ဗြဝတဳ၊ ဨပရဴ (၁၂)
ပ္ဍဲကဵုဒေသမေဝ်ကနေဝ် ပွိုၚ်ဍုၚ်ဗြဝတဳ တိဍာ်ဒပ်မဟာ (၆) ဗော်သွးကောန်ဂကူကရေၚ် KNU ဂှ် ပ္ဍဲဂိတုဨပရဴ (၁၁) တေံ အကြာဒပ်မၚ်ပယျဵုကံၚ်ဇြဳပၞာန် BGF ကဵု ကရောၚ်ပၞာန်ပံၚ်တောဲ KNLA တံ ပေါဲဗ္တိုက်သ္ကာတ်မြဟ်ဒၟံၚ်တုဲ လ္ပာ်ကံၚ်ဇြဳပၞာန် ရပ်စပ်စကာ ပရေၚ်ပန်ပှော်လွဟ်ဇၞော် ကေုာံ တရဴကျာတံ ဗွဲမဂၠိုၚ်ဂၠေၚ်တုဲ ဗ္တိုက်ဒၟံၚ်ရောၚ်ဂှ် ဂွံတီကေတ် လ္ဂောံပရိုၚ်ဗလးတိဂမၠိုၚ်ရ။
အပ္ဍဲပေါဲဗ္တိုက်ၜါလ္ပာ်ဂှ် ဒပ်ကံၚ်ဇြဳပၞာန်ဝွံ မွဲတ္ၚဲဓဝ် ကၠုၚ်စိုပ်ကၠောန်သ္ပလဝ် ပရေၚ်ဗ္တိုက်တရဴကျာ ပန်ဝါတုဲ သီုကဵုစကာ မဗမ် (၅၀၀) ပံၚ်တံတုဲ ဗ္တိုက်ဏာလဝ်ရောၚ်ဂှ် ပရိုၚ်တမ်ရိုဟ်ဗလးတိဂမၠိုၚ် ဟီုရ။
သ္အာၚ်နူဂှ်ပၠန် ဗျူဟာပၞာန်တေန်ဂါန်ညဳနံၚ် ကံဇြဳပၞာန်ဂှ်လေဝ် ကၠောန်သ္ပပန်ပှော်ဗ္တိုက်ဒၟံၚ် လ္ပာ်ကွာန်မေဝ်ကနေဝ် နကဵုလွဟ်ဇၞော် ဟွံပိုတ်သ္ကုတ်ရောၚ်ဂှ် သ္ဂးရ။
ဟိုတ်နူပရေၚ်ပန်ပှော် လွဟ်ဇၞော် ကေုာံ ပရေၚ်ဗ္တိုက်တရဴကျာ ဒပ်ကံၚ်ဇြဳပၞာန်တံဂှ်တုဲ ပြဟ်ဟ်ဏံ ပရေၚ်ဇီုကပိုက်ချိုတ်တံ ဟွံဂွံတီကေတ်တုဲ အပ္ဍဲပေါဲဗ္တိုက် ပရေၚ်ဇီုကပိုက်ၜါလ္ပာ်တံ နွံဒၟံၚ်ရောၚ်ဂှ် ဂွံတီကေတ် နူပရိုၚ်တမ်ရိုဟ်ဗလးတိဂမၠိုၚ်ရ။
တုဲကၠုၚ် ပ္ဍဲဂိတုဨပရဴမံက်တေံဂှ်လေဝ် ကြဴနူဂကောံဒပ်ပံၚ်ကောံ KNLA တံ လုပ်စိုပ်ဗ္တိုက်လဝ် ဗ္ဒိုပ်ဒပ်ဗၠာဲသၟိၚ် နူကဵုတေန်ဂါန်ညဳနံၚ် ကေုာံ ဒၞါဲအပိုၚ်အခြာဒေသသွံရာန်ဗၞိက် ဍုၚ်ဗြဝတဳတံဂှ်တုဲ ဒပ် BGF ကံၚ်ဇြဳပၞာန်တံ ထ္ပက်ဒၟံၚ်ကရောၚ်ပၞာန်ဗ္တိုက်ဒၟံၚ် နကဵုကရောၚ်ပၞာန် (၃) နကဵုဇြဟတ်ဒပ်လၟိဟ်ဗွဲမဂၠိုၚ်ဂၠေၚ်တံရ။
အပ္ဍဲပေါဲဗ္တိုက်မက္တဵုဒှ်လဝ် လ္ပာ်ကွာန်မေဝ်ကနေဝ် ပွိုၚ်ဍုၚ်ဗြဝတဳဂှ် လ္ပာ် BGF ကံၚ်ဇြဳပၞာန်ဂှ် ဗ္ဒါဲ (၃၀) ချိုတ်အာလဝ်တုဲ သီုကဵုပါလုပ်သၞာဲဒဴဂှ် ညးမကလိဂွံဝပ် (၃၀) ပြၚ်နွံတုဲ လွဟ်လက်နက်မကမ်လ္ၚဵုတံလေဝ် သီဂိုၚ်ဂွံလဝ်တုဲ ဟိုတ်နူပရေၚ်ပန်ပှော်လွဟ်ဇၞော် နူဒပ်ကံၚ်ဇြဳပၞာန်တုဲ ပိုန်ဒြပ်အရပ်ရာ သ္ၚိဒၟံၚ်မၞိဟ် နူကဵုကွာန်မေဝ်ကနေဝ်တံ ဒးဇီုကပိုက်ဆောံလေၚ်အာလဝ်ရောၚ်ဂှ် ကရောၚ်ပၞာန်ကဝ်ဗရာ မဒှ်ကရောၚ်ပၞာန်ပံၚ်တောဲ KNLA ဂှ် လလောၚ်ပ္တိတ်လဝ် ပ္ဍဲဂိတုဨပရဴ (၁၀) တေံရ။
ဟိုတ်နူပေါဲဗ္တိုက် မက္တဵုဒှ်လဝ် လ္ပာ်ကွာန်မေဝ်ကနေဝ် မၞုံအပ္ဍဲတိဍာ်ဒပ်မဟာ (၆) KNU တံဂှ်တုဲ ညးဍုၚ်ကွာန်ဒေသ ဂၠိုၚ်ကဵုလ္ၚီ နူကဵုကွာန်ဖာချံၚ်၊ ယဲတေတ်၊ မေဝ်ကနေဝ်အပ္ဍဲ၊ မေဝ်ကနေဝ်မ္ၚး၊ နအ်ဖိုဝ်တံဝွံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ်ဂှ် ဂွံတီကေတ် နူကဵုဂကောံမှာဇန်ကရေၚ်တံရ။
ပရိုၚ်−သြၚ်လောန်တိုၚ်(မ်)
ဗီုဓာတ်−Cobra Column