မတ်မလီု၊ ဨပရဴ (၇)
ပ္ဍဲကဵုမူဝါဒသၟတ်မန် ကဏ္ဍဇၞော်မၞုံ (၁၁) ကဏ္ဍဂှ် သွက်ဂွံထ္မံက်ရုပ်ရဴ (၅) ကဏ္ဍဂှ် ချူခၞံသ္ပဒတန်လဝ် မဟာဗျူဟာ ကေုာံ နဲဗျူဟာတံရောၚ် ညးအုပ်ကာကမ္မတဳက္ဍိုက်ပ် ဌာန်ကောံသၟတ်မန် နာဲစိစောန် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သွက်ဂွံသ္ပဒတန် မဟာဗျူဟာ ဌာန်ကောံသၟတ်မန်ဂှ် တုဲကၠုၚ် ဂိတုမာတ်ချ် (၂၅) ကေုာံ (၂၆) တေံ နူဌာန်ကောံသၟတ်မန် ကော်ကောံဓရီု ပ္ဍဲမတ်မလီု၊ တွဵုရးဍုၚ်မန်တုဲ ချူဓဇက်သ္ပဒတန်လဝ် (၅) ကဏ္ဍရ။
ပ္ဍဲကဵု (၅) ကဏ္ဍ မချူဓဇက်သ္ပဒတန်လဝ် နဒဒှ်မဟာဗျူဟာဂှ် ကဏ္ဍသၟတ် ကေုာံ ပရေၚ်ဍုၚ်ကွာန်၊ သၟတ် ကေုာံ ပရေၚ်ဂီုကၠီုၜိုဟ်လလမ်၊ သၟတ် ကေုာံ ပရေၚ်ပညာ၊ သၟတ် ကေုာံ ဂဥုဲၜူမာဲတံကီု သီုကဵုကဏ္ဍသၟတ် ကေုာံ လိက်ပတ်ယေန်သၞာၚ်တံ ပါလုပ်ရ။
မဟာဗျူဟာ မချူဓဇက်သ္ပဒတန်လဝ်တံဂှ် စဳဇန်လဝ် သွက်ဂွံစထ္မံက်အာရုပ်ရဴ ပ္ဍဲဂိတုမေကၠုၚ်စိုပ်ဏံတုဲ ပ္ဍဲဒၞါဲထ္မံက်ရုပ်ရဴ လၟေၚ်ကမၠောန်တံဂှ်လေဝ် ပ္ညဳပ္ညပ်ရေၚ်တၠုၚ်အာကဵု ဂကောံဗော်သွးမဆေၚ်စပ်တံရောၚ်ဂှ် နာဲစိစောန် ဟီုတဴရ။
“ပ္ဍဲကဵုလၟေၚ်ကမၠောန် မဟာဗျူဟာ ပိုယ်တံမချူဓဇက်လဝ် နွံတၟာဂလိုၚ်ဂှ် ပိုယ်တံ ရုဲပ္တိတ်ထောံ အဓိကမကဵုက္ဍိုပ် ၁၊ ၂၊ ၃ တံဂှ်ရ။ ဂၞန်မွဲ မကဵုက္ဍိုပ်ဂှ် ကၠုၚ်စိုပ်ဂိတုမေဏံ စထ္မံက်အာရုပ်ရဴဏောၚ်။ တၚ်တၞဟ်ဟ်တံဂှ်တှ်ေ နကဵုဌာန်ကောံသၟတ်မန် သ္ကုတ်ပိုယ်ကၠောန်ဟွံမာန်တံကဵုဒှ်၊ ဒှ်အာအခက်အခုဲကဵု အခိၚ်ကဵုဒှ် အေတံဏံဂှ် အာစိုပ်သဳကၠဳကဵု ဂကောံမှာဇန်မဆေၚ်စပ်တံတုဲ သွက်ဂွံရေၚ်တၠုၚ် လ္ပာ်မဟာဗျူဟာကုညးတံဂှ် စဳဇန်လဝ် နဒဒှ်ပရေၚ်စန်ဒက်ဂှ် နွံ” သာ်ဝွံ သ္ဂးရ။
ကဏ္ဍမူဝါဒသၟတ်မန် မသှ်ေဒၟံၚ် (၆) ကဏ္ဍတံဂှ် သွက်ဂွံချူဓဇက်ထ္မံက်ရုပ်ရဴ နဒဒှ်မဟာဗျူဟာ ကေုာံ နဲဗျူဟာမာန် ဒက်ပ္တန်လဝ် ကမ္မတဳမွဲတုဲ ကၠုၚ်စိုပ်ၜိုတ်ဂိတုဂျောန်ဏံမှဟေၚ် ချူဓဇက်မာန်ဏောၚ် ဒဒှ်ရချိၚ်ခယျကေတ်လဝ်ဂှ်ကီု၊ သွက်ဂွံချူဓဇက်ထောံဒတုဲ ကၠာဂွိုအ်စိုပ်ဂိတုဒဳဇြေမ်ဗာ သၞာံဏံဂှ် ဖျေံလဝ်အစဳဇန်ရောၚ် နာဲစိစောန် သောၚ်ကလးလဝ်ရ။
ဆ္ဂး ဟိုတ်နူအကာဲအရာပရေၚ်ဍုၚ်ကွာန် မက္တဵုဒှ်ဒၟံၚ် အပ္ဍဲဍုၚ်လၟုဟ် မဟွံညိၚ်ဝတ်တံဂှ်တုဲ သွက်ဂွံထ္မံက်ရုပ်ရဴ လၟေၚ်ကမၠောန်မူဝါဒသၟတ်မန်လ္ၚဵုတံဂှ် အခက်အခုဲနွံကီုလေဝ် လ္ပာ်သ္ကုတ်ကၠောန်မာန်တံဂှ် ဂ္စါန်ရေၚ်တၠုၚ်အာရောၚ် ညးသ္ဂးရ။
“ဗီုလဵုဒှ်ဒှ် လ္ပာ်ပိုယ်တံကၠောန်မာန် ကဵုပညာဟာ ဟွံသေၚ်မ္ဂး လ္ပာ်ကံက်ကပှ်တၚ်နၚ်တံဟာ မတံဏံဂှ် ပိုယ်တံဒုၚ်သ္ဇိုၚ်ကဵု လ္တူပရေၚ်ဂီုကၠီုပူဂဵုတုဲ လ္ပာ်ကၠောန်ဂွံတံဂှ် ကၠောန်အာဏောၚ်။ ခတှ်ေကၠောန်အာတံဂှ်လေဝ် ပ္ဍဲဒၞါဲဂီုကၠီုတံဂှ်ဟေၚ် စွံအဓိကတုဲ ကၠောန်အာဏောၚ်” သာ်ဝွံ နာဲစိစောန် ဟီုရ။
မူဝါဒဌာန်ကောံသၟတ်မန်ဂှ် သ္ပဒတန်လဝ် ပ္ဍဲကောံဓရီုဌာန်ကောံသၟတ်မန် မကၠောန်ဗဒှ်လဝ် ပ္ဍဲခရိုၚ်သဓီု တိဍာ်ထိၚ်ဒဝ် ဗော်ဍုၚ်မန်တၟိ သၞာံတုဲကၠုၚ်တေံ နူဂိတုဂျာန္နဝါရဳ (၂၇) စဵုကဵု (၂၉) တေံဂှ်တုဲ ကမ္မတဳဗဟဵု ကေုာံ ဂကောံညးအုပ်ကာနာနာ ဌာန်ကောံသၟတ်မန် မရုဲစှ်လဝ်တၟိတံဂှ် အပ္ဍဲပွိုၚ် (၆) ဂိတုကၠုၚ်စိုပ်ဏံ သွက်ဂွံချူဓဇက်ဒတုဲဂှ် သ္ဂုတ်သွာတ်လဝ်ရ။
ကြဴနူကၠောန်ဗဒှ်ကောံဓရီုတုဲဂှ် သွက်ကဏ္ဍ မပါလုပ် ပ္ဍဲမူဝါဒသၟတ်မန်တံဂှ် ထ္မံက်ဒၟံၚ်ရုပ်ရဴနွံတုဲ ပ္ဍဲကဵုမဟာဗျူဟာ မချူဓဇက်သ္ပဒတန်လဝ်လၟုဟ်တံဂှ်လေဝ် လၟေၚ်ကမၠောန်တံ ပါကၠုၚ်တၟာဂလိုၚ်ဏောၚ်ဂှ် ဂွံတီကေတ် နူကဵုဌာန်ကောံသၟတ်မန်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−MYF