ထဝါဲ၊ ဨဗြဴ(၂၂)
ရးဒေသဇၞော်တၞၚ်သြဳ၊ ပွိုၚ်ဍုၚ်ထဝါဲ၊ ညးဒေသ နူကွာန်သုက်ချောၚ် ကေုာံ ညောၚ်ချောၚ် ဗ္ဒာဲ (၂၀)တၠတအ် ကရောၚ်ပၞာန်ကံၚ်ဇြဳ ရပ်ကေတ်ဏာလဝ် နဒဒှ်ဒေၚ်ဒုၚ်ဒၞာမၞိဟ်ရဂှ် ညးတာလျိုၚ် PDF ဂြိုပ်ဗၟံက်ထဝါဲဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကရောၚ်ပၞာန်ကံၚ်ဇြဳ ဇြဟတ်မၞုံ(၂၀၀)တၠပြၚ် နူလ္ပာ်ထဝါဲ ထ္ပက်ကၠုၚ်လ္ပာ်ဍုၚ်မေတ္တာ သွက်ပြံၚ်ဒပ် ပ္ဍဲဂိတုဨဗြဴ စၟတ်တ္ၚဲ (၂၀) ဂှ် ရပ်ကေတ်လဝ်ဏာလဝ် ညးဒေသကောန်ကွာန် ပ္ဍဲမွဲဒမြိပ်ကွာန်ဍေံတအ်ဇက်ကၠုၚ်ဒၟံၚ် ဗ္ဒာဲ (၂၀) တၠ နဒဒှ်ဒေၚ်ဒုၚ်ဒၞာမၞိဟ်ရ။
ညးဒေသဒပ်ကံၚ်ဇြဳပၞာန် ရပ်ကေတ်ဏာလဝ်တအ်ဂှ် ဒှ်ကောန်ကွာန်သုက်ချောၚ် ကေုာံ ညောၚ်ချောၚ်ရဂှ် ဂွံတီကေတ်ရ။
သွက်ဂွံကြတ်ဗတိုက်ကရောၚ်ပၞာန်ကံၚ်ဇြဳ ကၠုၚ်သၠာဲပြံၚ်ဒပ်ဂှ် ၜိုန်ရစဳဇန်လဝ်ကီုလေဝ် ဟိုတ်နူရပ်နၚ်လဝ် ညးဒေသတအ် နဒဒှ်ဒေၚ်ဒုၚ်ဒၞာမၞိဟ်တုဲ ဒးဆုတ်ကလေၚ်ကဵုလဝ်ရဂှ် ညးတာလျိုၚ် PDF ဂြိုပ်ဗၟံက်ထဝါဲမွဲတၠ ဟီုသ္ဂးလဝ်ရ။
ညးဒေသ ဒပ်ကံၚ်ဇြဳပၞာန်ရပ်ကေတ်ဏာလဝ်ဂှ် ဒှ်ညးဒေသကောန်ဂကူကရေၚ်တုဲ မၞိဟ်တြုံ မၞိဟ်ဗြဴ ကေုာံကောန်ၚာ်ဂမၠိုၚ်ပါလုပ်ဒၟံၚ်တုဲ စဵုကဵုလၟုဟ်ဏံ ဟွံကလေၚ်ဗၠးတိတ်ကၠုၚ်ဏီရဂှ် ဂွံတီကေတ်လဝ်ရ။
ကရောၚ်ပၞာန်ကံၚ်ဇြဳ ရပ်ကေတ်ဏာလဝ်ညးဒေသတအ် နဒဒှ်ဒေၚ်ဒုၚ်ဒၞာမၞိဟ်ဂှ် ဂိတုဨဗြဴ စၟတ်တ္ၚဲ (၁၉) တုဲကၠုၚ် အခိၚ်နူဂယးဂှ် ရပ်စၟဳစၟတ်လဝ် ကောန်ညးဒေသပကာရဳ ပွိုၚ်ဍုၚ်ထဝါဲ (၁၀)တၠတုဲ အခိၚ်ဒေါဝ်တ္ၚဲဂှ် ကလေၚ်ဗလးကဵုလဝ်ရ။
ပ္ဍဲပွိုၚ်ဍုၚ်ထဝါဲ ကြဴနူဒပ်ပၞာန်သီအဝဵုတုဲ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးဂမၠိုၚ် ပေါဲဗတိုက်က္တဵုဒှ် ဒၟံၚ်ခြာဟွံလအ်ဟွံလအ်ကီု ပေါဲဗတိုက်က္တဵုဒှ်တုဲ ဒပ်ကံၚ်ဇြဳပၞာန် ပ္ဍဲပေါဲဗတိုက်ဂှ် လုပ်ကၠုၚ်ကွာန်တုဲ ပန်ဖျေံလွဟ်ဇၞော်ကီု၊ ရပ်ကေတ်ညးဒေသတအ် နဒဒှ်ပဝ်တာကီု သီုကဵုဒဒှ် ဒေၚ်ဒုၚ်ဒၞာမၞိဟ် ဆက်ကလိလောန်ကၠုၚ်ဒၟံၚ်ရ။
ပရိုၚ်-သြၚ်လောန်တိုၚ်(မ်)