ဒိုဝ်ဟာ၊ ဨပရဴ (၂၂)
ပ္ဍဲကဵုကောံဓရီုကုလသမဂ္ဂ မကၠောန်ဗဒှ် ပ္ဍဲဍုၚ်အာဖဂါန်နေဿတာန် ပ္ဍဲဂိတုမေကၠုၚ်စိုပ်ဏံဂှ် ဒဒှ်ရစွံအာအရီု လ္
တူပရေၚ်သ္ပစၟတ်သမ္တီ နဒဒှ်အလဵုအသဳတာလဳဗာန် ဟွံသေၚ်ပုဟ်ဂှ် ညးမၞုံအခေါၚ်ဟီုဂး ကုလ ဟီုဂးလဝ်ရ။
ဂအုပ်ညးအုပ်ကာနာနာ ကုလသမဂ္ဂ အာန်တိုဝ်နဳယိုဝ် ဂူတာရက်သ်ဝွံ ပ္ဍဲဂိတုမေ စၟတ်တ္ၚဲ (၁) ကေုာံ စၟတ်တ္ၚဲ (၂) ကၠုၚ်စိုပ်ဏံ ဍုၚ်နာနာ သွက်ဂွံကၠောန်ဗဒှ် ကောံဓရီုကၟာတ်တြၚ် ပ္ဍဲကဵုဒိုဝ်ဟာ နကဵုကလုတ်တမာန်တၟေၚ် စပ်ကဵုဍုၚ်အာဖဂါန်နေဿတာန်ဂှ် စဳဇန်လဝ်ရ။
“ကောံဓရီုဒိုဝ်ဟာ မကၠောန်ဗဒှ်အာ ပ္ဍဲဂိတုမေ (၁) ကေုာံ (၂) ဂှ်ဝွံ စွံအာအရီု လ္တူပရေၚ်သ္ပစၟတ်သမ္တီတံဟွံသေၚ်မွဲသာ် စပ်ကဵုအရာဏံတုဲ ဟွံမိက်ကဵုက္တဵုဒှ် ပရေၚ်ယှုက်ထုဲရ” သာ်ဝွံ အထံက်ညးမၞုံအခေါၚ်ဟီုဂး ကုလသမဂ္ဂ ဟီုဂးလဝ်ကဵု ဖာဟာန်ဟက်ရ။
“တၚ်မ္ဒးသဳကၠဳဂှ် ပြဟ်ဟ်ဏံ သွက်ဂွံဒက်ပ္တန် လစွံစိုတ်ဆန္ဒ ကောံကလောံညဳသၟဟ် လ္တူတၚ်ကော်ဆဴဂမၠိုၚ်ရဏောၚ်” သာ်ဝွံ ညးဟီုဂးလဝ်ရ။
ဗွဲကြဴပေါဲပၞာန် လလအ်ပွိုၚ် (၂၀) သၞာံတုဲ တာလဳဗာန်ဂမၠိုၚ်ဝွံ ဟိုတ်နူဒပ် သၟဝ်ပၠတရဴအမေရိကာန်တံ ဆုတ်စ္ဍးတိတ်အာဂှ်ရ ပ္ဍဲသၞာံ ၂၀၂၁ ဂိတုအဝ်ဂါတ်ဂှ် သီကေတ်လဝ်အဝဵုရ။
ပ္ဍဲဂိတုဒဳဇြေမ်ဗာဂှ် သွက်ဂွံဆုဲပြံၚ် ကောံဓရီုနာနာ ကုလသမဂ္ဂ ဍုၚ်မလုပ်လၟိဟ် ၁၉၃ ဍုၚ်ပါဂှ် သ္ပဒတန်လဝ်တုဲ နဒဒှ်အလန်ဒုတိယ ကဵုအခေါၚ် ကုအလဵုအသဳတာလဳဗာန်အာဖဂါန်တံ ဗလးကလုတ်တမာန်ကုလသမဂ္ဂ ပ္ဍဲဍုၚ်နျူယျံက်တုဲ စၟဳစလဝ် တၚ်သ္ဂုတ်သွာတ် မၞုံကဵုပွမသ္ပစၟတ်သမ္တီတံ မဒှ်ရ။
တာလဳဗာန်ဂှ် ပ္ဍဲသၞာံဏံအခိၚ်ပြဟ်ဟ်တေံ ကြဴနူဗဒေါအ်ကၠေံ မၞိဟ်ဗြဴဗွဲမဂၠိုၚ် နူကဵုပွမကၠောန်ကလောန် သွက်ဂကောံကဵုအရီုဗၚ် စပ်ကဵုပရေၚ်ဗ္စာရဏာမၞိဟ် ပ္ဍဲဂိတုဒဳဇြေမ်ဗာတေံတုဲဂှ် ကၟာတ်ဒၞါလဝ် ညးဗြဴအာဖဂါန်တံ အခေါၚ်ကၠောန်ကလောန် ပ္ဍဲကဵုကုလသမဂ္ဂရ။
နူကဵုပလှ်ဖျေံ အလဵုအသဳ မသ္ပလဝ်အထံက်အရီု ကုဍုၚ်ပလိုတ်တံတုဲဂှ် ကၟာတ်ဒၞါလဝ် ညးဗြဴဂမၠိုၚ် နူကဵုအခေါၚ်တိုန်တက္ကသိုလ်တံကီု၊ ကၟာတ်လဝ် ဘာတန်သၠုၚ်သၟတ်ဗြဴဗွဲမဂၠိုၚ်ကီု သီုကဵုပတေၚ်ဓရတ်လဝ် ညးဗြဴဂမၠိုၚ် နူကဵုအခေါၚ်လုပ်စိုပ် ပ္ဍဲဘဝမှာဇန်ညးဂမၠိုၚ်ဂှ်ရ။
ဗွဲမကိတ်ညဳကဵု ပွံက်အဓိပ္ပာယ် သၞောဝ်အေဿလာမ် မတေၚ်ဂြတ်တံဂှ် ရှ်ေသှ်ေတဴ အခေါၚ်အရာညးဗြဴတံရောၚ် သာ်ဝွံ တာလဳဗာန်တံ ဟီုဂးလဝ်ရ။
Ref: CNA