သဓီု၊ ဨပရဴ (၁၆)
ပ္ဍဲတွဵုရးဍုၚ်မန် ပွိုၚ်ဍုၚ်သဓီု အကြာသၞေဟ်ကွဳပၟတ်သဓီု ဂၠံၚ်ကွဳပၟတ်လ္ဂုၚ်−မတ်မလီု ကဵု သၞေဟ်ပၟတ်ယျေန်ညုၚ်ဂှ် ပ္ဍဲဂိတုဨပရဴ (၁၄) အခိၚ်တ္ၚဲစေၚ်ဂှ် ကွဳပၟတ်ဖ္ဍိုက်တၟံမွဲဖ္ဍိုက် ဒးဒုၚ်ဖံက်ဗ္တိုဟ်လဝ်မာၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုတ္ၚဲဂှ် လ္ဒေါဝ်တ္ၚဲ ၜိုတ် (၁) နာဍဳ ဂကောံရပ်လွဟ်ဟွံတီယၟုမွဲဂကောံ ဗ္တိုဟ်မာၚ်ဗ္တိုက်လဝ် ကွဳပၟတ်ဖ္ဍိုက်တၟံ မဒဳကၠုၚ် နူလ္ဂုၚ် အာလ္ပာ်မတ်မလီုဂှ်ရ။
ဟိုတ်နူဒးဒုၚ်ဖံက်ဗ္တိုဟ်မာၚ်ဂှ်ရ ဒ္ၚေါဝ်ဒၞါကျာက္ဍိုပ်စက် ကွဳပၟတ်ဂှ် ကရောန်ထ္ကးအာတုဲ ဂၠံၚ်ပသဲကွဳပၟတ် ဗ္ဒါဲ (၂) ဟတ် ပိုတ်လီုလာ်အာလဝ်ရောၚ် ညးတာလျိုၚ် ကွဳပၟတ်မတ်မလီုမွဲတၠ သ္ဂးရ။
တုဲကၠုၚ် ပ္ဍဲဂိတုဨပရဴ (၁၃) ဂှ်လေဝ် ပ္ဍဲဂၠံၚ်ကွဳပၟတ်လ္ဂုၚ်−မတ်မလီု ပွိုၚ်ဍုၚ်သဓီု အကြာသၞေဟ်ကွဳပၟတ်သဓီု ကေုာံ သၞေဟ်ပၟတ်ဒုၚ်သုက်ဂှ် ကွဳပၟတ်ဖုန်ကျာလ္ပာ်စှ်ေ စၟတ် (၈၂) မတ်မလီု−လ္ဂုၚ် ဒးဒုၚ်ဖံက်ဗ္တိုဟ်မာၚ်တုဲ ညးအာတရဴတံ ဇီုကပိုက်ကလိဂွံဝပ်တံ ဟွံမွဲကီုလေဝ် ဂၠံၚ်ပသဲကွဳပၟတ် ဗ္ဒါဲ (၁) ဟတ် လီုလာ်အာလဝ်ရ။
ဂၠံၚ်ကွဳပၟတ် လ္ဂုၚ်−မတ်မလီုဂှ်ဝွံ အပ္ဍဲကာလဒပ်ပၞာန်သီအဝဵု ပွိုၚ် (၂) သၞာံပြၚ်ဂှ် မွဲဏှမွဲဏှဟီုဂွံ ဒးဒုၚ်ဖံက်ဗ္တိုဟ်ဒၟံၚ်တုဲ ဟိုတ်နူပရေၚ်ဗ္တိုက်ဏံတုဲ လၟေၚ်တရဴကွဳပၟတ်လ္ၚဵု ဒးဒုၚ်ပလီုထောံလဝ် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ