ကအ်ကြိက်၊ ဨဗြဴ(၈)
ဟိုတ်နူပေါဲဗတိုက်သ္ကာတ်မြဟ်ဒၟံၚ်တုဲ နကဵုညးဍုၚ်ကွာန် သ္ပတမ်နူ ဂိတုဨဗြဴ စၟတ်တ္ၚဲ (၇)တုဲ ညံၚ်ဟွံဂွံတတ်ကၠောံအာကၠုၚ် ဂၠံၚ်ဇၞော်အာယှ ဗြဝတဳ-ကအ်ကြိက် တွဵုရးကရေၚ်ဂှ် ဂကောံဒပ်ပံၚ်ကောံ ပၠန်ဂတးကရေၚ် ပံၚ်တောဲပ္တိတ်လဝ်အသံပၟိၚ်ရ။
မွဲဒမြိပ်ဂၠံၚ်ဇၞော်အာယှဂှ် အကြာဒပ်ကံၚ်ဇြဳပၞာန် ဒပ်မၚ်ပယျဵု ကေုာံဂကောံဒပ်ပံၚ်ကောံ ပၠန်ဂတးကရေၚ်တအ် သ္ပတံနူ ဂိတုမာတ်ချ် စၟတ်တ္ၚဲ (၂၅) တုဲ ပေါဲဗတိုက်က္တဵုဒှ်ဒၟံၚ်ဂှ်ရ ပ္ဍဲပေါဲဗတိုက်ဏံ လ္ပာ်ကံၚ်ဇြဳပၞာန် ဒးဂိလဝ်တုဲ ပလံၚ်ဗစိုပ်ဒၟံၚ်ဇြဟတ်မၞိဟ် လွဟ်မကမ် ကေုာံဇွောံမတအ် နူဂၠံၚ်ဇၞော်အာယှ မွဲကဆံၚ်ရဂှ် ဂကောံဒပ်ပံၚ်ကောံတအ် လလောၚ်တြးလဝ်ရ။
ဟိုတ်ဂှ်ရ နကဵုကောန်အရာပ်ညးဍုၚ်ကွာန်တအ် သ္ပတမ်နူ ဂိတုဨဗြဴ စၟတ်တ္ၚဲ(၇) စဵုကဵု စၟတ်တ္ၚဲ (၂၁) ညံၚ်ဟွံဂွံတတ်ကၠောံအာကၠုၚ် ဂၠံၚ်ဇၞော် ဗြဝတဳ-ကအ်ကြိက်ဂှ် ဂကောံဒပ်ပံၚ်ကောံ ပံၚ်တောဲပ္တိတ်လဝ် လိက်လလောၚ်တြး နကဵုစၟတ်တ္ၚဲ ဂိတုဨဗြဴ စၟတ်တ္ၚဲ(၇)ရ။
ညံၚ်ဟွံဂွံတတ်ကၠောံအာကၠုၚ် ဂၠံၚ်ဇၞော်အာယှဂှ် ၜိုန်ရဂကောံဒပ်ပၠန်ဂတးပံၚ်ကောံတအ် ပ္တိတ်လဝ်လိက်ကဵုလဝ်သမ္တီကီုလေဝ် ညးလ္ၚဵုဂှ်အာကၠုၚ်ဒၟံၚ် နွံတုဲ ကွဳစက်အာကၠုၚ်ဒၟံၚ်မွဲဖ္ဍိုက် ဒးဒုၚ်စံၚ်လဝ် ပ္ဍဲတ္ၚဲဏံ ဂိတုဨဗြဴ စၟတ်တ္ၚဲ (၇) ကီု ပ္ဍဲသ္ကုတ်ဂၠံၚ်အာယှမွဲဒၞာဲဂှ်လေဝ် ဒှ်ဒၟံၚ်ပေါဲဗတိုက်ရ တမ်ရိုဟ်တၚ်ဂၞၚ်ပရိုၚ်ဒေသတအ် ဟီုသ္ဂးလဝ်ရ။
ပ္ဍဲလ္ပာ်ကွာန်မေဝ်ကနေဝ် ပွိုၚ်ဍုၚ်ဗြဝတဳဂှ်လေဝ် သွက်ဂွံထ္ပက်လုပ်ကရောၚ်ပၞာန် နကဵုဇြဟတ်ပေၚ်ၚ်ဂှ် ဒပ်ကံၚ်ဇြဳပၞာန် ဂစာန်ဒၟံၚ်တုဲ အကာဲအရာပၞာန်ၜါလ္ပာ်ဂှ် ဆက်ကြံၚ်မ္ၚိုဟ်ဒၟံၚ်တုဲ ဟိုတ်နူလ္ပာ်ကံၚ်ဇြဳပၞာန် ပန်ဖျေံလဝ်လွဟ်ဇၞော် ညးဍုၚ်ကွာန် မၞုံကွာန်မေဝ်ကနေဝ်(ပ္ဍဲ) မေဝ်ကနေဝ်(မ္ၚး)တအ် ဒးဂြိပ်ဒဴဒၟံၚ် သီုအလုံကွာန်ရဂှ် ဂွံတီကေတ်ရ။
ဟိုတ်နူပဋိပက္ခ က္တဵုဒှ်ဒၟံၚ် အကြာဒပ်ကံၚ်ဇြဳပၞာန် ကေုာံ ဂကောံဇြဟတ်ပရေၚ်ပၠန်ဂတးတအ် ပ္ဍဲတွဵုရးကရေၚ် ဍုၚ်ဗြဝတဳ ဍုၚ်တၟိယှိုဲကုက္ကိုဝ် တေန်ကာန်ညဳနောၚ် မေဝ်ကနေဝ် ကအ်ကြိက် ကေုာံ ဍုၚ်ကြုၚ်ဒဵုတအ်တုဲ ညးဒေသဂၠိုၚ်ကဵုလ္ၚီ ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဗၠးဘဲရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ(ဗီုတြေံ)