“ဒပ်ပၞာန်ဂှ် မိက်ဂွံဓမံက်ဒၟံၚ်ရုပ်ရဴသၞောတ်ပညာ မၞိဟ်ထံက်ဂလာန်ကဵုဍေံတအ် ပစူလ္ပုဟ်တဲတုဲ ဓညိက်က္ဍိုပ်။ ညးဓမံက်မံၚ်ရုပ်ရဴ ပရေၚ်ပညာဒဳမဝ်ကရေဇြဳ ဒစဵုဒစးကဵုဍေံတအ်ဂှ် ပၟိက်ဟၟဲပုဟ်။ ဒၟာနူဂှ်ရ ကၠောန်ဒၟံၚ်ပရေၚ်ရပ်စပ် ကေတ်အရေဝ်ရဂှ် ညာတ်ကေတ်ရ”

တၚ်ဆက်စၠောံ သၟာန်သွဟ်လဝ်ကဵုအ္စာနောၚ်ဇျှော နူသမဂ္ဂကောန်ကမၠောန်ပရေၚ်ပညာသ္ဇိုၚ်။

ဒဒှ်ရ ရပ်ထိၚ်ဒဝ်လဝ် မၞိဟ်(၁၅)တၠ မပါလုပ်သီုဒဝ်အိယှိုဲဇြေန် ညးတာလျိုၚ် ဘာဗ္တောန်လိက်အောန်လာၚ် Federal School of Aung Myay Thar Zan နူကဵုရးအၚ်ဝ၊ ပွိုၚ်ဍုၚ်အံၚ်မျတာသာန် ပံက်လဝ်နကဵုတၚ်စၞောန် အလဵုအသဳပရေၚ်ညဳသၟဟ်ကောန်ဂကူ (NUG)ရဂှ် ကံၚ်ဇြဳပၞာန် လလောၚ်တြးလဝ် ပ္ဍဲဂိတုဨဗြဴ စၟတ်တ္ၚဲ (၄) တုဲကၠုၚ်ဏံရ။ ဟိုတ်ဂှ်ရ ကံၚ်ဇြဳပၞာန် ပ္တဝ်လဝ်ကဵု ဘာဗ္တောန်လိက်အောန်လာၚ် NUG တုဲ အကာဲအရာရပ်စပ်ကၠုၚ်ဒၟံၚ်၊ ပရေၚ်ဆောံလေၚ်အခေါၚ်ဗ္တောန်ပညာ ပ္ဍဲလက်ထက်ကံၚ်ဇြဳပၞာန် ကေုာံ ညံၚ်ဘာဗ္တောန်လိက် NUG ဟွံဂွံဒးဒုၚ်ရပ်ဂှ် မုသွက်ဂွံဒးပရဟ်ဒုၚ်ပလေဝ်ပလေတ်လဝ် ထေက်ရော။ စပ်ကဵုအကာဲအရာဏံတုဲ ဆက်စၠောံသၟာန်သွဟ်လဝ်ကဵု အ္စာနောၚ်ဇျှော နူသမဂ္ဂကောန်ကမၠောန်ပရေၚ်ပညာသ္ဇိုၚ် (BEWU) ရ။  

-ကိုပ်ကၠာအိုတ်ဏံ လတူပရေၚ်ကံၚ်ဇြဳပၞာန်ကေတ်ကၠုၚ်အရေဝ် ရပ်စပ်ကၠုၚ် ဘာဗ္တောန်လိက်အောန်လာၚ် ပံက်လဝ် နူကဵု NUG ပၠန်ဂတးဒၟံၚ်ကဵုဍေံတအ်ဂှ် ဗီုလဵုညာတ်ကေတ်ရော။

ပိုဲဂှ် ဗကပ်လဝ်ဗဗေၚ်ကဵု ကံၚ်ဇြဳပၞာန်ရ။ ပိုဲ ဒှ်အ္စာ CDM၊ အ္စာၝောံ CDM ပံၚ်တောဲကဵု မိမကွးဘာတအ်တုဲ ဘာပရေၚ်ပညာညးဍုၚ်ကွာန်ဂှ် ပိုဲဟၟဲပၟိက်ကဵု ပညာဍိက်ဂၠုဲပၞာန်ပုဟ်။ အဖဝ်သၞောတ်တၠအဝဵုပၞာန်ဂှ် ပရေၚ်ပညာဍိက်ဂၠုဲပၞာန်ဂှ်လေဝ် ဒးပၠန်ဂတးကီုဏောၚ် ဒၟာနူဒုၚ်ဂိုၚ်ကေတ်လဝ်ဂှ်ရ ပရေၚ်ပညာညးဍုၚ်ကွာန်ဟီုတုဲတှ်ေ သွက်ဂွံဂါံအာ ပရေၚ်ပညာဖေတ်ဒရေတ်ဒဳမဝ်ကရေဇြဳ သွက်ဂွံဒးပလေဝ်ပလေတ်လဝ်လဂါံဇိုၚ် ပံက်ကၠုၚ်လဝ် ဘာပရေၚ်ပညာညးဍုၚ်ကွာန်ရ။ ကံၚ်ဇြဳပၞာန် ရပ်စပ်ကေတ်ကၠုၚ်အရေဝ်ကဵု ဘာဏံကီုလေဝ် ပ္ဍဲလ္ပာ်ဏံ အရာပိုဲအာဒၟံၚ်ဖေတ်ဒရေတ်ဒဳမဝ်ကရေဇြဳဂှ် တၠအဝဵုပၞာန် ဒးစိုတ်ဏောၚ် ဟွံထေၚ်ရ။ ဒပ်ပၞာန်ဂှ် မိက်ဂွံဓမံက်ဒၟံၚ်ရုပ်ရဴသၞောတ်ပညာ မၞိဟ်ထံက်ဂလာန်ကဵုဍေံတအ် ပစူလ္ပုဟ်တဲတုဲ ဓညိက်က္ဍိုပ်။ ညးဓမံက်မံၚ်ရုပ်ရဴ ပရေၚ်ပညာဒဳမဝ်ကရေဇြဳ ဒစဵုဒစးကဵုဍေံတအ်ဂှ် ပၟိက်ဟၟဲပုဟ်။ ဒၟာနူဂှ်ရ ကၠောန်ဒၟံၚ်ပရေၚ်ရပ်စပ် ကေတ်အရေဝ်ရဂှ် ညာတ်ကေတ်ရ။ ပရေၚ်ဗ္တောန်ဖျောန် ဟွံလုပ်ကဵုသၞောဝ်ရဂးတုဲ ကံၚ်ဇြဳပၞာန် ဟီုလဝ်ရ။ ဍာံဍာံ ဟွံလုပ်ကဵုသၞောဝ်ဂှ် ကံၚ်ဇြဳပၞာန်ရ။ သီကေတ်အဝဵုဂှ် နူကဵုလောန်အာ လ္တူ ၂၀၀၈ တေံဂှ်ရ ကံၚ်ဇြဳပၞာန် ကၠောန်သ္ပလဝ် ပရေၚ်သီအဝဵု ဟွံလုပ်ကဵုသၞောဝ်ရ၊ အတိုၚ်သွဟ်ပေါဲရုဲမာဲ ၂၀၂၀ တိတ်ကၠုၚ်လဝ်ဂှ်ရ မၞိဟ်ညးဍုၚ်ကွာန်တအ်ရုဲစှ်လဝ် အလဵုအသဳပရေၚ်ညဳသၟဟ်ကောန်ဂကူရ လုပ်ကဵုသၞောဝ်ရ။ ဂကောံဇြဟတ် ကၠောန်ပၠန်ဂတးဒၟံၚ်လ္ပာ်ဏံရ လုပ်ကဵုသၞောဝ် နကဵုပရေၚ် ညးဍုၚ်ကွာန်တအ် ထံက်ဂလာန်ရ။ ဗီုကံၚ်ဇြဳပၞာန်ဟီု ဟွံလုပ်ကဵုသၞောဝ်ပုဟ်ဟီုဂှ် ကံၚ်ဇြဳပၞာန်ရ ဟွံလုပ်သၞောဝ်။ ပရေၚ်ရပ်စပ်ကေတ်အရေဝ်ဂှ်တှ်ေ ဒၟာနူဒစဵုဒစးကဵုဍေံတအ်တုဲ ဒှ်စရိုတ်ၠအဝဵုပၞာန်တအ်ရဂှ် ပိုဲပတှ်ေကေတ်လဝ်ရ။

-ပရေၚ်ကံၚ်ဇြဳပၞာန်ရပ်စပ်ဒၟံၚ် မိမကွး ဘာဗ္တောန်ဒၟံၚ်လိက် ပ္ဍဲဘာဗ္တောန်လိက် NUG ဂှ် ဒှ်ဒၟံၚ်ပရေၚ်ဘပဠ လ္တူပရေၚ်ကတ်ဗ္တောန်ပညာ ကောန်ဍုၚ်မွဲမွဲတၠဟီုဂှ် ပ္ဍဲလ္တူဏံ မုမိက်ဂွံဟီုရော။

ပ္ဍဲဂၠးကဝ်လေဝ် အကာဲအရာလဵုဒှ်ဒှ် ပရေၚ်ပညာ အခေါၚ်အရာဗၠးၜးနွံဒၟံၚ်ရ။ အခေါၚ်ဗ္တောန်ပညာဗၠးဗၠးၜးၜးဟီုဂှ် ပါလုပ်ဒၟံၚ် ပ္ဍဲသ္ဇိုၚ်အခေါၚ်အရာမၞိဟ် တုဲတုဲဒၟံၚ်ရ၊ ဘပဠဒၟံၚ် RIGHT TO EDUCATION ဟီုဂှ် ဒှ်ပွကံၚ်ဇြဳပၞာန် ဘပဠဒၟံၚ် အခေါၚ်အရာမၞိဟ်သက်က် အရာဏံဂှ် ဒှ်ဒ္ဂေတ်စရိုတ်တၠအဝဵုပၞာန်ဇေတ်တ်ရ။ အတိုၚ်ဗီုပြၚ်တၠအဝဵုပၞာန်တအ်ကၠောန် ကၠောန်သ္ပဒၟံၚ်ဂှ်ရ ဖံက်ပ္ကဝ်ဒၟံၚ် အခေါၚ်အရာမၞိဟ် မံက်ဂတဝ်ဒၟံၚ်ရ ပ္ဍဲပရေၚ်ပညာပိုဲသၟးဟွံသေၚ်ပုဟ် ပရေၚ်စံၚ်ပလီုကွာန် အလုံမွဲကၟိန်ဍုၚ်ကီု ပရေၚ်ပ္ကီုပရာပ်ပြိုက်ဂစိုတ် ညးဍုၚ်ကွာန်တအ်ကီု ကၠောန်သ္ပဒၟံၚ်ပြာပြာကတ်တ်ရဟီုတှ်ေ ဖံက်ပ္ကဝ်ဒၟံၚ် အခေါၚ်အရာကွးဘာ ညးပံၚ်တောဲဒၟံၚ်ကဵု ပရေၚ်ပညာလ္ပာ်ဏံ ဗ္တောန်ပညာဗၠးဗၠးၜးၜးကဵု အခေါၚ်အ္စာ အ္စာၝောံတအ်ဗ္တောန်ကဵုပညာဗၠးဗၠးၜးၜးရဂှ် ညာတ်ကေတ်ရ။

-ဘာဗ္တောန်လိက်အောန်လာၚ် လၟုဟ်တှ်ေမပ္တံကဵု Federal School of Aung Myay Thar Zan သၞာံကၠာတေံလေဝ် Kaung for you ၊ FOEIM တအ်ဂှ် မုဟိုတ်ကံၚ်ဇြဳပၞာန် ဂွံထိၚ်ဒဝ်ကၟာတ်လဒဵုကၠုၚ်ဗီုရော။

ကံၚ်ဇြဳပၞာန်တော်လဝ် အ္စာ၊ အ္စာၝောံ CDM တအ်ကဵု ဂကောံဇြဟတ်ပရေၚ်ပၠန်ဂတးတအ် သာသ္ပအ်ဒၟံၚ် ဒှ်မာန်ရ။ ဓမံက်ရုပ်ရဴ ပရေၚ်ပညာဟွံမာန်ပုဟ်။ ဍေံတအ်ထေၚ်လဝ်တှ်ေ စမြိုၚ် ကၟဳဗ္ဒၚ်နွံမှ ဒှ်ဘာဗ္တောန်လိက်ဏောၚ် ချပ်ဒၟံၚ်ကဵု လညာတ်တြေံတြဟ် ဒှ်မာန်ရ။ အခိၚ်လၟုဟ်ဏံ ဘာဗ္တောန်လိက်အောန်လာၚ် နဒဒှ်ဘာပရေၚ်ပညာညးဍုၚ်ကွာန် မံက်တိတ်ကၠုၚ် နကဵုဒမြိပ်အသိၚ်ခိုဟ်ဟ်။ ၜိုတ်ထေက်ကဵုအံၚ်ဇၞးလေဝ် အံၚ်ဇၞးရ။ မွဲလ္ပာ်ပၠန် ဍာ်ဒကေဝ်အစောန်စရာဲပညာညာ ကောန်ၚာ်သၟတ်တအ် ကဵုသၞောတ်ဗ္တောန်ဒၟံၚ် ပ္ဍဲဘာကံၚ်ဇြဳပၞာန်ဂှ် မုဟွံဆေၚ်ဆက်ရ။ ဒှ်သၞောတ်တၟိရ။အာဒၟံၚ်ကဵုသၞောတ်ပရေၚ်ပညာတၟိ မာန်ကၠုၚ်ဒၟံၚ်ယျ။ ပရေၚ်အံၚ်ဇၞး ပ္ဍဲအောန်လာၚ် ကံၚ်ဇြဳပၞာန် ဟၟဲပၟိက်ပုဟ်။ ၜိုန်ရတော်လဝ်ပိုဲ သာသာသ္ပအ်သ္ပအ်ကီုလေဝ် ဘာပရေၚ်ပညာပိုဲ ဒှ်ကၠုၚ်ဇြဟတ်ခိုဟ်ဟ် အသိၚ်သၠုၚ်ၚ်ဂှ် မိက်ဂွံထိၚ်ဒဝ်တုဲ ပရေၚ်ပရပ်စပ် ကေတ်ကၠုၚ်အရေဝ်တအ် ကၠောန်ကၠုၚ်ရဂှ် ညာတ်ကေတ်ရ။

-ပရေၚ်ကံၚ်ဇြဳပၞာန်ဂၠိုက်ဂၠာဲရပ်စပ်ဒၟံၚ် ဗီုလၟုဟ်ဏံ ပရေၚ်ဂီုကၠီု လ္တူကွးဘာတိုန်ဒၟံၚ်ဘာ NUG မိမကွးဘာတအ် အ္စာ အ္စာၝောံ ဗ္တောန်ဖျောန်ကဵုဒၟံၚ်တအ် ဇၞော်ဇၞော် ဒှ်ကၠုၚ်မာန်ဟာ။

ပရေၚ်ပညာဟီုဂှ် အတိုၚ်ဗီုဟီုလဝ် နူကၠာဏံဂှ်ရ။ ပရေၚ်ပညာဂှ် ဒှ်အခေါၚ်ဗၠးၜး။ ပိုဲဂှ် ယဝ်ရဟွံဒးစိုတ် အ္စာဗ္တောန်ကဵုဒၟံၚ်ပ္ဍဲတန်ဏံတှ်ေ ပိုဲအာ ပ္ဍဲအ္စာ အ္စာၝောံ ဗ္တောန်ကဵုဒၟံၚ် ပ္ဍဲတန်တၞဟ်တုဲ ဒးဓမံက်အာရုပ်ရဴ သၞောတ်ပရေၚ်ပညာ အခေါၚ်ဗၠးဗၠးၜးၜး နွံဏောၚ်။ ဟွံဒးစိုတ်သၞောတ်ပရေၚ်ပညာကံၚ်ဇြဳပၞာန်တုဲ အာပံၚ်တောဲကဵုဘာပရေၚ်ပညာညးဍုၚ်ကွာန် NUG ဘာဂကောံဇြဟတ်ပၠန်ဂတးတအ် ပံက်လဝ်တအ်ဂှ် ဒှ်အခေါၚ်ရုဲစှ် မၞိဟ်မွဲမွဲတၠရ။ အရာဏံဂှ်ဒှ်အခေါၚ်ဗၠးၜး ပရေၚ်ပညာရ။ ဒးစိုတ်ကဵုဒှ် ဟွံဒးစိုတ်ကဵုဒှ် ဒးလုပ်ဗ္တောန်ဏောၚ်တှ်ေ ဒှ်ကၠုၚ်သၞောတ်ပရေၚ်ပညာခိုဟ်မွဲ ဟွံသေၚ်ပုဟ်။ ယဝ်ရပရေၚ်ပညာညးဍုၚ်ကွာန် ဓမံက်ဒၟံၚ်ရုပ်ရဴဂှ် ဟွံခိုဟ်တှ်ေ သွက်ညးဍုၚ်ကွာန်တအ် ဂွံလုပ်ပံၚ်တောဲဂှ် နွံဟွံသေၚ်။ ဒၟာနူသ္ဍိုက်မၠိုၚ် ပရေၚ်ပညာညးဍုၚ်ကွာန်တုဲ ဒှ်ကၠုပ်ပရေၚ်ပံၚ်တောဲရေၚ်တၠုၚ်ရ။ ပရေၚ်ရပ်စပ် အ္စာအ္စာၝောံ နူဘာပရေၚ်ပညာညးဍုၚ်ကွာန်ဂှ် လ္တူနူပရေၚ်ဂီုကၠီု ပရေၚ်ပရောကဵုပရိုၚ်တုဲ ဒးဒုၚ်ရပ်လဝ် ရံၚ်ကေတ်ဏောၚ်တှ်ေ အရာဏံဂှ် ဒှ်ပရေၚ်ကဵုပရိုၚ်ရ။

ဒၟာနူမၞိဟ်ဍေံ ဒှ်ဒၟံၚ်ညံၚ်မၞိဟ်ဇကု နွံဒၟံၚ်ရ။ တုဲမွဲပၠန်ဂှ် NON CDM တအ်ရ။ ပိုဲဂှ် အခိၚ်ကၠာတေံတှ်ေ ၜိုန်ရယိုက်ဂၠေၚ်လဝ်တာလျိုၚ် ဗ္တောန်ကၠုၚ်လဝ်လိက် မွဲဘာဓဝ်ကီုလေဝ် တၚ်ပတှ်ေ ပရေၚ်ဍုၚ်ကွာန် တၚ်ပတှ်ေ ပရေၚ်ပၠန်ဂတး ဟွံတုပ်ကၠုၚ်ဂှ်ရ ဒှ်အာညးမွဲမွဲလ္ပာ်ဂှ် ပြသၞာဟွံသေၚ်ပုဟ်။ မံၚ်လ္ပာ်သၞတုဲ ပရေၚ် NON CDM ကၠောန်သ္ပဒၟံၚ်အထံက်တိုၚ်ကံၚ်ဇြဳပၞာန် ပၟိက်တုပ်ကဵုသၞ တေၚ်စိုပ် ကဵုပရိုၚ်တအ်လေဝ် ပါလုပ်ဒၟံၚ်ရ။ အရာဏံဂှ် ဇီုကပိုက်ဒးဒၟံၚ် ပရေၚ်ဂီုကၠီု အ္စာအ္စာၝောံ မၞုံပ္ဍဲပရေၚ်ပညာညးဍုၚ်ကွာန် ဇၞော်ကဵုဇြဟတ် နွံဒၟံၚ်ရ။ 

ဒးဟီုဂး ပိုတ်တ်သ္ကုတ်တ်ဏောၚ်။ မၞိဟ်ကၠောန်သ္ပဒၟံၚ် ညံၚ်ကဵုသတ်ပညောန် နွံဒၟံၚ်ပ္ဍဲယန္တရာကံၚ်ဇြဳပၞာန် နွံဒၟံၚ်ညိညရ။ ဆ္ဂးဂှ် ဗွဲမဂၠိုၚ်ဂှ်တှ်ေ လ္ပာ်ပိုဲ အခိၚ်ပြံၚ်သၠာဲအယောၚ်အလာတှ်ေ စပ်ကဵုပရေၚ်ရေၚ်တၠုၚ်ကဵုလဝ် အတိုၚ်ပၟိက်ကံၚ်ဇြဳပၞာန်ဂှ် သွက်ဂွံက္လေၚ်ဓမံက်ပတိုန်ကဵု ပရေၚ်ဓဝ်ဍာံ ဒှ်တၚ်ဂၞၚ် နွံဒၟံၚ်ပၟိက် အဓိကရ။ သွက်ဂွံဒးဂွိၚ်ကဵုပရေၚ်ဂီုကၠီုကွးဘာ အ္စာ အ္စာၝောံတအ် နွံဒၟံၚ်ကီုရ။ ဆ္ဂး ဟွံဒးဒှ်ဓဝိၚ်ပုဟ်။ ဒှ်ကၠုၚ် နူကဵု Non CDM ရေၚ်တၠုၚ်ဒၟံၚ် အတိုၚ်ပၟိက်ကံၚ်ဇြဳပၞာန် အထံက်တိုၚ်ကံၚ်ဇြဳပၞာန်လ္ၚဵုတအ်ဂှ်ရ။ ပိုဲလေဝ် သွက်ဂွံထိၚ်ဒဝ်ဂှ် ပ္တိတ်ဒၟံၚ်ဇြဟတ်ရ။ အရာဏံ ဇီုကပိုက်ဒးဒၟံၚ် လ္တူပရေၚ်ဂီုကၠီု နွံဟွံဂၠိုၚ်ပုဟ်။ သွက်ဂွံဒးဂွိၚ်လေဝ် ဟၟဲပုဟ် ဗီုဏံ မိက်ဂွံဗ္ကန်ဏာရ။

-အလန်လကြဴအိုတ်ဏံ ၜိုန်ရတိုန်စိုပ်ကတ်ဗ္တောန်ဒၟံၚ် နူအောန်လာၚ်ကီုလေဝ် ညံၚ်တၚ်ဂၞၚ်ဟွံဂွံမံက်တိတ်အာ၊ ပရေၚ်ရပ်စပ် ညံၚ်ဟွံဂွံဒှ်ကၠုၚ်ဂှ် နကဵုဘာပံက်လဝ် လၟေၚ်ဂၠံၚ်တရဴ NUG တအ်ဂှ် ထေက်ကဵုဒးရေၚ်တၠုၚ် ပရေၚ်ဂီုကၠီု Digital ဗီုပြၚ်လဵုနွံ ကဵုကသပ်မွဲဝါညိ။

အဓိကဂှ်တှ်ေ သွက်ဂွံသီဂိုၚ်တၚ်ဂၞၚ်တအ်ဏံပ္ဍဲဒၞာဲဂီုကၠီုမွဲဒၞာဲဂှ် ဒးရေၚ်တၠုၚ်ထေက်ဏောၚ် ထေၚ်ကေတ်ရ။ ဒၟာနူဒှ်ဒၟံၚ်အောန်လာၚ်ဂှ်ရ ကုမ္ပဏဳရေၚ်တၠုၚ်ကဵုဒၟံၚ်ပရေၚ်ဂီု နွံဒၟံၚ်ရ။ ပ္ဍဲကၟိန်ဍုၚ်နာနာလေဝ်နွံရ။ ပ္ဍဲဖေတ်ဗော်တအ်၊  ပလေတ်ဖောၚ်အောန်လာၚ်တအ်ဂှ် ကုမ္ပဏဳကေတ်လဝ်တာလျိုၚ်တၞဟ်ခြာနွံၚ်ဒၟံၚ်၇။ ဂကောံနွံရ။ အရာတအ်ဏံဂျ် ပိုဲထေက်ကဵုဒးဆကစၠောံရေၚ်တၠုၚ်ထေက်ဏောၚ်ထေၚ်ရ။ ပ္ဍဲကဵုပိုဲလေဝ် ဒးကံက်ကေတ်ဒၟံၚ်တၚ်ဂၞၚ်နူအောန်လာၚ် ဒးကေတ်ဒၟံၚ်တာလျိုၚ်ဂှ်ရ အရာတအ်ဏံဂျ် အလဵုအသဳNUG ဆက်စၠောံကဵုကုမ္ပဏံထိၚ်ဒဝ်တၚ်ဂၞၚ်တအ်တုဲတှ်ေ သွက်ဂွံထိၚ်ဒဝ်တၚ်ဂၞၚ်ဘာပရေၚ်ပညာညးဍုၚ်ကွာန်တအ်ဂှ် ဒးရေၚ်တၠုၚ်ထေကရောၚ်ညာတ်ကေတ်ရ။ တၚ်ဂၞၚ်ကွးဘာ အ္စာ အ္စာၝောံပါလုပ်ဒၟံၚ်ပ္ဍဲပရေၚ်ပညာညးဍုၚ်ကွာန်တအ်ဂျ် ဂီုဂီုကၠီုကၠီု တၚ်ဒုၚ်လျိုၚ်နွံနွံဒးကဵုၚုဟ်မးပရေၚ်ရေၚ်တၠုၚ်တုဲ NUG ဒးရေၚ်တၠုၚ်ကဵု ပလေတ်ဖောၚ် ထိၚ်ဒက်သီဂိုၚ်တၚ်ဂၞၚ်မွဲထေက်တုဲ ဒးထိၚ်ဒဝ်လဝ်ပ္ဍဲကဵုဂှ်ထေက်ဏောၚ်ဂျ် နကဵုအဲ မိက်ဂွံကဵုကသပ်ဗတိုက်ဖ္အောဝ်ဏာရ။