မတ်မလီု၊ ဨပရဴ (၆)
လ္တူတၚ်လလောၚ်တြး ကံၚ်ဇြဳပၞာန် မထံက်ပၚ်ရီုဗၚ်အာကဵု ကောန်ကလောန်ဆုဲပြံၚ် စဴဌာန်ဒၟံၚ် မကလေၚ်လုပ်စိုပ်ကၠုၚ် နူကဵုဍုၚ်သ္အာၚ်နာနာတံ ညံၚ်ဂွံဒှ်ရဲပ္တုန်ပ္တူကမၠောန်မာန်တံဟီုဂှ် ဓဝ်ပတှ်ေဟွံမွဲပုဟ်ဂှ် သၟာကမၠောန်တံကဵု ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်သၟာကမၠောန်တံ ဟီုဂးလဝ်ရ။
တုဲကၠုၚ်ဂိတုဨပရဴ (၂) တေံ ရုၚ်ကလုတ်ဍုၚ်ဗၟာ(ၜၚ်ကံက်) သၟဝ်တဲကံၚ်ဇြဳပၞာန်ဂှ် လလောၚ်ပ္တိတ်လဝ် လိက်ကဵုသမ္တီမွဲ ကုကောန်ကလောန်ဆုဲပြံၚ် မစဴဌာန်ဒၟံၚ်တံရ။
ပ္ဍဲကဵုတၚ်လလောၚ်တြးဏံဂှ် ကောန်ကလောန်ဆုဲပြံၚ်ဍုၚ်ဗၟာ မကၠောန်ကလောန်ပ္ဍဲဍုၚ်သ္အာၚ်တုဲ အခိၚ်ကာလစၟတ်လဝ်တံ ပေၚ်တုဲ မကလေၚ်စဴကၠုၚ်တံဝွံ ဒှ်ညးမပိုၚ်ပြဳလဝ် တၚ်ဆဵုဂဗစပ်ကဵုကမၠောန်တံ၊ မိတ်သဟာဲသွာၚ်ပရေၚ်ပိုန်ဒြပ်တံ ကေုာံ သြန်လှုဲတံရောၚ်ဂှ် သ္ဂးရ။
ကုညမပိုၚ်ပြဳလဝ်သာ်ဏံတံဂှ် နကဵုကံၚ်ဇြဳပၞာန် သွက်ဂွံထံက်ပၚ်သၠုၚ်ပ္တိုန် ကုကမၠောန်ပရေၚ်ပိုန်ဒြပ်အဇာဍောတ်၊ အဇာဒေါဝ်တံမာန် ဒက်ဂကောံ၊ ဒက်ကမ္မတဳ၊ ဒက်အေဂျေန်ဇြဳတံတုဲ ဟိုတ်နူထံက်ပၚ်ရီုဗၚ်ကဵုဒၟံၚ် ကုညးသၟိက်မိက်ဂွံကၠောန်ကမၠောန်တံဂှ်ရ နကဵုကောန်ကလောန် မၞုံကဵုတၚ်ဆဵုဂဗဂမၠိုၚ် သီုသြန်လှုဲ မပ္ကောံပ္ကေဝ်လဝ်တံဂှ် သွက်ဂွံပံၚ်တောဲ ပ္ဍဲအေဂျေန်ဇြဳ (MSME) မၞုံပ္ဍဲရးဒေသ ကေုာံ တွဵုရးမဆေၚ်စပ်တံဂှ် ဖ္တိုက်ဖ္အောဝ်လဝ်ရ။
ကုညးမပံၚ်တောဲရေၚ်တၠုၚ်တံဂှ် ကေတ်အထံၚ်ပၚ်သြန်၊ ကေတ်ကသပ်ဂၞန် ကေုာံ သီုကလိဂွံ လိက်စၟတ်သမ္တီကမၠောန် နူကဵုအေဂျေန်ဇြဳ (MSME) ကံၚ်ဇြဳပၞာန် မၞုံရးဒေသ ကေုာံ တွဵုရးမဆေၚ်စပ်တံဂှ်တုဲ ကလိဂွံအခေါၚ်ပ္တိတ်ဇြဟတ် နူကဵုဘဝကောန်ကလောန်ဆုဲပြံၚ် ညံၚ်ဂွံစိုပ်ဘဝတၠကမၠောန်တံမာန်ရောၚ်ဂှ် တြးလဝ်ဝါဒရ။
ညးမရီုဗၚ်ရေၚ်တၠုၚ်ဒၟံၚ် ပရေၚ်ကောန်ကလောန်ဆုဲပြံၚ်မွဲတၠဂှ် ၜိုန်ရကံၚ်ဇြဳပၞာန် ဟီုဂးဒၟံၚ် ကုကောန်ကလောန်ဆုဲပြံၚ်တံ သွက်ဂွံပံၚ်တောဲကဵု ပ္ဍဲကမၠောန် (MSME) ဍေံတံကီုလေဝ် အခိၚ်လၟုဟ်ဂှ် ဒးဒုၚ်ပတိတ်ဒၟံၚ်နူကဵုကမၠောန်ဂှ် ပါလုပ်သီုကဵုကောန်ကလောန် MOU တံတုဲ သြန်မပ္ကောံပ္ကေဝ်ဂွံ နူကဵုဍုၚ်သ္အာၚ်တံဂှ် တၚ်ဒုၚ်လျိုၚ်ဟွံမွဲမွဲသာ် ကော်ဘိက်ဒၟံၚ်ဂှ်ဝွံ ဒှ်လက္ချန်ဟုတ်တုဲ ဒှ်ပရေၚ်တြးဝါဒမွဲဟေၚ်ရဂှ် ပါ်ပါဲလဝ်ရ။
“အဲဟီုမွဲဏောၚ်။ လၟုဟ် တိုန်တန်ဗ္တောန် ထ္ပက် MOU တုဲ သၟာကမၠောန်မအာဒၟံၚ် ဍုၚ်သေံတံဂှ် လၟုဟ်ပ္ဍဲဍုၚ်သေံတေံ သီုဖအိုတ် ဒးဒုၚ်ပ္တိတ်ဒၟံၚ် နူကဵုကမၠောန်အိုတ်ရ။ ဌာနဝန်ဇၞော်သၟာကမၠောန်ဂှ် ဆၜိုတ်သၟာကမၠောန် ထ္ပက်စၟတ်တဲ MOU တုဲ မအာဒၟံၚ်သေံတံသၟးရဂှ် အတေံ ဒးဒုၚ်ပ္တိတ်နူကမၠောန်တုဲ လၟုဟ်ဂှ် ဒှ်ဒၟံၚ်အကာဲအရာ ကြပ်ဒးပလံၚ်ဖျဴဒၟံၚ်ဍုၚ်ဗၟာအိုတ်ဂှ် ကိစ္စနူကၠၚ်ဂှ်တှ်ေ ဒှ်ကိစ္စစှ်ေကဵုနတဲဟွံသေၚ်ပုဟ်။ သၟာကမၠောန် မကၠုၚ်စိုပ်ပ္ဍဲသေံ၊ ပ္ဍဲမလေဝ်တံဗွဲမဂၠိုၚ်ဂှ် ပြၚ်လှုဲပ္ဍဲသ္ၚိမာန်ကွေံကွေံဟွံသေၚ်ပုဟ်၊ အေ ဂှ်တှ်ေ သြန်ညးတံ ပ္ကောံပ္ကေဝ်လဝ် လ္ပာ်တေံ (၄) (၅) (၆) သၞာံ သီုဖအိုတ် ပ္ဍဲကိစ္စဓလိုက်တမ်ရိုဟ်ဗီုတံဏံဂှ် တၚ်ဒုၚ်လျိုၚ် ၜိုတ်လဵုနွံရောဟီုဂှ် မုမှဟီုဟွံဂွံပုဟ်။ ဟီုဂွံဂှ် မွဲရဏောၚ်။ အကာဲအရာ အာလ္ပာ်ခိုဟ်ဂှ်ဟွံသေၚ်။ ဒှ်အာအကာဲအရာ လ္ပာ်လဟုတ်ဏောၚ်။ SME တံ၊ မုတံဂှ်လေဝ် ပိုယ်တံ ဂွံဆဵုဒၟံၚ်ပ္ဍဲပရိုၚ်ရ။ ညအ်သီုဖအိုတ်ဂှ်မုရောဟီုတှ်ေ ဒှ်ပြဝထ္ၜးစဒၟံၚ် တြးဒၟံၚ်ဝါဒ ကုဍုၚ်သ္အာၚ်မွဲဏောၚ်ဂှ် ညာတ်ရ” သာ်ဝွံ သ္ဂးရ။
ကောန်ကလောန်ဆုဲပြံၚ် ဗွဲမဂၠိုၚ်ဝွံ ၜိုန်ရအာကၠောန်ၜိုတ်ဒၟံၚ်ကမၠောန် ဍုၚ်မွဲလ္ပာ်တေံကီုလေဝ် ဟိုတ်နူတၠပညာတံ ဟွံသေၚ်ဂှ်ရ ကလိဂွံလှုဲ ဟွံဂၠိုၚ်တုဲ ပ္ကောံပ္ကေဝ်လဝ်သၞာံလအ်လကာဖာတုဲ ယဝ်ရဓလိုက်ထောံတမ်ရိုဟ် ပ္ဍဲကဵုကမၠောန်ကံၚ်ဇြဳပၞာန် ဟွံမွဲကဵုတၚ်ဒုၚ်လျိုၚ်တံဂှ်မ္ဂး ဒှ်အာညံၚ်ဆာဲထောံဍာ်ပ္ဍဲဗ္တဳမာန်ဏောၚ်ဂှ် ညးမရေၚ်တၠုၚ်ဒၟံၚ် ပရေၚ်သၟာကမၠောန်တံ သ္ဂးရ။
သၟာကမၠောန်ဆုဲပြံၚ်ဍုၚ်သ္အာၚ်မွဲတၠဂှ်လေဝ် တၚ်ကော်ဘိက်ကံၚ်ဇြဳပၞာန်ဂှ် ဓဝ်ပတှ်ေဟွံမွဲတုဲ ပ္ဍဲကဵုကမၠောန် MSME ဍေံတံမကၠောန်ဒၟံၚ်ဂှ်လေဝ် ဓလိုက်အာတမ်ရိုဟ် ဟွံသေၚ်ပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပ္ဍဲဗလးတိဏံ ဍေံတံဂှ် ကော်ဒၟံၚ်ဗီုဏံရဏောၚ်၊ စဴကၠုၚ်ညိ၊ ကၠောန်ဗီုဏံညိ။ လ္တူဏံဂှ် ပိုယ်ကောန်ဍုၚ်ဗၟာ ရဲစိုပ်ဒၟံၚ်ဍုၚ်သေံတံ ဓဝ်ပတှ်ေဟွံမွဲပုဟ်။ တုဲတှ်ေ ၜိုန်ရလလောၚ်တြးလဝ် ဟီုလဝ် နကဵုညးတံ ဒှ်အလဵုအသဳမၚ်သ္ၚိကီုလေဝ် ပ္ဍဲကဵုကိစ္စပရေၚ်သၟာကမၠောန် စိုပ်ဒၟံၚ်သေံတံဂှ် ကၠုၚ်စိုပ်ပသောၚ်ကဵု လ္ပာ်ဏံတံဂှ် ညးလဵုမွဲမှဟွံမွဲပုဟ်။ လ္တူဍေံတံ ဟီုဒၟံၚ်သာ်ဏံ ပ္ဍဲကဵုတၚ်လလောၚ်တြး စကစတံဂှ် ဓဝ်ပတှ်ေဟွံမွဲပုဟ်ဂှ် ပိုယ်မိက်ဂွံဟီုရ။ ဗီုလဵုဟီုဟီု ပိုယ်တံဂှ်တှ်ေ ဟိုတ်နူဓဝ်ပတှ်ေဟွံမွဲဂှ်ရ ပရေၚ်ဓလိုက်တမ်ရိုဟ်လေဝ် ကၠောန်အာဟွံသေၚ်ပုဟ်။ အစဳဇန်သွက်ဂွံစဴလေဝ် ဟွံမွဲပုဟ်” သာ်ဝွံ သ္ဂးရ။
ညံၚ်ကမၠောန်အဇာဍောတ်၊ အဇာဒေါဝ် (MSME) တံ ဂွံဖောအ်ဗြေဝ်တောတက် ကံၚ်ဇြဳပၞာန် မရီုဗၚ်ရေၚ်တၠုၚ်ကဵုဏောၚ်ဂှ်ဝွံ အခိၚ်လၟုဟ်ဂှ် ပၟတ်ဓာတ်လလဳရ ကဵုမှာန်န် ဟွံမာန်တုဲ ကမၠောန်ဗွဲမဂၠိုၚ် ဒးဆေၚ်ဒၟံၚ်မုက် ကုအကာဲအရာ ဒးဒေါအ်ဇူတံရ။
ဍုၚ်ဗၟာဝွံ ကြဴနူဒပ်ပၞာန်သီအဝဵုတုဲ ပရေၚ်ဓလိုက်တမ်ရိုဟ်ဍုၚ်သ္အာၚ်တံ တိတ်စ္ဍးအာကီု၊ ဟိုတ်နူပြသၞာ ကမၠောန်ကၟိတ်ဟွံမွဲ အပ္ဍဲဍုၚ်တံဂှ်တုဲ အရိုဟ်ဒဒှ်တ္ၚဲ ကောန်ကလောန်ဆုဲပြံၚ် ဂၠိုၚ်ကဵုကၠံ အာစိုပ်ဍုၚ်ဇိုၚ်ဝုတ်ဒိုဟ်တံတုဲ ဒးကၠောန်ၜိုတ်ဒၟံၚ် သွက်ပရေၚ်စသုၚ်မံၚ်စံၚ်တံရ။
အတိုၚ်ဂလာန် ဂကောံသၟာကမၠောန်တံဂှ်မ္ဂး အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံဂှ် ဟိုတ်နူပြသၞာအခက်အခုဲ ကမၠောန်ကၟိတ်တံတုဲ ကောန်ကမၠောန်ဆုဲပြံၚ် ဂၠိုၚ်ကဵုကိုဋ် အာစိုပ်ဍုၚ်သ္အာၚ် ကၠောန်ဒၟံၚ်ကမၠောန်တုဲ ပ္ဍဲကဵုဏံ တိတ်အာဍုၚ်သေံ၊ မလေဝ်ယှာ၊ သေန်ကာပေါဝ်၊ ဂျပါန် ကေုာံ ဍုၚ်ကိုဝ်ရဳယျာတံ ဂၠိုၚ်အိုတ်ရောၚ်ဂှ် သ္ဂးလဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−MOI