်ဂမၠိုၚ် နူကဵုပရေၚ်သောၚ်ကလးသၟာကမၠောန် အလဵုအသဳသေံတံ ပံၚ်တောဲတုဲပသောၚ်ဒၟံၚ်အိုတ်ရ။
ၜိုန်ရသၟာကမၠောန် MOU ဍုၚ်ဗၟာတံ ဒးဒုၚ်ပ္တိတ်နူကမၠောန် နကဵုဂအုံဗွဝ်တံကီုလေဝ် သၞာဲဒဴကလုတ် သၟာကမၠောန် နူလ္ပာ်ရုၚ်ကလုတ်ဍုၚ်ဗၟာ သၟဝ်တဲကံၚ်ဇြဳပၞာန် မခါန်ကၞက်လဝ်တံ ကၠုၚ်စိုပ်သောၚ်ကလးကဵုလဝ် ဟွံမွဲပုဟ်ဂှ် ကိုဝ်ယျေဝ်မေန် ဟီုရ။
“ဍေံတံ ဂွံသၠုဲတုဲတှ်ေတုဲ ကၠောန်လဝ်တုဲ ရုၚ်ကလောန်ဏံ နွံပၟိက်ကဵုမၞိဟ်ဟာ၊ ဟွံမွဲပၟိက်ဟာ ရုၚ်ဏံ ကဵုကၠောန် ၆ ဂိတုရဟာ၊ ၇ ဂိတုရဟာ ဟွံစဳစောတ်ချိုတ်တ်ပၠိုတ်တ်မွဲသာ် ဂွံပလံၚ်မၞိဟ်ဂၠိုၚ်ၚ်တှ်ေတုဲဂးတုဲ ဟိုတ်နူပလံၚ်လဝ် ဂွံတှ်ေတုဲဂှ်ရ သၟာကမၠောန်တံဏံ ဒးဒှ်ဒဒိုက်ရ။ သွက်ဏံဂှ် အေဂျေန်ဇြဳတံဏံ ဒးကၠောန်သ္ပ ပရေၚ်ကေတ်လျိုၚ် ဒုၚ်လျိုၚ်တံဏောၚ်။ နနဲသာ်ဂှ်ကီု သၟာကမၠောန်ဍုၚ်ဗၟာ MOU သွက်ဂွံကၠုၚ်ဍုၚ်သေံဂှ် နွံဒၟံၚ်တၟာဂလိုၚ်ရ။ မၞိဟ်တံဏံလေဝ် လ္ပကၠုၚ်လးလးညိ။ စပ်ကဵု MOU တုဲ ပ္ဍဲကဵုဍုၚ်သေံဏံ လီုလာ်ဒၟံၚ်အိုတ်ယျ၊ တုဲတှ်ေ သၟာကမၠောန်ဍုၚ်ဗမာ ဂၠိုၚ်ကဵုကိုဋ် ဒှ်ဒၟံၚ်ကမၠောန်ကၟိတ်ဟွံမွဲ ပ္ဍဲဍုၚ်သေံဏံ။ လၟုဟ် ခေတ်ဏံဂှ် အေဂျေန်ဇြဳ ကၠုၚ်နူသၟဝ်တဲမေန်အံၚ်လှာၚ် ဂကောံပကီုပရာပ်တံ ဒှ်ၝကၠုၚ်နူဒပ်ပၞာန်တံ ဟိုတ်နူဒှ်ကမ္ပဏဳ မလုပ်လဝ်ယှေဝ်ယာ မၞိဟ်ဇၞော်ဇၞော် လ္ပာ်ဍေံတံဂှ်ရ သောၚ်ကလးကဵုလေဝ် ဟွံမွဲပုဟ်။ သၟာကမၠောန်တံ ဒးဂိတုဲ ယဝ်ရကၠုၚ်ဍုၚ်သေံ နကဵုသၞောတ် MOU မ္ဂး စနူတ္ၚဲဏံတုဲ ဒေါအ်ထောံညိ။ သၟာကမၠောန်ဍုၚ်ဗၟာတံ လ္ပကၠုၚ်ဍုၚ်သေံ နကုသၞောတ် MOU ညိ၊ ပ္ဍဲဍုၚ်သေံဏံ မၞိဟ်ဒးဒုၚ်ပ္တိတ်နူကမၠောန်တံ တၟာဂလိုၚ်ဏောၚ်။ ဂၠိုၚ်ကဵုကိုဋ် နွံဒၟံၚ်ဂှ် လဴထ္ၜးစညိ။ အခိၚ်လၟုဟ် အခိၚ်သၟာကမၠောန်တံဏံ ဒးဒုၚ်ပ္တိတ်နူကမၠောန် နကဵုဂအုံဗွဝ်ဂှ် သၞာဲဒဴကလုတ် (၅) တၠ နူကဵုရုၚ်ကလုတ်ဍုၚ်ဗၟာ သၟဝ်တဲကံၚ်ဇြဳပၞာန် မဗလးလဝ် သွက်ဂွံသောၚ်ကလး ကိစ္စသၟာကမၠောန်တံဂှ် ပသောၚ်ကလးကဵုလဝ် ဟွံမွဲလးလးပုဟ်၊ ကၠုၚ်စိုပ်ရီုဗၚ်ကဵုလဝ်ဟွံမွဲပုဟ်” သာ်ဝွံ ကိုဝ်ယျေဝ်မေန် သ္ဂးရ။
အခိၚ်လၟုဟ်ဂှ်လေဝ် အပ္ဍဲဍုၚ်သေံဂှ် ဟိုတ်နူသၟာကမၠောန်ဍုၚ်ဗၟာတံ ဒှ်ဒၟံၚ်ကမၠောန်ကၟိတ်ဟွံမွဲ ဗွဲမဂၠိုၚ်ဂၠေၚ်ဂှ်ရ လ္ပကၠုၚ်ဍုၚ်သေံ နကဵုသၞောတ် MOU ဟွံမွဲကဵုသၞောတ်ချိုတ်တ်ပၠိုတ်တ်တံဂှ် ဖ္တိုက်ဖ္အောဝ်လဝ်ရ။
နကဵုသၞောတ် MOU လိက်ကသုက်တုပ်စိုပ်ၜါဍုၚ်ဂှ် ကလေၚ်စလဝ် နူကဵုသၞာံတုဲကၠုၚ်တေံတုဲ ကလေၚ်ပလံၚ်ကဵုလဝ် ကောန်ကလောန်ဍုၚ်ဗၟာတံ အပ္ဍဲဍုၚ်သေံတုဲ ကောန်ကမၠောန်အပ္ဍဲဝၚ်ကမၠောန်တံဝွံ ဟွံဂွံသြန်ဂိတုတံကီု၊ ဒးဒုၚ်ပ္တိတ်နူကမၠောန်တံကီု၊ ဒးဒုၚ်ဝးပ္ကဝ်ဒၟံၚ် အခေါၚ်အရာသၟာကမၠောန်တံ ဒှ်တမ် ပြသၞာတံဏံဂှ် နကဵုသၟာကမၠောန်တံ ဒးဆေၚ်ဒၟံၚ်မုက် ဒးဂဗဒၟံၚ်လၟိုန်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−Ye Min (MHAC)