မတ်မလီု၊ ဨပရဴ (၂၂)
ပ္ဍဲတွဵုရးဍုၚ်မန် ၚုဟ်သ္ၚုမက္ဍၚ်ကၠုၚ်လဝ် နူကၠာအတးဂွိုအ်စှ်ေတေံဂှ်ဝွံ အခိၚ်အတးလောန်ၜက်တုဲ ဟိုတ်နူဇြဟတ်ရာန်ဂၠိုၚ်ကၠုၚ်ဂှ်ရ ၚုဟ်ထပ်သၠုၚ်တိုန်ကၠုၚ်မာန်ရောၚ်ဂှ် သၟာဗၞိက်သ္ၚုတံကဵု တၠကမၠောန်စက်သ္ၚုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်သ္ၚုဝွံ ကၠာအတးဂွိုအ်စှ်ေ အပ္ဍဲဂိတုဨပရဴ သတ္တာဟပထမတေံ သ္ၚုမောဝ် သ္ၚု(ပေါ်ဆန်) မွဲရိုက် နူကဵုနွံကၠုၚ် ပွဳပွူ (၇၂၀၀၀) ဒ္ကေဝ်ဂှ် ကြဴနူအတးတိုန်တုဲ မွဲရိုက် ၚုဟ်သၠုၚ်တိုန်ကၠုၚ် စဵုကဵု (၇၆၀၀၀) ဒ္ကေဝ်ရ။
သ္အာၚ်နူဂှ်ပၠန် သ္ၚု (ပေါ်ကျွဲဆန်) ဂှ်လေဝ် မွဲရိုက် နူကဵုပွဳပွူ (၆၃၀၀၀) ဒ္ကေဝ် စဵုကဵု (၆၈၀၀၀) ဒ္ကေဝ် တန်တဴကဵု ဂကူဍေံတုဲ မွဲရိုက် သၠုၚ်တိုန်ကၠုၚ်လဝ် နူကဵု (၃၀၀၀) ဒ္ကေဝ် စဵုကဵု (၅၀၀၀) ဒ္ကေဝ်ရ။ သ္ၚု(ဧည့်မထ) မလုပ်ဂကောံသ္ၚုကြံၚ်ဂှ်လေဝ် ၚုဟ်သၠုၚ်ဒၟံၚ်ဖိုဟ်ရ။
ၚုဟ်သ္ၚုဂမၠိုၚ်ဝွံ ဟိုတ်နူသ္ၚုသၟေဟ်အောန်စှ်ေကၠုၚ်ကီု သီုကဵုတ္ၚဲကၟာတ်လဝ် အခိၚ်အတး ဂၠိၚ်အာကီုဂှ်တုဲ ပ္ဍဲအခိၚ်ကလေၚ်ပံက်ခံက်ဖျာဂှ် ဇြဟတ်ရာန်ဂၠိုၚ်ဒၟံၚ်ဂှ်ရ ၚုဟ်ဆက်သၠုၚ်တိုန်ကၠုၚ်ရောၚ်ဂှ် သၟာဗၞိက်သ္ၚုမွဲတၠ ဟီုရ။
“အပ္ဍဲကာလအတးဂှ် တ္ၚဲကၟာတ်ကလောန်ဂၠိၚ်သ္ၚောဲတုဲ သ္ၚုယှိုဲဗိုဝ် သ္ၚု(ပေါ်ဆန်း) တံ မုတံဂှ် တိုန်ကၠုၚ်တီတီ ဟီုဂွံရ။ သ္ၚုကြံၚ်ၚ်ဂှ်တှ်ေ ဒဵုကဵုတီတီဂှ် ဟွံတိုန်ပုဟ်၊ တိုန်ဟီုဂှ် ဒၟါနူဇြဟတ်ရာန် ကဵု ဇြဟတ်သွံရဏောၚ်။ ညအ်ဂှ် လ္ဂောံကဵုသဘဴဓဝ် ဇြဟတ်ရာန် ကေုာံ ဇြဟတ်သွံတံဏောၚ်။ ဇြဟတ်ရာန်ကဵု ဇြဟတ်သွံဂှ် ယဝ်ရဇြဟတ်သွံ ဂၠိုၚ်တှ်ေ စှ်ေအာဏောၚ်။ ဇြဟတ်ရာန်ဂၠိုၚ်တှ်ေ တိုန်ဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် သ္ၚုဂမၠိုၚ်ဝွံ အပ္ဍဲအခိၚ်ကာလအတးဏံ ဟိုတ်နူကာမ္ၚဵုသ္ဘၚ်ကဵုဒါန်တံတုဲ ဇြဟတ်ရာန်ဂၠိုၚ်တုဲ ၚုဟ်သၠုၚ်တိုန်လဝ်တုဲ ဒၟါနူဆေၚ်သ္ၚုဗွဲမဂၠိုၚ် ကၟာတ်လဝ်ဂှ်တုဲလေဝ် ဆေၚ်မပံက်လဝ်ဂမၠိုၚ် သွံဒၟံၚ်ၚုဟ်ကြိုက်စိုတ် နကဵုၚုဟ်သၠုၚ်ၚ်တံနွံဂှ် ဂွံတီကေတ်ရ။
တၠကမၠောန်စက်သ္ၚုမွဲတၠဂှ်လေဝ် ၚုဟ်သ္ၚုဝွံ ဒၟါနူသြောံကသီုသၟေဟ် ဟွံမွဲရကီု၊ ၜိုန်ရသြောံက္ညၚ် တိတ်ဒၟံၚ်ကီုလေဝ် ဒၟါနူဆက်နွံဒၟံၚ် အတိုၚ်ၚုဟ်သၠုၚ်ၚ်ဂှ်ရ ၚုဟ်နှေန် မ္ဒးထပ်တိုန်ကၠုၚ်ပၠန်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကဵုသြောံဟွံမွဲဂှ်လေဝ် ဆေၚ်ဒၟံၚ်ဏောၚ်၊ သၟာဗ္ၚလ္ၚဵုတံတှ်ေ သ္ၚိမွဲမွဲဂှ် ၜိုတ်အရၚ်စရ သှ်ေ။ ဒၞါဲဏံ ဟိုတ်နူသြောံအောန်ကၠုၚ်လေဝ် ဒှ်ဏောၚ်။ တုဲတှ်ေ သၟာဗ္ၚတံဂှ်ပၠန်လေဝ် ကုညးမွဲမှ ဟွံမိက်သွံရပုဟ်လေဝ်။ လၟုဟ်တှ်ေ (၂၀) ပြၚ်ဒၟံၚ်ဏောၚ်။ သ္ၚုမောဝ်တံဂှ်တှ်ေ ၜိုတ် (၂၂) ကိုဋ်နွံဏောၚ်။ (၂၂) ကိုဋ်၊ (၂၃) ကိုဋ် အဏံဒးဟီု နကဵုပံၚ်ဏောၚ်။ လျိုၚ်ပံၚ်ဂၠိုၚ်တှ်ေ ၚုဟ်ဂှ် ကလေၚ်ဂၠိုၚ်ကၠုၚ်ဏောၚ်။ သြောံက္ညၚ်ဂှ် တိတ်ဂှ်တိတ်ဒၟံၚ်ရ။ ဆ္ဂး ဍေံလေဝ် ၚုဟ်ခိုဟ်ဒၟံၚ်ဏောၚ်။ သြောံက္ညၚ်ရဂှ် ၜိုတ် (၁၇) ကိုဋ်နွံဏောၚ်။ ဗီုလဵုမှ ဂွံဗုတ်ဂှ် ဟွံပြေပြံၚ်ပုဟ်။ သြောံဂှ်လေဝ် ဍုက်ညိ၊ ဒးစဲညိ ကလောန်တံဏံဂှ် မုမှဟွံကၠောန်ပုဟ်။ ဟွံကၠောန်မ္ဂး ခိုဟ်အိုတ်ဂှ်ရ မုမှဟွံကၠောန်ရပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် သြောံအပ္ဍဲတွဵုရးဂမၠိုၚ်ဝွံ အပ္ဍဲကာလဏံ ဒးရာန်ဝါတ်ဂါတ်ကီု ၚုဟ်သၠုၚ်တိုန်ဒၟံၚ်ကီုတုဲ စက်သ္ၚုလ္ၚဵု ဒးဒေါအ်ဇူလဝ်တုဲ သ္ၚုသှ်ေအောန်စှ်ေကၠုၚ်ဗက် ၚုဟ်ထပ်တိုန်ကၠုၚ်မာန်ရောၚ်ဂှ် တၠကမၠောန်စက်သ္ၚုတံ သ္ၚဳဂၠိပ်လဝ်ရ။
မွဲလ္ပာ်ပၠန်ဂှ် ကြဴနူဒပ်ပၞာန်သီအဝဵုတုဲ ဟိုတ်နူပၟတ်ဓာတ်လလဳ ဟွံမှာန်ကီု၊ ၚုဟ်ကၠေၚ်စက် ဇၞော်သၠုၚ်ဒၟံၚ်ကီု၊ ခရိတ်ပလံၚ်ဗစိုပ်တံ သၠုၚ်တိုန်ဒၟံၚ်သၟးဟွံက ဟိုတ်နူခရိတ်အိုတ်နာနာ ကေုာံ ခရိတ်ကၠောန်ပ္တိတ်တံ ဇၞော်သၠုၚ်ဂှ်တုဲ လ္တူနူထေၚ်လဝ်ဂှ် ၚုဟ်သာတုဲသၠုၚ်တိုန်ကၠုၚ်မာန်ရောၚ် သ္ဂးအိုတ်ရ။
ၚုဟ်သ္ၚုဝွံ ကၠာဒပ်ပၞာန်ဂွိုအ်သီအဝဵု ပ္ဍဲလက်ထက်အလဵုအသဳ NLD တေံ သ္ၚုမောဝ်မွဲရိုက် ပွဳပွူ (၃၀၀၀၀) ဒ္ကေဝ်ဓဝ် နွံလဝ်တုဲ သ္ၚု(ပေါ်ကျွဲ) ဂှ်လေဝ် (၂၉၀၀၀) ဒ္ကေဝ်ဓဝ် နွံလဝ်ရ။ ကြဴနူဒပ်ပၞာန်သီအဝဵုတုဲ ၚုဟ်သ္ၚု သၠုၚ်တိုန်ကၠုၚ် (၂) ဆပြၚ်တုဲ ပ္ဍဲဒေသလ္ၚဵုတံဂှ် ဒးဆေၚ်ဒၟံၚ်မုက် ကုအကာဲအရာ ဗက်ရာန်ဟွံလောဲတံရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ