လ္ဂုၚ်၊ ဨပရဴ (၁၂)
ဒမြိပ်ပရေၚ်ပိုန်ဒြပ်တောတက်ဍုၚ်ဗၟာ အပ္ဍဲသၞာံ ၂၀၂၃ ဂှ်ဝွံ ဒၟါနူနွံဒၟံၚ် (၂) တၟံကၠံဓဝ်ဂှ်ရ ယဝ်ရဒးပ္တောံၜတ်ကဵု ဍုၚ် အပ္ဍဲဒေသအာဇြဳယာန်တၞဟ်ဟ်တံဂှ်မ္ဂး စိုပ်ကၠုၚ်အကာဲအရာသဝ်အိုတ်တံမာန်ရောၚ်ဂှ် ဂကောံရေၚ်တၠုၚ်ပံၚ်တောဲပရေၚ်ပိုန်ဒြပ် ကေုာံ ပရေၚ်တောတက်ဖောအ်ဗြေဝ် (OECD) ချိၚ်ခယျလဝ်ရ။
ပ္ဍဲကဵုလိက်ဒုၚ်စဳရေၚ် စပ်ကဵုပရေၚ်ပိုန်ဒြပ်တောတက် ဍုၚ်အိန္ဒိယ၊ ကြုက် ကေုာံ အာယှဒိုဟ်အဂၞဲ နူကဵု OECD မလလောၚ်ပ္တိတ်လဝ် သၞာံ ၂၀၂၃ ဂှ် ပ္ဍဲကဵုပရေၚ်ဍုၚ်ကွာန်ဍုၚ်ဗၟာဟွံညိၚ်ဝတ်ဂှ် ဟိုတ်နူပုဂ္ဂလိက ရာန်ရပ်စပ်စကာတံ အောန်စှ်ေဒၟံၚ်ဂှ်ရ ၚုဟ်မး GDP စှ်ေအာဂှ် သ္ဂးလဝ်ရ။
အပ္ဍဲဒပ်ပၞာန်သီအဝဵု သၞာံ ၂၀၂၁ ဂှ် GDP ဍုၚ်ဗၟာဝွံ ထ္ၜးလဝ်လက္ချန်ဟုတ်တုဲ ပ္ဍဲသၞာံ ၂၀၂၂ ဂှ် ၜိုန်ရတိုန်ကၠုၚ် (၂) တၟံကၠံကီုလေဝ် စိုပ်သၞာံ ၂၀၂၃ ဂှ် စၟဳစလဝ် သွက်ဂွံတိုန်ကၠုၚ် (၂) တၟံကၠံတုဲ သၞာံ ၂၀၂၄ ဂှ် ပသှ်ေလဝ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဒံက်တာသာၚ်ကျဳဇြေန်သဵုဂှ် GDP ၂ တၟံကၠံ မချိၚ်ခယျလဝ်ဂှ်ဝွံ ယဝ်ရဒးပ္တောံၜတ်ကဵု ဒမြိပ်သြန်ဖောဝ်လၟုဟ်မ္ဂး အောန်ဒၟံၚ်ဏီတုဲ ပရေၚ်ပိုန်ဒြပ်ဍုၚ်ဗၟာဝွံ ထ္ၜးဒၟံၚ်လက်က္ချန်ဟုတ်တုဲ တန်တဴဒၟံၚ်ကဵု အကာဲအရာ မက္တဵုဒှ်ဒၟံၚ်လၟုဟ်တံရောၚ်ဂှ် သ္ၚဳဂၠိပ်လဝ်ရ။
“GDP (၂) တၟံကၠံဂှ် အောန်ဒၟံၚ်ကွေံကွေံ။ inflation rate လၟုဟ်ဂှ် (၆) တၟံကၠံပြၚ်ဒၟံၚ်။ အေ ဂှ်တှ်ေ သြန်လုပ် အောန်နူကဵု inflation ဂှ်နွံဒၟံၚ်ဏောၚ်ဟီုတှ်ေ ပရေၚ်ပိုန်ဒြပ်ကၟိန်ဍုၚ်ဗၟာဂှ် ဒှ်သဘဴထ္ၜးဒၟံၚ်လက္ချန်ဟုတ်နွံဒၟံၚ်။ အေ ဂှ်တှ်ေ အဟိန်မံၚ်မးမး မွဲတ္ၚဲတုဲမွဲတ္ၚဲဂှ် ဇြဟတ်ပရေၚ်ပိုန်ဒြပ်ဂှ် ဒှ်သဘဴယအ်စှ်ေဒၟံၚ်ဏောၚ်။ အေညအ်ဂှ် အရာဟွံညိၚ်ဝတ်အခိၚ်လၟုဟ်တံလေဝ် နွံဒၟံၚ်ဏောၚ်။ ပရေၚ်ကြံၚ်မ္ၚိုဟ် အကြာဂကောံတံ ပါဏောၚ်။ ပ္ဍဲကဵုဒေသ မ္ဒးလုပ်စိုပ်ကၠောန်ၜိုတ်တံဂှ် နကဵုပရေၚ်ဂီုကၠီုကဵုဒှ်၊ ဟွံသေၚ်မ္ဂး ပရေၚ်ဓလိုက်တမ်ရိုဟ်တံ အကာဲအရာကဵုပွစဵုဒၞါမာန်တံကဵုဒှ် လ္ဂောံကဵုဗွဝ်ဖျာတုဲ ဟွံညိၚ်ဟွံဝတ်က္တဵုဒှ်ဒၟံၚ်၊ ကလိဂွံဓဝ်ပတှ်ေဟွံမာန်တံဂှ်ဝွံ တန်တဴကဵုလ္တူဏံတုဲ သဘဴဂွံသ္ဂောံစှ်ေဂှ် နွံဒၟံၚ်” သာ်ဝွံ ညးသ္ဂးရ။
အတိုၚ်လိက်ဒုၚ်စဳရေၚ် OECD တံဂှ်မ္ဂး ညးမဓလိုက်တမ်ရိုဟ် အပ္ဍဲဍုၚ်ဗၟာဂှ်ဝွံ ဟိုတ်ဒၟါနူစိုတ်လုပ်စ ပ္ဍဲဇြဟတ်ဓာတ် ကေုာံ ပရေၚ်ပလံၚ်ပ္တိတ်သတ္တုတံဂှ်ရ ပရေၚ်ဓလိုက်တမ်ရိုဟ်ဍုၚ်သ္အာၚ် ယအ်စှ်ေဏောၚ်ဂှ် စၟဳစလဝ်တုဲ ဒမြိပ်ပရေၚ်ပိုန်ဒြပ်အာယှဒိုဟ်အဂၞဲ တောတက်တိုန်ဂှ်ဝွံ သၞာံတုဲတေံ နူကဵု (၅ ဒဿမ ၆) တၟံကၠံနွံဂှ် သၞာံဏံ စှ်ေအာ စဵုကဵု (၄ ဒဿမ ၆) တၟံကၠံရောၚ်ဂှ် သ္ဂးရ။
သ္အာၚ်နူဂှ်ပၠန် အပ္ဍဲသၞာံဏံ ပ္ဍဲကဵုဒေသအာယှဒိုဟ်အဂၞဲတံဂှ် ဟိုတ်ပရူပရာအဓိက မကဵုဒမြိပ်ပရေၚ်ပိုန်ဒြပ်တောတက် အိၚ်စှ်ေအာဂှ်ဝွံ ဒှ်သြန်ဖောဝ်တံကဵု ပရေၚ်ပိုန်ဒြပ်ဂၠးတိ အိၚ်စှ်ေအာတံရောၚ် သာ်ဝွံ လိက်ဒုၚ်စဳရေၚ်ဂှ် ထံက်ထ္ၜးလဝ်ရ။
ပ္ဍဲဍုၚ်ဗၟာဂှ် အပ္ဍဲကာလဒပ်ပၞာန်သီအဝဵု ပွိုၚ် (၂) သၞာံဂှ် ဒမြိပ်သြန်ဖောဝ် သၠုၚ်တိုန်ကၠုၚ်လဝ် မွဲအသိၚ်ဓဝ်တုဲ ပ္ဍဲပရေၚ်ဓလိုက်တမ်ရိုဟ်ဍုၚ်သ္အာၚ်တံဂှ် ကမ္ပဏဳ (၃၄) ဟွံအောန် ဒေါအ်ဇူလဝ်ကမၠောန်ကီု၊ သွံတြးတုဲ ကလေၚ်တိတ်စ္ဍးအာတံ နွံလဝ်ရ။
အတိုၚ်တၚ်နၚ် ဂကောံသုတေသန ISP-Myanmar တံဂှ်မ္ဂး ၚုဟ်မးပရေၚ်ဓလိုက်တမ်ရိုဟ် မတိတ်စ္ဍးအာဂှ်ဝွံ ၜိုတ်ဒဝ်ဠာအမေရိကာန် ပန်ဗဳလျာန်ပြၚ်နွံတုဲ ပွမဇီုကပိုက် ပရေၚ်ပိုန်ဒြပ်ပရေၚ်မၞိဟ် လ္တူကွပ်မၞိဟ်သ္ဇိုၚ်တံဂှ်လေဝ် ဇၞော်သၠဲဒၟံၚ်ရောၚ်ဂှ် သ္ဂးလဝ်ရ။
ကံၚ်ဇြဳပၞာန် မထိၚ်လဝ်အဝဵုကၟိန်ဍုၚ်ဂှ် Per Capita GDP သွက်မၞိဟ်မွဲမွဲ သွက်ဂွံဒှ်ကၠုၚ် (၂၄) ကိုဋ်ပြၚ်ဂှ်ကဵု GDP ကၟိန်ဍုၚ် သွက်ဂွံတိုန်ကၠုၚ် (၄ ဒဿမ ၁) တၟံကၠံဂှ် စုတ်စၟဳစလဝ် ပ္ဍဲသၞောဝ်ကိုန်စဳမာန်ကောန်ဂကူရ။
ပရိုၚ်−သြၚ်လောန်တိုၚ်(မ်)
ဗီုဓာတ်−TLT