မတ်မလီု၊ ဨပရဴ (၁၁)
ဟိုတ်နူပေါဲဗ္တိုက် မက္တဵုဒှ်ဒၟံၚ် ပ္ဍဲပွိုၚ်ဍုၚ်ကအ်ကြိက် ကေုာံ ပွိုၚ်ဍုၚ်ဗြဝတဳ၊ တွဵုရးကရေၚ်တံဂှ်တုဲ ပရေၚ်ကူသာန်သွံရာန် သေံ−ဗၟာၜါဍုၚ် ဒၟါနူဒေါအ်ဒေၚ်အာကြပ်ဖအိုတ်ဂှ်ရ အပ္ဍဲအခိၚ်အတး ၚုဟ်ဖျာ သၠုၚ်တိုန်ကၠုၚ် ဂၠိုၚ်ကဵုဆမာန်ရောၚ်ဂျ် တၠပညာပရေၚ်ပိုန်ဒြပ်တံကဵု သၟာဗၞိက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုမွဲဒမြိပ်ဂၠံၚ်ဇၞော်အာယှ ဗြဝတဳ−ကအ်ကြိက် မဒှ်ဂြိုဟ်ဒတန် ပရေၚ်ကူသာန်သွံရာန်ဂှ် စနူဂိတုမာတ် (၂၅) တုဲကၠုၚ်တေံတုဲ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ပေါဲဗ္တိုက်တံ က္တဵုဒှ်ဒၟံၚ်တုဲ အခိၚ်လၟုဟ်ဂှ်လေဝ် ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်ဖိုဟ်ရ။
ဟိုတ်နူပေါဲဗ္တိုက်တံ သ္ကာတ်မြဟ်ဒၟံၚ်ဂှ်ရ ပွမရပ်စပ်ဂၠံၚ်ဇၞော်အာယှ ဗြဝတဳ−ကအ်ကြိက် စနူဂိတုဨပရဴ (၇) စဵုကဵု (၂၁) ပွမကၠောန်သ္ပတတ်ကၠောံအာကၠုၚ်တံဂှ် လ္ပကၠောန်သ္ပအိုတ်ညိဂှ် ကရောၚ်ပၞာန်ပံၚ်တောဲဗလးတိ ဂကောံဇြဟတ်ပၠန်ဂတး (၁၀) ဂကောံတံ လလောၚ်ပ္တိတ်လဝ်ရ။
ဂကောံဇြဟတ်ပၠန်ဂတးတံဂှ် ဒပ်ကံၚ်ဇြဳပၞာန် မ္ဒးဂိဒၟံၚ် အပ္ဍဲပေါဲဗ္တိုက်တံဂှ်ဝွံ နူကဵုဂၠံၚ်ဇၞော်အာယှ ဗြဝတဳ−ကအ်ကြိက်တံဂှ်မွဲကဆံၚ် သုၚ်စောဲကွဳစက်ညးဍုၚ်ကွာန်ကောန်အရာပ်တံဂှ်တုဲ ပလံၚ်ဗစိုပ်ဒၟံၚ်ဇြဟတ်မၞိဟ်၊ လွဟ်လက်နက်မကမ် ကေုာံ ဇွောံမစၞစတံဂှ်ရ ဒးကၟာတ်လဝ်အခေါၚ်အာကၠုၚ်တံရောၚ်ဂှ် သ္ဂးလဝ်ရ။
မ္ၚးနူပေါဲဗ္တိုက်ဂမၠိုၚ်ဂှ် ဟိုတ်နူဂၠံၚ်ဇၞော်အာယှ ဒးဒုၚ်ကၟာတ်လဒဵုလဝ် အခေါၚ်အာကၠုၚ်တံဂှ်ရ ကဏ္ဍဗၞိက်ပၠောပ်၊ ဗၞိက်ပလံၚ်ပ္တိတ်တံ စှ်ေကၠုၚ်တီတီဒှ်ဒှ်မာန်တုဲ အပ္ဍဲအခိၚ်ကာလခြာဟွံလအ်ဏံ ၚုဟ်ဖျာ သၠုၚ်တိုန်ကၠုၚ် ဂၠိုၚ်ကဵုဆမာန်ရောၚ်ဂှ် တၠပညာပရေၚ်ပိုန်ဒြပ်မွဲတၠ ဟီုရ။
“ ရံၚ်အာပရေၚ်သွံရာန်ဗၞိက်ပယျဵုတံဂှ်မ္ဂး ကြဴနူကဝ်ဝေဒ်တုဲဂှ် ပရေၚ်ကူသာန်သွံရာန်ပယျဵုဗြဝတဳဂှ် သၠုၚ်အိုတ်ရ။ ကၠာတေံတှ်ေ မူဇြေဝ်ဂှ် သၠုၚ်အိုတ်။ ဆ္ဂး ကြုက် ကၟာတ်ထောံ ပ္ဍဲကဵုအခိၚ်ကဝ်ဝေဒ်ဂှ်တုဲ ပရေၚ်သွံရာန်ဗၞိက်ဗြဝတဳဂှ် ဒှ်ဒၟံၚ်သၠုၚ်အိုတ်၊ ကၟာတ်ထောံမဏံမ္ဂး ပရေၚ်သွံရာန်ပယျဵုဂှ် စှ်ေအာတၟာဂလိုၚ်ဏောၚ်။ မွဲပၠန်ဂှ် အပ္ဍဲကာလလလောၚ်တြးဂှ် တ္ၚဲကၟာတ်အတးလေဝ် ပါဒၟံၚ်ကီု။ ဗွဲမဂၠိုၚ်မ္ဂး အပ္ဍဲအခိၚ်အတးဂှ် ပရေၚ်သွံရာန်ဗၞိက်ဂှ် စှ်ေလေပ်ရ။ အေ ဂှ်တှ်ေ ဒဵုကဵုစၟတ်တ္ၚဲ (၂၁) တေံဟီုမ္ဂး ဒးထပ်မၚ်ကျောဝ် မွဲသတ္တာဟပၠန်ဏောၚ်။ ညအ်ဂှ် လလောၚ်တြးလဝ် ဗွဲမလုပ်သၞောဝ်၊ လလောၚ်တြးလဝ် ဗွဲမလုပ်သၞောဝ်ကဵုဒှ်၊ ဟွံလုပ်သၞောဝ်ကဵုဒှ် ဂၠံၚ်ဂှ်တှ်ေ ပၟိက်ဇၞော်ကွေံကွေံဏောၚ်။ အရာမဇီုကပိုက်ဂှ်တှ်ေ တၟာဂလိုၚ်ဏောၚ်၊ ဗၞိက်ကမၠောန်တိတ်နူဍာ်အဓိကတံ ပလံၚ်ဒၟံၚ်လ္ပာ်ဏံဂှ် နွံ။ ဗၞိက်ပလံၚ်ပ္တိတ်ဂှ် အာဒဵုကဵုလ္ပာ်ဏံမာန်ဒၟံၚ်၊ ဗၞိက်ပၠောပ်ဏံပၠန်ဂှ်လေဝ် ကပေါတ်ကြုက်တုဲမ္ဂး ကပေါတ်ဗၞိက်သေံဂှ် သုၚ်စောဲဒၟံၚ်ဂၠိုၚ်အိုတ်ရ။ ကပေါတ်သေံတံ ၚုဟ်တိုန်အာမာန်ဏောၚ်။ ဂၠံၚ်အာယှဏံသၟးဟွံသေၚ်ပုဟ်၊ လၟုဟ် ပရေၚ်သွံရာန်ကုသေံ ဒၞါဲဗွဲမဂၠိုၚ်ဂၠေၚ်ဂှ် ဟွံပြေပြံၚ်ပုဟ်။ ဗြဝတဳဂှ်တှ်ေ ပ္ဍဲကဵုပရေၚ်သွံရာန်ဗၞိက်တံဂှ် ဇၞော်အိုတ်၊ အဏံလေဝ် ဒေါအ်အာတှ်ေ သာတုဲတီကၠးကၠုၚ်ရ၊ လ္တူနူကဵုပရေၚ်သွံရာန်ဓမ္မတာတံဂှ် ပရေၚ်သွံရာန်ဗၞိက်ပယျဵုဂှ် ၜိုတ် (၂၅) တၟံကၠံနွံဏောၚ်။ ပ္ဍဲကဵုဏံ ကၠာတေံ ၜိုတ်ကဝက်ဂှ် နူကဵုကြုက်၊ လၟုဟ်ဂှ် ဒၞါဲဏံဂှ် သေံ ကေတ်ဏာ။ ဟီုမ္ဂး ပရေၚ်သွံရာန်ဗၞိက်ပယျဵု အပံၚ်ဖအိုတ် ၜိုတ် (၂၅) တၟံကၠံဂှ် သ္ဇက်ဂွံစှ်ေအာနွံ” သာ်ဝွံ သ္ဂးရ။
သ္အာၚ်နူဂှ်ပၠန် ပရေၚ်သွံရာန်ဗၞိက် ဂေတ်ဂြိပ်တံဂှ်ဝွံ နူကဵုပယျဵုဗြဝတဳမွဲကဆံၚ် ဟိုတ်နူလုပ်စိုပ်ဒၟံၚ် ဒၞါဲဒေသဗွဲမဂၠိုၚ်ဂၠေၚ်တံဂှ်ရ ယဝ်ရတ္ၚဲကၟာတ်ဂၠံၚ်လအ်အာမ္ဂး ကဏ္ဍပရေၚ်သွံရာန်ဗၞိက် စှ်ေအာတီတီဒှ်ဒှ်မာန်တုဲ နကဵုဗၞတ်ဗ္ၜတ်ကၟိန်ဍုၚ်မ္ဂး ပရေၚ်သွံရာန် ဟွံအောန်နူကဵု (၂၅) တၟံကၠံ ယအ်အာမာန်ရောၚ်ဂှ် သ္ဂးရ။
သၟာဗၞိက်ပယျဵုမွဲတၠဂှ်လေဝ် မ္ၚးနူဂၠံၚ်ဇၞော်အာယှ ဗြဝတဳ−ကအ်ကြိက် မဒှ်ဂၠံၚ်တရဴသွံရာန် သေံ−ဗၟာဂှ် ဂၠံၚ်ထိုအ်ကိုဝ်ကိုဝ်ဂှ်လေဝ် ပေါဲဗ္တိုက်တံ က္တဵုဒှ်ဒၟံၚ်ဂှ်ရ ညးလဵုမှ ဟွံဂံၚ်အာရတုဲ ဒးဒေါအ်ဇူလဝ်ကမၠောန်တံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပိုယ်တံဂှ်တှ်ေ ပြဟ်ဟ်ဏံ ဟွံအာဏီပုဟ်။ ကွဳစက်ပိုယ်တံလေဝ် ဟွံအာရပုဟ်၊ မွဲဏေံညိ ဒးဒုၚ်စံၚ်မ္ဂး ဂွံဂှ်ညိညိ၊ ဆောံလေၚ်ဂှ်ဂၠိုၚ်ၚ်။ ကၟာတ်ဏောၚ်ဟီုတှ်ေ လ္ပအာဂှ် ခိုဟ်ရ။ အခိၚ်ဍေံတံပံက်မှ အာဏောၚ်လေဝ်။ ညအ်မှ ဂွံမံၚ်စၜိုဟ်ညိ။ မံၚ်ဂွံမွဲအံၚ် ဒှ်ပန်ပှော်မ္ဂး ဒှ်ဒဒိုက်ဏောၚ်။ မၞိဟ်ဂံၚ်အာဂှ် အာ၊ မၞိဟ်ဟွံဂံၚ်အာဂှ် လ္ပအာ ၜိုတ်ဏံရ။ ဒုၚ်ဆောံလေၚ်မာန်တှ်ေ အာ၊ ဒုဟ်ဆောံလေၚ်ဟွံမာန်မ္ဂး လ္ပအာ။ တုဲတှ်ေ ဂၠံၚ်ထိုအ်ကိုဝ်ကိုဝ်ဂှ်လေဝ် ကၟာတ်အာယျလေဝ်၊ မုပရောဟီုတှ်ေ ဂၠံၚ်ဂှ်ဂှ် PC နွံဒၟံၚ်ဏောၚ်၊ မၞိဟ်ပါ်တိတ်နူ PC ဂှ် ကေတ်ထောံဂၠံၚ်ဏံတှ်ေ၊ လၟုဟ်ဂှ် လ္ပာ်ဏံ ဒှ်မံၚ်ပေါဲဗ္တိုက်။ ဒးၜေတ်တတ်အာ နူကဵုယှိုဲကုက္ကိုဝ်။ အေ ဂှ်တှ်ေ ဂၠံၚ်ထိုအ်ကိုဝ်ဝ်လေဝ် ဖျေံစိုတ်ဟွံဂွံပုဟ်၊ ဗွဲမဂၠိုၚ်ဂှ် ဟွံဒှ်အာအိုတ်ပုဟ်။ ကွဳစက်ဇၞော်ဇၞော်တံ ဟွံစှ်ေရပုဟ်၊ ကွဳစက်ဍောတ်တ်တံရ စှ်ေဒၟံၚ်။ ကွဳစက်ဍောတ်တ်တံဂှ်တှ်ေ မၞိဟ်ဒးအာ ဟွံဒေါအ်ဟွံဂွံတံရ စှ်ေဒၟံၚ်ညးသ္ကအ်အိုတ်။ ကွဳစက်ဇၞော်ဇၞော်တံဂှ် စှ်ဂှ်ေ ဟွံဆဵုပုဟ်၊ ဟွံမိၚ်ပုဟ်။ သၟာဗၞိက်ဗွဲမဂၠိုၚ်ဂၠေၚ်ဂှ်လေဝ် ဗီုဏံရ။ အခိၚ်အတးလေဝ် ဗီုအခိၚ်အတး ၚုဟ်ဖျာတံဂှ် က္ဍၚ်ဒၟံၚ်ညိည” သာ်ဝွံ သ္ဂးရ။
ၜိုန်ရပေါဲဗ္တိုက်တံ က္တဵုဒှ်ဒၟံၚ်ကီုလေဝ် ဒဒှ်ရကလေၚ်သုၚ်စောဲ ဂၠံၚ်အာယှမာန်ဂှ် ကံၚ်ဇြဳပၞာန်တံ လလောၚ်တြးဒၟံၚ်တံ နွံဒၟံၚ်ကီုလေဝ် လ္ဂောံကဵုပရေၚ်ဂီုကၠီု ဟိုတ်နူဖျေံစိုတ်ဟွံဂွံဂှ်ရ ပွမကၠောန်သ္ပယိုက်ပလံၚ် ကပေါတ်ဗၞိက်တံဂှ် ဟွံကၠောန်ရတုဲ ကဏ္ဍပရေၚ်သွံရာန်ဗၞိက် ဒေါအ်ဒေၚ်အာရ။
ကၟိန်ဍုၚ်ဗၟာဝွံ နူကဵုပယျဵုဗြဝတဳမွဲကဆံၚ် ပၠောပ်ပ္တိုန်ဒၟံၚ် ကပေါတ်တိတ်နူဍုၚ်သေံဂမၠိုၚ် မပ္တံကဵုဗၞိက်စၞစသုၚ်သ္ဇိုၚ်၊ ဂဥုဲဇဗ၊ ဗၞိက်ပယျေဝ်၊ ဗၞိက်အရပ်စပ်မၞိဟ်၊ ကပေါတ်ဗၞိက်အပြောံ အရပ်စပ်ပရေၚ်သိုၚ်ခၞံတံကီု သီုကဵုကပေါတ်ဗၞိက်နာနာတံတုဲ ပလံၚ်ပ္တိုန်ဒၟံၚ် ပ္ဍဲကဵုဍုၚ်သေံဂှ် သြောံဂန် သီုကဵုပါလုပ် သတ်တဵုလွဳ တိတ်နူဒေသဂမၠိုၚ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−TLT