အေဒေန်၊ ဨပရဴ (၁၁)
ကြဴနူချုက်လိက်ကသုက် တၚ်တုပ်စိုတ် သွက်ဂွံကဵုပရေၚ်စဵုဒၞါ သၞတရဴကျာ ကုဝှေန်လာန် မလုပ်ဂကောံနေတိုဝ်ဂှ်တုဲ လအ်ဂွံမွဲအံၚ်ဂှ် အေဿရေ သွက်ဂွံသွံတြး ကမ်လှောဝ်ပလီု ကွဳစၚ်ခြပ်ပသဲ သပိုခ်(Spike) ဇရေၚ်ဂရိဂှ် ထ္ပက်လဝ်စၟတ်တဲ တၚ်တုပ်စိုတ် သွက်ၚုဟ်မး (၄၀၀) ပြကောဋိကိုဋ်ဒဝ်ဠာဂှ် ဌာနဝန်ဇၞော်ကာစဵုဒၞါအေဿရေ ဟီုဂးလဝ် ပ္ဍဲဂိတုဨပရဴ (၁၀) တေံရ။
သပိုခ်ဝွံ ဒှ်ကမ်လှောဝ်ပလီု ကွဳစၚ်ခြပ်ပသဲ မပ္တိတ်နူရာဝှေ(လ်) ကာန်ထရာ်တာ ပရေၚ်စဵုဒၞါ ဍုၚ်အေဿရေပိုၚ်တုဲ ဍုၚ်အဳယူ ကေုာံ ဍုၚ်လုပ်ဂကောံနေတိုဝ် ဗွဲမဂၠိုၚ်ဂၠေၚ် သုၚ်စောဲဒၟံၚ်မွဲရ။
ကမ်လှောဝ် Spike ဝွံ သ္ကဵုကိရိယာစပ်ကဵုပရေၚ်ပြုပြေၚ်ပၞာန် ဒပ်ပၞာန်ဂရိတံ ဇြဟတ်ခိုဟ်မွဲတုဲ အပ္ဍဲကာလခြာဟွံလအ်ဏံ နူကဵုပရေၚ်ပံၚ်တောဲရေၚ်တၠုၚ် မစှ်ေကဵုမဟာဗျူဟာတံမွဲကဆံၚ် သွက်ဂွံသၠဲပ္တိုန်အာ ဒဒှ်ရစၟဳစလဝ်ဂှ် သဳအဳအိုဝ် ရာဝှေ(လ်) ဟီုဂးလဝ်ရ။
တၚ်တုပ်စိုတ်ဏံဝွံ ပရေၚ်ဆက်ဆောံ အကြာၜါဍုၚ်ဂှ် သ္ကဵုဇြဟတ်ခိုဟ်တဴရောၚ်ဂှ်လေဝ် ဝန်ဇၞော်ကာစဵုဒၞါအေဿရေ ဟီုဂးလဝ်ဏီရ။
ကုဍုၚ်ဝှေန်လာန် မလုပ်စိုပ်လဝ် ဂကောံနေတိုဝ်ဗွဲမလုပ်သၞောဝ် ပ္ဍဲကဵုဂိတုဨပရဴ (၄) တေံဂှ် နူကဵုအေဿရေ ကေုာံ ရာဝှေ(လ်) တံ ပအပ်အာကဵု သၞောတ်စဵုဒၞါ သၞတရဴကျာကဆံၚ်သၠုၚ် David’s Sling တံဏောၚ်ဂှ် ဟီုဂးလဝ် သတ္တာဟတုဲကၠုၚ်တေံရ။
သၞောဝ်စဵုဒၞါ မပ္တိတ်လဝ်ဒဳဇြာၚ် သွက်ဂွံကြတ်ဒၞါအကြာ ကမ်လှောဝ်ထိၚ်သၞေဝ်တံဂှ် ဝှေန်လာန်ဝွံ ဂွံဒုၚ်အာတဲ နကဵုယူရိုဝ် ၃၁၆ ပြကောဋိကိုဋ် ( ဒဝ်ဠာ ၃၄၅ ပြကောဋိကိုဋ်) ဏောၚ်တုဲ ဒးကေတ်ဒၟံၚ်အခေါၚ် ကၟိန်ဍုၚ်အမေရိကာန် မပါလုပ်ဒၟံၚ် ပ္ဍဲကဵုပရေၚ်ကၠောန်ပ္တိတ်သၞောတ်ဏံဏီရောၚ် မဒှ်ရ။
ဍုၚ်ဝှေန်လာန် ဟွံပံၚ်တောဲပါလုပ်ဒၟံၚ်လ္ပာ်ပၞာန် လလအ်ပွိုၚ်ၜါစှော်သၞာံပြၚ်ဂှ်ဝွံ ဗွဲအပြောံမ္ဂး သ္ကဵုဇမၠိၚ်တွဵုဒၞက် ရုယှာ ကေုာံ NATO တံ ပဵုတိုန်ၜါဆတုဲ ပေါဲပၞာန်ယူကရုၚ်ဝွံ သ္ဂုတ်သွာတ်ဟွံမွဲမွဲသာ် ညိၚ်ဝတ်ဒၟံၚ်ဂှ်ရ ကဵုမွဲဒမြိပ်သ္ကုတ်ဗၟံက်ညးတံ ဇြဟတ်ခိုဟ်တဴလဝ်ရ။
အကာဲအရာဏံဝွံ သီုကဵုဘပဠလဝ် ပရေၚ်ပၞာန်ခၠေဝ်ပလန် နူကဵုမဝ်သကိုဝ်တံကီုဏောၚ်ဂှ်လေဝ် သ္ဂးရ။
တၚ်တုပ်စိုတ် ကုအေဿရေဂှ်ဝွံ ဒဒှ်ရသၠုၚ်ပ္တိုန်ကဵု အစောံစရာဲညးတံ တီတီဒှ်ဒှ်ဏောၚ်ဂှ် ဝှေန်လာန်ဟီုဂးလဝ်တုဲ ပ္ဍဲကဵုပရေၚ်ရေၚ်တၠုၚ်ပံၚ်တောဲ ပရေၚ်စဵုဒၞါ အကြာဍုၚ်ဂမၠိုၚ်ဂှ် ဒှ်တဴပရေၚ်တောတက်ဇၞော်ဇၞော်မွဲရောၚ်ဂှ် အေဿရေ ကော်ခဴလဝ်ရ။
Ref: Reuters