ၜဳကလေၚ်၊ ဨပရဴ (၅)
ပ္ဍဲတွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ အကြာကွာန်တပျေနဳ ကေုာံ ကွာန်အဠူ လ္တူဂၠံၚ်ကွဳစက် လ္ဂုၚ်−မတ်မလီုဂှ် ပ္ဍဲဂိတုဨပရဴ (၄) အခိၚ်နူဂယးဂှ် ဟိုတ်နူရေၚ်ကွဳစက်ကံၚ်ဇြဳပၞာန် ဒးဒုၚ်ဗ္တိုက်တုဲ ကောန်ဂကောံဒပ်ကံၚ်ဇြဳပၞာန် (၄) တၠ ကလိဂွံလဝ်ဝပ်ဂှ် ဥက္ကဌကမ္မတဳကောပ်ကာဲ ကေၚ်ကာခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုတ္ၚဲဂှ် အခိၚ်နူဂယး ၜိုတ် (၉) နာဍဳ နူကဵုတမ်ဒပ် (၃) ဗော်သွးကောန်ဂကူကရေၚ် KNLA တံ အာစိုပ်ပန်ပှော်လဝ် ကုရေၚ်ကွဳစက်ကံၚ်ဇြဳပၞာန် ကွဳစက် (၅) ဖ္ဍိုက်ပါ နူကဵုပွိုၚ်ဍုၚ်ကျာ်ထဝ် မဒဳကၠုၚ် လ္ပာ်ပွိုၚ်ဍုၚ်သဓီု နကဵုလွဟ်ဇၞော်၊ လွဟ်ဍောတ်တံရ။
ဟိုတ်နူပရေၚ်ဗ္တိုက်ဏံတုဲ ပရေၚ်ပန်ပှော်မွဲလ္ပာ်ကုမွဲလ္ပာ် က္တဵုဒှ်လဝ် လလအ်ဗ္ဒါဲဘာ်နာဍဳတုဲ ဒပ်ပံၚ်ကောံ KNLA ဂှ် ဇီုကပိုက်ဒးလဝ်ဟွံမွဲ ဆုတ်ကလေၚ်မာန်လဝ်ဂှ် သ္ဂးရ။
ကြဴနူပရေၚ်ဗ္တိုက်ဂှ်တုဲ ကရောၚ်ပၞာန်ကံၚ်ဇြဳပၞာန်ဝွံ ဘပဠဟီုဂးဏာလဝ် ဒဒှ်ရစံၚ်ပလီုကွာန် တပျေနဳ ကေုာံ ကွာန်အဠူတံရောၚ်ဂှ် ဂွံတီကေတ် အတိုၚ်ဂလာန်ညးဒေသတံရ။
တုဲကၠုၚ် ပ္ဍဲဂိတုမာတ်ချ် (၂၉) တေံဂှ်လေဝ် ရေၚ်ကွဳစက်ကံၚ်ဇြဳပၞာန် ဒးဒုၚ်ပန် လ္တူဂၠံၚ်ကွဳစက် လ္ဂုၚ်−မတ်မလီု ပ္ဍဲကွာန်အဠူဂှ်တုဲ ကြဴနူပေါဲဗ္တိုက်ၜါလ္ပာ် က္တဵုဒှ်တုဲဂှ် လ္ပာ်ကံၚ်ဇြဳပၞာန် ပန်ပှော်လဝ်ဆဆဵုဂှ်ရ သ္ၚိဒၟံၚ် ဗ္ဒါဲ (၄၀) ဒးမကမ်လီုလာ်အာလဝ်တုဲ ညးဒေသ (၁) တၠ ချိုတ်တုဲ (၁) တၠ ကလိဂွံလဝ်ဝပ်ရ။
ပ္ဍဲအကြာကွာန်တပျေနဳ ကေုာံ ကွာန်အဠူ ပွိုၚ်ဍုၚ်ၜဳကလေၚ်ဂှ် ရေၚ်ကွဳစက်ကံၚ်ဇြဳပၞာန်တံ ဒးဒုၚ်ဗ္တိုက်ဒၟံၚ် မွဲဏှမွဲဏှတုဲ အပ္ဍဲပရေၚ်ဗ္တိုက်ဏံဂှ် ကောန်အရာပ်ဇီုကပိုက်ချိုတ်ဂျိုၚ်တံ ဆက်နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်− ဗီုတြေံ ရေၚ်ကွဳစက်ကံၚ်ဇြဳပၞာန်