ကွာလာလာမ်ပူ၊ ဨပရဴ (၅)
အလဵုအသဳ သ္ကိုပ်ဝန်ဇၞော် အာန်ဝါအဳဗရာဟေန် ဍုၚ်မလေဝ်ယှာဂှ် နဒဒှ်ပရေၚ်ပြုပြေၚ်ပြံၚ်လှာဲ စပ်ကဵုသၞောဝ်ဓဝ် မသ္ကဵုဒှ်ကိတ်ညဳတဴ နဒဒှ်လက္ကရဴအိုတ်ဂှ်တုဲ ဂ္စါန်ဒၟံၚ် သွက်ဂွံတာဒၞါ ပရေၚ်ဂစိုတ်ဇကုဇကုတံရောၚ်ဂှ် ဝန်ဇၞော်ကေၚ်ကာသၞောဝ်ဓဝ် ဟီုဂးလဝ် ပ္ဍဲဂိတုဨပရဴ (၄) တေံရ။
ပ္ဍဲကဵုပါလဳမာန်မလေဝ်ယှာဂှ် ထပိုတ်ကၠေံ လၟိဟ်ဂၞန်ဒုဟ်ဒဏ် ဟွံဒေါအ်ဟွံဂွံ မဖျေံစၟတ်ဒဏ်ဂစိုတ်မာန်တံဂှ်တုဲ သွက်ဂွံပလီု ဒုဟ်ဒဏ်မွဲအာယုက် အတိုၚ်သဘာဝဂှ် ပါ်မာဲသ္ဂုတ်သွာတ်တုဲ လအ်ဂွံမွဲတ္ၚဲဂှ် တၚ်လလောၚ်တြးဏံ မံက်တိတ်ကၠုၚ်ရ။
အတိုၚ်သၞောဝ်ဥပဒေလၟုဟ်မ္ဂး မၞိဟ်ပ္တိတ်ဇြဟတ် သွက်ဂွံဂစိုတ်ဇကုဇကု ညးလဵုမွဲဟွံဟီု ဒဏ်ထံၚ်မွဲသၞာံကဵုဒှ်၊ ဒဏ်သြန်ကဵုဒှ် သီုၜါဏံကဵုဒှ် ဖျေံစၟတ်မာန်ရောၚ်ဂှ် စၞောန်ပျးလဝ်ရ။
အလဵုအသဳဂှ် ၜိုန်ရမိက်ဂွံရုပ်သီကၠေံ တၚ်ဏံဂှ်ကီုလေဝ် ဒဒှ်မဂစိုတ်ကၠေံဇကုဇကုဂှ် ဆက်ထိၚ်ဒက်အာ နဒဒှ်အမှုရာဇဝတ်မွဲရောၚ်ဂှ် ဝန်ဇၞော်ကေၚ်ကာသၞောဝ်ဓဝ် ဟီုဂးလဝ်ရ။
သွက်ကိစ္စ မရီုဗၚ်ကဵု သွက်ဂွံဂစိုတ်ဇကုဇကု သီုကဵုပါလုပ်ကောန်ၚာ်သၟတ်တံကဵု ညးက္ဍဟ်ဟွံဖောအ်ဗြေဝ်တံဂှ် အလဵုအသဳ ပၠောပ်လဝ်ဂလာန် သွက်ဂွံဖျေံစၟတ်ကဵုဒုဟ်ဒဏ် မသ္ကာတ်မြဟ်တံရ။
“ ဣဏံဝွံ ဒုၚ်သ္ဇိုၚ်ကဵု တၚ်နၚ်နွံဒၟံၚ် အပ္ဍဲသွာၚ်ပ္တိတ်ဇြဟတ် သွက်ဂွံဂစိုတ်ဇကုတံဂှ်တုဲ ပြဝဏံဝွံ ဒှ်ပွစိုတ်ဟွံထတ်ယုက် ဟွံသေၚ်မ္ဂး ဒှ်ဖဵုအဆက်ယဲဝေဒနာစိုတ်တံရောၚ်” သာ်ဝွံ ဝန်ဇၞော်ဂှ် ဟီုလဝ်ရ။
ပ္ဍဲကဵုစၟတ်သမ္တီ မလလောၚ်ပ္တိတ်လဝ် သၞာံတုဲတေံဂှ် ဍုၚ်မလေဝ်ယှာဝွံ ယဝ်ရၜတ်ကၞာတ်ကဵု (၆၃၁) အမှု မက္တဵုဒှ်လဝ် ပ္ဍဲသၞာံ ၂၀၂၀ တေံဂှ်မ္ဂး ပ္ဍဲသၞာံ ၂၀၂၁ ဂှ် အမှုဂစိုတ်ဇကုဇကု သၠုၚ်တိုန်ကၠုၚ်လဝ် စဵုကဵု (၁၁၄၂) အမှုရောၚ်ဂှ် ဝန်ဇၞော်ပရေၚ်ထတ်ယုက်တြေံ ဟီုဂးလဝ်ရ။
အတိုၚ်တၚ်နၚ် တိုက်သြန်ဂၠးတိ ပြဟ်ဟ်ဏံဂှ်မ္ဂး ဒမြိပ်ဂစိုတ်ဇကုဂှ်ဝွံ ပ္ဍဲသၞာံ ၂၀၁၉ ပ္ဍဲကဵုလၟိဟ်မၞိဟ် (၁) ကိုဋ်ဂှ် ( ၅ ဒဿမ ၇) တၠ နွံလဝ်ရ။
ဝန်ဇၞော်ကေၚ်ကာသၞောဝ်ဓဝ်ဂှ် ပ္ဍဲပရေၚ်ပြုပြေၚ်ပြံၚ်လှာဲအလဵုအသဳဂှ် ကုမၞိဟ်ဇီုကပိုက်ဒးဂိတံ သွက်ဂွံကေတ်အရီုဗၚ်ဂှ်ကီု၊ သွက်ဂွံတးပါဲကၠေံ ယၟုလီုလီုတံဂှ်ကီု ကေုာံ သွက်ဂွံဖအောန်ဖျေံ ဒမြိပ်ဂစိုတ်ဇကုဇကု ပ္ဍဲကၟိန်ဍုၚ်ဂှ် ကဵုအာဇြဟတ်ဂရိုဟ်ရောၚ် ဒဒှ်ရစၟဳစလဝ်ဂှ် ဟီုဂးလဝ်ရ။
Ref: CNA