ပျုမ်ယာမ် – ဨဗြဴ(၇)
နူပရေၚ်အမေရိကာန် ကေုာံ ကိုဝ်ရဳယျာသၠုၚ်ကျာတအ် ပံၚ်တောဲပ္ကတ်ပ္ကေၚ်ပၞာန်မွဲကဆံၚ် ပရေၚ်ကြံၚ်မ္ၚိုဟ်သ္ကာတ်မြဟ် သၠုၚ်တိုန်ကၠုၚ်တုဲ သွက်ဂွံဒှ်ကၠုၚ် ပေါဲပၞာန်နျူကလဳယာ ဒှ်ဒၟံၚ်ဇြဟတ်ဓရိုဟ်ရဂှ် ကိုဝ်ရဳယျာသၟဝ်ကျာ စောတ်စောဲလဝ်တုဲ ပလန်အာတဲ နပၞာန်ထ္ပက်ရောၚ်ဂှ် ဓမံက်ထ္ၜးလဝ် ပ္ဍဲမဳဒဳယာကၟိန်ဍုၚ် KCNA ရ။
ဇျှောဂျူဟွောမ် ညးလ္ၚတ်ပရေၚ်ဂီုကၠီုကၟိန်ဍုၚ်နာနာဂှ် ပရေၚ်ပ္ကတ်ပ္ကေၚ်ပၞာန်ဏံ ကဵုဒၟံၚ်ဇြဟတ်ဓရိုဟ် စဵုကဵုတ္ကအ်ကိုဝ်ရဳယျာ ဂွံပါ်ခတိုဟ်အာရဂှ် ဟီုဂး ပါ်ပါဲလဝ်ရ။
“အမေရိကာန် သီုညးဗက်လကြဴညးတအ် ပရေၚ်ဆေၚ်မုက်ဟွံစၚ်ခြၚ် ဒစဵုဒစး လ္တူကိုဝ်ရဳယျာသၟဝ်ကျာ၊ ပရေၚ်ပ္တိတ်ဒၟံၚ်ပၞောတ်ဒေါသဂှ် ဓရိုဟ်ဗစိုပ်ဒၟံၚ် အကာဲအရာ ပ္ဍဲတ္ကအ်ကိုဝ်ရဳယျာ စဵုကဵုလ္အိတ်ပေါဲပၞာန်နျူကလဳယာ နဒဒှ်ကပ်ပရေံ ကလေၚ်ဂတးလကြဴဟွံမာန်ရ” ဂှ် သုၚ်စောဲလဝ် ယၟုဇမၠေံကၟိန်ဍုၚ်သမ္မတညးဍုၚ်ကွာန်ဒဳမဝ်ကရေတ်တေတ် ကိုဝ်ရဳယာ မဒှ်ယၟုလုပ်သၞောဝ် ကိုဝ်ရဳသၟဝ်ကျာတုဲ ဓမံက်ထ္ၜးလဝ် ပ္ဍဲလိက်ပရေၚ်ရ။
ပရေၚ်ပ္ကတ်ပ္ကေၚ်ပၞာန်ကျာ ပၞာန်ဍာ် က္ၜၚ်ပ္ဍိုက်က္ၜၚ်ကျာအမေရိကာန်၊ က္ၜၚ်ကျာဂြာတ်ဗုံ B-1B ကေုာံ B-52 တအ်ပါလုပ်ဒၟံၚ်ကီု သီုကဵုပရေၚ်ပ္ကတ်ပ္ကေၚ်ပၞာန်ရာသဳက္ညၚ် ဇၟာပ်ပ်သၞာံ ကေုာံပရေၚ်ပ္ကတ်ပ္ကေၚ်ပၞာန် စှ်ေကုန်/ဍာ်ၜါဂၠံၚ် ပွိုၚ်မသုန်သၞာံ အလန်ပထမ မပါလုပ်ဂှ် ဒပ်ပၞာန်အမေရိကာန် ကေုာံကိုဝ်ရဳယာသၠုၚ်ကျာတအ် ပ္ကတ်ပ္ကေၚ်ဒၟံၚ်ပၞာန် နူကဵုဂိတုမာတ်ချ် တုဲကၠုၚ်ဏံရ။
ကဵုဖျုန်ဓမံက်ထ္ၜးလဝ် ပရေၚ်ပံၚ်တောဲ က္ၜၚ်ပ္ဍိုက်က္ၜၚ်ကျာ ရန်လဝ်သွက်ဂွံတဝ်စၞေဟ် ပရေၚ်ဗတိုက်ဆေၚ်မုက်ဂှ်တုဲ ပျုမ်ယာမ် ကလေၚ်ပလန်အာတဲ နပွမစှ်ေပၞာန်ထ္ပက် ပရေၚ်ပ္ကတ်ပကေၚ်ပၞာန်ရောၚ်ဂှ် ဟီုသ္ဂးလဝ်ရ။
ပ္ဍဲလ္တူပရေၚ်ပ္ကတ်ပ္ကေၚ်ပၞာန် ကိုဝ်ရဳယာသၟဝ်ကျာ ကလေၚ်ပလန်လဝ်တဲ သီုဒေါသမဇၞော်ကီု သီုဟီုသ္ဂးလဝ် ပရေၚ်ပ္ကတ်ပ္ကေၚ်ပၞာန်စမ်ၜတ် သွက်ဂွံလောန်ၜက် လ္တူညးတအ်ရ။
သ္အာၚ်နူဂှ်ပၠန် ညးစၞးကလုတ်တမာန်ကိုဝ်ရဳယျာသၟဝ်ကျာဒ္တန် မၞုံဂျဳနဳဗာ ဟာန်တေသောၚ်ဂှ် စပ်ကဵုအခေါၚ်အရာကၟိန်ဍုၚ်တုဲ တၚ်သ္ဂုတ်သွာတ် ကံၚ်ဇြဳအခေါၚ်အရာမၞိဟ်ကုသလမဂ္ဂ မဖျေံလဝ် ပ္ဍဲသတ္တာဟဏံ ဟီုဂးပျုတ်ဗ္ဒေက်လဝ် သ္ကာတ်တ်မြဟ်ဟ်ရဂှ် ဓမံက်ထ္ၜးလဝ် ပ္ဍဲ KCNA ရ။
ပျုမ်ယာမ်ဂှ် ဓမံက်ထ္ၜးလဝ် နဒဒှ်ပရေၚ်ဂြိုဟ်စာ အမေရိကာန်က္ဍိုက်က္ဍိုပ် သွက်ဂွံပလှ်ဖျေံအလဵုအသဳညးတအ်တုဲ ပ္ဍဲလ္တူပရေၚ်ဖံက်ပ္ကဝ်အခေါၚ်အရာမၞိဟ်ညးတအ် တးပါဲလဝ် ပရေၚ်ပါ်ပါဲကၟိန်ဍုၚ်နာနာ အခိၚ်ကာလလအ်လရ။
“ဒှ်ဒေါသပရေၚ်ဍုၚ်ကွာန် အေၚ်ဒုၚ်ဟွံမာန်ကဵု ပရေၚ်ဂၠာဲသၞတုဲ ဒှ်ပရေၚ်လီၜန် ပရေၚ်ဍုၚ်ကွာန်သ္ကာတ်မြဟ်ရ” ဂှ် စပ်ကဵုတၚ်သ္ဂုတ်သွာတ်ဏံတုဲ ညးစၞးဟာန် ဟီုသ္ဂးလဝ်ရ။
သမ္မတကိုဝ်ရဳယျာသၠုၚ်ကျာ ယွောန်ဆု(ခ်)ယိုဝ်ဂှ်မ္ဂး စပ်ကဵုပရေၚ်ပျုမ်ယာမ် ဖံက်ပ္ကဝ်အခေါၚ်အရာမၞိဟ်တုဲ အာတ်မိက်လဝ် သွက်ဂွံကၠောန်သ္ပကဵုလညာတ်ရ။
Ref, Reuters