ဗြဝတဳ၊ ဨပရဴ (၁၉)
အပ္ဍဲပေါဲဗ္တိုက်ၜါလ္ပာ် မက္တဵုဒှ်ဒၟံၚ် ပ္ဍဲပွဳပွူ ဗ္ဒါဲဒေသမေဝ်ကနေဝ် ပွိုၚ်ဍုၚ်ဗြဝတဳ တိဍာ်ဒပ်မဟာ (၆) ဗော်သွးကောန်ဂကူကရေၚ် KNU ဂှ် ဒပ်ကံၚ်ဇြဳပၞာန် ပန်ပှော်ဒၟံၚ် ကမ်လှောဝ်တံရောၚ် ဂွံတီကေတ် နူကဵုတမ်ရိုဟ်ပရိုၚ်ပရေၚ်ပၞာန် ဗလးတိတံရ။
ပပ္တံနူဂိတုဨပရဴ (၁၈) အခိၚ်နူဂယး (၆) နာဍဳကဝါ်ဂှ်တုဲ ဟိုတ်နူဒပ်ကံၚ်ဇြဳပၞာန် လုပ်စိုပ်ထ္ပက်ကၠုၚ်ကရောၚ်ပၞာန် အပ္ဍဲကွာန်မေဝ်ကနေဝ် ပွိုၚ်ဍုၚ်ဗြဝတဳတံဂှ်ရ က္တဵုဒှ်ဒၟံၚ် ပရေၚ်ပန်ပှော်ဆေၚ်မုက် ကုကရောၚ်ပၞာန်ကဝ်ဗရာ (၂) ကရောၚ်ပၞာန် Venom PDF တံရ။
ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန်ဂှ်ဝွံ ပပၞပ္တောံကျိုၚ်လဝ်ကယျိုၚ်ကေအာန်ယူတုဲ ထ္ပက်တိုန်ကၠုၚ်ဂှ်ရ အပ္ဍဲပေါဲဗ္တိုက်ဇီုကပိုက်ဆေၚ်မုက်ဂှ် လ္ပာ်ဒပ်ကံၚ်ဇြဳပၞာန် (၂) တၠ ချိုတ်တုဲ လ္ပာ်ဂကောံဒပ်ပံၚ်ကောံတံ သီုကဵုသီဂိုၚ်ဂွံလဝ် လွဟ်လက်နက် (၂) ဇကိုအ်ရောၚ် ထ္မံက်ထ္ၜးပါလုပ် ပ္ဍဲတၚ်လလောၚ်ပရိုၚ် ကရောၚ်ပၞာန် Venom PDF ရ။
အပ္ဍဲလၟေၚ်ဒဒှ်ပေါဲဗ္တိုက်ဂှ် လ္ပာ်ဒပ်ကံၚ်ဇြဳပၞာန် ကၠောန်ၜိုတ်ပန်ပှော်ဒၟံၚ် အပ္ဍဲကွာန်မေဝ်ကနေဝ်အပ္ဍဲ နကဵုကမ်လှောဝ်တံရောၚ်ဂှ် ပရိုၚ်တမ်ရိုဟ်ဗလးတိဂမၠိုၚ် သ္ဂးလဝ်ရ။
ပ္ဍဲကွာန်မေဝ်ကနေတ် တိဍာ်ဒပ်မဟာ (၆) KNU ဂှ် တုဲကၠုၚ်ဂိတုမာတ်ချ်ကြပ်အိုတ်တေံတုဲ အကြာဒပ် BGF ကံၚ်ဇြဳပၞာန်တံကဵု ကရောၚ်ပၞာန်ပံၚ်တောဲ ဂကောံဇြဟတ်ပၠန်ဂတးတံဂှ် ပေါဲဗ္တိုက်ဆေၚ်မုက်တအ် သ္ကာတ်မြဟ်လဝ်တုဲ လ္ပာ်ဒပ်ကံၚ်ဇြဳပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ်သၟးဟွံက သုၚ်စောဲလွဟ်ဇၞော်၊ သုၚ်စောဲတရဴကျာတံတုဲ ထ္ပက်ပၞာန်ဗ္တိုက်ဒၟံၚ် လ္ပာ်ကွာန်မေဝ်ကနေဝ် ဒဵုကဵုအခိၚ်လၟုဟ်ရ။
အပ္ဍဲပေါဲဗ္တိုက်ဂှ် ဟိုတ်နူပရေၚ်ဗ္တိုက်တရဴကျာ ကေုာံ လွဟ်ဇၞော် ဒပ်ကံၚ်ဇြဳပၞာန်တုဲ ဘာကျာ်ခရေတ်ယာန်မွဲမပါလုပ်ကီု သီုကဵုသ္ၚိမၞိဟ်ဒၟံၚ် ဗွဲမဂၠိုၚ်ဂၠေၚ် ပၟတ်တူလီုလာ်အာလဝ်တုဲ လၟိဟ်မၞိဟ်ဂၠိုၚ်ကဵုလ္ၚီဝွံ ဒဵုကဵုအခိၚ်လၟုဟ် ဒးဂြိပ်ဒဴပါဲဒလေတ်လဝ် ဒၞါဲဗၠးဘဲတံရောၚ်ဂှ် ဂွံတီကေတ် နူကဵု ဂကောံဗော်သွးကောန်ဂကူကရေၚ်တံ မဟီုဂးလဝ်ဂှ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CINCDS