တၚ်ဆက်စၠောံသၟာန်သွဟ်လဝ်ကဵု ညးအုပ်ကာနာနာ ဗော်ဒဳမဝ်ကရေတ်တေတ် တွဵုရးကရေၚ်ဍာဲ (KySDP) ခူတေဝ်ယျေဝ်။
ကဝ်မယှေန်ပေါဲရုဲမာဲကံၚ်ဇြဳပၞာန်ဂှ် ဒဒှ်ရသီပလီုလဝ် ဗော်ပရေၚ်ဍုၚ်ကွာန် (၄၀)ဗော် မပါလုပ် သီုဗော်ဒဳမဝ်ကရေဇြဳကောန်ဂကူ NLD ဂှ် လလောၚ်တြးလဝ် ပ္ဍဲဂိတုမာတ်ချ် စၟတ်တ္ၚဲ (၂၈) တုဲကၠုၚ်ဏံရ၊ ပ္ဍဲကဵုဗော်ပရေၚ်ဍုၚ်ကွာန် ကံၚ်ဇြဳပၞာန်ရုပ်ပလီုလဝ်တအ်ဂှ် ဗော်ဒဳမဝ်ကရေတ်တေတ် တွဵုရးကရေၚ်ဍာဲ (KySDP) လေဝ် ပါလုပ်ဒၟံၚ်ရ။ ဟိုတ်ဂှ်ရ စပ်ကဵုအကာဲအရာ ဟွံပ္တိုန်စၟတ်သမ္တီဗော် ဇရေၚ်ကံၚ်ဇြဳပၞာန်ကီု၊ လၟေၚ်ကမၠောန် ဆက်ကၠောန်ရေၚ်တၠုၚ်အာ ဂတဏံကီု၊ တၚ်မိက်ဂွံဟီုဗ္ကန်ကဵု ကောန်ညးဍုၚ်ကွာန် တွဵုရးကရေၚ်ဍာဲတအ်ကီု စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်သွဟ်လဝ်ကဵု ညးအုပ်ကာနာနာ ဗော်ဒဳမဝ်ကရေတ်တေတ် တွဵုရးကရေၚ်ဍာဲ (KySDP) ခူဒေဝ်ယျေဝ်ရ။
-ကၠာအိုတ်ဏံ နကဵုဗော် (KySDP) အကာဲအရာ ဒးဖျေံသ္ဂုတ်သွာတ် သွက်ဟွံဂွံပတိုန်စၟတ်သမ္တီတုဲ ဟီုထ္ၜးကဵုညိ။
နကဵုဗော် (KySDP) ပိုဲ ဂွံပ္တိုန်စၟတ်သမ္တီဗော် နူသၟဝ်သၞောဝ်ဥပဒေကဝ်မယှေန်ပေါဲရုဲမာဲစကစ ပျးဌာန်လဝ်ဂှ် ယဝ်ရချပ်ရံၚ်တှ်ေ သွက်ဂွံဒက်ပ္တန် သၞောတ်ကၟိန်ဍုၚ်ပံၚ်ကောံဖေတ်ဒရေဝ်ဂှ် ဒှ်ကၠုၚ်အကာဲအရာ ဒးအာသၟဝ်သၞောဝ်သ္ဇိုၚ်ဥပဒေ ၂၀၀၈ ဏောၚ် ဒးသ္ၚဳဂၠိပ်ကၠာရ။ ဒးစိုတ် သၞောဝ်သ္ဇိုၚ်ဒက်ပ္တန် ကွေံကွေံကြာန်ကြာန်တုဲ လုပ်ကၠုၚ်လဝ်ပေါဲရုဲမာဲ ဟွံသေၚ်ပုဟ်။ နူကဵု ၂၀၁၀ စဵုကဵု ၂၀၂၀ ပွိုၚ်စှ်သၞာံဂှ် နူကဵုသၟဝ်သၞောဝ်ဥပဒေ ၂၀၀၈ ပိုဲဒက်ပ္တန်ကၠုၚ်လဝ် ပရေၚ်ဍုၚ်ကွာန်ရ။ သီုကဵုဟွံဒးစိုတ်သၞောဝ်ဥပဒေ ၂၀၀၈ မွဲသာ် နူသၟဝ် ၂၀၀၈ ဂှ် ကၠောန်ပရေၚ်ပြံၚ်သၠာဲ မမိက်ကဵုမွဲမွဲ ဂွံမာန်ဟာ ဂးတုဲ နကဵုတၚ်စၟဳပတှ်ေဗီုဏံ ဗော်ပရေၚ်ဍုၚ်ကွာန် ကောန်ဍုၚ်အရၚ်တအ် ယဝ်ရဒးဟီုတှ်ေ ဂကောံဇြဟတ်ဒဳမဝ်ကရေဇြဳတအ် လုပ်ကၠုၚ်လဝ် သၟဝ် ၂၀၀၈ ရ။
အကြာ နူကဵု၂၀၁၀ စဵုကဵု ၂၀၂၀ ဂှ် ပိုဲလုပ်ပြိုၚ်လဝ်ရ။ ပ္ဍဲအကြာ ၂၀၁၅၊ ၂၀၂၀ ဂှ် လုပ်ပြိုၚ်တုဲ ဂွံဇၞးကၠုၚ်လဝ်ရ။ ပလေဝ်ပလေတ် သၞောဝ်သ္ဇိုၚ် ၂၀၀၈ တုဲ ဒက်ပ္တန်အာ သၞောတ်ဖေတ်ဒရေဝ်ဍာံဍာံဇေတ်ဇေတ်ဏောၚ်။ ပလေဝ်ပလေတ်တၚ်ဍိုန်လျ သၞောဝ်သ္ဇိုၚ် ၂၀၀၈ တုဲမှ သွက်ဂွံဒှ် ကၟိန်ဍုၚ်ဒဳမဝ်ကရေဇြဳဇေတ်တ်မာန် ကၠောန်အာဏောၚ်ဂးတုဲ လုပ်ကၠုၚ်ပေါဲရုဲမာဲ နကဵုတၚ်ရန်တၟံ ဗီုဏံရ။ ဆ္ဂးဂှ်လေဝ် ပ္ဍဲအာယုက်ကၠတ်ထဝ်ဒုတိယ သၞာံ၂၀၁၅၊ ၂၀၂၀ဂှ်တှ်ေ သွက်ဂွံပလေဝ်ပလေတ် သၞောဝ်ဥပဒေဂှ် ပိုဲဒးဒှ်လဝ်ပရေၚ်ခက်ခုဲ ဗွဲမဂၠိုၚ်ရ။
နဒဒှ်ဗော်ပရေၚ်ဍုၚ်ကွာန်လေဝ် ပ္ဍဲဂှ်တှ်ေ ဒးဂဗလဝ်ပရေၚ်ခက်ခုဲရ။ နကဵု EAO တအ်လေဝ် သွက်ဂွံပလေဝ်သၞောဝ်ဥပဒေ ကဵုဂၠံၚ်တရဴ NCA ဂှ် ဂွံဆဵုဂဗလဝ် ပ္ဍဲပေန်လုမ် ၂၁ ဗွဝ်သီုညးဖအိုတ်ရ။ ပလေဝ်သၞောဝ် ပ္ဍဲကၠတ်ထဝ်လေဝ် ဟွံဒှ်ကမၠောန်ပုဟ်။ အာသဳကၠဳသၞောဝ် ပ္ဍဲပေန်လုမ် ၂၁ ဗွဝ်လေဝ် ပ္ဍဲကဵုတၚ်တုပ်စိုတ်ကၟိန်ဍုၚ် တုပ်လဝ်စိုတ်ဂှ်လေဝ် သၞောတ်ဖေတ်ဒရေဝ်ကဵု သၞောဝ်ဒဳမဝ်ကရေဇြဳမိက်ဂွံဂွံဂှ် ဟွံမံက်တိတ်ကၠုၚ်ပုဟ်။ ပ္ဍဲလတူဗော်ပိုဲ ပ္တိုန်စၟတ်သမ္တီ ဟွံပတိုန်ဂှ်တှ်ေ အရာဏံ ဒးချပ်အဓိကရ။ တုဲပၠန် မွဲဂှ်တှ်ေ ပေါဲရုဲမာဲသၞာံ ၂၀၂၀ ပ္ဍဲသၞာံ ၂၀၂၁ ဂိတုဖေဖဝ်ဝါရဳ စၟတ်တ္ၚဲ (၁)ဂှ် ဒပ်ပၞာန်ကလေၚ်သီထောံအဝဵုပၠန်ဂှ်ရ သာတုဲတှ်ေ သၞောဝ်သ္ဇိုၚ် ၂၀၀၈ ဟီုဂှ်မုရောတှ်ေ ဒှ်ကၠုၚ်တၚ် သွက်ဂွံဒးသၟာန်ရ။ သၞောဝ်သ္ဇိုၚ် ၂၀၀၈ ဂှ် သာတုဲ ဂကောံဇြဟတ် ဒဳမဝ်ကရေဇြဳတအ်ကဵု ဂကောံဇြဟတ်ကောန်ဍုၚ်အရၚ်တအ် ဒှ်ကၠုၚ်အကာဲအရာ ဟွံပတှ်ေစှ်ေစိုတ်ရ။ ဗော်ပိုဲလေဝ် ဒှ်ဗော်ဂစာန်ပ္တိတ်ဒၟံၚ်ဇြဟတ် သွက်ဂွံဒက်ပ္တန် သၞောတ်ဖေတ်ဒရေဝ်ဒဳမဝ်ကရေဇြဳကဵု အခေါၚ်အရာကောန်ဍုၚ်အရၚ်တအ် မွဲဗော်ရ။ ဒှ်ဗော်ဒုၚ်သ္ဇိုၚ်ကဵုညးဍုၚ်ကွာန်တုဲ ဒက်ပ္တန်လဝ်ရ။ မ္ၚးနူဒှ်ကၠုၚ် သံသယ လ္တူ ၂၀၀၈ ဂှ် ဒပ်ပၞာန်ထပ်သီကေတ်အဝဵု သၞာံ ၂၀၂၁ ဂှ်ပၠန်တှ်ေ သွက်ဗော်ပိုဲ ဂွံပတိုန်စၟတ်သမ္တီဂှ် ဒှ်ကၠုၚ်အကာဲအရာ ဒးချပ်နွံတၟာဂလိုၚ်ရ။
-ပ္ဍဲလ္တူလ္ပာ်ကံၚ်ဇြဳပၞာန်ရုပ်သီပလီုကၠုၚ်ဗော်ဂှ် ဗီုလဵုမိက်ဂွံဟီုသ္ဂး နွံရော။
ပ္ဍဲလ္တူရုပ်သီကၠုၚ်ဗော်ဂှ် နကဵုပိုဲမုလေဝ် မိက်ဂွံဟီုဂး တၟေၚ်ၚ်တၟဟ်ဟ် ဟၟဲပုဟ်။ ဗော်ပိုဲပ္တိုန်စရၚ်စၟတ်သမ္တီ ဟွံပ္တိုန်ဟီုဂှ် ဗော်ပိုဲဂှ် သ္ၚဳဂၠိပ်ဟိုတ်ဖဵုသီုဖအိုတ် သရောပ်ထောံတုဲမှ အရာဏံ ဒှ်အကာဲအရာ ဒးပတိုတ်စၟတ်သမ္တီရ။ ကၠာနူဟွံဂွံသီအဝဵုလေဝ် ယဝ်ရဆက်အာ အတိုၚ်သၟဝ် ၂၀၀၈ တှ်ေ ပရေၚ်ဍုၚ်ကွာန်ကီု သၞောတ်ကီု စပ်ကဵုပရေၚ်ကောန်ဍုၚ်အရၚ်တုဲ ဒှ်ဒတုဲဖိုလ်ဍာံဍာံမာန်ဟာဟီုဂှ် ဒှ်ကၠုၚ်အကာဲအရာ ဒးချပ်ရ။ သီကေတ်အဝဵုတုဲမှ သာတုဲဒှ်အကာဲအရာ ဒးရေၚ်တၠုၚ်ပရေၚ်ပိုဲ နူဂၠံၚ်တရဴလဵုရောဂှ် ဒှ်ကၠုၚ် သွက်ဂွံဒးချပ် ပါ်ပါဲရ။
ပရေၚ်ပလီုထောံဗော်ဂှ် ဒှ်အဓိက သွက်ပိုဲဟွံသေၚ်ပုဟ်။ သ္ပအဓိကကဵု ညးဍုၚ်ကွာန်ရ။ ညးဍုၚ်ကွာန်တအ်ဂှ် နကဵုဗော် နူကဵုသၟဝ် ၂၀၀၈ မိက်ဂွံဟီုဟီု နူကဵသၟဝ် ၂၀၀၈ ဟွံသေၚ်မွဲသာ် သွက်ဂွံသ္ပစၞးကဵုညးဍုၚ်ကွာန်ပိုဲ မွဲနဲမွဲဗီုမာန်ဂှ် ယဝ်ရနွံပၟိက်ဏောၚ်တှ်ေ နကဵုဗော်ပိုဲ ဆက်ဒတူလာၚ်အာဒၟံၚ်ဏီရ။ လ္တူကဝ်မယှေန်ပေါဲရုဲမာဲစကစ ပသီလီုလဝ်ဗော်ဂှ် မုလေဝ်သွက်ဂွံဒးဟီုဂး တၟေၚ်တၟေၚ်တၟဟ်ဟ် ဟၟဲပုဟ်။ ပရေၚ်ဗော်နွံ ဗော်ဟၟဲဂှ် မုလေဝ် ဟွံဆေၚ်ကဵု UEC စကစပုဟ်။ ဒၟာနူဆေၚ်ဆက်ဒၟံၚ်ကဵု ညးဍုၚ်ကွာန်ဂှ်ရ လုကဴညးဍုၚ်ကွာန်တအ် ဆက်ထံက်ဒၟံၚ်ဂလာန်ဏီတှ်ေ ဗော်ပိုဲ ဆက်နွံအာဒၟံၚ်ဏီရ။
-နကဵုဗော် KySDP သ္ကုတ်လကြဴဏံတှ်ေ သွက်ဂွံဆက်ကၠောန်အာ ဗီုပြၚ်လဵု စဳဇန်လဝ်ရော။
အခိၚ်ဒးဒုၚ်ပလီုလဝ်ဗော်တုဲဂှ်တှ်ေ နကဵုပိုဲ ဒးက္လၚ်ရမျှာၚ် ညးဍုၚ်ကွာန်တအ်ဏောၚ်။ ဗီုပြၚ်လဵု ညးဍုၚ်ကွာန်တအ်မိက်ဂွံဒှ်ဂှ် မုရောဟီုတှ်ေ ပိုဲဒးက္လၚ်ဒၟံၚ်လၟိုန်ဏောၚ်။ မုပိုဲဆက်ကၠောန်အာရောဟီုတှ်ေ အခိၚ်လၟုဟ်ဏံ ဂွံဟီုဂှ် ပြဟ်ဒၟံၚ်ဏီ ဒးဟီုရ။ ပ္ဍဲကဵုတွဵုရးပိုဲ အတိုၚ်တီဒၟံၚ်ရ။ ပေါဲဗတိုက်တအ် အသိၚ်သၠုၚ်တိုန်ဒၟံၚ်။ ကောန်တွဵုရး ၜိုတ်ကဝက်ပြၚ်ၚ် ၜိုတ် ၃ ဂအုမ် ၂ ဂအုမ် ဒှ်ဒၟံၚ်ညးပါဲဘဲပၞာန်။ အခိၚ်စိုပ်ဒၟံၚ်ဒဒိုက်ဇၞော်ကဵုဇြဟတ်ဏံဂှ် ကိစ္စပရေၚ်ဗော်ပိုဲဂှ်တှ်ေ နကဵုပိုဲအဓိဂှ် သွက်ဂွံလုပ်ပေါဲရုဲမာဲ သွက်ဂွံပ္တိုန်စၟတ်သမ္တီဂှ် ပ္ဍဲက္ဍဟ်ပိုဲ ဟၟဲပုဟ်။ သွက်ဗော်ဂွံဆက်ဂျိုၚ်တန်တဴအာဂှ် ကမၠောန်ဒးပံၚ်တောဲရေၚ်တၠုၚ်ကဵု UEC ဂှ်လေဝ် ပိုဲကၠောန်သ္ပအာ ဟွံသေၚ်ပုဟ်။ အဓိကဂှ် ရံၚ်ကဵုအကာဲအရာ ညးဍုၚ်ကွာန်တုဲ ဗီုပြၚ်လဵု ဗော်ဂွံဆက်တန်တဴအာရောဂှ်ရ စွံအာအဓိကဏောၚ်။
-ဗော်ပရေၚ်ဍုၚ်ကွာန် ပတိုန်လဝ်စရၚ်စၟတ်သမ္တီဇရေၚ်ကံၚ်ဇြဳပၞာန်တုဲ လုပ်ပြိုၚ်ပေါဲရုဲမာဲတအ်ဂှ် မုမိက်ဂွံဟီုဂး နွံရော။
နကဵုပိုဲ လ္တူနူဟီုဂးပါ်ပါဲ ဗော်ပရေၚ်ဍုၚ်ကွာန်လ္ၚဵု ပလေဝ်ပလေတ်ဒၟံၚ် ကမၠောန်ပ္တိုန်စၟတ်သမ္တီတုဲ သွက်ဂွံလုပ်ပြိုၚ်ပေါဲရုဲမာဲတအ်ဂှ် ပ္ဍဲကဵုဗော်ညးတအ်မွဲမွဲဗော်ဂှ်တှ်ေ ပဝ်လဇြဳညးတအ်ကဵု ညးတအ်ရ နွံဏောၚ်။ တုဲပၠန် ဗော်ပ္ဍဲကၟိန်ဍုၚ်ဗၟာပိုဲ နွံဗွဲမဂၠိုၚ်ရ။ ဗော် ၉၀ ၊ ဗ္ဒာဲ ၁၀၀ နွံဒၟံၚ်ရ။ အဲညာတ်ကေတ်ရ။ ပ္ဍဲဗော်ပရေၚ်ဍုၚ်ကွာန်ပိုဲတအ်ဂှ် မွဲကာလ အဲလုပ်ကၠောန်ချဳဒရာၚ်ဒၟံၚ်ဂှ်တှ်ေ ဗော်ကၟိန်ဍုၚ်ပိုဲ နွံဗွဲမဂၠိုၚ်ဂှ် ဂကောံပါ်ဒကးဒၟံၚ် ၜါဂကောံရ။ ဗော်ဂကောံဇြဟတ်ဒဳမဝ်ကရေဇြဳကဵု ဗော်ထံက်ဂလာန်ဒပ်ပၞာန်ဟီုတုဲတှ်ေ ဒှ်ဒၟံၚ်ၜါဂကောံ ညာတ်ကေတ်ရ။ ဗော်ပ္တိုန်စၟတ်သမ္တီတအ်ဂှ်တှ်ေ ကဵုဒၟံၚ်ဇြဟတ်ထ္ၜၚ်ပ္တိုန် ကံၚ်ဇြဳပၞာန် ပံၚ်တောဲကဵု ကံၚ်ဇြဳပၞာန်တုဲ ဒှ်ဒၟံၚ်ဗီုပြၚ် ကၠုၚ်ပ္တိတ်ပရဲ သွက်ဒတုဲဖိုလ်ညးတအ် ညာတ်ကေတ်ရ။ ဗွဲတၟေၚ်တှ်ေ ဗော်ကောန်ဍုၚ်အရၚ်တအ်ဂှ် သွက်ဂွံဒက်ပ္တန် သၞောတ်ကၟိန်ဍုၚ်ဖေတ်ဒရေဝ်ဆေၚ်ကဵု ပရေၚ်ကောန်ဍုၚ်အရၚ်တအ်ဂှ် ဗော်ရေၚ်တၠုၚ်ဒၟံၚ်တှ်ေ နူကဵုသၟဝ် ၂၀၀၈ ဟွံသေၚ်မွဲသာ် လောန်လ္တူ ၂၀၀၈ တုဲ သွက်ဂွံဖံက်တိတ် နွံဒၟံၚ်ပၟိက်ရဂှ် မိက်ဂွံဟီုရ၊ ဇၟာပ်ပ်ဗော်ဂှ် ပဝ်လဇြဳညးကဵုညး နွံဒၟံၚ်ရ။ ဇၟာပ်က္ဍိုပ်သ္ကိုပ်ဗော်ဂှ် လညာတ်ပရေၚ်ဍုၚ်ကွာန်ညးတအ် တၚ်ဒတူလာၚ်ညးတအ် နွံလေဝ် နွံမာန်ရ။ ကၠောန်ဗီုဏံညိဂှ် ဟွံမိက်ဟီုပုဟ်။ ဗီုပြၚ်ပရေၚ်ဍုၚ်ကွာန် မိက်ဂွံကဵုဒှ်ဂှ်တှ်ေ နကဵုဂကောံဇြဟတ်ဒဳမဝ်ကရေဇြဳတအ် ညံၚ်ဂွံညဳသာညးသ္ကအ်ဂှ် ပၟိက်ဇၞော်ဒၟံၚ်ရ။ ညးမွဲမွဲပၞော် ကဆော်ပ္တိတ်ဒၟံၚ်ကၠေၚ်တှ်ေ သၞောတ်ဒဳမဝ်ကရေဇြဳ၊ သၞောတ်ဖေတ်ဒရေဝ် ပိုဲနွံဒၟံၚ်ပၟိက်ဂှ် တရဴသ္ၚောဲဒၟံၚ်ဏီ ညာတ်ကေတ်ရ။
-အလန်လကြဴအိုတ်ဏံ နကဵုဗော် KySDP မုမိက်ဂွံဟီုကဵု ညးဍုၚ်ကွာန် တွဵုရးကရေၚ်ဍာဲတအ်ဂလာန်ဗ္ကန်နွံရော။
နကဵုအဲ မိက်ဂွံဟီုကဵုကောန်တွဵုရးသီုဖအိုတ်ရ။ ဗော် KySDP ဟီုဂှ် ဒှ်ဗော်ပရေၚ်ဍုၚ်ကွာန် မွဲဗော်ရ။ တၚ်ဒတူလာၚ်ဗော် ပဝ်လဇြဳ တၚ်ရန်တၟံဗော်ပိုဲ နွံဒၟံၚ်ရ။ တိုၚ်ပ္ကဴပိုဲ နွံဒၟံၚ်ရ။ ဗော်ပရေၚ်ဍုၚ်ကွာန်ပိုဲဂှ် သွက်ဂွံဆက်အာ အတိုၚ်ပဝ်လဇြဳဇကုဂှ် ပ္တိတ်ဒၟံၚ်ဇြဟတ်ရ။ ပိုဲဂှ် ဟိုတ်နူဂကောံပၠန်ဂတးဟွံသေၚ်ဂှ်ရ ပ္ဍဲပရေၚ်ပၠန်ဂတး က္တဵုဒှ်ဒၟံၚ်အခိၚ်လၟုဟ်ဏံ ပါလုပ်လဝ်ဟွံမာန်ပုဟ် ပါလေဝ် ပါလုပ်ဟွံသေၚ်ပုဟ်။ နဒဒှ်က္ဍိုက်က္ဍိုပ်ရေၚ်တၠုၚ်ကဵု ညးဍုၚ်ကွာန်ဂှ် ပါလုပ်ဂွံရ။ က္ဍိုက်ကဵုက္ဍိုပ် ပရေၚ်ဍုၚ်ကွာန် ညးဍုၚ်ကွာန်ပိုဲဂှ် ဂွံရ။ ပဋိပက္ခဒှ်ဒၟံၚ်လၟုဟ်ဂှ် ညးဍုၚ်ကွာန်ပိုဲ ဒးဒှ်ဒၟံၚ်ဒတုဲဏောၚ်။ နကဵုညးဍုၚ်ကွာန်တအ် ဒးကောံကလောံဏောၚ်။
နကဵုအဲစပ်ကဵုကၠောန်ဒၟံၚ်ပၠန်ဂတးဂှ် သွက်ဂွံဒးဟီုဂးပါ်ပါဲ ဟၟဲပုဟ်။ ဆ္ဂး ပ္ဍဲလ္တူဂကောံဒကးပရးဒၟံၚ်ဂှ်တှ်ေ ကိစ္စဒှ်ထေက်ဟွံသေၚ် ညာတ်ကေတ်ရ။ အကြာညးဟၟဲပၟိက်ကဵုတၠအဝဵုဂှ် ပရေၚ်ကောံကလောံ ဒးနွံဏောၚ်။ မွဲတ္ၚဲတှ်ေ တိုၚ်ပ္ကဴမိက်ဂွံစိုပ် စိုပ်မာန်ဏောၚ်။ ဒုၚ်သ္ဇိုၚ်ကဵုဗော်တုဲ ဂကောံရပ်လွဟ်မံက်တိတ်ကၠုၚ်တအ် ပ္ဍဲလ္တူဂကောံရပ်လွဟ်လေဝ် နွံဒၟံၚ်ဂှ် ပိုဲတအ် ညိဓဝ်စိုတ်ဟွံမိပ်လးလးရ။ ပိုဲဂှ် နူသၟဝ်ဗော်ပရေၚ်ဍုၚ်မွဲ သိုၚ်ပ္တန်အာ ဂကောံမွဲ၊ ဒက်ပ္တန်အာ ဂကောံမွဲဏောၚ်ဟီုဂှ် ပ္ဍဲပိုဲဟၟဲပုဟ်။ ပရေၚ်က္ဍိုက်က္ဍိုပ် နူဂကောံကၠိုဟ်ခၠၚ်ပရေၚ်ပၠန်ဂတး မွဲဂကောံဟေၚ် ပိုဲဗက်အာအတိုၚ်ဇၟောဝ်ပရေၚ်ဍုၚ်ကွာန်ရ။ ပိုဲတအ်ဂှ် အကာဲအရာဂွံက္ဍိုက်က္ဍိုပ် ပရေၚ်ပၠန်ဂတးဏံလေဝ် ဟၟဲပုဟ်။ ဗော်ပိုဲ ပဝ်လဇြဳဖျေံလဝ် သွက်ဂွံအာဂၠံၚ်တရဴပရေၚ်ပၠန်ဂတးဏံလေဝ် ဟၟဲပုဟ်။ မိက်ဂွံကဵုညးဍုၚ်ကွာန်တအ် သီုညးဖအိုတ် ညဳသာညးသ္ကအ်ရ။ ညံၚ်ဟွံဂွံပါ်ဒကးအာ ညးမွဲမွဲဗီုဂှ် မိက်ဂွံဟီုရ။ ယဝ်ရ စိုပ်ကၠုၚ်အခိၚ်သွက်ကၟိန်ဍုၚ်ဒှ်ကၠုၚ်ဏောၚ်တှ်ေ နကဵုဗော်ပရေၚ်ဍုၚ်ကွာန်မွဲ ညံၚ်ဂွံဆက်ဒတူလာၚ်အာ သွက်ညးဍုၚ်တအ်ဂှ် ယဝ်နွံဒၟံၚ်ပၟိက်ဏီတှ်ေ ဆက်ဒတူလာၚ်အာ သွက်တွဵုရးပိုဲဂှ် ဒှ်ဒၟံၚ်ဒတုဲရ။
ဍုၚ်ဂှ် ဒှ်ကၠုၚ်အကာဲအရာဗီုဏံဂှ်ရတှ်ေ နကဵုဗော်ပရေၚ်ဍုၚ်ကွာန်မွဲ သွက်ဂွံလုပ်ပေါဲရုဲမာဲသက်က်ဂှ်ဟေၚ် ချပ်ဒၟံၚ်ဟွံဂွံရ။ နကဵုညးဍုၚ်ကွာန်တအ် လ္ၚတ်ပရေၚ်ဍုၚ်ကွာန် ပရေၚ်ပၠန်ဂတး ဇြိုဟ်ဟ်နက်က်တုဲ သ္ၚဳဂၠိပ်ဗၠေတ်ဒးတုဲမှ မိက်ဂွံညးဍုၚ်ကွာန်တအ် ဖျေံသ္ဂုတ်သွာတ်ရ။ ပရေၚ်ဍုၚ်ကွာန်မိက်ဂွံဟီုဟီု ဒးအာအတိုၚ်တၚ်သ္ဂုတ်သွာတ် တၚ်ထံက်ဂလာန်ညးဍုၚ်ကွာန်တအ်ဟေၚ်ရဂှ် မိက်ဂွံဟီုကဵု မိမညးဍုၚ်ကွာန်တအ်ရ။