နေပျဳဒဝ် – ဨဗြဴ(၂၂)
ဗော်ကျာန်ခိုၚ်ယျေ (USDP) ဒပ်ပၞာန်နွံတန်တဴဒၟံၚ်လ္ပာ်လကြဴဂှ် ဒဒှ်ရကဵုကၠုၚ်အခေါၚ်စၟတ်သမ္တီ နဒဒှ်ဗော်ပရေၚ်ဍုၚ်ကွာန်ရဂှ် ကဝ်မယှေန်ပေါဲရုဲမာဲကၟိန်ဍုၚ် (UEC) ကံၚ်ဇြဳပၞာန်ခါန်ကၞက် လလောၚ်တြးလဝ် ပ္ဍဲဂိတုဨဗြဴ စၟတ်တ္ၚဲ (၂၀) ဏံရ။
ကြဴနူသီကေတ်အဝဵုတုဲ အတိုၚ်သၞောဝ်ဥပဒေပ္တိုန်စရၚ်စၟတ်သမ္တီဗော်ပရေၚ်ဍုၚ်ကွာန် ကံၚ်ဇြဳပၞာန်ပျးဌာန်လဝ် ၝောံပိုဒ် (၉) သ္ပကဵုလဝ်အခေါၚ်တုဲ စၟတ်သမ္တီဗော်ပျဳထောၚ်သုကျာန်ခိုၚ်ယျေ ဒှ်စၟတ်(၁)ရဂှ် လလောၚ်တြးလဝ်ရ။
ဗော်ပျဳထောၚ်သုကျာခိုၚ်ယျေဂှ် ကြဴနူပျးဌာန်ကၠုၚ်သၞောဝ်ဥပဒေပ္တိုန်စၟတ်သမ္တီဗော်ပရေၚ်ဍုၚ်ကွာန်တုဲ မွဲၜါတ္ၚဲဂှ် ကၠုၚ်စိုပ်ပ္တိုန်လဝ်စရၚ်စၟတ်သမ္တီ အခေါၚ်ဒက်ပ္တန်ဗော် ကေုာံ အခေါၚ်စၟတ်သမ္တီဗော် ဇရေၚ် UEC ကံၚ်ဇြဳပၞာန် ပ္ဍဲဂိတုဖေဖဝ်ဝါရဳ စၟတ်တ္ၚဲ (၁) ဂှ် ကိုပ်ကၠာအိုတ်ရ။
ဗော်ကျာန်ခိုၚ်ယျေ စၟတ်သမ္တီ ဒဒှ်ဗော်စန္ဒက်အလုံကၟိန်ဍုၚ်စှ်ေကၠုၚ်လဝ်ဂှ် ပ္ဍဲကောံဓရီုဗော်မရနုက်ကဵုအလန်တတိယ ကၠောန်ဗဒှ်လဝ် ပ္ဍဲသၞာံတုဲကၠုၚ် ဂိတုအဝ်ဂေတ် ပွိုၚ်ၜါတ္ၚဲဂှ် ကၠောန်သ္ပလဝ် ပရေၚ်ပြံၚ်သၠာဲက္ဍိုပ်သ္ကိုပ်ကဆံၚ်လ္တူရ။
ကြဴနူဒပ်ပၞာန်ထပ်သီအဝဵု သၞာံ ၂၀၂၁ မွဲအလန်ပၠန် နဒဒှ်ဥက္ကဋ္ဌဗော်ဂှ် ဥူခေန်ယျဳ သ္ကိုပ်ဗၠာဲသၟိၚ်တြေံ ညးကေၚ်ယိုက်ဂၠေၚ်လဝ်တာလျိုၚ် နဒဒှ်ဝန်ဇၞော်ကောပ်ကာဲပရေၚ်မၞိဟ်လုပ်တိတ် ကံၚ်ဇြဳပၞာန် ကေုာံ နဒဒှ်ဒုဥက္ကဋ္ဌ (၁)ဂှ် သၞာဲဒဴဒပ်ပၞာန်တြေံ ဥူမျိုဝ်ဇြဝ်တုၚ် ကေတ်လဝ်တာလျိုၚ်ရ။
သွက်ပေါဲရုဲမာဲသၞောတ်ဒဳမဝ်ကရေဇြဳဗော်စုၚ် ကၠောန်ဗဒှ်ကဵုဏောၚ်ဟီုလဝ်ဂှ် ကြဴနူဂိတုဂျာန္နဝါရဳတုဲကၠုၚ်ဂှ် ကံၚ်ဇြဳပၞာန် ပျးဌာန်လဝ်သၞောဝ်ဥပဒေပ္တိုန်စၟတ်သမ္တီဗော်တၟိတုဲ ပ္ဍဲပွိုၚ် (၆၀)တ္ၚဲ သွက်ဂွံပ္တိုန်စၟတ်သမ္တီ ဇရေၚ်UEC လလောၚ်တြးလဝ်ရ။
ပ္ဍဲတ္ၚဲစၟတ်သမ္တီလဝ် ပွိုၚ်(၆၀) တ္ၚဲဂှ် ဗော်ပရေၚ်ဍုၚ်ကွာန်ပ္တိုန်လဝ်စရၚ်အခေါၚ်ဒက်ပ္တန်ဗော် ကေုာံ အခေါၚ်စၟတ်သမ္တီဗော် စဵုကဵု (၆၃)ဗော်နွံဒၟံၚ်တုဲ ဗော်ပရေၚ်ဍုၚ်ကွာန်မၞုံပြာကတ်ဒၟံၚ် (၄၀)ဗော်တအ်ဂှ် ဒးလီုလာ်အာ နူဒဒှ်ဗော်အလဵုလဵုရဂှ် လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – USDP