သွက်ညးဍုၚ်ကွာန်တအ် ဂွံကၠိုဟ်တီ ပရေၚ်ဂကောံဇြဟတ်ပၠန်ဂတးတအ် ဂစာန်ပ္တိတ်ဒၟံၚ်ဇြဟတ်တုဲ ဂကောံသုတေသန ဉာဏ်လေန်တေတ် ပ္တိတ်တြးလိက်စံၚ်

မတ်မလီု – ဨဗြဴ(၁၁)

ပ္ဍဲကာလပွိုၚ် (၂)သၞာံ ဒပ်ပၞာန်သီကေတ်လဝ်အဝဵုကၟိန်ဍုၚ်ဗၟာဏံဂှ် တၚ်ပ္တိတ်ဇြဟတ်ပၠန်ဂတး NUCC၊ CRPH ကေုာံ NUG ပၠန်ဂတးဒစဵုဒစးဒၟံၚ်ကဵု ကံၚ်ဇြဳပၞာန်ဂှ် နကဵုတၚ်ရန်တၟံ သွက်ဂွံဗှ်လ္ၚတ်ကေတ်တၚ်ဂၞၚ်တအ်ဂှ်မာန်တုဲ ဂကောံသုတေသန ဉာဏ်လေန်တေတ် တြးပ္တိတ်ကၠုၚ်လဝ် လိက်စံၚ် (၂)စံၚ်ရ။

ဂကောံသုတေသနဉာဏ်လေန်တေတ်ဂှ် သ္အာၚ်နူမၚ်ရံၚ်ကျောဝ် လ္ၚတ်ဂၠိုက်ဂၠာဲဒၟံၚ် ပဋိပက္ခရပ်လွဟ်၊ ဒဒှ်ပရေၚ်ဍုၚ်ကွာန် ဂကောံဇြဟတ်ပၠန်ဂတး ကေုာံ ကံၚ်ဇြဳပၞာန် အဆက်ဟွံပိုတ်သ္ကုတ်တုဲ ကၠောန်သ္ပဒၟံၚ်သုတေသန လၟိုန်ရ။

ကြဴနူဒပ်ပၞာန်သီအဝဵုတုဲ ဂကောံဒပ်ပၞာန် ဒက်ပ္တန်ကၠုၚ်လဝ် ကံၚ်ဇြဳပၞာန်ကီု မွဲလ္ပာ်ပၠန်လဝ် NUCC၊ CRPH ကေုာံ NUG တအ်ဂှ် ဒှ်ဂကောံဇြဟတ်ပရေၚ်ဍုၚ်ကွာန် နဒဒှ်တမ်ရိုဟ်ဂကောံဇြဟတ်ပၠန်ဂတးမွဲ က္ဍိုက်ဒၟံၚ်က္ဍိုပ် ပါလုပ်ဒၟံၚ် ပ္ဍဲပၠန်ဂတးက္ညၚ် မွဲဂကောံရ။

ပ္ဍဲမွဲကာလဒပ်ပၞာန်သီအဝဵု ပွိုၚ်(၂)သၞာံဏံ ညံၚ်အဝဵုကံၚ်ဇြဳပၞာန် ဂွံတန်တဴအာဍာ်ဇမၠိၚ်တုဲ ပရေၚ်ပ္တိတ်ဇြဟတ်၊ ပရေၚ်ဍဵုဍိုက်ပ္ကီုပရာပ်ဒၟံၚ် လတူညးဍုၚ်ကွာန်ကီု၊ တၚ်ပ္တိတ်ဇြဟတ်ရုန်ဂစာန် တမ်ရိုဟ်ဂကောံဇြဟတ်ပၠန်ဂတးဂတးတအ်ကီု ဓမံက်ထ္ၜးလဝ် ပ္ဍဲလိက်စံၚ်ဏံ သောဲသောဲဗြောဲဗြောဲရ။

ညးစၞးတမ်ရိုဟ်ဂကောံဇြဟတ်ပၠန်ဂတးတအ်ဂှ် မွဲဒပ်ပမြိပ်အခိၚ်ကာလပၠန်ဂတးဏံ ဆဵုဂဗလဝ်ကဵု ဂကောံ ERO ဂမၠိုၚ်မပ္တံ KNU၊ KPICT၊ AA ကေုာံ CNF တုဲ သွက်ဂွံပံၚ်တောဲပၠန်ဂတးဂှ် သဳကၠဳကၠုၚ်လဝ်ကီု ပ္ဍဲပရေၚ်ရိုဝ်ဟေန်ဂျာလေဝ် ပ္ဍဲလ္တူတၚ်စောဲဂဗုတ် ဆေၚ်စပ်ကဵုပရေၚ်ဂစိုတ်ကမၠက်ဂကူ ပ္ဍဲကၟိန်ဍုၚ်ဗၟာ ပရေၚ်အလဵုအသဳ NLD ပါဲတးလဝ်အလုံအိုဿီုဂှ် NUG က္လေၚ်ရုပ်သီလဝ်တုဲ ပွိုၚ်(၂)သၞာံဏံ ဆဵုဂဗလဝ်ကဵု ဂကောံရိုဝ်ဟေန်ဂျာ၊ က္ဍိုပ်သ္ကိုပ်ပရေၚ်ပညာတအ် (၄)ဝါရဂှ် ဂွံတီကေတ်ရ။

မ္ၚးနူဏံပၠန် နူကဵုဌာနဝန်ဇၞော်အလဵုအသဳပရေၚ်ညဳသၟဟ်ကောန်ဂကူဂှ် ပ္ဍဲမွဲပွိုၚ်သီအဝဵု (၂)သၞာံဏံ တၚ်လလောၚ်တြး ဆေၚ်စပ်ကဵုပရေၚ်ဍုၚ်ကွာန်၊ ပရေၚ်ပိုန်ဒြပ်၊ ပရေၚ်ဆက်ဆောံဍုၚ်သ္အာၚ်တအ် လလောၚ်တြးကၠုၚ်လဝ် ဗွိုၚ် (၃၇၂)စံၚ်ရဂှ် ဂွံတီကေတ်ရ။

NUG ဂှ် ပ္ဍဲပွိုၚ် (၂) သၞာံဏံ ပံက်ကၠုၚ်လဝ် ရုၚ်သၞောဝ်ဓဝ် ပွိုၚ်ဍုၚ် (၂၄) ရုၚ်ကေုာံ ရုၚ်သၞောဝ်ဥပဒေ (၂၂) ရုၚ် မာန်ကၠုၚ်လဝ်ကီု ပ္ဍဲပရေၚ်အုပ်ဓုပ်လေဝ် ဒက်ပ္တန်ကၠုၚ်လဝ် ဂကောံအုပ်ဓုပ်ညးဍုၚ်ကွာန် ကာအကြာ နကဵုသ္ဇိုၚ်ဝန်စ္ဍးတိတ်ကၠုၚ် နူကမၠောန် ရးသေတ်ဂါၚ် (၂၉) ပွိုၚ်ဍုၚ်၊ ရးမဂွေ (၇) ပွိုၚ်ဍုၚ်တအ် မာန်လဝ်ရဂှ် ဓမံက်ထ္ၜးလဝ်ရ။

ကံၚ်ဇြဳပၞာန်ဂှ် ကလိလောန်ဒၟံၚ် ပရေၚ်ရပ်ဒက်ပြိုက်ဂစိုတ် ပါ်ပရး ပ္ကီုပရာပ်ဒၟံၚ် ညးဍုၚ်ကွာန် ထ္ၜးဆန္ဒဗွဲမၜိုဟ်သြိုဟ် ဒဒှ်ရဒစဵုဒစးကဵု တၠအဝဵုပၞာန်အလုံမွဲကၟိန်ဍုၚ် ကေုာံ သ္ဇိုၚ်ဝန်စ္ဍးတိတ်အာနူကမၠောန်တအ်ဂှ်ရ။

သွက်ဂွံဂြိုဟ်စာပြိုက်ဂစိုတ် ပ္တဝ်လဝ်ကဵု ကောန်ဗော် NLD ကေုာံညးပါလုပ် ပ္ဍဲပရေၚ်ပၠန်ဂတးတအ်ဂှ်တုဲ ကံၚ်ဇြဳပၞာန် ဒက်ပ္တန်ကဵုကၠုၚ်ဇြဟတ် ဂကောံမပ္တံကဵုပျူသဝ်ထဳ၊ သုၚ်ဆီ၊ သစ္စာဆီ၊ ဇြောန်ယျေဝ်၊ မျိုဝ်ချေတ်ပေါၚ်၊ Yangon Castigate Group တအ်လေဝ် နွံကၠုၚ်ဒၟံၚ်ရ။

လိက်စံၚ်ဉာဏ်လေန်တေတ် ချူလဝ် တၚ်ဂကောံဇြဟတ်ပၠန်ဂတးတအ် ကၠောန်ရေၚ်တၠုၚ်လဝ် ကေုာံပရေၚ်ပ္ကီုပရာပ် ကံၚ်ဇြဳပၞာန် သောဲသောဲဗြောဲတအ်ဂှ် ပ္ဍဲLink သၟဝ်ဏံ ဗှ်လ္ၚတ်ကေတ် ဗွဲမသက္ကုၚုဟ်မးမာန်ရ။

ပရေၚ်ချဳဒရာၚ် CRPH, NUCC, NUG ပွိုၚ် (၂)သၞာံဂမၠိုၚ်

သွက်ဂွံဗှ်လ္ၚတ်ဗွဲဘာသာအေၚ်္ဂလိက် : https://bit.ly/3ZMJSnp

သွက်ဂွံဗှ်လ္ၚတ်ဗွဲဘာသာဗၟာ : https://bit.ly/3UgFKLc

ပရေၚ်ချဳဒရာၚ်ကံၚ်ဇြဳပၞာန် ပွိုၚ်(၂)သၞာံဂမၠိုၚ်

သွက်ဂွံဗှ်လ္ၚတ် ဗွဲဘာသာအေၚ်္ဂလိက် : https://bit.ly/3UifFLJ

သွက်ဂွံဗှ်လ္ၚတ် ဗွဲဘာသာဗၟာ : https://bit.ly/3Ki3SZl

ပရိုၚ်-သြၚ်လောန်တိုၚ်(မ်)

ဗီုရုပ် – ဂကောံသုတေသနဉာဏ်လေန်တေတ်