နေပျဳဒဝ်၊ ဨဗြဴ(၂၃)
ပရိုၚ်ကဵုဂလိုၚ်ပ္တိုန် သြန်ဂိတုသ္ဇိုၚ်ဝန် သၟဝ်တဲကံၚ်ဇြဳပၞာန်တအ်ရောၚ်ဟီုဂှ် ဒှ်ကောလာဟလဟေၚ်ရဂှ် ဓမံက်ထ္ၜးလဝ် ပ္ဍဲလိက်ပရိုၚ်တြးဝါဒကံၚ်ဇြဳပၞာန် ပ္ဍဲဂိတုဨဗြဴ စၟတ်တ္ၚဲ (၂၂) ဏံရ။
သၠုၚ်ပ္တိုန်ကဵုသြန်ဂိတုသ္ဇိုၚ်ဝန်ကၟိန်ဍုၚ်ရောၚ်ဂးတုဲ ဟိုတ်နူကောလာဟလ ပြးတိတ်ဒၟံၚ် ပ္ဍဲမုက်လိက်ဇာနှိက်ပရေၚ်မၞိဟ်တုဲ ဒးလလောၚ်တြးပ္တိတ်လဝ် သာ်ဏံရဂှ် ဟီုသ္ဂးလဝ်ရ။
အတိုၚ်ဂလာန်သ္ကိုပ်စၞောန်ပ္ညုၚ် ဌာနဝန်ဇၞော်ကိုန်စဳမာန် ကေုာံဘဏ္ဍာကံၚ်ဇြဳပၞာန် ဥူဝေန်ထိုက်ဟီုသ္ဂးလဝ်မ္ဂး အတိုၚ်အကာဲအရာဘဏ္ဍာကၟိန်ဍုၚ်မ္ဂး သွက်ဂွံဂလိုၚ်ပ္တိုန်ကဵုသြန်ဂိတု သွက်သ္ဇိုၚ်ဝန်တအ်ဟၟဲဏီရဂှ် ဟီုသွဟ်လဝ်ရ။
သ္ဇိုၚ်ဝန်သၟဝ်တဲကံၚ်ဇြဳပၞာန်တအ်ဂှ်မ္ဂး ဃောဆဵုဂဗကဵုက္ဍိုပ်သ္ကိုပ်ပၞာန် ပ္ဍဲသၞာံတုဲကၠုၚ်ဏံဂှ် သၠုၚ်ဂလိုၚ်ပ္တိုန်ကဵု ဗ္ၜတ်သြန်ဂိတုသ္ဇိုၚ်ဝန်ကၟိန်ဍုၚ် ဗွဲမကိတ်ညဳကဵုခေတ်ကာလအခိၚ်လၟုဟ်ရောၚ် ကေၚ်ဟီုသ္ဂးလဝ်နွံရဂှ် ဟီုသ္ဂးလဝ်ရ။
သ္အာၚ်နူဂှ်ပၠန် ကၠာတေံလေဝ် သွက်သ္ဇိုၚ်ဝန် CDM တအ် ဂွံကလေၚ်လုပ်ကၠုၚ်ပၠန်ဂှ် စွံကဵု ပ္ဍဲဒၞာဲတာလျိုၚ်မူလတၞံပၠန်ရောၚ်ကီု ဗ္ၜတ်သြန်ဂိတုလေဝ် ကဵုဂလိုၚ်ပ္တိုန်ရောၚ်ကီုဂးတုဲ ပရေၚ်တြးဝါဒ အကြာတွဳဗွိုၚ်သ္ဇိုၚ်ဝန်ဂမၠိုၚ် ကေၚ်နွံကၠုၚ်ဒၟံၚ်ရဂှ်လေဝ် ဂွံတီကေတ်ရ။
ညးလ္ၚတ်သ္ၚဳဂၠိပ်ပရေၚ်ပိုန်ဒြပ်မွဲတၠဂှ်မ္ဂး လလောၚ်တြးကၠုၚ်လဝ် အတိုၚ်အကာဲအရာဘဏ္ဍာကၟိန်ဍုၚ်မ္ဂး သွက်ဂွံသၠုၚ်ပ္တိန်ကဵုသြန်ဂိတု ဟၟဲဏီဟီုဂှ် ဒဒှ်ရထ္ၜးပျးဒၟံၚ် သြန်ဘဏ္ဍာ ပ္ဍဲလက်ထက်ကံၚ်ဇြဳပၞာန် အောန်ယအ်စှ်ေဒၟံၚ် ပြာကတ်ရဂှ် သ္ၚဳဂၠိပ်လဝ်ရ။
သြန်ဂိတုသ္ဇိုၚ်ဝန်ကၟိန်ဍုၚ်တအ်ဂှ်မ္ဂး ညးယိုက်ဝန် သ္ဇိုၚ်ဝန်ကဆံၚ်ဍောတ်တအ်ဂှ် နူကဵု ၁၅၀၀၀၀ ကဆံၚ်လျိုၚ်ဝန်၊ သ္ကိုပ်စၞောန်ပ္ညုၚ်တအ်ဂှ် စဵုကဵု ၅၅၀၀၀၀ စၟတ်သမ္တီလဝ်ရ။
ပရိုၚ်သြၚ်လောန်တိုၚ်(မ်)
ဗီုရုပ် – Thi Ha Lwin