လဂုၚ်၊ ဨဗြဴ (၁၉)
ပ္ဍဲကၟိန်ဍုၚ်ဗၟာကြဴနူဒပ်ပၞာန်သီအဝဵုတုဲ စဵုကဵုဂိတုဨဗြဴစၟတ်တ္ၚဲ (၁၆) သၞာံဏံ ညးဗြဴကေုာံကောန်ၚာ်သၟတ် (၁၀၀၀)တၠပြၚ်ဒးချိုတ်လဝ်ရဂှ် အလဵုအသဳပရေၚ်ညဳသၟဟ်ကောန်ဂကူ (NUG) ဌာနဝန်ဇၞော်ပရေၚ်ညးဗြဴကေုာံကောန်ၚာ်လလောၚ်တြးလဝ်ရ။
ပ္ဍဲကာလသီအဝဵုပွိုၚ်(၂)သၞာံဂှ် ဟိုတ်နူကံၚ်ဇြဳပၞာန်ပ္ကီုပရာပ်တုဲ ညးဗြဴ ၆၃၇ တၠ ကေုာံကောန်ၚာ်သၟတ် ၃၉၆ တၠ ပံၚ်လၟိဟ် ၁၀၃၃ တၠဒးချိုတ်အာလဝ်ရဂှ် ဓမံက်ထ္ၜးလဝ်ပ္ဍဲတၚ်လလောၚ်တြးဂှ်ရ။
မ္ၚးနူဏံပၠန် ညးဗြဴ(၃၃၀၀)ပြၚ်ကေုာံ ကောန်ၚာ်သၟတ် (၃၅၅)တၠတအ်ဂှ် ဆက်ဒးဒုၚ်ရပ်လဝ်ပ္ဍဲထံၚ်စာတ်၊ အချုက်ထံၚ်တအ်တရဂှ် ဟီုသ္ဂးလဝ်ရ။
သ္ကုတ်လကြဴနူသီအဝဵုတုဲဂှ် ဟိုတ်နူကံၚ်ဇြဳပၞာန်ပ္ကီုပရာပ်တုဲ ပ္ဍဲကဵုညးဒးဒုၚ်ချိုတ်လတ်ဂမၠိုၚ်တအ်ဂျ် ညးဗြဴကေုာံကောန်ၚာ်သၟတ်ပါလုပ်ဒၟံၚ် ၃၂ တၟံကၠံတုဲ ပ္ဍဲညးဒးဒုၚ်ရပ်ထိၚ်ဒက်လဝ်တအ်ဂှ်မ္ဂး ပါလုပ်ဒၟံၚ် (၁၇) တၟံကၠံရ။
ပ္ဍဲတုဲကၠုၚ်မွဲၜါတ္ၚဲဏံ ပ္ဍဲပရေၚ်ကံၚ်ဇြဳပၞာန်ဗတိုက်ပန်ပှော်လဝ်ပဇြဳဂျဳကဵုက္ၜၚ်ကျာဂှ် ကောန်ၚာ်သၟတ်စဵုကဵုဗ္ဒာဲ ၄၀ တၠ ဒးချိုတ်လဝ် ဗွဝ်ကဵုဗွဝ်တုဲ ပရေၚ်ပရောဏံဂှ် ပ္ဍဲကာလဒပ်ပၞာန်သီအဝဵု ပွိုၚ် (၂)သၞာံဏံ ဒှ်ပရေၚ်ပရောကောန်ၚာ်သၟတ်ဒးချိုတ်လဝ်ဂၠိုၚ်အိုတ်ရ။
ညးဗြဴကေုာံကောန်ၚာ်သၟတ်ဂမၠိုၚ်တအ်ဂှ် ဟိုတ်နူဒပ်ကံၚ်ဇြဳပၞာန်ပန်ဖျေံလွဟ်ဇၞော်ပ္ဍဲကွာန်တအ်ကီု၊ ဟိုတ်နူဗတိုက်ကဵုက္ၜၚ်ကျာကီု၊ ဟိုတ်နူပန်ပှော်ဒၟံၚ်ကြာန်န်သီုဟိုတ်ဟၟဲမွဲသာ်ကီု သီုကဵုဒးဒုၚ်ရပ်ဒက်ပျဲပျာံဒၟံၚ်တုဲ ဒးချိုတ်ကၠုၚ်ဒၟံၚ်လေဝ် နွံကၠုၚ်ဒၟံၚ်ရ။
အတိုၚ်ဂကောံ မၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် AAPP ဟီုသ္ဂးလဝ်မ္ဂး ပ္ဍဲကာလဒပ်ပၞာန်သီအဝဵုဏံ ပရေၚ်ညးဍုၚ်ကွာန်ဒုဟ်ဒဏ်ဟၟဲဒးချိုတ်လဝ် စဵုကဵု ၃၂၄၀ တၠ နွံကၠုၚ်ဒၟံၚ်ရဂှ် လလောၚ်တြးလဝ်ပ္ဍဲဂိတုဨဗြဴ စၟတ်တ္ၚဲ (၁၂)ဏံရ၊
ပရိုၚ်-သြၚ်လောန်တိုၚ်(မ်)
ဗီုရုပ် – NUG