မတ်မလီု-ဨဗြဴ(၅)
ဟိုတ်ပြဝကံၚ်ဇြဳပၞာန် ဂြာတ်ထောံဖျေံဗုမ် နူက္ၜၚ်ကျာ ဟၟဲကဵုပရေၚ်စၚ်ခြၚ်ဗ္စာရဏာဂှ်ရ ညးအာယုက်ဇၞော်ဂမၠိုၚ် ထောံဌာန်ဒၟံၚ်တုဲ ဒးဂြိပ်ဒဴဒၟံၚ်ကီု သီုနွံဒၟံၚ်ပၟိက်ကဵု အရီုဗၚ်ထံက်ပၚ်ပရေၚ်မၞိဟ်ရဂှ် ကလုတ်တမာန်ဥူကျဝ်မိုဝ်ထောန် ဟီုသ္ဂးလဝ်ရ။
ပ္ဍဲဌာန်ဂအုပ်ကုလသမဂ္ဂ ဖျေံသ္ဇိုၚ်ဍုၚ်နယူယျံက်ဂှ် ကၠောန်ဗဒှ်ဒၟံၚ်ကောံဓရီု Open-Ended Working Group on Ageing မရနုက်ကဵု (၁၃)ဝါ နူဂိတုဨဗြဴ စၟတ်တ္ၚဲ(၃) စဵုကဵုစၟတ်တ္ၚဲ(၆)တုဲ ပ္ဍဲကောံဓရီုဂှ် ကလုတ်တမာန် ညးစၞးကၟိန်ဍုၚ်ဗၟာဒ္တန် ဟီုမြော်လဝ် ဂလာန်လၟိၚ်ရ။
နကဵုကၟိန်ဍုၚ်နာနာဂမၠိုၚ် ပ္ဍဲလ္တူကိစ္စပ ရေၚ်ကၟိန်ဍုၚ်ဗၟာ၊ ညးအာယုက်ဇၞော်တအ် ဒးဆေၚ်ဒၟံၚ်မုက်အဓိကဂှ် ညံၚ်ဂွံစွံကဵုအာရီုဗွဲတၟေၚ်၊ ပရေၚ်ရေၚ်တၠုၚ်ကေတ်အရေဝ် ညံၚ်ဂွံစိုပ်တရဴကီု နွံဒၟံၚ်ပၟိက်ကဵုအရီုဗၚ်တအ်ရဂှ် အမာန်ကလုတ်တမာန် ဟီုသ္ဂးလဝ်ရ။
နူလောန်ကၠုၚ် (၅)သၞာံတေံဂှ် အတိုၚ်တၚ်ဂၞၚ် UNFPA ပကောံပကေဝ်လဝ်မ္ဂး လၟိဟ်ညးအာယုက်ဇၞော် မၞုံပ္ဍဲကၟိန်ဍုၚ်ဗၟာဂှ် အကြာပွိုၚ်(၃၀)သၞာံဏံ ဂၠိုၚ်တိုန်ကၠုၚ် စဵုကဵုပိချရောၚ်တုဲ သွက်ဂွံသ္ပဂရုကၠေံစိုတ် ပ္ဍဲပရေၚ်ရေၚ်တၠုၚ်ပရေၚ်မၞိဟ် ယန္တရာပရေၚ်စဵုဒၞာ ကေုာံ မူဝါဒဒှ်ဒတုဲဖိုလ် သွက်ညးအာယုက်ဇၞော်တအ်ဂှ် ဒုၚ်သ္ဇိုၚ်ကဵုတၚ်ကဵုကသပ်ဏံတုဲ ဓမံက်ကၠုၚ်လဝ်ရုပ်ရဴ ပရေၚ်တဴတက် မံက်က်ဂတဝ်ဂတဝ်ရဂှ် ဟီုသ္ဂးလဝ်ရ။
သ္အာၚ်နူဂှ်ပၠန် ပွမကဵုဂလိုၚ်ပတိုန် သြန်ဂိတုပေန်ဇြေန်ဒေါံဇူ၊ ပွမပံက်ကဵု ဌာန်ဇၞူညးအာယုက်ဇၞော်၊ ပွမဇဳဇန်ဖန်ဖက်ကဵု ပရေၚ်မၚ်မွဲရံၚ်စံၚ် ဒုၚ်သ္ဇိုၚ်လ္တူပွဳပွူ၊ ပွမပ္ကတ်ပကေၚ်ကဵု ညးမၚ်မွဲရံၚ်စံၚ် မၞိဟ်အာယုက်ဇၞော်၊ ပွမရေၚ်တၠုၚ်ဂလိုၚ်ပ္တိုန်ကဵု အခေါၚ်ဒုၚ်စသိုၚ် ပရေၚ်မၚ်မွဲရံၚ်စံၚ် ပရေၚ်ထတ်ယိုတ်ကီု သီုကဵုပရေၚ်ထံက်ပၚ်ကဵု သ္ၚိဒၟံၚ်တအ် ပါလုပ်ဒၟံၚ်ရဂှ် ဂွံတီကေတ်ရ။
ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ ညးဍုၚ်ကွာန် ဗ္ဒာဲ(၂)ပြကောဋိကိုတ် ဒးဂြိပ်ဒဴပါဲဓလေတ်ဒၟံၚ်တုဲ ဟိုတ်နူပန်ဗတိုက်ကၠုၚ်ကဵုက္ၜၚ်ကျာ ကေုာံပရေၚ်ဒးဒုၚ်ပြိုၚ်ဂစိုတ်ဗွဝ်ကဵုဗွဝ်တုဲ ညးဍုၚ်ကွာန် (၇၀၀)တၠပြၚ်ဒးချိုတ်လဝ်ရဂှ် NUG လလောၚ်တြးလဝ်ရ။
ကောံဓရီု Open-Ended Working Group on Ageing မရနုက်ကဵု (၁၃)ဝါဂှ် မ္ၚးနူ ကၟိန်ဍုၚ်လုပ်ဂကောံကုလသမဂ္ဂတအ်တုဲ ဂကောံ National Human Rights Institutions-NHRIs မၞုံကဆံၚ်(A) (၁၅)ဂကောံကီု သီုကဵုဂကောံအလဵုအသဳဟွံသေၚ်(၁၇)ဂကောံတအ် ပါလုပ်ဒၟံၚ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)