မတ်မလီု-ဨဗြဴ(၆)
ဟိုတ်နူဇြဟတ်ညးဍုၚ်ကွာန်တအ် ပံၚ်တောဲတုဲ ဒစဵုဒစးကၠုၚ်နဲကဲစုၚ် ဟွံကေၚ်ဂဗဆဵုလဝ် ပ္ဍဲခေတ်တၞဟ်မွဲလှ်ေဂှ်တုဲ အခိၚ်လၟုဟ်ဏံ ဒပ်ကံၚ်ဇြဳပၞာန် ဇြဟတ်ဍိုန်လျ စိုပ်ဒၟံၚ်အခိၚ်လကြဴအိုတ်ရဂှ် သမ္မတအလဵုအသဳပရေၚ်ညဳသၟဟ်ကောန်ဂကူယာယဳ ဒူဝါလယှဳလ ဟီုသ္ဂးလဝ်ရ။
ပ္ဍဲကောံဓရီု ဂကောံအလဵုအသဳ မရနုက်ကဵု (၁၃)ဝါ အလဵဵုအသဳပရေၚ်ညဳသၟဟ်ကောန်ဂကူ ကၠောန်ဗဒှ်လဝ် ပ္ဍဲဂိတုဨဗြဴ စၟတ်တ္ၚဲ (၄) တုဲကၠုၚ် အခိၚ်နူဂယးဂှ် ဟီုသ္ဂးလဝ် သာ်ဏံရ။
“အခိၚ်လၟုဟ်ဏံ ဇြဟတ်ဒပ်ပၞာန်ပ္ကီုပရာပ် ဍိုန်လျစှ်ေ စိုပ်ဒၟံၚ်အခိၚ်လကြဴအိုတ် ဟီုစဂွံရ။ မုဒှ်ဂွံဒးဟီုဗီုဏံရောတှ်ေ ဟိုတ်နူဇြဟတ်ပံၚ်တောဲညးဍုၚ်ကွာန်တအ် ဒစဵုဒစးကၠုၚ် နဲကဲစုၚ် ခေတ်လဵုလေဝ် ဟွံကေၚ်ဂဗဆဵုလဝ် မွဲလှ်ေရ။ ပ္ဍဲကဵုဂှ်တှ်ေ ပြာကတ်အိုတ်ဂှ် နူအကြာညးဍုၚ်ကွာန်ဂှ် ဂကောံဇြဟတ်ပၠန်ဂတး ခိုၚ်ၚ်ဗိုန်န် ဇြဟတ်ခိုဟ်ဟ် မံက်ဂတဝ်တိတ်ကၠုၚ်လဝ်ကီု၊ မွဲလ္ပာ်ပၠန်လေဝ် နူဌာနဆေၚ်စပ်နာနာလေဝ် သ္ပကၠုၚ် CDM တုဲ ဒစဵုဒစးကၠုၚ်ကဵု ဒပ်ပၞာန်ကြအ်ဝိဝိၚ်ဒၟံၚ်အဝဵုရ” ဂှ် သမ္မတNUG ယာယဳ ဒူဝါလယှဳလ ဟီုသ္ဂးလဝ်ရ။
သ္အာၚ်နူဂှ်ပၠန် ဟိုတ်ဒုၚ်တဲ ကမၠောန်ဓဇန်ကြာန် ဒပ်ပၞာန်ဟွံမာန်တုဲ သၞာဲဒဴညးမၞုံကဆံၚ် အကြာပ်ဒပ် ကောန်သ္ဂံၚ် ပ္ဍဲဒပ်တအ် သ္ပကၠုၚ် CDM တုဲ တိတ်ကၠုၚ်နူကဵုဒပ် နွံကၠုၚ်ဗွဲမဂၠိုၚ် ဂၠိုၚ်တိုန်ကၠုၚ်ဒၟံၚ် အရိုဟ်ဒဒှ်တ္ၚဲရဂှ် ဟီုသ္ဂးလဝ်ရ။
ဟိုတ်နူအကာဲအရာဏံတုဲ က္ဍိုပ်သ္ကိုပ်ပၞာန် စိုတ်ဖေက်ညးဂြောပ်ဗ္ဒန်ဟွံမာန် သွက်ဂွံပၞုက်ဗ္ဒန်တုဲ ဟီုဂးဒၟံၚ် ကြအ်ကြအ်ကြာန်ကြာန်ဂှ်လေဝ် ဂွံဆဵုကေတ်ဒၟံၚ်တုဲ ပရေၚ်ညးကၠောန်သ္ပဒၟံၚ် ပွဒိုဟ်ကြာန်ဂှ် ဒှ်ကၠုၚ်သက်သဳသာဓက ပ္ဍဲကဵုမုက်လိက် ပရေၚ်စဳရေၚ်သၞောဝ်ဓဝ် ကၟိန်ဍုၚ်နာနာရောၚ်ဂှ် ဟီုသ္ဂးလဝ်ရ။
နကဵုက္ဍိုပ်သ္ကိုပ်ပၠန်ဂတးတအ် ညးဍုၚ်ကွာန် နူဒေသဇကု ညးမပ္တိုန်လဝ်ဇကု နဒဒှ်က္ဍိုပ်သ္ကိုပ်တအ် ဒးဒုၚ်ဒၟံၚ် ပွဒပ်ပၞာန် ယုတ်မာဓဇန်ကြာန်ဂှ် ဒးသ္ပဒၟံၚ်သတိလၟိုန်ကီု ထံက်ရံၚ်ကဵု မုက်ညးဍုၚ်ကွာန်တုဲ လ္တူနူအဝဵုဇကုဂှ် သွက်ဂွံစဵုဒၞာကဵု ဒတုဲမြမောဝ်ညးဍုၚ်ကွာန် ပ္ဍဲဒေသဇကု နကဵုဂုဏ်သိက္ခာပရေၚ်ဍုၚ်ကွာန်နွံနွံဂှ်လေဝ် သမ္မတယာယဳ ဟီုဗတိုက်ဖ္အောဝ်လဝ်ရ။
လၟုဟ်ဏံ ကၠောန်ရေၚ်တၠုၚ်ဒၟံၚ် ညံၚ်ဒပ်ကံၚ်ဇြဳပၞာန် ရိုဟ်ကၞက်ဂွံပိုတ်သ္ကုတ်အာ နူသွာၚ်နာနာဂှ်ရ ပ္ဍဲကဵုကောံဓရီုတအ်လေဝ် သွက်ဌာနဝန်ဇၞော်သီုဖအိုတ် ဂွံဒှ်ချဳဒရာၚ် နဇိုၚ်နတဲတုဲ ညံၚ်ဂွံကၠောန်ရေၚ်တၠုၚ်အာ နကဵုဂၠံၚ်တရဴ နဲကဲစိုပ်တရဴတအ်ကီု စေဝ်ပၞောန်ကၟိန်ဍုၚ်နာနာဖျေံစွံလဝ်ဂှ် ကိတ်ညဳကဵု အကာဲအရဗလးမုက်တိတုဲ ညံၚ်ဂွံဓမံက်အာရုပ်ရဴ ဗွဲမဂတာပ်အခိၚ် ပ္တိတ်ဇြဟတ်အိုတ်ညိဂှ် ဟီုသ္ဂးလဝ်ရ။
ကောံဓရီုဂကောံအလဵုအသဳပရေၚ်ညဳသၟဟ်ကောန်ဂကူဂှ် သမ္မတဒူဝါလယှဳလ၊ သ္ကိုပ်ဝန်ဇၞော်မာန်ဝေန်ခိုၚ်တာန်ကီု သီုကဵုဝန်ဇၞော်ကၟိန်ဍုၚ်၊ ဒုဝန်ဇၞော် ညးတာလျိုၚ်ဂမၠိုၚ် တိုန်စိုပ်လဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – NUG