က္ၜၚ်ကံၚ်-ဨဗြဴ(၆)
လာဘ် People of tomorrow မအပ်ပြာပ်ကဵုဒၟံၚ် ညးက္ဍိုက်က္ဍိုပ်ပရေၚ်ပြံၚ်သၠာဲ ပ္ဍဲကဏ္ဍစုၚ်မပ္တံကဵု ဂဳတ၊ အနုသုခုမ၊ ပရေၚ်ဍုၚ်ကွာန်၊ ပရေၚ်ပိုန်ဒြပ် ပ္ဍဲဍုၚ်သေံဂှ် ညးတၠသၞေဝ် ဗ္ဒမ်ဂဥုဲမေဝ်ဒဝ် ဒံက်တာဇြေန်ဒဳယာမောၚ် ဂွံဒုၚ်ကေတ်လဝ်တဲ ပ္ဍဲဂိတုဨဗြဴ စၟတ်တ္ၚဲ(၅)တ္ၚဲဏံရ။
လာဘ် The People Award ဂှ် ရုဲစှ်ကေတ် ပူဂိုလ် နူကဵုဂကောံ (၁၀၀)ဂကောံ မက္ဍိုက်က္ဍိုပ် သွက်ပရေၚ်ပြံၚ်သၠာဲပရေၚ်မၞိဟ်သွာၚ်နာနာ ပ္ဍဲဍုၚ်သေံမာန်တအ်တုဲ လကြဴအိုတ် ကဵုလာပ် ကုမၞိဟ်(၁၀)တၠရ။
ဒံက်တာဇြေန်ဒဳယာမောၚ် ပါလုပ်ကၠုၚ် ပ္ဍဲစရၚ်မၞိဟ် (၁၀)တၠ လကြဴအိုတ်ဂှ် ဒးဒုၚ်စၟတ်မသမ္တီလဝ် နဒဒှ် မၞိဟ်ထေက်ကဵုညးဍုၚ်ကွာန်တအ် ဒးသ္ပအစာံ သွက်တ္ၚဲယးဂတ (The People Award) ရ။
ဗ္ဒမ်ဂဥုဲမေဝ်ဒဝ် ဒံက်တာဇြေန်ဒဳယာမောၚ် က္ဍိုက်လဝ်က္ဍိုပ်ဂှ် ပွမရေၚ်တၠုၚ်ကဵု ပရေၚ်ထတ်ယိုတ်၊ ပရေၚ်စဵုဒၞာကောန်ၚာ်သၟတ် ကေုာံပါ်ပရအ်ကဵုကၠုၚ် တန်ဗ္တောန် ပရေၚ်ပညာ၊ ပရေၚ်ထတ်ယိုတ် မ္ၚးနူဂှ်ပၠန် သွက်သၞောတ်ပရေၚ်ထတ်ယိုတ် သၟာဒဒိုက်ဆုဲပြံၚ်တအ် ဇြဟတ်ဂွံခိုဟ်ဂွံခိုၚ်ဗိုန်ဂှ် ပတိတ်ဇြဟတ်ရေၚ်တၠုၚ်ဒၟံၚ်တုဲ ပ္ဍဲမွဲဒမြိပ်ပယျဵုဒၞက်သေံ-ဗၟာဏံ ဒှ်ဂကောံ အထံက်အရီု ပွိုၚ်(၃၀)သၞာံပြၚ်ရဂှ် ဂွံတီကေတ်ရ။
သ္အာၚ်နူဂှ်ပၠန် ဗ္ဒမ်ဂဥုဲမေဝ်ဒဝ်ဂှ် တန်ဗ္တောန်ပရေၚ်ထတ်ယိုတ် ကေုာံ သွက်သၞောတ်ပရေၚ်ထတ်ယိုတ်ဂွံခိုဟ် ဂွံခိုၚ်ဗိုန်ဂှ် ပံၚ်တောဲရေၚ်တၠုၚ်ကၠောန်ဒၟံၚ် မွဲကရောံကဵု ဂကောံထတ်ယိုတ် ကောန်ဍုၚ်အရၚ်မၞုံ မွဲဒမြိပ်ပယျဵုဒၞက် သ္ကုတ်ဗၟံက်ကၟိန်ဍုၚ်ဗၟာရ။
ပရိုၚ်/ဗီုရုပ်-သြၚ်လောန်တိုၚ်(မ်)