ကျာ်ထဝ်၊ ဨပရဴ (၆)
ပ္ဍဲတွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ကွာန်အၚ်္ဂဗိုဝ်၊ ပ္ဍဲသ္ကဲဂၠံၚ်ကွဳစက် လ္ဂုၚ်−မတ်မလီု ပ္ဍဲဂိတုဨပရဴ (၅) ပယျာံနူဂယးဂှ် အကြာပ်ဒပ်ကံၚ်ဇြဳပၞာန်မွဲတၠ ဒးဒုၚ်ပန်ဂစိုတ်လဝ်ရောၚ်ဂှ် ဂွံတီကေတ် နူကဵုကမ္မတဳကောပ်ကာဲ ကေၚ်ကာမိတ်ခရိုၚ်သဓီု KNU ရ။
ပ္ဍဲဂိတုဨပရဴ (၅) အခိၚ်နူဂယး ၜိုတ် (၆) နာဍဳ အကြာပ်ဒပ် ဂျဝ်သာန် နူကဵုခမရ (၂) တမ်ဒပ်တိုက် သၟဝ်တဲၝောံဒပ် (၄၄) မဖျေံသ္ဇိုၚ်ပွိုၚ်ဍုၚ်ကျာ်ထဝ် မတိတ်ကၠုၚ် နူကဵုဗ္ဒါဲသုသာန်ကွာန်အၚ်္ဂဗိုဝ် ပ္ဍဲဒၞါဲမဖျေံလဝ်ဒပ်ဂှ် ဂကောံဒပ်ပံၚ်တောဲ KNLA, KRF တံ ပန်ပသောၚ်လဝ်ရ။
ဟိုတ်နူဒးဒုၚ်ပန်ပှော်လဝ်ကဵု သေနာတ်ဂှ်ရ အကြာပ်ဒပ်ဂျဝ်သာန်ဝွံ နကဵုဝပ်က္ဍိုပ်ထောၚ်အာဂှ် ချိုတ်အာလဝ် ပ္ဍဲဒၞါဲဂှ်လွာဲဂှ်ရ။
နူကဵုအကြာပ်ဒပ် ဂျဝ်သာန် မချိုတ်အာဂှ် သီဂိုၚ်ဂွံလဝ် ဗမ်တဲ၊ ဖုၚ်၊ ကွဳလိုန်ဓာတ် ကေုာံ ကံက်တဲတံရောၚ်ဂှ် ဂကောံဇြဟတ်ပၠန်ဂတးကျာ်ထဝ် KRF တံ လလောၚ်ပ္တိတ်လဝ်ရ။
ဥက္ကဌကမ္မတဳ ကောပ်ကာဲကေၚ်ကာမိတ် ခရိုၚ်သဓီု KNU ဂှ် အကြာပ်ဒပ်ဂျဝ်သာန်ဝွံ ပ္ဍဲကဵုဒၞါဲပန်ပှော်လွဟ်ဇၞော် အပ္ဍဲကွာန်ဂမၠိုၚ်ဂှ် ဒှ်ညးတာလျိုၚ်နွံမွဲရောၚ် ရဴဝွံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကြဴနူအကြာပ်ဒပ်ကံၚ်ဇြဳပၞာန် ဒးဒုၚ်ပန်ပှော်ကဵုသေနာတ်တုဲဂှ် ဒပ်ကံၚ်ဇြဳပၞာန် စၟဳတ်ကၟာတ်လဒဵုလဝ် ဂၠံၚ်လ္ၚဵုလ္ၚဵုတံကဵု ဂၠိုက်ဂၠါဲလဝ်ဒၞါဲစေအ်အ်တံရောၚ်ဂှ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)