ပလေဝ်-ဨဗြဴ(၈)
ရးသေတ်ဂါၚ်၊ ဒပ်စဵုဒၞာညးဍုၚ်ကွာန် ဖျေံသ္ဇိုၚ်ပွိုၚ်ဍုၚ်ပလေဝ် M-7 ဂှ် ဟိုတ်နူကံၚ်ဇြဳပၞာန် ဗတိုက်ပန်ပှ်ောလဝ် နကဵုက္ၜၚ်ကျာတုဲ ကောန်သ္ဂံၚ်ဒပ်စဵုဒၞာ (၄)တၠ ဒးပြဟ်လလုဲလဝ်ရဂှ် ညးတာလျိုၚ်ဗ္ဒပ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုဨဗြဴ တုဲကၠုၚ် စၟတ်တ္ၚဲ(၅) အခိၚ်နူဂယးဂှ် ကြဴနူပန်ဗတိုက်ကၠုၚ် နကဵုဂျေတ်ဖိုကတ်တာ Mi-35 တုဲ ဟိုတ်နူထပ်ဂလိုၚ်ပတိုန်လဝ်ဇြဟတ် နကဵု Mi-17 (၄)ဖ္ဍိုပ် က္လေၚ်ဗတိုက်လဝ်ပၠန်ဂှ်ရ ဒးလဝ်ဘဲဝပ် (၇)တၠရဂှ် ဂွံတီကေတ်ရ။
ဗ္ဒပ်ဒပ်စဵုဒၞာညးဍုၚ်ကွာန် M- 7 ဂှ် မၞိဟ်ဂွံတီလဝ် အောန်ဒၟံၚ်တုဲ အခိၚ်ကၠုၚ်ပန်ကဵုက္ၜၚ်ကျာဂှ်လေဝ် ဟိုတ်နူပွိုက်တအ် ချိုတ်ပၠိုတ်လောန်ဂှ်ရ ဗီုပြၚ်ကဵုလဝ်ပရိုၚ် ကုလ္ပာ်ဒပ်ကံၚ်ဇြဳပၞာန် နွံဒၟံၚ်တုဲ ဗ္ဒပ်ဏံဂှ် အကာဲအရာထ္ပက်လုပ်ကရောၚ်ပၞာန် ပ္ဍဲဗလးမုက်တိဟွံဂွံရဂှ် ညးတာလျိုၚ် M-7 People’s Defence Force မွဲတၠ ဟီုသ္ဂးလဝ်ရ။
ပါဲနူဂှ်ပၠန် အခိၚ်ဒပ်ကံၚ်ဇြဳပၞာန် ကၠုၚ်ပန်ပှော်လဝ် ကဵုက္ၜၚ်ကျာဂှ် ဒၟာနူဒှ်အခိၚ် သ္ဂံၚ်တအ်စဒၟံၚ်ပုၚ်တုဲ ဟွံဂွံအခိၚ်ပလေဝ်ပလေတ်တုဲ ဒးဂိလဝ်ရဂှ် ညးဟီုလဝ်ဏီရ။
ပါဲနူကံၚ်ဇြဳပၞာန် ဗတိုက်ကဵုက္ၜၚ်ကျာတုဲ သီုကဵုပၞာန်ရီုတအ် လုပ်စိုပ်ဗတိုက်လဝ်တုဲ အခိၚ်လၟုဟ်ဏံလေဝ် ဖျေံလဝ်ဗ္ဒပ် ပ္ဍဲဗ္ဒပ်ဒပ်စဵုဒၞာညးဍုၚ်ကွာန် M-7 ဂှ်ရ ဟွံတီကေတ်လဝ် ပရေၚ်ဆောံလေၚ်လီုလာ် ချိုတ်တ်ပၠိုတ်တ်ဏီရဂှ် ဂွံတီကေတ် နူဂဒပ်စဵုဒၞာညးဍုၚ်ကွာန်ရ။
အတိုၚ်ပရိုၚ်ဂွံလဝ်ပြဟ်ဟ်ဏံမ္ဂး နူလ္ပာ်ဒပ်စဵုဒၞာညးဍုၚ်ကွာန်ဂှ် M-4 မွဲဒကိုအ်၊ Ak-47 မွဲဒကိုအ်၊ ၆၀-မမ မွဲဒကိုအ်၊ လွဟ်ကၠောန်၊ ဖုၚ်ကီု သီုကဵုမာၚ် သ္အာၚ်နူဂှ် သီုဒးဒုၚ်စံၚ်ပလီုလဝ်ဗ္ဒပ်ရဂှ် ဂွံတီကေတ်ရ။
ဟိုတ်နူဒပ်ကံၚ်ဇြဳပၞာန် ဗတိုက်လဝ် သီုကဵုဇြဟတ်ပၞာန်ရီုတုဲ ညးဍုၚ်ကွာန် နူကွာန်ပါန်၊ ကွာန်နွာကူ ကေုာံကွာန်တနေဝ် ပွိုၚ်ဍုၚ်ပလေဝ် သ္ကုတ်သၠုၚ်ကျာ (၈၀၀၀)တၠပြၚ် ဒးပါဲဒဴဒၟံၚ်ပၞာန်တုဲ လ္ပာ်ပွိုၚ်ဍုၚ်ပလေဝ် သ္ကုတ်သၟဝ်ကျာ နူကဵုကွာန် ၜိုတ်စှ်ကွာန်ဂှ်လေဝ် ဒးဂြိပ်ဒဴဒၟံၚ်ရဂှ် ဓမံက်ထ္ၜးလဝ် ပ္ဍဲပရိုၚ်ဒေသရ။
ပရိုၚ်- သြၚ်လောန်တိုၚ်(မ်)
ဗီုရုပ် – M-7 PDF