တၚ်ဆက်စၠောံသၟာန်သွဟ်လဝ်ကဵု သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်
ဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲ ပ္ဍဲလိက်ကသုက် NCA (၇)ဂကောံတအ်ဂှ် ပ္ဍဲပြသၞာပရေၚ်ဍုၚ်ကွာန် ကၟိန်ဍုၚ်ဗၟာဂှ် ညံၚ်ဂွံဒှ်ပေါဲသဳကၠဳ ပါလုပ်သီုညးဖအိုတ်ကီု သီုကဵုသွက်ဂွံက္လေၚ်ဓမံက်ရုပ်ရဴ လၟေၚ်ကမၠောန်ပရေၚ်ၜိုဟ်လလံဂှ် ဆဵုဂဗလဝ်ကဵု ကံၚ်ဇြဳပၞာန်ရ။ ဟိုတ်ဂှ်ရ ပရေၚ်ပ္တိတ်ဇြဟတ်ဂကောံဒေါံပန်ပှော် (၇)ဂကောံညံၚ်ဂွံဒှ်ပေါဲသဳကၠဳပရေၚ်ဍုၚ်ကွာန်ကီု၊ အကာဲအရာက္တဵုဒှ်ကၠုၚ်မာန်ကီု၊ ဗလးပရေၚ်ဍုၚ်ကွာန်ကၟိန်ဍုၚ်ဗၟာ အနာဂတ်ဂတဏံကီု ဗလးအကာဲအရာဗီုပြၚ်လဵု က္တဵုဒှ်ကၠုၚ်မာန်ရောဟီုဂှ် စပ်ကဵုအကာဲအရာဏံတုဲ ဆက်စၠောံသၟာန်သွဟ်လဝ်ကဵု သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ရ။
-ကိုပ်ကၠာအိုတ်ဏံ ပ္ဍဲလတူ ဂကောံဒေါံပန်ပှ်ော (၇) ဂကောံ ဆဵုဂဗလဝ်ကဵု ကံၚ်ဇြဳပၞာန်တုဲ ညံၚ်ဂွံဒှ်ပေါဲသဳကၠဳပရေၚ်ဍုၚ်ကွာန် ဂွံပါလုပ်သီုညးဖအိုတ်မာန် ဂစာန်ပ္တိတ်ကၠုၚ်ဒၟံၚ်ဇြဟတ်ဂှ် ဗီုလဵုညာတ်ကေတ်ရော။
ဂကောံဒေါံပန်ပှ်ော(၇) ဂကောံဂှ်တှ်ေ ကၠာတေံ နွံဒၟံၚ် (၁၀)ဂကောံရ။ ပ္ဍဲကဵုဂှ် ဂကောံဗတိုက်ကၠုၚ်လေဝ် နွံဒၟံၚ်ဂှ်ရတှ်ေ ပံၚ်တောဲကဵုဍေံတုဲ ဂကောံရေၚ်တၠုၚ်ဒၟံၚ်ဂှ် နွံ(၇)ဂကောံရလေဝ်။ ပရေၚ်ပလေဝ်သၞောဝ်သ္ဇိုၚ်ဒက်ပ္တန် ပေါဲရုဲမာဲဟီုဂှ် ဒှ်လၟေၚ်ဂၠံၚ်တရဴ ပၠန်ဂတးဟွံသေၚ်ပုဟ်လေဝ်။ ဒှ်အာဂၠံၚ်တရဴ ပရေၚ်ဍုၚ်ကွာန်ဗော်ယျ။ ရပ်လဝ်လွဟ်တုဲတှ်ေ ဂကောံ EAO ကၠောန်ဒၟံၚ်ကမၠောန်ပရေၚ်ဍုၚ်ကွာန်ဗော်ဏောၚ်တှ်ေ ဩဇာဂကောံဂှ် အောန်ယအ်စှ်ေအာညိရ။ နကဵုညးတအ် ဒှ်အာဗီုပြၚ် ကၠောန်ဒၟံၚ်ကမၠောန် ပ္ဍဲလာၚ်ဗော်ပရေၚ်ဍုၚ်ကွာန် ညးတအ်ကၠောန်မာန်ဂှ်ရ။ ဒှ်အရေဝ် ဗော်လုပ်သၞောဝ်တအ် ဒးဟီုဂးရ။ ဆ္ဂးဂှ်ဂကောံ EAO တအ် ပ္ဍဲလတူဂလာန်ဏံ ဒုၚ်ဒၟံၚ်တဲရ၊ သဳကၠဳဏောၚ်ဟီုတှ်ေ အရာဏံဂှ် အစောန်စရာဲဍာ်ဒကေဝ်ညးတအ်စှ်ေအာရ။ ညးတအ်ဂှ် ရပ်လဝ်လွဟ်တုဲ ကၠောန်ဒၟံၚ်ပရေၚ်ပၠန်ဂတးရ။ ကၠောန်ပၠန်ဂတးတုဲ ဒးကဵုအာဇြဟတ်ဒရိုဟ်ဏောၚ်။ လုကဴဟွံဂွံ အရာဇကုမိက်ဂွံဂွံဏီတှ်ေ ဟွံဖျေံလွဟ်ပုဟ်ဟီုဂှ် စေဝ်ပၞောန် ပ္ဍဲဂကောံပၠန်ဂတးတအ်ဗီုဏံဂှ် လစွံစိုတ်ဗီုဏံ ဒးနွံလဝ်ဏောၚ်။ ယဝ်ရကဵုဖျုန် ဍိုက်ကၠောန်ဒၟံၚ်ပရေၚ်ပလေဝ်ပလေတ်သၞောဝ်သ္ဇိုၚ် ပေါဲရုဲမာဲတအ်ဏောၚ်တှ်ေ ဟွံလအ်ပုဟ်ဂကောံတအ်ဏံ စိုပ်အာကဆံၚ်ဗော်ပရေၚ်ကွာန်ဏောၚ်။
ဂကောံရပ်လွဟ်တအ် ဇီုဓဗတ်ဒးညးသ္ကအ်တုဲ လစွံစိုတ်ဒကးပရး ညံၚ်ဂွံကြဳကှ်စှ်ေအာဂှ် နူကဵုဂၠံၚ်တရဴပရေၚ်ပၠန်ဂတး ညံၚ်ဂွံစိုပ်ကၠုၚ် ဂၠံၚ်တရဴပရေၚ်ဍုၚ်ကွာန်ဂှ် လ္ပာ်ဍေံတအ်ကၠောန်သ္ပဒၟံၚ် နဲကဲစုၚ်ရ။ ယဝ်ဒးသရောပ်ဟီုထောံတှ်ေ ဂကောံရပ်လွဟ် EAO တအ်ဂှ် နကဵုဂၠံၚ်တရဴရပ်လွဟ်ရ ဒးကဵုဇြဟတ်ဓရိုဟ်ကဵု အလဵုအသဳဏောၚ်။ အာတ်မိက်ထေက်ဏောၚ် ညာတ်ကေတ်ရ။ ဗက်ပၟိက်အလဵုအသဳတုဲ ယဝ်ရကၠောန်ဒၟံၚဏောၚ်တှ်ေ ခြာဟွံလအ် နူကဵုဘဝ ဒၞာဲစွံလဝ်ဂှ် ဒှ်ဘဝ ဒၞာဲဂွံစကာဏောၚ်ဂှ် ညာတ်ကေတ်ရ။
-ပ္ဍဲပြသၞာပရေၚ်ဍုၚ်ကွာန်လၟုဟ်ဏံ ပ္ဍဲလတူဂကောံဒေါံပန်ပှ်ော (၇)ဂကောံဒတူလာၚ်ဒၟံၚ်ဂှ် ဗီုလဵုညာတ်ကေတ်ရော။
ဂကောံ EAO တအ်ဂှ် မွဲဂကောံကဵုမွဲဂကောံ ဟွံတုပ်ညးသ္ကအ်ပုဟ်။ Agenda ဇကုကဵုဇကု နွံဒၟံၚ်ရ။ အကာဲအရာဇကုကဵုဇကု နွံဒၟံၚ်ရ။ EAO လ္ၚဵုတအ်ဂှ်တှ်ေ ဒေါံဟွံဂွံတုဲ ဒှ်ဒၟံၚ်ဗီုပြၚ် ဒးဆက်ဆောံဒၟံၚ်ကဵု စကစ ရ ဟိုတ်နူဇြဟတ်ဟၟဲ ကဵုဒှ်၊ ပ္ဍဲတိဍာ်ညးတအ်ဂှ် အကာဲအရာဂွံဒတူလာၚ်ကေတ်တၞဟ်ခြာ ဟွံမာန်ကဵုဒှ်၊ အကာဲအရာဗီုဏံ ဒးဆက်ဆောံဒၟံၚ်ကဵု စကစ နွံဒၟံၚ်ရ။ ဒးပံၚ်တောဲ ဆက်စၠောံဒၟံၚ်တအ်ဂှ် နွံရ။ ဂကောံလ္ၚဵုဂှ်တှ်ေ ဂကောံစုက်လုက်ကဵု ဍုၚ်ကြုက်ဂှ်လေဝ်။ ဂကောံသ္ကုတ်သၟဝ်ကျာ (၇)ဂကောံရ။ ညးတအ်လေဝ် အတိုၚ်အကာဲအရာ ဒေသညးတအ် ပရေၚ်ဒးပံၚ်တောဲရေၚ်တၠုၚ်ကဵုကြုက် နွံရ။ တၚ်ရန်တၟံညးတအ်ဂှ်တှ်ေ မွဲဂကောံကဵုမွဲဂကောံ ဟွံတုပ်ညးသ္ကအ်ပုဟ်။ Agenda ဇကုကဵုဇကု ပ္ဍဲညးတအ်နွံဏောၚ် ထေၚ်ကေတ်ရ။ ပရေၚ်ကၠောန်သ္ပဗီုဏံဂှ် ညံၚ်ဂကောံရပ်လွဟ်ကောန်ဍုၚ်အရၚ်တအ်သီုဖအိုတ် ဂွံလုပ်တုပ်စိုတ်ဂှ် ဝါဂါတ်ဒၟံၚ်။ ဂအုပ်သ္ကိုပ်ဗိုလ်ဇၞော်မေန်အံၚ်လှာၚ်ဂှ်တှ်ေ သဳကၠဳလဝ်မွဲမွဲဂကောံ တၞဟ်တၞဟ်ရ။ လ္ပာ်ဏံဂှ် ဂကောံထ္ပက်လဝ်စၟတ်တဲ NCA တအ်ဂှ် သဳကၠဳလဝ်တၞဟ်ခြာ။ ဍေံဂှ်တှ်ေ ဖျေံတုဲ ဝေၚ်ဒၟံၚ်ရ။ ညံၚ်ဂွံစိုပ်အကာဲအရာညးတအ် နွံပၟိက်ဂှ် ပံၚ်တောဲကၠောန်ရေၚ်တၠုၚ်အာမွဲကရောံကဵုမေန်အံၚ်လှာၚ်ဟီုဂှ် ဂွံဒှ်အာမွဲဖျုန် မွဲပလိုဟ် ဍေံဟွံလောဲပုဟ်။ ပ္ဍဲလ္ပာ်ဏံပၠန်လေဝ် ဂကောံဆက်စၠောံရေၚ်တၠုၚ်ဒၟံၚ်ကဵု NUG,PDF တအ်လေဝ်နွံဒၟံၚ်ရ။ အလုံမွဲကၟိန်ဍုၚ်လေဝ် ပရေၚ်ကလိုက်ကၟဵုညးဍုၚ်ကွာန် ဆေၚ်ကဵုပၞာန်တအ်လေဝ် အကာဲအရာဟွံညိၚ်ဝတ် နွံဒၟံၚ်ဇၟာပ်ပ်ဒၞာဲရ။ အကာဲအရာဏံဂှ်တှ်ေ သွက်ဂွံဖန်ဗဒှ် အကာဲအရာ ဗီုဇကုနွံပၟိက်ဂှ် ဍေံဒှ်ဟွံလောဲ။ ၜိုတ်အခေါၚ်အရာဍေံမိက်ဂွံကဵုဓဝ်ဂှ်တှ်ေ လ္ပာ်ဏံ ပြေစိုတ်တုဲ ပ္ဍဲမွဲမွဲအခိၚ် ၜိုဟ်သြိုဟ်အာဏောၚ်၊ ညိၚ်ဝတ်အာဏောၚ်ဟီုဂှ် ဒှ်ဟွံမာန်ရ။ အရာဂွံဒးကၠောန်ချိုတ်တ်ပၠိုတ်တ်ဂှ် လ္ပာ်ဍေံတအ် ကၠောန်ရ။ ဂကောံသှ်ေဒၟံၚ်တအ်ဂှ်လေဝ် ဗီုပြၚ်ညးတအ်ကဵုညးတအ် ကၠောန်ဒၟံၚ်ရဂှ် အဲဂွံညာတ်ကေတ်ရ။
-အလန်လကြဴအိုတ်ဏံ က္ဍိုပ်သ္ကိုပ်ပၞာန်လေဝ် ကေတ်အာအရေဝ်ကဵု EAO ထံက်ပၚ်ထ္ၜလဘာ်ဒၟံၚ် NUG, PDF တအ် ပိုတ်တ်သ္ကုတ်တ်ဏောၚ်ဂှ် ဟီုဂးလဝ်နွံရ၊ ဟီုတှ်ေ ဗလးပရေၚ်ဍုၚ်ကွာန်ကၟိန်ဍုၚ်ဗၟာဏံ မုဆက်က္တဵဒှ်ကၠုၚ်မာန်ရော။
နကဵုဍေံတအ်ဂှ် ဟွံဒးစိုတ်ပရေၚ်ပၠန်ဂတးရပ်လွဟ်ရ။ ဂကောံလဵုလေဝ် ရပ်လဝ်လွဟ်တှ်ေ ဍေံဟွံဒးစိုတ်ရ။ ထံက်ဂလာန်ကဵု NUG, PDF တှ်ေ ဍေံတအ်ဗတိုက်သရိုဟ်အာ ပေၚ်ၚ်ဏောၚ်။ နူဂွံလဝ်ပရေၚ်ဗၠးၜတုဲ ပံၚ်လၟိဟ်သၞာံ (၇၀)ပြၚ်တေံရ ဂကောံရပ်လွဟ်ကောန်ဍုၚ်အရၚ်တအ် နွံကၠုၚ်ဒၟံၚ်။ ဂကောံလဵုလေဝ် ဍေံတအ် ဂွံဗတိုက်သရိုဟ်လဝ် ပ္ဍဲဒပ်ပၞာန်ဂှ် ဟၟဲပုဟ်။ ဂွံဗတိုက်သရိုဟ်ဟီုဂှ် ဒှ်ဟွံမာန်လးလးရ။ ဇြဟတ်ညးကဵုညးနွံဒၟံၚ်ဏောၚ်။ ပ္ဍဲကဵုဂကောံတအ်လေဝ် နွံဒၟံၚ်ၜါဂကူရ။ ဒၟာနူညးတအ်ဗတိုက်ဟွံမာန်တုဲ ဂကောံဒေါံလဝ်ပန်ပှ်ော နွံဒၟံၚ်။ ဂကောံကိတ်ညဳကဵုဍေံတုဲ ပံၚ်ဒၟံၚ် နွံရ။ ပ္ဍဲလ္တူဂကောံတအ်ဂှ် ဍေံဟီုဂး ဂွံမာန်ရ။ ဂကောံဗတိုက်ဒၟံၚ်ကဵုဍေံတအ်ဂှ်တှ်ေ ၜိုတ်အရေဝ်ဏံဓဝ်ရတှ်ေ ဗီုလဵုပလေဝ် လ္ပာ်တေံဂွံဒးဒုၚ်စသိုၚ်ဟၟဲပုဟ်။ အရေဝ်ဂှ် ဍေံဟီုဒၟံၚ်တွဵုရ။ သွက်ဂွံဗတိုက်သရိုဟ်ဂှ် ဟွံလောဲပုဟ်။ အနာဂတ်ကၟိန်ဍုၚ်ဗၟာဂှ်တှ်ေ ထုဲထံၚ်အာ အတိုၚ်ဗီုပြၚ်ဏံတုဲ ပ္ဍဲသၟဝ်က္ဍိုပ်အခေါၚ်အရာဖေတ်ဒရေဝ်ဂှ် ဝေၚ်ဒၟံၚ် ဗၠိုက်မွဲလစုတ်၊ မံက်မွဲလစုတ်တုဲ ဟွံစိုပ်ဒၟံၚ်တရဴ ပွိုၚ်သၞာံ(၇၀)ပြၚ်ကၠုၚ်ဒၟံၚ်ယျ။ ကောန်ဍုၚ်အရၚ်တအ်လေဝ် ဟွံပတှ်ေဒပ်ပၞာန်ပုဟ်။ ဒပ်ပၞာန်လေဝ် ဟွံပတှ်ေကောန်ဍုၚ်အရၚ်တအ်ပုဟ်။ အရာဏံဂှ် သွက်ဂွံဒက်ပ္တန်ပရေၚ်ၜိုဟ်လလံ သွက်ဂွံဒက်ပ္တန်ဓဝ်ပတှ်ေဂှ်တှ်ေ ဒးကၠောန်ဒၟံၚ် နွံတၟာဂလိုၚ်ဏီရ။ လအ်ခ္ဍၚ် ပရေၚ်ညဳသၟဟ်အကြာကောန်ဂကူ ဒကးပရးခ္ဍၚ်။ လကြဴဏံ ဗၟာကဵုဗၟာလေဝ် ဒှ်ကၠုၚ်အကာဲအရာ ဒက်ပ္တန်ပရေၚ်ၜိုဟ်လလံဟွံမာန် စိုပ်ကၠုၚ်ဂှ်ရ အရာဏံဂှ် ဖအိုတ်ထောံကဵု ပရေၚ်ရပ်လွဟ်ဟာ။ ဖအိုတ်ထောံကဵုပရေၚ်သဳကၠဳပ္ညပ်ဟာ ဟီုဂှ်တှ်ေ ဍာဇမၠိၚ်ဂှ် သီုၜါလ္ပာ်ဒးဂိကၠုၚ်ဏောၚ်။ ဟွံသေၚ်တှ်ေ ဂၠာဲသွဟ်ကဵု ပရေၚ်သဳကၠဳဟာ။ အခိၚ်ဒးဂိဒၟံၚ်သီုၜါလ္ပာ်ဂှ် သဳကၠဳမာန်ကီု နကဵုဒပ်ပၞာန်လေဝ် အကာဲအရာဂွံထိၚ်ဒက် အလုံမွဲကၟိန်ဍုၚ်ဟၟဲ အကာဲအရာဂွံထိၚ်ဒက်ဒပ်ဍေံဟၟဲ မွဲမွဲအခိၚ်တှ်ေ စိုပ်ကၠုၚ်မာန်ဏောၚ်။ ပရေၚ်ဒးက္လေၚ်ဒုၚ်သီအဝဵုကဵု က္ဍိုပ်သ္ကိုပ်ကဆံၚ်သၟဝ်ဒပ်ဇကု နွံကၠုၚ်မာန်ရ။ ယဝ်ရသီဇာတ်ကဵု ပေါဲသဳကၠဳပရေၚ်ဍုၚ်ကွာန်ဏောၚ်တှ်ေ ပရေၚ်လစွံစိုတ်သၠဲလးတအ် ပရေၚ်ပျဲပျာံဒၟံၚ် ညးဍုၚ်ကွာန်တအ် သွက်ဂွံဒးဖ္အောန်ယှအ်ဖျေံ နူလ္ပာ်ဍေံတအ်ရ။ နူလ္ပာ်ဍေံတအ် ကော်ဘိက်ကၠုၚ် နကဵုစေတနာတပ်ပ်တုဲ နကဵုစိုတ်ဓာတ်ကောဒေံဇကုအရၚ်၊ စိုတ်ဓာတ်ကၟိန်ဍုၚ်ပံၚ်ကောံ ညံၚ်ဂွံကၠောန်မာန်ဂှ် နူအခိၚ်လၟုဟ် လ္ပာ်ဍေံတအ် ဒးပလေဝ်ပလေတ်လဝ် လဂါံဇိုၚ်ရ။ လၟုဟ်ဂှ်တှ်ေ မၞိဟ်ဍေံဟွံဒးစိုတ်ဂှ် ပၞောတ်လဝ်စိုတ်တုဲ ပရေၚ်ဘပဠ၊ ပရေၚ်ရုပ်သီဗော်တအ်ဂှ်တှ်ေ ပရေၚ်ၜိုဟ်လလံ ပိုဲမိက်ဒၟံၚ်ဂှ် သာတုဲ သ္ၚောဲခြာအာမာန်ရ။