ဗြဝတဳ၊ ဨဗြဴ (၂၃)
ပေါဲဗတိုက် ပ္ဍဲဒေသမေဝ်ကနေဝ် ပွိုၚ်ဍုၚ်ဗြဝတဳ တိဍာ်ဒပ်မဟာ(၆) ဗော်သွးကောန်ဂကူကရေၚ် KNU ဂှ် သာသ္ကာတ်မြဟ်ကၠုၚ်တုဲ လ္ပာ်ကံၚ်ဇြဳပၞာန် ထပ်ကၠောန်ကၠုၚ်ပရေၚ်ဗတိုက်ပန်ပှ်ောကဵုက္ၜၚ်ရဂှ် ဂွံတီကေတ် နူဇရေၚ်ဂကောံဇြဟတ်ပၠန်ဂတးတအ်ရ။
သ္ပတမ်နူ ဂိတုဨဗြဴ ပထမသတ္တာဟတုဲကၠုၚ်တေံ ပေါဲဗတိုက်စက္တဵုဒှ်ကၠုၚ်တုဲ ဒပ်ကံၚ်ဇြဳပၞာန် ဒးဂိလဝ် ပ္ဍဲပေါဲဗတိုက်ဒေသမေဝ်ကနေဝ်ဂှ် ဂိတုဨဗြဴ စၟတ်တ္ၚဲ (၂၂) အခိၚ်ၜိုတ် (၁)နာဍဳဂှ်လေဝ် ကၠုၚ်စိုပ်ဗတိုက်လဝ်ကဵုက္ၜၚ်ကျာရဂှ် ဂကောံဇြဟတ်ပၠန်ဂတးဂမၠိုၚ် ဟီုသ္ဂးလဝ်ရ။
ပ္ဍဲဒေသမေဝ်ကနေဝ် တိဍာ်ဒပ်မဟာ(၆) KNU ဂှ် ဒပ်ကံၚ်ဇြဳပၞာန် ကၠုၚ်ပန်ပှ်ောလဝ် နူကဵုဗလးကျာနကဵုက္ၜၚ်ကျာအဆက်ဆက်ကီု ထ္ပက်လုပ်ကၠုၚ်ပၞာန် နကဵုဇြဟတ်ပေၚ်ၚ်တုဲ နကဵုလွဟ်ဇၞော်တအ်လေဝ် ပန်ပှော်ဒၟံၚ်အဆက်ဆက်ရဂှ် ညးတာလျိုၚ်လလောၚ်ပရိုၚ် ကရောၚ်ပၞာန် Venom PDF ကရောၚ်ပၞာန်ကဝ်ဗရာ (၂) ဟီုသ္ဂးလဝ်ရ။
ဂိတုဨဗြဴ စၟတ်တ္ၚဲ (၂၂)တုဲကၠုၚ် အခိၚ်နူဂယးပြဟ်ဂှ် ဟိုတ်နူဒပ်ကံၚ်ဇြဳပၞာန် ဗတိုက်ကၠုၚ်ကဵုက္ၜၚ်ကျာတုဲ လ္ပာ်ဂကောံပၠန်ဂတး ဒပ်ပံၚ်ကောံတအ် ဇီုကပိုက်ဒးလဝ်မမိက်ကဵုမွဲမွဲ ဟၟဲရဂှ် ကရောၚ်ပၞာန်ကျာတေတ်နေတ် လလောၚ်တြးလဝ်ပရိုၚ်ရ။
ပ္ဍဲတၚ်လလောၚ်တြး ကရောၚ်ပၞာန်ကျာတေတ်နေတ်ဂှ် ဂိတုဨဗြဴ စၟတ်တ္ၚဲ(၂၁) အခိၚ်ဒေါဝ်တ္ၚဲဂှ်လေဝ် ဒပ်ကံၚ်ဇြဳပၞာန် ဗတိုက်လဝ်ကဵုက္ၜၚ်ကျာကီု ဒပ်ကံၚ်ဇြဳပၞာန်ကဵု ဒပ်မၚ်ပယျဵုတအ်ဂှ် ပန်ဖျေံဒၟံၚ်ကဵုလွဟ်ဇၞော် ကမ်လှောဝ်တောဲဖိုဟ်ဏီတုဲ ပ္ဍဲပရေၚ်ပန်ပှော်ဏံ သ္ဂံၚ်လ္ပာ်ကျာတေတ်တနေတ် (၁)တၠ ဇီုကပိုက် ဒးလဝ်ဝပ် နွံကၠုၚ်လဝ်ရ။
သ္အာၚ်နူဂှ်ပၠန် အခိၚ်ပသောၚ်သ္အးတိဍာ်ဂှ် သီဂွံလဝ် လွဟ်လက်နက်မကမ် ကေုာံကပေါတ်ပၞာန် လ္ပာ်ကံၚ်ဇြဳပၞာန်သှ်ေၜက်ဒၟံၚ်ရဂှ် ကရောၚ်ပၞာန်ကျာတေတ်နေတ် လလောၚ်တြး ဟီုသ္ဂးလဝ်ရ။
ဟိုတ်နူပရေၚ်ပၞာန်ၜါလ္ပာ် သ္ကာတ်မြဟ်တိုန်ကၠုၚ်ဒၟံၚ်တုဲ ညးဍုၚ်ကွာန် မၞုံပ္ဍဲဒေသမေဝ်ကနေဝ်လၟိဟ်မၞိဟ် ဂၠိုၚ်ကဵုလ္ၚီတအ်ဂှ် ဒးဂြိပ်ဒဴပါဲဓလေတ်ဒၟံၚ် ပ္ဍဲဌာန်ဗၠးဘဲတုဲ နွံဒၟံၚ်ပၟိက်ကဵုအရီုဗၚ်ရဂှ် ဂကောံပရေၚ်မၞိဟ်ကောန်ဂကူကရေၚ်တအ် ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – Cobra Column