ဗြဝတဳ၊ ဨပရဴ (၁၁)
အပ္ဍဲတိဍာ် ဒပ်မဟာ (၆) ဗော်သွးကောန်ဂကူကရေၚ် KNU ဂှ် ကရောၚ်ပၞာန် VENOM ကၠုၚ်စိုပ်ပံၚ်တောဲလဝ်ကဵု ဇရေၚ်ကရောၚ်ပၞာန်ကဝ်ဗရာ မဒှ်ဂကောံပံၚ်ကောံ KNLA မဗ္တိုက်ပၠန်ဂတးဒၟံၚ် ကုဒပ်ကံၚ်ဇြဳပၞာန်ဂှ်ရောၚ်ဂှ် ဂွံတီကေတ် အတိုၚ်တၚ်လလောၚ်တြး ကရောၚ်ပၞာန်ကဝ်ဗရာရ။
တုဲကၠုၚ် ပ္ဍဲဂိတုဨပရဴ (၆) တေံ ကရောၚ်ပၞာန် VENOM ဝွံ ကၠုၚ်စိုပ်ပံၚ်တောဲလဝ် ဇရေၚ်ကရောၚ်ပၞာန်ကဝ်ဗရာတုဲ ဟိုတ်နူပရေၚ်ပံၚ်တောဲသာ်ဏံတုဲ ဗီုပြၚ်ဒက်ပ္တန်ကရောၚ်ပၞာန်ကဝ်ဗရာဂှ် ကလေၚ်ဒက်ပ္တန်လဝ် နကဵုကရောၚ်ပၞာန် (၁) ၊ ကရောၚ်ပၞာန် (၂) တံရောၚ်ဂှ် ပါလုပ် ပ္ဍဲတၚ်လလောၚ်တြးဂှ်ရ။
ပ္ဍဲကဵုတၚ်လလောၚ်တြးဏံဂှ် နဒဒှ်သ္ကိုပ်ပြုပြေၚ်ပၞာန် ကရောၚ်ပၞာန်ကဝ်ဗရာဂှ် ဗိုလ်ဒါဗဝ်၊ သ္ကိုပ်ကရောၚ်ပၞာန် ကရောၚ်ပၞာန် (၁) ဂှ် ဗိုလ်သဝ်ကဝ်၊ ဒုသ္ကိုပ်ကရောၚ်ပၞာန် ကရောၚ်ပၞာန် (၁) ဂှ် ဗိုလ်တောန်တေ၊ သ္ကိုပ်ကရောၚ်ပၞာန် ကရောၚ်ပၞာန် (၂) ဂှ် ဗိုလ်သဝ်ဝေန်မျေတ် ကေုာံ ဒုသ္ကိုပ်ကရောၚ်ပၞာန် ကရောၚ်ပၞာန် (၂) ဂှ် ဗိုလ်သဝ်ညုၚ်ဆာန်ဝေန်တံ မဒှ်ရောၚ်ဂှ် ထ္မံက်ထ္ၜးလဝ်ရ။
ဒဒှ်မဒးပံၚ်တောဲရေၚ်တၠုၚ်ကဵု ကရောၚ်ပၞာန်ကဝ်ဗရာဂှ်ဝွံ ပ္ဍဲကဵုပရေၚ်ထပိုတ်ရိုဟ်ကၞက်သၞောတ်တၠအဝဵုပၞာန်ဂှ် သွက်ဂွံဗ္တိုက်သၞောတ်စှ်ေစှ်ေ နကဵုဇြဟတ်ခိုဟ်ဟ်မာန် နကဵုတၚ်ရန်တၟံဏံ ပံၚ်တောဲလုပ်အာပေါဲဗ္တိုက် ကုဂကောံတၚ်ဒတူလိုၚ်တုပ်၊ တၚ်ရန်တၟံတုပ် တၚ်ပ္တဝ်က္ဍိုပ်ဍာံပြတံရောၚ်ဂှ် ညးဒုၚ်တာလျိုၚ် လလောၚ်ပရိုၚ် ကရောၚ်ပၞာန် VENOM ဒဝ်ယမေန်ဝါဝါမာၚ် ဟီုရ။
သ္အာၚ်နူဂှ်ပၠန် သွက်ဒဒိုက်ညးဍုၚ်ကွာန် နူကဵုသၟဝ်တဲသၞောတ်တၠအဝဵုပၞာန် သၞာံဗွဲမလအ်လတံ ဂွံၜိုဟ်လလမ်အာ ဗွဲမပြဟ်ဂှ် ကောန်ဍုၚ်အရၚ်ကောဒေံဂမၠိုၚ် သွက်ဂွံဗ္တိုက် နကဵုဇြဟတ်ခိုဟ်ဟ် ဗွဲမကောံကလောံဂှ် ဒးပံၚ်တောဲရေၚ်တၠုၚ်လဝ်ရောၚ် သ္ဂးရ။
ပ္ဍဲဂိတုဨပရဴ (၉) တေံဂှ်လေဝ် ပ္ဍဲကဵုဒေသပၞာန်ရးသ္ကုတ်သၠုၚ်ကျာ ခရိုၚ်ဗြဝတဳဂှ် ကရောၚ်ပၞာန် VENOM ဝွံ နကဵုသ္ကိုပ်သ္က ကရောၚ်ပၞာန်ကဝ်ဗရာဂှ် ထ္မံက်ဒၟံၚ်ပေါဲဗ္တိုက် ပရေၚ်ဗ္တိုက်သၠေက်ရိုဟ်ကၞက်သၞောတ်တၠအဝဵုပၞာန်တံဂှ်တုဲ က္တဵုဒှ်လဝ် ပေါဲဗ္တိုက်ဗွဲမသ္ကာတ်မြဟ် ကုဒပ်မၚ်ပယျဵုကံၚ်ဇြဳပၞာန် BGF မဗ္တိုက်ထ္ပက်ကၠုၚ်ပၞာန် နကဵုကရောၚ်ပၞာန် (၃) ဂှ် ကရောၚ်ပၞာန် VENOM လလောၚ်ပ္တိတ်လဝ်ပရိုၚ်ရ။
ပြဟ်ဟ်ဏံ အပ္ဍဲတိဍာ်ဒပ်မဟာ (၆) KNU ဂှ် ဒပ်ကံၚ်ဇြဳပၞာန် ကေုာံ ဒပ် BGF တံဝွံ ပွမသၠဲပ္တိုန်ဇြဟတ်ပရေၚ်ပၞာန်၊ ပွမဗ္တိုက်ပန်ပှော်လွဟ်ဇၞော်တံဂှ် ကၠောန်ၜိုတ်သၠုၚ်ပ္တိုန်အသိၚ်တုဲ ပေါဲဗ္တိုက်ၜါလ္ပာ်တံ သာသ္ကာတ်မြဟ်ကၠုၚ်လဝ်တုဲ ဟိုတ်နူပေါဲဗ္တိုက်တုဲ ညးဍုၚ်ကွာန်ဒေသတံဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံတုဲ တၚ်နွံပၟိက်အရီုအဗၚ်ပရေၚ်ဗ္စာရဏာမၞိဟ်တံ ဆက်သၠုၚ်တိုန်ကၠုၚ်ဒၟံၚ်ရောၚ်ဂှ် ဂွံတီကေတ် ဇရေၚ်ဂကောံမှာဇန်ကရေၚ်တံရ။
ပရိုၚ်−သြၚ်လောန်တိုၚ်(မ်)
ဗီုဓာတ်−Cobra Column