မတ်မလီု၊ ဨပရဴ (၅)
အပ္ဍဲဂိတုဖေဖဝ်ဝါရဳ ကေုာံ ဂိတုမာတ်ချ် မထပ်ပပဵုပ္တိုန်လဝ် အာယုက်ကာလကာတၟေၚ်ဂှ် ဟိုတ်နူပရေၚ်ပန်ပှော် ဒပ်ကံၚ်ဇြဳပၞာန်တုဲ ပ္ဍဲတွဵုရးဍုၚ်မန် ကောန်အရာပ်ဇီုကပိုက်ချိုတ်တံ သာဂၠိုၚ်ကၠုၚ်ဂှ် ဂွံတီကေတ် နူကဵုတၚ်နၚ် သြၚ်လောန်တိုၚ်(မ်) မကံက်ကပှ် ပ္ကောံပ္ကေဝ်လဝ်တံရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) မကံက်ကပှ်လဝ်တံဂှ်မ္ဂး ပ္ဍဲပွိုၚ်ဍုၚ်ကျာ်ထဝ်၊ ၜဳကလေၚ်၊ သဓီု ကေုာံ ပွိုၚ်ဍုၚ်ရေဝ် တွဵုရးဍုၚ်မန်တံဂှ် အပ္ဍဲပွိုၚ်ၜါဂိတု ဟိုတ်နူပရေၚ်ပန်ပှော် ဒပ်ကံၚ်ဇြဳပၞာန်တုဲ ကောန်အရာပ် ဗ္ဒါဲ (၂၀) ချိုတ်လဝ်တုဲ မၞိဟ်ကလိဂွံဝပ်တံလေဝ် (၄၀) ပြၚ် နွံလဝ်ရ။
ညးဍုၚ်ကွာန်ကောန်အရာပ်တံဝွံ ဟိုတ်နူဒပ်ကံၚ်ဇြဳပၞာန် ပန်ပှော် ဟွံမွဲကဵုဟိုတ်၊ မကမ်လွဟ်ဇၞော် ဒတုံထ္ကး ပ္ဍဲကွာန်ဂမၠိုၚ်၊ ပန်ပှော်ကြာန်န်တံကီု၊ ဟိုတ်နူလောန်ၜက်အာကၠုၚ် အခိၚ်မပိုၚ်ခြာလဝ်တံဂှ်တုဲ ဒးဒုၚ်ပန်ပှော်လဝ်ရ။
ပ္ဍဲကဵုဂှ် ညးဒေသနူပွိုၚ်ဍုၚ်ရေဝ် မလလောၚ်တြးလဝ် ပရေၚ်အုပ်ဓုပ်ပၞာန်တံဂှ်ဝွံ ဟိုတ်နူအာကၠုၚ် လောန်ၜက်အခိၚ်မပိုၚ်ခြာလဝ်တံဂှ်ရ ဒးဒုၚ်ပန်ဂစိုတ်လဝ် ဂၠိုၚ်အိုတ်တုဲ ပ္ဍဲကဵုပွိုၚ်ဍုၚ် နူခရိုၚ်သဓီုတံဂှ် ဟိုတ်နူဒးလွဟ်ဇၞော်တုဲ ပရေၚ်မ္ဒးချိုတ်တံ သာဂၠိုၚ်ကၠုၚ်ရ။
လျိုၚ် PDF ခရိုၚ်သဓီု ကိုဝ်အေမေန်ထောန်ဂှ် ဒပ်ကံၚ်ဇြဳပၞာန်ဝွံ ဇၟာပ်ပ်ဗ္ဒိုပ်ဒပ်ဍေံတံ ဒးဒုၚ်ဗ္တိုက်ဂှ် ပန်ပှော်လွဟ်ဇၞော် လ္တူကွာန်ကောန်အရာပ်တံ မံၚ်တန်တဴတံဂှ်တုဲ ပရေၚ်ဇီုကပိုက်ချိုတ်ဂျိုၚ်တံ သာဂၠိုၚ်ကၠုၚ်လဝ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အခိၚ်ဗ္တံမ္ဂးလေဝ် ပန်ပှော်ဒၟံၚ်လွဟ်ဇၞော်တံကြာန်န်ဏောၚ်။ ဇၟာပ်ပ်ပန်ပှော်ဂှ် ဗ္တုံဒၟံၚ် ဒဵုကဵုအပ္ဍဲကွာန်တံဏောၚ်။ ဒးညးဍုၚ်ကွာန် ဒးကောန်ၚာ်သၟတ်တံတုဲ ချိုတ်ဂျိုၚ်တံလေဝ်နွံတုဲ ကလိဂွံဝပ်တံလေဝ် နွံရ။ ပ္ဍဲဂိတုမာတ်ချ်ဂှ် မၞိဟ်ကလိဂွံဝပ်ဇီုကပိုက်ဂှ် စှ်တၠလ္ပာ်လ္တူနွံဏောၚ်။ ပိုယ်တံ ပန်ပှော်ဍေံတံဏောၚ်ဟီုမ္ဂး ညံၚ်ဂွံစိုပ်ဒၞါဲဍေံတံရ ပိုယ်တံပန်။ ပိုယ်တံ စွံပွန်ကဵုဍေံတံရဏောၚ်။ သွက်ဂွံကၠောန်ဗီုဍေံတံ ကုသ္ၚိကၟိန်ဍေံတံဂှ် မွဲလှ်ေမှ ပိုယ်တံဟွံချပ်လဝ်ပုဟ်။ ဍေံတံဂှ် သွက်ဂွံဗ္တိုက်ပိုယ်ဟီုမ္ဂး ပန်ပှော်စုတ် လွဟ်ဇၞော်အပ္ဍဲကွာန်တံတုဲ ဒးကောန်ကွာန်၊ ဒးတိရစ္ဆာန်၊ ဒးသ္ၚိဌာန်ညးဍုၚ်ကွာန်တံရ” သာ်ဝွံ သ္ဂးရ။
ပ္ဍဲကဵုလၟေၚ်ဒဒှ်တံဏံဂှ် တုဲကၠုၚ်ပ္ဍဲဂိတုမာတ်ချ် (၁၈) တေံ နူကဵုတမ်ဒပ်အမၠံက် ဇြဳဝန် စၟတ် (၃၁၄) ဖျေံသ္ဇိုၚ်ပွိုၚ်ဍုၚ်ၜဳကလေၚ်ဂှ် ဟိုတ်နူပန်ပှော်လဝ် လွဟ်ဇၞော် ကုကွာန်အဝေန်ကျဳ၊ ဂကောံကွာန်ယှိုဲယံၚ်ပျတံဂှ်တုဲ ကောန်ၚာ်သၟတ် အာယုက် (၆) သၞာံမွဲတၠ ဒးချိုတ်အာလဝ်လွာဲဂှ်ရ။
ပ္ဍဲကဵုညးဍုၚ်ကွာန်ကောန်အရာပ် ဇီုကပိုက်ချိုတ်ဂျိုၚ်တံဂှ် ညးဗြဴ ကေုာံ ကောန်ၚာ်သၟတ် ဗ္ဒါဲ (၇၀) တၟံကၠံ ပါလုပ်ဒၟံၚ်တုဲ မၞိဟ်တြုံဂှ် (၃၀) ပြၚ် ပါလုပ်ဒၟံၚ်ရ။
ဆ္ဂး တၚ်နၚ်တံဏံဝွံ နူကဵုသြၚ်လောန်တိုၚ်(မ်) ၜိုတ်က္ဍစိုပ် ပ္ကောံပ္ကေဝ်လဝ်တုဲ ပ္ဍဲဗလးတိဏံ ဂၠိုၚ်နူဏံ တၟာဂလိုၚ်မာန်ရ။
ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် (MSRF) နာဲနဂါဂှ်လေဝ် ၜိုန်ရပရေၚ်ဇီုကပိုက်ချိုတ်ဂျိုၚ် ညးဍုၚ်ကွာန်တံ ဒှ်ကၠုၚ်စေအ်အ်ကီုလေဝ် ဂကောံဗော်ပရေၚ်ဍုၚ်ကွာန် မသ္ပစၞး သွက်ဂကူမန်ကဵု သွက်တွဵုရးဍုၚ်မန်တံဂှ် ကေတ်လျိုၚ်သောၚ်ကလးကဵုဟွံမွဲတုဲ ဒှ်ဒၟံၚ်အကာဲအရာ ညးဒးညးဒုၚ်ရောၚ်ဂှ် ဟီုရ။
“လ္တူမဒှ်ကၠုၚ်ဒၟံၚ်စေအ်အ် ပ္ဍဲတွဵုရးဍုၚ်မန်လၟုဟ်ဂှ် ဗော်ပရေၚ်ဍုၚ်ကွာန်၊ ဂကောံဗော်သွး မသ္ပစၞး သွက်ဂကူမန် ကေုာံ သွက်တွဵုရးဍုၚ်မန်တံဂှ် မုရမျာၚ်မှ ဟွံဂွံမိၚ်ကေတ်ပုဟ်။ ဒှ်ဒၟံၚ်အကာဲအရာ ဇကုဒး ဇကုဒုၚ်ဏောၚ်။ အေ ဂှ်တှ်ေ နကဵုညးဍုၚ်ကွာန်မန်ဂမၠိုၚ် သွက်ဂွံဂ္စါန်ရုန်တိတ် နူသၟဝ်ဒပ်ပၞာန် မဍဵုဍိုက်ဓဇန်ဒၟံၚ် ကုညးဍုၚ်ကွာန်တံ ဗွဲမပြဟ်ဂှ် ပၟိက်ဇၞော်ဒၟံၚ်ဏောၚ်။ သွက်ဂွံဂွံပရေၚ်ဗၠးၜးသာ်ဏံမွဲဂှ် ၜိုတ်သ္ပမာန် မွဲနဲမွဲဗီု သွက်ဂွံပါလုပ်ရီုဗၚ်ကဵု လ္ပာ်ဂကောံဇြဟတ်ပၠန်ဂတးပိုယ်တံအိုတ်ဂှ် မိက်ဂွံဖ္တိုက်ဖ္အောဝ်တဴရ” သာ်ဝွံ ဟီုရ။
အခိၚ်လၟုဟ်ဂှ်လေဝ် ပ္ဍဲတွဵုရးဍုၚ်မန် ပေါဲဗ္တိုက်တံ ဒှ်ကၠုၚ်အဆက်က်တုဲ ပ္ဍဲကဵုပေါဲဗ္တိုက်တံဏံဂှ် ဟိုတ်နူကောန်ဒပ်ကံၚ်ဇြဳပၞာန်တံ ပြဟ်လလုဲဂၠိုၚ်ကၠုၚ်ဂှ်ရ စိုတ်ဖေက်ဂၠိုၚ်ကၠုၚ်တုဲ ညးဍုၚ်ကွာန် ကေုာံ ကောန်သ္ဂံၚ်ပၠန်ဂတးတံဂှ် ပါ်ခြာဟွံဒးရတုဲ ဇၟာပ်ညာတ်ဂှ် ပန်ပှော်ဒၟံၚ်ရောၚ် နာဲနဂါ သ္ဂးရ။
တွဵုရးဍုၚ်မန်ဝွံ ကြဴနူပရေၚ်ပၞာန်သီအဝဵု လောန်ၜက်အာတုဲ အပ္ဍဲပွိုၚ် (၃) ဂိတု ပ္ဍဲသၞာံဏံ အကြာဒပ်စဵုဒၞါဒေသ၊ ဒပ်ပၞာန်ဗၠးၜးကောန်ဂကူကရေၚ် KNLA တံ ကေုာံ ကံၚ်ဇြဳပၞာန်တံဂှ် ပေါဲဗ္တိုက်အပံၚ် ဟွံအောန်နူကဵု (၂၀) ဝါ က္တဵုဒှ်လဝ်တုဲ အပ္ဍဲပေါဲဗ္တိုက်တံဏံဂှ် ကောန်အရာပ်ဇီုကပိုက်ချိုတ်ဂျိုၚ်တံလေဝ် ဆက်နွံဒၟံၚ်ရ။
အတိုၚ်တၚ်နၚ် ဂကောံရီုဗၚ်မၚ်မွဲ ကောန်ထံၚ်ပရေၚ်ဍုၚ်ကွာန် (AAPP) တံဂှ်မ္ဂး အပ္ဍဲကာလဒပ်ပၞာန်သီအဝဵု ပွိုၚ် (၂) သၞာံ ပ္ဍဲတွဵုရးဍုၚ်မန်ဂှ် ကောန်အရာပ် ဗ္ဒါဲ (၆၀) ဒးဒုၚ်ဂစိုတ်လဝ်ရောၚ် ပ္ဍဲဂိတုဨပရဴ (၃) တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်− ဂကောံရီုဗၚ်မှာဇန် ပရဟိတယှိုဲဟေန်တာ
ဗီုလိက်− အဃောဂွံဆဵုကေတ် မၞိဟ်မချိုတ်လဝ် နကဵုဝပ်မကမ် ဗ္ဒါဲကွာန်အံၚ်သာယာ ဍုၚ်ရေဝ်။