ဍုၚ်ကွာန်ဟွံညိၚ်ဝတ်ကီုလေဝ် ပရေၚ်ပိုန်ဒြပ်တောတက်ကၠုၚ်ရောၚ် က္ဍိုပ်သ္ကိုပ်ပၞာန် ထပ်ဟီုပၠန်

နေဗျဳဒဝ်၊ ဨပရဴ (၁၉)

ဒၟါနူပရေၚ်ဒပ်ပၞာန်သီအဝဵုတုဲ ဍုၚ်ကွာန်ဟွံညိၚ်ဝတ် နွံဒၟံၚ်ကီုလေဝ် က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ်ဂှ် ပရေၚ်ပိုန်ဒြပ်ကၟိန်ဍုၚ်ဗၟာဝွံ လ္တူနူကဵုသၞာံတုဲတေံဂှ် ပရေၚ်ပိုန်ဒြပ်တောတက် ဇြဟတ်ခိုဟ်ကၠုၚ်ရောၚ် ဟီုဂးကၠုၚ်ရ။

ပရေၚ်ပိုန်ဒြပ်ဍုၚ်ဗၟာဝွံ အပ္ဍဲသၞာံ ၂၀၂၀ ဂှ် အကြေပ်အဂြတ်တံ နွံဒၟံၚ်ကီုလေဝ် ပ္ဍဲသၞာံ ၂၀၂၂ ဂှ် ပရေၚ်ကၠောန်ပ္တိတ်ဗၞိက် အပ္ဍဲဍုၚ် ခိုဟ်ကၠုၚ်တုဲ ပံက်ကၠုၚ်ပရေၚ်သွံရာန်ဗၞိက်ပယျဵုတံ စဵုကဵုဗၞတ်ဗ္ၜတ်မွဲမွဲမာန်လဝ်ရောၚ်ဂှ် ဟီုဂးလဝ် ပ္ဍဲကဵုဂလာန်သၞာံတၟိညးရ။

ဟိုတ်ဂှ်ရ ပရေၚ်ိပုန်ဒြပ်ကၟိန်ဍုၚ်ဗၟာဝွံ ပ္ဍဲသၞာံ ၂၀၂၃ ဂှ် တောတက်ကၠုၚ် စဵုကဵုဗ္ဒါဲ ၃ တၟံကၠံမာန်တုဲ ပရေၚ်တောတက် ဇြဟတ်ခိုဟ်ကၠုၚ်ရောၚ်ဂှ် က္ဍိုပ်သ္ကိုပ်ပၞာန် သ္ဂးရ။

တၠပညာပရေၚ်ပိုန်ဒြပ်မွဲတၠဂှ် ဟိုတ်နူပရေၚ်ဟွံညိၚ်ဝတ် မက္တဵုဒှ်ဒၟံၚ်လၟုဟ်ဂှ်တုဲ ပရေၚ်ပိုန်ဒြပ်ကၟိန်ဍုၚ် ဂွံတောတက်ကၠုၚ် ဟွံမွဲဏီတုဲ သွက်ဂွံကလေၚ်စိုပ်ဗီုကၠာတေံဂှ် နွံပၟိက်ဒၟံၚ် အခိၚ်တၟာဂလိုၚ်ဏီရောၚ် ဟီုရ။

“ ဂွံကလေၚ်စိုပ် အကာဲအရာဒပ်ပၞာန်ဂွိုအ်သီအဝဵု သၞာံ ၂၀၂၁ တေံပၠန်ဂှ် နွံပၟိက်တၟာဂလိုၚ်ဏောၚ်။ မူဟိုတ်ရောတှ်ေ ဍုၚ်သ္အာၚ်တံ ချိၚ်ခယျစဒၟံၚ်ဂှ် သၞာံ (၂၀၂၁) ဂှ် ထ္ပက်စှ်ေအာ (၁၈) တၟံကၠံ၊ ဒးဟီုမ္ဂး ထ္ပက်စှ်ေအာ သၟဝ်ဇြဟ် (၁၈) ပေဂှ်ရ။ နူကဵုဂှ် ပ္ဍဲသၞာံ ၂၀၂၂ ကလေၚ်တိုန်ကၠုၚ် ၜိုတ် (၂) ပေဘာ်။ လၟုဟ် ၂၀၂၃ ဏံ ကလေၚ်တိုန်ကၠုၚ် ၜိုတ် (၃) ပေ။ ကလေၚ်တိုန်ကၠုၚ် အပံၚ်ဖအိုတ်ဂှ် (၅) ပေပြၚ် ၜိုတ် (၆) ပေရနွံ။ စှ်ေအာ (၁၈) ပေ ဂှ်ရ ကလေၚ်တိုန် (၆) ပေဟီုတှ်ေ သွက်ဂွံကလေၚ်စိုပ် အကာဲအရာဏံပၠန် နွံဒၟံၚ်ပၟိက် ၜိုတ် (၁၂) ပေဏီ။ ဟီုမ္ဂး တိုန်ၜိုတ် (၁၂) တၟံကၠံမှ စိုပ်ၜိုတ်ကဆံၚ် (၂၀၁၉) (၂၀၂၀) ညိကီု။ အဓိကဂှ်တှ်ေ (၂၀၂၁) ရ။ ပ္ဍဲမွဲဒမြိပ်ဝၚ်ဍုၚ်ဗၟာဏံ ပရေံအိုတ်လေဝ် ဟီုဂွံ။ သၞာံ ၂၀၂၁ ဂှ် ဒှ်အာသၞာံကတက်အာ လက်ဗၠိုက်၊ ဒးတော်ကဵုသၞာံဂှ်မ္ဂး ဗီုလဵုဟီုဟီု ဒးတိုန်တွဵုရ၊ ဆ္ဂး အာပ္တောံၜတ်ကဵု သၞာံတုဲတုဲ မခိုဟ်ကၠုၚ်လဝ်တံ ဟွံဂွံပုဟ်” သာ်ဝွံ သ္ဂးရ။

က္ဍိုပ်သ္ကိုပ်ပၞာန်ဂှ် ပ္ဍဲဒၞါဲသၠုၚ်ပ္တိုန်ပရေၚ်ပိုန်ဒြပ်ဂှ် နွံပၟိက်ဒးရေၚ်တၠုၚ် ကမၠောန်ပရေၚ်ပိုန်ဒြပ်မခိုၚ်ဗိုန်တံဂှ်တုဲ ပွမကဵုဇြဟတ် ကုကမၠောန်ကၠောန်ပ္တိတ်ဗၞိက်အပ္ဍဲဍုၚ်ဂှ်ဝွံ ဒှ်အရာကဵုဇြဟတ် ပရေၚ်သၠုၚ်ပ္တိုန် ပရေၚ်ပိုန်ဒြပ်ကၟိန်ဍုၚ်တံဂှ်ရ ကဵုဒၟံၚ်ဇြဟတ်ရေၚ်တၠုၚ်ဒၟံၚ် ကမၠောန် MSME တံရောၚ်ဂှ် ဟီုဂးကၠုၚ်ရ။

တၠကမၠောန် MSME မွဲတၠဂှ်လေဝ် ကံၚ်ဇြဳပၞာန် ၜိုန်ရဟီုဂးဒၟံၚ် ကဵုဒၟံၚ်ဇြဟတ်ရေၚ်တၠုၚ်ဒၟံၚ် ကမၠောန် MSME တံကီုလေဝ် နတဲဏံ ပ္ဍဲကဵုဒၞါဲဂၠေံသၠုဲ သွက်ကမၠောန်တံရဂှ် အခက်အခုဲနွံဒၟံၚ်တုဲ စေဝ်ပၞောန်လေဝ် ဂၠိုၚ်တဴဂှ်ရ သြန်ဓလေံလေဝ် ဟွံဂွံအိုတ်ပုဟ်ဂှ် ဟီုရ။

“ညးဂှ် အစဳဇန်ပိုယ်ကဵုဟီုဂှ် ညံၚ်ဂွံဂွံဂှ် ဟွံကဵုပုဟ်။ စေဝ်ပၞောန်ဂှ် ဂၠိုၚ်ကွေံကွေံ။ ဥပမာ ဂရာမ်ဒဳဍေံတံမိက်ဂွံဂွံ၊ တၚ်နၚ်ဍေံတံမိက်ဂွံဂွံတံဂှ် SME ပိုယ်တံဗွဲမဂၠိုၚ်ဂၠေၚ်ဂှ် ဟွံစုၚ်ပုဟ်။ သြန်ဓလေံလ္ၚဵုတံဂှ် ဍေံတံကဵုဒက် နကဵုဂကောံ၊ ဥပမာ အောန်အိုတ် မၞိဟ် (၃) တၠ။ ၜိုတ် (၃) တၠ ဒက်ဂကောံတုဲ ကေတ်ဂွံ။ သွက်ဂွံပကောံပိတၠဂှ်လေဝ် အကာဲအရာတၠကမၠောန်တံဂှ် ဟွံလောဲသွာပုဟ်။ ပံၚ်တောဲမၞိဟ်ပိတုဲ ကဵုဒုၚ်လျိုၚ် ကုသြန်ဓလေံဏံဂှ်မ္ဂး သွက်ဇကုဂှ် ဗီုလဵုဒှ်ဒှ် ခိုဟ်ကီု ပရေံကီု ကေတ်တာလျိုၚ်ဂွံရ။ ဒးကေတ်ကဵုတာလျိုၚ် သီုကမၠောန်ညးတၞဟ်မ္ဂး ဟွံမိက်ကေတ်ရပုဟ်။ သြန်ဓလေံဂှ် ကဵု၊ ဆ္ဂး စေဝ်ပၞောန်သၞောတ်ဗ္ၜတ်တံဂှ် ဂၠိုၚ်ဒၟံၚ်ဟီုတှ်ေ တၠကမၠောန်တံဂှ် ဂွံဟွံမာန်ပုဟ်၊ ၜိုတ်အဲတီဂှ်တှ်ေ မၞိဟ်ဂွံဂှ် ဟွံဆဵုပုဟ်” သာ်ဝွံ သ္ဂးရ။

မွဲလ္ပာ်ပၠန်ဂှ် ကမၠောန်အဇာဍောတ်၊ အဇာဒေါဝ် MSME တံဝွံ ပၟတ်ဟွံမှာန်ကီု၊ ကပေါတ်ဗၞိက်အပြောံ ၚုဟ်မးသၠုၚ်ဒၟံၚ်ကီု၊ ၚုဟ်ကၠေၚ်စက် ကေုာံ ခရိတ်အိုတ်နာနာ ၚုဟ်တိုန်ဒၟံၚ် ဂၠိုၚ်ကဵုဆဂှ်ရ ကမၠောန်ဂမၠိုၚ် သွက်ဂွံဆက်ဂေတ်ဂြိပ်ဂှ် ဒးဂဗဒၟံၚ်အခက်ရ။

ပရေၚ်ပိုန်ဒြပ်ကၟိန်ဍုၚ်ဗၟာဝွံ အပ္ဍဲဒပ်ပၞာန်သီအဝဵု ပွိုၚ် (၂) သၞာံဂှ် ဟိုတ်နူပဋိပက္ခဂမၠိုၚ်တုဲ စှ်ေဒၟံၚ်ပရေံပရေံတုဲ ၚုဟ်မးကၠောန်ပ္တိတ်အပ္ဍဲဍုၚ် GDP ဂှ်လေဝ် ဒဵုကဵုဂိတုဒဳဇြေမ်ဗာဂှ် ၜိုတ် (၃) တၟံကၠံရ နွံကၠုၚ်မာန်ရောၚ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် တိုက်သြန်ဂၠးတိ ဂိတုမာတ်ချ် (၃၁) တေံရ။

ဟိုတ်နူပရေၚ်ဒပ်ပၞာန်သီအဝဵုတုဲ ပွပကီုပရာပ် မက္တဵုဒှ်ဒၟံၚ်ဂမၠိုၚ်၊ ပၟတ်ဓာတ်လလဳ ပၠိုတ်ဒၟံၚ်ပရေံပရေံတံကီု ကေုာံ တၚ်ဍိုန်လျ စပ်ကဵုမူဝါဒတံဂှ်ဝွံ သ္ကဵုက္တဵုဒှ် အကြေပ်အဂြတ် သွက်ပရေၚ်ဍုၚ်ကွာန် ကေုာံ သွက်ပရေၚ်မၞိဟ်တုဲ သ္ကဵုပရေၚ်ပိုန်ဒြပ် ဆက်တုဲပရေံတဴရောၚ်တုဲ ဟိုတ်နူကဵုတၚ်သၞောတ်ဗ္ၜတ်စေဝ်ပၞောန် ဟွံညိၚ်ဝတ်လောန်တံဂှ်ရ ဆၜိုတ်ရုပ်ဓဝ်ဟေၚ် သ္ဇက်ဂွံတောတက်ကၠုၚ် ဟွံမွဲပုဟ်ဂှ် တိုက်သြန်ဂၠးတိ သ္ဂးလဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−MOI