တၞၚ်သဳ၊ ဨပရဴ (၆)
ပ္ဍဲပွိုၚ်ဍုၚ်တၞၚ်သဳ၊ ရးဒေသဇၞော်တၞၚ်သဳ မလလောၚ်တြးလဝ် ပရေၚ်အုပ်ဓုပ်ပၞာန်တံဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ က္တဵုဒှ်ဒၟံၚ် ပေါဲဗ္တိုက် အရိုဟ်တ္ၚဲအဆက်က်ဂှ် ညးတာလျိုၚ် ဂကောံဒပ်မဟာမိတ် ပွိုၚ်ဍုၚ်တၞၚ်သဳတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကြဴနူဂကောံဇြဟတ်ပၠန်ဂတးတံ အာစိုပ်ဗ္တိုက်လဝ် ကုန်ဗျူဟာကံၚ်ဇြဳပၞာန် မၞုံပ္ဍဲကွာန်ဍာ်ဗု၊ ပွိုၚ်ဍုၚ်တၞၚ်သဳတုဲဂှ် လ္ပာ်ကံၚ်ဇြဳပၞာန် ဟိုတ်နူထ္ပက်ကၠုၚ်ပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ်ဂှ်ရ တုဲကၠုၚ် နူဂိတုဨပရဴ (၂၈)စဵုကဵု ဂိတုဨပရဴ (၅) ဂှ် ပေါဲဗ္တိုက်တံ က္တဵုဒှ်ဒၟံၚ် အရိုဟ်ဒဒှ်တ္ၚဲရ။
ပေါဲဗ္တိုက်တံဏံဝွံ ဗွိုၚ်ပေါဲပၞာန် သၠဲလးကၠုၚ် ဒဵုကဵုကွာန်တုၚ်ဃောန်၊ (ချောၚ်းနှစ်ပေါက်) ၊ ဍာ်ဗု၊ တေဝ်ဖျူ၊ ဗာန်လမွတ်တံတုဲ အပ္ဍဲပွိုၚ် (၈) တ္ၚဲဂှ် ပေါဲဗ္တိုက် က္တဵုဒှ်လဝ် ဟွံအောန်နူကဵု (၁၅) ဝါရ။
အပ္ဍဲပေါဲဗ္တိုက်ၜါလ္ပာ်ဂှ် လ္ပာ်ကံၚ်ဇြဳပၞာန် ချိုတ်အာလဝ် ဗ္ဒါဲ (၃၀) တုဲ မၞိဟ်ကလိဂွံဝပ် ဗွဲမဂၠိုၚ်ဂၠေၚ်နွံတုဲ လ္ပာ်ဂကောံဇြဟတ်ပၠန်ဂတးတံဂှ်လေဝ် ကောန်သ္ဂံၚ် PDF မွဲတၠ ပြဟ်လလုဲတုဲ မၞိဟ်ကလိဂွံဝပ်တံလေဝ် နွံဒၟံၚ်ရ။
ပေါဲဗ္တိုက် ကုဒပ်ကံၚ်ဇြဳပၞာန်တံဂှ် ဒပ်မဟာ (၄) KNU ၊ ကဝ်တူလေဝ်အာမဳ၊ ဒပ်ပံၚ်ကောံမဟာမိတ် ပွိုၚ်ဍုၚ်တၞၚ်သဳ၊ ပဖက ပွိုၚ်ဍုၚ်တၞၚ်သဳ၊ ပကဖ ဗိက်တံ ဗ္တိုက်ဒၟံၚ်ရ။
ဟိုတ်နူပေါဲဗ္တိုက်တံတုဲ ညးဍုၚ်ကွာန်ဒေသ မ္ၚးနူကဵုကွာန်တုၚ်ဃောန်၊ ချောၚ်းနှစ်ပေါက်၊ ဍာ်ဗုူ၊ တေဝ်ဖျူ၊ ဗာန်လမွတ်တံဂှ် သီုကဵုညးဒေသ နူကဵုကွာန် ၜိုတ် (၁၀) ကွာန် ဗ္ဒါဲ (၃၀၀၀) ဂှ် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတုဲ နွံပၟိက်ဒၟံၚ်ကဵု အရီုဗၚ်စပ်ကဵုပရေၚ်ဗ္စာရဏာမၞိဟ်တံရောၚ်ဂှ် ဂွံတီကေတ် နူညးဒေသပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)
ဗီုဓာတ်−Tanintharyi PDF