ပေါၚ်တေဝ် – ဨဗြဴ (၁၁)
ရးဒေသဗဂေါ၊ ပ္ဍဲဍုၚ်ပေါၚ်တေဝ်ဂှ် သွက်ဂွံဗကပ်ဗဗေၚ် သ္ဘၚ်အတးသၚ်္ကြာန်ကံၚ်ဇြဳပၞာန် ကၠောန်ဗဒှ်ဗီုပြၚ်ဂှ် ဖံက်ခတိုဟ်ကဵုလဝ်သတိ ကၞာထးဗဟဵု ဃောသိုၚ်ခၞံဒၟံၚ်ရဂှ် Bago Region PDF လလောၚ်တြးလဝ် ပရိုၚ်ရ။
တ္ၚဲဏံ ဂိတုဨဗြဴ စၟတ်တ္ၚဲ (၉) အခိၚ်နူဂယးပြဟ်ဂှ် ပ္ဍဲဍုၚ်ပေါၚ်တေဝ်၊ ကၞာထးကံၚ်ဇြဳပၞာန် သိုၚ်ခၞံဒၟံၚ် ပ္ဍဲအရာပ်ဖျာစၟတ်(၂) ဂၠံၚ်ကျာ်ဇၞော်ဂှ် ပ.က.ဖ ပွိုၚ်ဍုၚ်ပေါၚ်တေဝ်၊ ဂကောံက္ညၚ် တံဒပ် -၂၆၀၁ ဒပ်လ္ပာ် – ၅ ဖံက်ခတိုဟ်လဝ် မာၚ်ရ။
ကြဴနူပရေၚ်ဖံက်ခတိုဟ် က္တဵုဒှ်တုဲဂှ် ကံၚ်ဇြဳပၞာန် ကၟာတ်ဂၠံၚ် ဂၠိုက်ဂၠာဲစၟဳစၟတ်လဝ်တုဲ ပရေၚ်မၞိဟ်ဇီုကပိုက်ဒးလဝ် ဟၟဲရဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သွက်သ္ဘၚ်အတးသၚ်္ကြာန်ကံၚ်ဇြဳပၞာန် ဂွံက္တဵုဒှ်ကၠုၚ် ကၠောန်လဝ်တၞးလိက်မာဲစမ်ကံ ပ္ဍဲပွိုၚ်ဍုၚ်ပေါၚ်တေဝ်တုဲ စရေဂအုပ်နာနာ၊ သ္ကိုပ်အုပ်ဓုပ်ကွာန်အရာပ် ကေုာံဒေၚ်ဝေၚ်လံၚ်ဇျှၚ်၊ သၟာကၠတ်ဆု၊ သၟာကမၠောန်ပရေၚ်ပိုန်ဒြပ်တအ်ကီု သီုကဵုသ္ဇိုၚ်ဝန် Non CDM တအ် နူဌာမဆေၚ်စပ်မွဲကဆံၚ် သွံတြးလဝ် တၞးလိက်မာဲတုဲ ပရေၚ်ကံက်ကေတ်ဒၟံၚ်သြန်တအ်လေဝ် ကၠောန်သ္ပဒၟံၚ်ရဂှ် ဂွံတီကေတ်။
ကံၚ်ဇြဳပၞာန်သီအဝဵုဂှ် သွက်ဂွံဂြောပ်ဗ္ဒန် ဒုဟ်ရာဇဝတ် ကလိလောန်လဝ် လ္တူညးဍုၚ်ကွာန်တအ်ကီု သီုကဵုသွက်ဂွံပြံၚ်အာရီုညးဍုၚ်ကွာန်တအ်တုဲ ရေၚ်တၠုၚ်ကၠောန်ဗဒှ်ဒၟံၚ် သ္ဘၚ်အတးသၚ်္ကြာန်ဗီုပြၚ် သွက်ဒတုဲမြမောဝ်ဍေံတအ် ဃရေက်ဃရေၚ်ဂဗက်ဂဗက်ရ။
ဂကောံဇြဟတ်ပၠန်ဂတးတအ်ကီု သီုကဵုဒပ်စဵုဒၞာညးဍုၚ်ကွာန်တအ်ဂှ် ဗကပ်ဗဗေၚ်ပါဲတးလဝ် သ္ဘၚ်အတးသၚ်္ကြာန် ကံၚ်ဇြဳပၞာန်ပ္တိတ်ဒၟံၚ်ဇြဟတ် သွက်ဂွံသုၚ်စောဲအာ နဒဒှ်ဒတုဲမြမောဝ်ကံၚ်ဇြဳပၞာန်ဂှ်တုဲ သွက်ဂွံဝေၚ်အာပၞာန်ပၠန်ဂတးသၚ်္ကြာန်မာန် အာတ်မိက်လဝ် ညးဍုၚ်ကွာန်တအ် ဗွဲမေတ္တာရ။
ပရိုၚ်-သြၚ်လောန်တိုၚ်(မ်)
ဗီုရုပ် – Bago PDF