မတ်မလီု၊ ဨပရဴ (၁၈)
ကံၚ်ဇြဳပၞာန်ဂှ် နဒဒှ်စၟတ်သမ္တီတ္ၚဲကၠောံသၞာံတၟိတုဲ ပ္ဍဲတွဵုရးဍုၚ်မန် ၜိုန်ရကလေၚ်ဗလးကဵုလဝ် ကောန်ထံၚ် ၂၂၀ ပြၚ် နူကဵုထံၚ်နာနာတံကီုလေဝ် ကောန်ထံၚ်ပရေၚ်ဍုၚ်ကွာန် ပါလုပ်ဟွံမွဲပုဟ်ဂှ် ဂွံတီကေတ် နူကဵုဌာနက္ဍိုက်ပ်ထံၚ်စာတ် တွဵုရးဍုၚ်မန်ရ။
ကံၚ်ဇြဳပၞာန်ဝွံ နူကဵုထံၚ်စာတ်၊ အချုက်၊ ဂုက် (၁၁) မၞုံအပ္ဍဲတွဵုရးဍုၚ်မန်တံဂှ် နကဵုသၞောတ်ဗ္ၜတ် ကလေၚ်ဗလးလဝ် ကောန်ထံၚ်တြုံ ၂၀၂ တၠ၊ ကောန်ထံၚ်ဗြဴ ၂၂ တၠ၊ အပံၚ်ဖအိုတ် ၂၂၄ တၠရ။
ပ္ဍဲကဵုကောန်ထံၚ် ကံၚ်ဇြဳပၞာန် ကလေၚ်ဗလးကဵုလဝ်တံဂှ် အမှုကၠတ်၊ အမှုဂဥုဲၜူမာဲ၊ အမှုဂြိပ်တိတ် နူဗၠာဲသၟိၚ်၊ နူဒပ်ပၞာန်တံ ပါလုပ်ဂၠိုၚ်အိုတ်တုဲ ကောန်ထံၚ်ပရေၚ်ဍုၚ်ကွာန် မွဲတၠမှ ပါလုပ်လဝ် ဟွံမွဲရ။
ကောန်ထံၚ်ပရေၚ်ဍုၚ်ကွာန်တြေံမွဲတၠဂှ် ပ္ဍဲကဵုလ္ပာ်ကံၚ်ဇြဳပၞာန်တံ ကလေၚ်ဗလးကဵုတံဂှ် ကောန်ထံၚ်ပရေၚ်ဍုၚ်ကွာန် ဟွံပါလုပ်ပုဟ်ဟီုဂှ် ဒစးဒုၚ်တော်လဝ်တုဲတုဲ ကောန်ထံၚ်ပရေၚ်ဍုၚ်ကွာန် ဗွဲမဂၠိုၚ်ဂှ်လေဝ် လ္တူနူကဵုအခေါၚ်ဗလးနူဒုဟ်ဒဏ်ဂှ် အပြံၚ်အလှာဲပရေၚ်ဍုၚ်ကွာန်ဟေၚ် စၟဳစလဝ်ရောၚ်ဂှ် သ္ဂးရ။
“ကောန်ထံၚ်ပရေၚ်ဍုၚ်ကွာန် မွဲတၠမှ ဟွံပါပုဟ်။ ပ္ဍဲမတ်မလီုဂှ် ကောန်ထံၚ်ပရေၚ်ဍုၚ်ကွာန်ဟွံမွဲပုဟ်။ ကောန်
ထံၚ်ပရေၚ်ဍုၚ်ကွာန်ဂှ် နွံဒၟံၚ်ပ္ဍဲကျာ်မြဟ်။ ဗၠးကၠုၚ်ဂှ် (၂၁) တၠ။ ကောန်ထံၚ်ပရေၚ်ဍုၚ်ကွာန် ဟွံပါပုဟ်ဟီုဂှ် ပိုယ်တံ တော်လဝ်နူကၠာတေံတုဲတုဲရ။ မုဒှ်ရောဟီုတှ်ေ ဍေံဂှ် ဒှ်မံၚ်ညံၚ်စိုတ်ကောန်ၚာ်တုဲ ကောန်ထံၚ်ပရေၚ်ဍုၚ်ကွာန်တံဏံဂှ် ဍေံထပ်တုဲပျဲပျာံပၠန်ဏောၚ်။ ညံၚ်မၞိဟ်တံ ယာက္ဍိုပ်ဂွိုအ်မာန် ဇၟာပ်မၞိဟ်မဒစဵုဒစး ကုဍေံ ညံၚ်စိုတ်ဖေက်ဂွံလုပ်အာဂှ် ဍေံကၠောန်တွဵုဏောၚ်။ ကောန်ထံၚ်ပရေၚ်ဍုၚ်ကွာန်ဗွဲမဂၠိုၚ်ဂှ် အခေါၚ်ဗၠးနူဒုဟ်ဒဏ်ဂှ် ဟွံစၟဳပုဟ်။ သီုဖအိုတ်ဂှ် အပြံၚ်အလှာဲရ စၟဳဒၟံၚ်အိုတ်။ မုဒှ်ရောဟီုတှ်ေ ဗလးကဵုဏံဂှ် ဒှ်အရာဍာံဍာံပြပြဟွံသေၚ်ပုဟ်။ ကဵုဒၟံၚ် နကဵုစၟတ် ဍေံတံမိက်ဂွံဒှ် ဍေံတံမိက်ဂွံဂွံတံဂှ်ရဏောၚ်။ ဒှ်အပြံၚ်အလှာဲမှဟေၚ် ကောန်ထံၚ်ပရေၚ်ဍုၚ်ကွာန်သီုဖအိုတ် ဗၠးဏောၚ်။ ကောန်ထံၚ်ပရေၚ်ဍုၚ်ကွာန်တံဂှ်လေဝ် မၞိဟ်မၞုံကဵုတၚ်ဒုၚ်ဂိုၚ်ကေတ် သ္ကာတ်တ်မြဟ်ဟ်တံဂှ် ဟွံစၟဳစလဝ် အခေါၚ်ဗၠးနူဒုဟ်ဒဏ်ဂှ်ပုဟ်၊ စၟဳစလဝ်ဂှ်တှ်ေ ဒှ်အပြံၚ်အလှာဲမွဲတုဲ ပြံၚ်လှာဲကၠေံ ဗီုပြၚ်မြက်က်ဇက်က်တုဲ အခါဂှ်မှ ကောန်ထံၚ်ပရေၚ်ဍုၚ်ကွာန်သီုဖအိုတ် ဗၠးဏောၚ် တၚ်ဒုၚ်ဂိုၚ်ကေတ်ဏံရ နွံ” သာ်ဝွံ သ္ဂးရ။
ကံၚ်ဇြဳပၞာန်ဝွံ နဒဒှ်စၟတ်သမ္တီကၠောံသၞာံတၟိဂှ် ကောန်ထံၚ် မ္ဒးဒုၚ်ဒၟံၚ်ဒုဟ်ဒဏ် ပ္ဍဲကဵုထံၚ်စာတ်နာနာ မၞုံအပ္ဍဲကၟိန်ဍုၚ် (၃၀၁၅) တၠဂှ် လ္ဂောံကဵုၝောံပိုဒ် ၄၀၁၊ ၝောံပိုဒ်ပါ် (၁) သၞောဝ်ရာဇဝတ်မ္ဂး ယဝ်ရထပ်ကလိလောန် ဒုဟ်ဒဏ်မွဲဝါပၠန်မ္ဂး မ္ၚးနူဒုဟ်ဒဏ်ဏံဂှ် သီုကဵုဒုဟ်ဒဏ်သွက်ဂွံဒးဒုၚ်နွံတံဂှ် ဆက်တုဲဒးဒုၚ်အာရောၚ် ကလေၚ်ဗလးကဵုလဝ် နကဵုစေဝ်ပၞောန်ဏံရ။
သ္အာၚ်နူဂှ်ပၠန် ကောန်ထံၚ် ကောန်ဍုၚ်သ္အာၚ် မဒးဒုၚ်ဒၟံၚ်ဒုဟ်ဒဏ် ပ္ဍဲကဵုထံၚ်စာတ်နာနာ (၉၈) တၠတံဂှ်လေဝ် ဍုၚ်မွဲကုမွဲ ညံၚ်ဝတ်မိတ်ဟွံဂွံလီုဂှ်ကီု နကဵုပရေၚ်ဗ္စာရဏာမၞိဟ် ကလေၚ်ဗလးကဵုတုဲ ကဵုလဝ်ဒဏ်ဗက်ဗဒဴနူဍုၚ်ရောၚ်ဂှ် လလောၚ်ပ္တိတ်လဝ်ရ။
ပ္ဍဲတွဵုရးဍုၚ်မန်ဂှ် ကောန်ထံၚ်ပရေၚ်ဍုၚ်ကွာန်တံဂှ် စွံလဝ် ပ္ဍဲကဵုထံၚ်စာတ်ကျာ်မြဟ်တုဲ ကောန်ထံၚ်ပရေၚ်ဍုၚ်ကွာန်တြုံ (၂၁၀) ပြၚ်၊ ကောန်ထံၚ်ဗြဴ (၉၀) ပြၚ် မ္ဒးဒုၚ်ရပ်ဒက်ဖျေံလဝ်ထံၚ် နကဵုၝောံပိုဒ်ပရေၚ်ဍုၚ်ကွာန် နူကဵုဒေသနာနာ သီုကဵုပါလုပ်လ္ဂုၚ်၊ မာန္တလေဝ်၊ ဗဂေါ၊ တွဵုရးကရေၚ်၊ တွဵုရးဍုၚ်မန်တံ နွံဒၟံၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−MOI