ဗြဝတဳ၊ ဨပရဴ (၇)
ပ္ဍဲတွဵုရးကရေၚ်၊ ပွိုၚ်ဍုၚ်ဗြဝတဳ၊ ဗ္ဒါဲဍုၚ်တၟိယှိုဲကုက္ကိုဝ်ဂှ် ဟိုတ်နူပေါဲဗ္တိုက် အကြာဒပ်ပံၚ်ကောံ BGF ကံၚ်ဇြဳပၞာန်ကဵု ဂကောံဒပ်ပၠန်ဂတးတံ ဆက်သ္ကာတ်မြဟ်ဒၟံၚ်ဂှ်ရ ညးမဂြိပ်ဒဴပါဲဒလေတ် လ္ပာ်သေံတေံ ဂၠိုၚ်တိုန်ကၠုၚ် စဵုကဵု (၆၀၀၀) ပြၚ်ဂှ် ဂွံတီကေတ် အတိုၚ်တၚ်နၚ်သၟိၚ်တၠအဝဵုသေံတံရ။
တုဲကၠုၚ် ပ္ဍဲဂိတုဨပရဴ (၅) တေံ နူကဵုဂကောံဇြဟတ်ပၠန်ဂတးတံ အာစိုပ်ဗ္တိုက်သီလဝ် ဗ္ဒိုပ်သၞေဟ်ကၚ် BGF (၂) ဗ္ဒိုပ် မၞုံလ္တူဂၠံၚ်ကွဳစက် ယှိုဲကုက္ကိုဝ်−ဗြဝတဳ ကေုာံ ကွာန်ထိဂဝ်ထဝ် ဗ္ဒါဲဍုၚ်တၟိယှိုဲကုက္ကိုဝ်ဂှ်တုဲ ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။
ပေါဲဗ္တိုက်ဂှ်ဝွံ ပ္ဍဲဂိတုဨပရဴ (၆) တ္ၚဲဏံဂှ်လေဝ် ပေါဲဗ္တိုက်အကြာဒပ်ပံၚ်ကောံ BGF ကံၚ်ဇြဳပၞာန်ကဵု ဂကောံဒပ်ပံၚ်ကောံပၠန်ဂတးတံ ဆက်က္တဵုဒှ်ဒၟံၚ်တုဲ ၜါလ္ပာ်ဇီုကပိုက်ချိုတ်တံလေဝ် နွံဒၟံၚ်ရောၚ်ဂှ် တမ်ရိုဟ်ပရိုၚ်အပ္ဍဲဒေသတံ ဟီုရ။
သ္အာၚ်နူဂှ်ပၠန် ပ္ဍဲလ္ပာ်ဒေသမေဝ်ကနေဝ် ကွာန်တၟိတေန်ဂါန်ညဳနံၚ် တိဍာ်ဒပ်မဟာ (၆) KNU မၞုံဗ္ဒါဲဍုၚ်ဗြဝတဳဂှ်လေဝ် အကြာဒပ်ပံၚ်ကောံ BGF ကံၚ်ဇြဳပၞာန်ကဵု ဂကောံဒပ်ပံၚ်ကောံ KNLA တံ ပရေၚ်ပၞာန်ကြံၚ်မ္ၚိုဟ် ဆက်က္တဵုဒှ်ဒၟံၚ်တုဲ ပ္ဍဲဂိတုဨပရဴ (၅) တေံ ဒပ်ကံၚ်ဇြဳပၞာန် ကၠောန်သ္ပဗ္တိုက်လဝ်တရဴကျာ လ္ပာ်ကွာန်မေဝ်ကနေဝ်အပ္ဍဲ၊ မေဝ်ကနေဝ်မ္ၚးတံဂှ်တုဲ ညးဍုၚ်ကွာန်ဒေသတံ ဒးဂြိပ်ဒဴပါဲဒလေတ်ဒၟံၚ် အလုံကွာန်မွဲတုဲ နွံပၟိက်ဒၟံၚ်ကဵု ဇွောံမစၞစ ဂဥုဲဇဗ ကေုာံ ဒၞါဲမံၚ်စံၚ်တံ ကာမံက်တိုန်ရောၚ်ဂှ် ဂွံတီကေတ် အတိုၚ်ဂလာန်ညးဒေသတံရ။
ပ္ဍဲပွိုၚ်ဍုၚ်ကအ်ကြိက် ကေုာံ ပွိုၚ်ဍုၚ်ဗြဝတဳ တွဵုရးကရေၚ်တံဂှ် စနူဂိတုမာတ်ချ်ကြပ်အိုတ်တေံတုဲ အကြာဒပ်ပံၚ်ကောံ BGF ကံၚ်ဇြဳပၞာန်ကဵု ဂကောံဒပ်ပံၚ်ကောံ KNLA တံဂှ် ပေါဲဗ္တိုက်ဆေၚ်မုက်တံ သာသ္ကာတ်မြဟ်ကၠုၚ်ဒၟံၚ်တုဲ ဟိုတ်နူပေါဲဗ္တိုက်တုဲ ကောန်အရာပ်ဇီုကပိုက်တံ က္တဵုဒှ်လဝ်ရ။
ပ္ဍဲပွိုၚ်ဍုၚ်ကအ်ကြိက်ဂှ် အပ္ဍဲအကြာတ္ၚဲတံဏံ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံဂှ် ဟိုတ်နူပဋိပက္ခပရေၚ်ပၞာန် မက္တဵုဒှ်လဝ်ဂှ်တုဲ ကောန်ၚာ်သၟတ် (၂) တၠကီု သီုကဵုညးဍုၚ်ကွာန်ဒေသ (၇) တၠ ဇီုကပိုက်ကလိဂွံလဝ်ဝပ်တုဲ သ္ၚိဒၟံၚ် (၂) မလေဝ် ပၟတ်တူလီုလာ်အာလဝ်ဂှ် ညးဒေသတံ ဟီုရ။
ကြဴနူက္ဍိုပ်သ္ကိုပ်ပၞာန် ဟီုဂးပ္ဍဲအသေအဟာန် တ္ၚဲဒပ်ပၞာန်ဗၟာ ပ္ဍဲဂိတုမာတ်ချ် (၂၇) တုဲကၠုၚ်တေံ ဒဒှ်ရကေတ်အာဒုဟ် ကုဂကောံရပ်လွဟ်ကောန်ဍုၚ်အရၚ်လ္ၚဵု မဒုၚ်တဲရီုဗၚ်ကဵုဒၟံၚ် ဂကောံ NUG, PDF တံ ပိုတ်တ်သ္ကုတ်တ်ရောၚ်တုဲဂှ် ပ္ဍဲတိဍာ်အုပ်ဓုပ် ဗော်သွးကောန်ဂကူကရေၚ် KNU ဂှ် ပေါဲဗ္တိုက်တံ သာသ္ကာတ်မြဟ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−Social Media