ပဠဝ်၊ ဨပရဴ (၂၂)
ပ္ဍဲရးဒေသဇၞော်တၞၚ်သဳ၊ ဍုၚ်ပဠဝ်၊ အရာပ် (၂) ပ္ဍဲဂိတုဨပရဴ (၂၁) ဇိုၚ်သဝ်တ္ၚဲဂှ် ဟိုတ်နူပၟတ်တူက္တဵုဒှ်အာလဝ်ဂှ်ရ သ္ၚိဒၟံၚ် (၂၀) မပြၚ် ပၟတ်တူလီုလာ်အာလဝ်တုဲ မၞိဟ်တြုံမွဲတၠ ကလိဂွံလဝ်ဝပ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပရေၚ်ပၟတ်တူဏံဂှ်ဝွံ ပ္ဍဲကဵုတ္ၚဲဏံ ဇိုၚ်သဝ်တ္ၚဲ (၃) နာဍဳဂှ် စတူလဝ် နူကဵုဖဴ ဍုတ်သ္ၚိဒဝ်ချဵုချဵုထိုဲ ဒၟံၚ်အရာပ်စၟတ် (၁) ဍုၚ်ပဠဝ်ရ။
ဟိုတ်နူပရေၚ်ပၟတ်တူတုဲ သ္ၚိဒၟံၚ် (၂၀) မပြၚ် တူလီုလာ်အာတုဲ သ္ၚိဌာန်မလီုလာ်အာတံဝွံ ဒှ်သ္ၚိဆု၊ သ္ၚိကၞိတံရောၚ်ဂှ် ဂွံတီကေတ်ရ။
မၞိဟ်တြုံ မဘိုၚ်သိုဟ်ပၠိုတ်ဒၟံၚ်ပၟတ်မွဲတၠ ပ္ဍဲအခိၚ်ပၟတ်တူဂှ် ဒၟါနူဒးအာကဝေက်ပၟတ် ကလိဂွံလဝ်ဝပ်ဂှ်ရ ပလံၚ်ဗစိုပ်လဝ် ရုၚ်ဂဥုဲထဝါဲရောၚ်ဂှ် သ္ဂးရ။
ညးဍုၚ်ကွာန်ဒးဘဲပၟတ် (၇၀) ပြၚ်ဂှ်လေဝ် ဆုဲပြံၚ်ကဵုလဝ် ပ္ဍဲသ္ၚိဒၟံၚ် မသကလောကောဒေံစုက်လုက်တံကဵု ဘာလကျာ်တံ ယာယဳရောၚ်ဂှ် ဂွံတီကေတ်ရ။
ဒဒှ်မပၟတ်တူဂှ် ဂကောံဒပ်သိုဟ်ပၠိုတ်ပၟတ် ပွိုၚ်ဍုၚ်ပဠဝ်၊ ဂကောံသိုဟ်ပၠိုတ်ပၟတ်အရန် ကေုာံ ညးဍုၚ်ကွာန်တံ ဘိုၚ်ရီုဗၚ်ပၠိုတ်ကဵုလဝ်ညးသ္ကအ်အိုတ်ဂှ်ရ ပၟတ်တူတုဲ လအ်ဂွံၜိုတ်မွဲနာဍဳပြၚ် သိုဟ်ပၠိုတ်မာန်လဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ