တမ်ဒပ်ကံၚ်ဇြဳပၞာန် ခမရ (၃) ဖျေံသ္ဇိုၚ်ၜဳကလေၚ် ဒးဒုၚ်ဗ္တိုက်ကဵုဒရုၚ်

ၜဳကလေၚ်၊ ဨပရဴ (၁၂)

ဂကောံဒပ်ပံၚ်ကောံ KNLA တံ အာစိုပ်ဗ္တိုက်လဝ် တမ်ဒပ်တိုက်ကံၚ်ဇြဳပၞာန် ခမရ (၃) မၞုံဗ္ဒါဲကွာန်ပိုၚ်ဒဝါ၊ ပွိုၚ်ဍုၚ်ၜဳကလေၚ်၊ တွဵုရးဍုၚ်မန် နကဵုဒရုၚ်ရောၚ် ညးဒုၚ်တာလျိုၚ် PDF ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုဨပရဴ (၁၀) ဇိုၚ်သဝ်တ္ၚဲ ၜိုတ် (၃) နာဍဳဂှ် ဂကောံဒပ်ပံၚ်ကောံ PDF, ဒပ်ပၞာန်ဗၠးၜးကောန်ဂကူကရေၚ် KNLA တံ အာစိုပ်ဗ္တိုက်လဝ် တမ်ဒပ်ကံၚ်ဇြဳပၞာန် ခမရ (၃) နကဵုဒရုၚ် (၂) ဖ္ဍိုက်တုဲ အပ္ဍဲပရေၚ်ဗ္တိုက်ဂှ် ဒရုၚ်မွဲဖ္ဍိုက် ဇီုကပိုက်လီုလာ်လဝ်ရ။

ပ္ဍဲကဵုပရေၚ်ဒးဒုၚ်ဗ္တိုက်ကဵုဒရုၚ်ဂှ် စမြိုၚ်ကၚ်ဗဟဵုတမ်ဒပ်ဂှ် ဇီုကပိုက်လီုလာ်အာလဝ်တုဲ ကောန်ဂကောံဒပ်ကံၚ်ဇြဳပၞာန် ဇီုကပိုက်ချိုတ်ဂျိုၚ်တံ နွံမာန်ကီုလေဝ် ဆက်ဂၠိုက်ဂၠါဲဒၟံၚ် အကာဲအရာဗလးတိဏံဖိုဟ်ဂှ် သ္ဂးရ။

ကြဴနူတမ်ဒပ်ကံၚ်ဇြဳပၞာန် ဒးဒုၚ်ဗ္တိုက်ကဵုဒရုၚ်ဂှ် လ္ပာ်ကံၚ်ဇြဳပၞာန် ကလေၚ်ပန်ပှော်လဝ်ကဵု လွဟ်ဇၞော် ဟွံအောန်နူကဵု (၈) မကီုလေဝ် လ္ပာ်ဂကောံဒပ်ပံၚ်ကောံ KNLA တံ ဇီုကပိုက်ဒးဟွံမွဲပုဟ်ဂှ် ဂွံတီကေတ်ရ။

ပ္ဍဲကဵုအကံက်ထလဳဂရာမ် ညးထံက်ဂလာန်ဒပ်ပၞာန်တံဂှ် ပ္ဍဲကဵုပရေၚ်ဗ္တိုက် တမ်ဒပ်ကံၚ်ဇြဳပၞာန်ဂှ် စမြိုၚ်လ္ၚဵုတံဟေၚ် ဇီုကပိုက်လီုလာ်လဝ်ကီုလေဝ် ကောန်ဂကောံဒပ်ကံၚ်ဇြဳပၞာန်တံ ဇီုကပိုက်ကလိဂွံဝပ် ဟွံမွဲပုဟ်ဂှ် တြးဒၟံၚ်ဝါဒတံ နွံဒၟံၚ်ရ။

တုဲကၠုၚ် ပ္ဍဲဂိတုဨပရဴ (၉) တေံဂှ်လေဝ် ဒပ်ပံၚ်ကောံ KNLA တံ အာစိုပ်ဗ္တိုက်လဝ် ဗ္ဒိုပ် BGF ဒပ်မၚ်ပယျဵုကရေၚ် သၟဝ်တဲကံၚ်ဇြဳပၞာန် မၞုံပ္ဍဲကွာန်မေဝ်လာန် ပွိုၚ်ဍုၚ်ၜဳကလေၚ်ဂှ်တုဲ သၞာဲဒဴ BGF (၂) တၠ ချိုတ်အာလဝ်ဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−CJ