မတ်မလီု၊ ဨပရဴ (၁၈)
ထပိုတ်ရိုဟ်ကၞက် သၞောတ်တၠအဝဵုပၞာန်မာန်မှဟေၚ် အနာဂတ်ဍုၚ်ကွာန် ဒဒှ်ရကျေဝ်ဂေါဝ်ရောၚ်ဂှ် ဒးကၠိုဟ်လဝ်တုဲ ပ္ဍဲအခိၚ်ပရေၚ်ပၠန်ဂတးဏံ သီုကဵုဒးပသတိ ပရေၚ်ဂီုကၠီုဗွဲတၟေၚ်ဏောၚ်ဂှ် ဒုသ္ကိုပ်က္ဍိုက်ပ် KNLA ဟီုဂးလဝ်ရ။
ပ္ဍဲကဵုလိက်သဝဏ်ပ္တိုန်ဂုဏ်စရာဲ နူကဵုဒုသ္ကိုပ်က္ဍိုက်ပ်ပၞာန် ဒုသ္ကိုပ်ဗိုလ်ဇၞော် သဝ်ဗဝ်ကျဝ်ဟေဝ် ဒပ်ပၞာန်ဗၠးၜးကောန်ဂကူကရေၚ် KNLA မပလံၚ်ဗစိုပ်လဝ် အသေအဟာန် တ္ၚဲဒပ်ပၞာန်ဗၠးၜးကောန်ဂကူဗၟာ (BPLA) ပေၚ် (၂) သၞာံ ပ္ဍဲဂိတုဨပရဴ (၁၇) တေံဂှ် ဟီုဂးလဝ်ရ။
ပ္ဍဲအရာဗ္တိုက်ပ္တိတ်ထပိုတ်ရိုဟ်ကၞက် သၞောတ်တၠအဝဵုပၞာန်အိုဿီု မၞုံအပ္ဍဲကၟိန်ဍုၚ် သွက်ပရေၚ်မဟွံဗဗွဲဓဝ်၊ ပရေၚ်ကဆံၚ်တုပ်သၟဟ် ကေုာံ သွက်တၚ်နွံပၟိက်ကၟိန်ဍုၚ်တံဂှ် နကဵုကောန်သ္ဂံၚ်ဂမၠိုၚ် သွက်ဂွံဆက်ပံၚ်တောဲပါလုပ် သီုစိုတ်သီုစရိုတ်ဂှ် နွံပၟိက်တုဲ ကရောံတၠအဝဵုပၞာန်ဂှ် တၠအဝဵုပၞာန်လဵုဟွံဟီု ထပိုတ်ရိုဟ်ကၞက်မာန်မှဟေၚ် အနာဂတ်ကၟိန်ဍုၚ်လေဝ် ဒဒှ်ရကျေဝ်ဂေါဝ်မာန်ဂှ် နကဵုဒပ်ပၞာန်ကီု၊ ကောန်သ္ဂံၚ်ဂမၠိုၚ်ကီု ဒးကၠိုဟ်လဝ်ရောၚ်ဂှ် ဒုသ္ကိုပ်ဗိုလ်ဇၞော် သဝ်ဗဝ်ကျဝ်ဟေဝ် ဟီုရ။
နကဵုဒပ်ပၞာန် မလုပ်ဒၟံၚ်ပေါဲဗ္တိုက် သွက်ပရေၚ်ဗၠးၜး မဒှ်အခေါၚ်အရာသ္ဇိုၚ်ဇကုတံဂှ် ညံၚ်ဂွံဒှ်ဒပ်ပၞာန် မရှ်ေသှ်ေစဵုဒၞါ အခေါၚ်အရာညးဍုၚ်ကွာန်ကောန်အရာပ်တံဂှ်လေဝ် နွံပၟိက်ရောၚ်ဂှ် ဒုသ္ကိုပ်ဗိုလ်ဇၞော် သဝ်ဗဝ်ကျတ်ဟေဝ် ဟီုဂးလဝ်ရ။
သ္အာၚ်နူဂှ်ပၠန် ပ္ဍဲအခိၚ်ကာလပရေၚ်ပၠန်ဂတးဂှ် လညာတ်သမ္တီပၠန်ဂတးကီု၊ သတိကီု ဒးနွံသီုကဵုသတိပရေၚ်ဂီုကၠီုတုဲ ပရေၚ်ဂီုကၠီုဇြဟတ်ခိုဟ်ခ္ဍၚ် အခေါၚ်အရာပေါဲအံၚ်ဇၞးပရေၚ်ပၠန်ဂတးလေဝ်ခိုဟ်ခ္ဍၚ်ဂှ်ရ ဒးပသတိ ပရေၚ်ဂီုကၠီု ဗွဲတၟေၚ်ဏောၚ်တုဲ သွက်ဂွံတဝ်စၞေဟ်ပၞာန် နကဵုနဲကွတ်ပညာဂတာပ်ခေတ်တံမာန်ဂှ် ဒးလ္ၚတ်အာဒၟံၚ်လၟိုန်ရောၚ် ဒုသ္ကိုပ်ဗိုလ်ဇၞော် သဝ်ဗဝ်ကျဝ်ဟေဝ် ဟီုလဝ်ရ။
ရံၚ်ကဵုခေတ်ကာလ မတောတက်ကၠုၚ်ဂှ်မ္ဂး ပ္ဍဲအရာကၠောန်သ္ပပရေၚ်ပၠန်ဂးတဂှ် ကွတ်တဲကွတ်ဇိုၚ်သၟးဟွံက ပံၚ်ဖျပ်ကဵု သီုဒ္ဂေတ်ပဋိပတ်စိုတ်စရိုတ်တံတုဲ ဒးလုပ်ပေါဲဗ္တိုက်ပၠန်ဂတးအာဏောၚ်မဒှ်တုဲ ကရောံနဲကွတ်ပညာ ဗ္တိုက်ကေတ် နကဵုကွတ်တဲကွတ်ဇိုၚ်တံဂှ် နကဵုဒပ်ပၞာန် ဒးပလေဝ်လဝ် သီုပေါဲဗ္တိုက်စိုတ်စရိုတ်တံရောၚ်ဂှ်လေဝ် သ္ဂးလဝ်ရ။
ပ္ဍဲအကြာအခက်အခုဲအကြေပ်အဂြတ် တၚ်ကော်ဆဴလၟုဟ်ဂှ် သီုကဵုဒက်ပ္တန်မာန်လဝ် ဒပ်ပၞာန်ဂှ်ကီု သီုကဵုက္ဍိုပ်သ္ကိုပ်၊ ကောန်သ္ဂံၚ် ဒပ်ပၞာန်ဗၠးၜးကောန်ဂကူဗၟာ BPLA မလုပ်ဒၟံၚ်ပေါဲဗ္တိုက် ပ္ဍဲမုက်ပၞာန်ပၞောန်ဂတတံကီုဂှ် ပ္ဍဲတ္ၚဲဒပ်ပၞာန်က္တဵုဒှ် (၂) သၞာံဏံ သ္ပစၟတ်သမ္တီတုဲ ကေတ်ဂုဏ်စရာဲအိုဟ်တၟိုဟ် ဗွဲမလောန်ရောၚ်ဂှ် ဒုသ္ကိုပ်က္ဍိုက်ပ် KNLA ဟီုဂးစုတ်လဝ် ပ္ဍဲလိက်သဝဏ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−KNU