နေပျဳဒဝ်၊ ဨဗြဴ(၅)
သၞောဝ်ဥပဒေအကံက်အခေါန်ကၟိန်ဍုၚ် သွက်သၞာံ ၂၀၂၃ ဂှ် က္ဍိုပ်သ္ကိုပ်ပၞာန် ဂအုပ်သ္ကိုပ်ဗိုလ်ဇၞော်မေန်အံၚ်လှာၚ် ပျးဌာန်လဝ် အတိုၚ်သၞောဝ်သ္ဇိုၚ်ဒက်ပ္တန် ၝောံပိုဒ် ၄၁၉ ပ္ဍဲဂိတုမာတ်ချ် စၟတ်တ္ၚဲ (၃၀)ရဂှ် လလောၚ်တြးလဝ် ပ္ဍဲလိက်ပရိုၚ်တြးဝါဒရ။
သၞောဝ်ဥပဒေဏံဂှ် ကော်ခဴဂး သၞောဝ်ဥပဒေအကံက်အခေါန်ကၟိန်ဍုၚ် သၞာံ ၂၀၂၃ တုဲ သ္ပတမ်နူ ဂိတုဨဗြဴ စၟတ်တ္ၚဲ (၁)တုဲ လမျီုစလုပ်ကၠုၚ်ရောၚ်ဂှ် ကံၚ်ဇြဳပၞာန် လလောၚ်တြးလဝ်ရ။
စပ်ကဵုဂကူဗၞိက်တၟေၚ်တုဲ ၜံက်ဗုဂကူနာနာ မွဲဓုပ် ပါ (၂၀) တၞုၚ် ၚုဟ်သွံ ဒှ်အာ စဵုကဵု (၇၀၀) မ္ဂး မွဲတၞုၚ် (၁၀) ဒ္ကေဝ် ၚုဟ်သွံ ယဝ်ဒှ်လ္တူ (၁၁၀၁)မ္ဂး မွဲတၞုၚ် စဵုကဵု (၂၇) ဒ္ကေဝ် ဒးဒုၚ်အကံက်အခေါန်ရ။
ဂဥုဲတၞးဇၞော်ကေုာံ ဂဥုဲပံၚ်ဗာဂျဳနဳယာတုဲဂှ်မ္ဂး ၆၀ တၟံကၠံ၊ ၜံက်သၠမအ၊ ၜံက်တဝ် ကေုာံ ဂဥုဲစဇဗၠု ဂကူနာနာတအ်ဂှ် (၈၀)တၟံကၠံကီု ယဝ်ရၜံက်ဍုၚ်မွဲတၞုၚ်မ္ဂး စၟတ်လဝ် အကံက်အခေါန် (၁)ဒ္ကေဝ်ရ။
အရက်ဗဳယာဂကူနာနာတအ်ဂှ် စၟတ်လဝ်ၚုဟ်အခေါန် (၆၀)တၟံကၠံ ၚုဟ်မးမွဲလဳတာတုဲ ဂကူဝိုၚ်ဂကူနာနာတအ်ဂှ် ဒးဒုၚ်အကံက်အခေါန် (၅၀)တၟံကၠံ ၚုဟ်မွဲလဳတာရ။
ကၠေၚ်ဍေန်၊ ကၠေၚ်ဓာတ်၊ ကၠေၚ်ဒဳဇြေဝ် ကေုာံ ကၠေၚ်က္ၜၚ်ကျာဂျေတ်တအ်ဂှ်မ္ဂး နဒဒှ်ဂကူဗၞိက်တၟေၚ် စၟတ်လဝ်အကံက်အခေါန် (၅)တၟံကၠံတုဲ သၟုဟ်ဓာတ်သဘာဝမ္ဂး စၟတ်သမ္တီလဝ်အကံက်အခေါန် (၈)တၟံကၠံရ။
စပ်ကဵုအကံက်အခေါန်ဗၞိက်ဆက်စၠောံတုဲ ကပေါတ်ဗၞိက်စၞစ၊ ဗၞိက်ပရေၚ်တဵုလွဳ ကေုာံ ဗၞိက်ပရေၚ်လွဳလွတ်ကီု၊ ဗၞိက်သုၚ်စောဲဘာဗ္တောန်လိက် သုၚ်စောဲရုၚ်တအ်ကီု၊ ကပေါတ်ဗၞိက်သုၚ်စောဲ ဆေၚ်ကဵုပရေၚ်ထတ်ယိုတ်ကီု၊ ကပေါတ်ဗၞိက်သုၚ်စောဲပ ရေၚ်ဘာသာ ကေုာံ ပရေၚ်မၞိဟ်တအ်ကီု သီုကဵုဗၞိက်ပရေၚ်ပလံၚ်ဗစိုပ်တအ်ဂှ် ဟွံဒးဒုၚ်အကံက်အခေါန်ရဂှ် ဓမံက်ထ္ၜးလဝ်ရ။
သ္ပတမ်နူဒပ်ပၞာန်သီကေတ်အဝဵုကၟိန်ဍုၚ်ပိတန်တုဲ စဵုကဵုလၟုဟ်ဏံ သီုကၠတ်ထဝ်ဟၟဲမွဲသာ် ကံၚ်ဇြဳပၞာန် လလောၚ်တြးပျးဌာန်ကၠုၚ်ဒၟံၚ် သၞောဝ်ဥပဒေ၊ နဲကဲသၞောဝ်ဥပဒေ သီုကဵုတၚ်စၞောန်ပၟိၚ်ဂမၠိုၚ် အတိုၚ်သၞောဝ်သ္ဇိုၚ်ဒက်ပ္တန် ၝောံပိုဒ် ၄၁၉ ရ။
ပရိုၚ်-သြၚ်လောန်တိုၚ်(မ်)
ဗီုရုပ် -MOI